1 Kiŋ 6 - Krio Fɔs Oli Baybul

Sɔlɔmɔn Bil PAPA GƆD In Os

¹ Sɔlɔmɔn bigin bil di os fɔ PAPA GƆD fo ia afta we i bi kiŋ. I bigin di wok insay Ziv mɔnt, dat na di sɛkɛn mɔnt na di ia. Ɔl dis yaso bi fo ɔndrɛd ɛn twɛnti-et ia frɔm di tɛm we di Izrɛlayt dɛn lɛf Ijipt.

² Di os fɔ PAPA GƆD lɔŋ naynti fut; i wayd tati fut, dɔn in ayt na fɔti-fayv fut.

³ Di frɔnt viranda lɔŋ fiftin fut ɛn wayd tati fut; i wayd lɛkɛ aw di os fɔ PAPA GƆD insɛf tan.

⁴ Di winda dɛn gɛt ol dɛn we de na di wɔl. Di ol in mɔt na do smɔl dɔn di wan insay big.

⁵ Di wɔl dɛn na di tu sayd ɛn biɛn gɛt apatmɛnt dɛn;

⁶ na tri stori dɛn bil na di apatmɛnt. Wan stori in ayt pan di apatmɛnt na sɛvin ɛn af fut. Wan rum in mɛzhɔmɛnt na di fɔs flɔ na sɛvin ɛn af fut wayd, di sɛkɛn flɔ in nayn fut wayd dɔn di tɔd flɔ na tɛn ɛn af fut wayd. Di wɔl dɛn na di fɔs flɔ tik pas di wan dɛn we de pantap am dɔn di wan dɛn na di sɛkɛn flɔ tik pas di wan dɛn na di tɔd flɔ; dɛn du dis fɔ lɛ dɛn nɔ go gɛt fɔ bɔs ol fɔ put tik dɛn insay fɔ sɔpɔt di wɔl dɛn.

⁷ Bikɔs na kwari dɛn bin dɔn kɔt kɔt ɔl di ston dɛn fɔ bil di tɛmpul, dɛn nɔ bin gɛt wan kɔz fɔ yuz ama, chisul ɔ ɛni ayɛn tul wɛn dɛn de bil di os fɔ PAPA GƆD. Nɔn nɔys nɔ bin de de.

⁸ Di stɛp fɔ go insay di apatmɛnt na di os fɔ PAPA GƆD bin de na di lɛfan say ɛn na de ɔlman de pas te go na di sɛkɛn ɛn tɔd flɔ.

⁹ Na so Kiŋ Sɔlɔmɔn tek bil di os fɔ PAPA GƆD dɔn. Na tik tik sida bod dɛn put ɛn krɔs krɔs di ɔda layt sida bod pan dɛn fɔ mek di silin.

¹⁰ As fɔ di tri stori apatmɛnt, ich flɔ in ayt na sɛvin ɛn af fut. I yuz tik tik sida bod dɛn fɔ jɔyn di apatmɛnt in wɔl to di os fɔ PAPA GƆD in yon wɔl.

¹¹ PAPA GƆD tɔk to Sɔlɔmɔn. I se,

¹² “Lɛkɛ we yu de bil dis os so, if nɔmɔ yu obe mi ɛn du ɔl wetin a tɛl yu, a go gi yu ɔl wetin a prɔmis yu papa Devid.

¹³ A go tap wit di Izrɛlayt dɛn; dɛn na mi pipul dɛn ɛn a nɔ go lɛf dɛn.”

¹⁴ So Sɔlɔmɔn bil PAPA GƆD in os dɔn.

Di Fɔnichɔ Dɛn We Bin De Insay Di PAPA GƆD In Os

¹⁵ Sɔlɔmɔn kɔba di insay wɔl dɛn wit sida bod frɔm di grɔn te go ɔp di silin, dɔn i yuz payn bod fɔ mek di flɔ.

¹⁶ I kɔt wan rum insay de we i se na de fɔ oli pas ɔl. Di rum in mɛzhɔmɛnt na tati fut. Na sida bod i yuz fɔ patishɔn am frɔm di grɔn te go ɔp di silin.

¹⁷ Di opin spes we de bifo di rum we fɔ oli pas ɔl lɔŋ siksti fut.

¹⁸ Dɛn kav kalbas ɛn flawa dɛn pan di sida bod dɛn na di wɔl; dɛn kɔba ɔl di wɔl dɛn insay wit sida bod fɔ lɛ nɔn ston nɔ sho.

¹⁹ I rɛdi di rum we nainsay de i se dɛn fɔ de kip PAPA GƆD in Kɔvinant Bɔks.

²⁰ Dis rum lɔŋ tati fut wayd tati fut ɛn ay tati fut i kɔba ɔlsay wit piɔ gold. Na sida bɔd i yuz fɔ mek di ɔlta ɛn kɔba insɛf wit piɔ gold.

²¹ I yuz gold fɔ kɔba insay PAPA GƆD in os; dɔn i blɔk di rum we oli pas ɔl in domɔt wit tik tik gold chen.

²² I kɔba insay di wanol ples wit gold, ɛn di ɔlta insɛf na di say we oli pas ɔl.

²³ I yuz ɔliv bɔd kav tu chɛryubim. Dɛn bin de na di ples we oli pas ɔl. Wan in ayt na fiftin fut.

²⁴ Wan chɛryubim in fɛda sɛvin ɛn af fut ɛn na tu, tu fɛda dɛn ɔl gɛt. Di spes bitwin dɛn ɔltu na fiftin fut.

²⁵ Di sɛkɛn chɛryubim na di sem wit di fɔs wan.

²⁶ Wan chɛryubim in ayt na fiftin fut.

²⁷ I put di chɛryubim dɛn insay di rum we oli pas ɔl, dɛn ɔltu de sayd bay sayd, dɔn dɛn fɛda dɛn opin te tɔch di wɔl ɛn tɔch dɛnsɛf.

²⁸ I kɔba di chɛryubim dɛnsɛf wit gold.

²⁹ I kav chɛryubim dɛn, pam tri dɛn ɛn opin flawa dɛn insay na di wɔl dɛn insay ɔl di rum dɛn.

³⁰ I kɔba ɔl di rum dɛn grɔn wit gold.

³¹ Na di domɔt fɔ go insay di rum we oli pas ɔl, tu af do de we na ɔliv bod i yuz fɔ mek dɛn dɔn i gi di domɔt fayv sayd we gɛt tɔnoba v pantap.

³² I kav chɛryubim dɛn, pam tri dɛn ɛn opin flawa dɛn pan di tu af do, dɔn i kɔba di chɛryubim dɛn ɛn di pam tri dɛn wit gold.

³³ I gi di frem fɔ di men domɔt fɔ go insay di men ɔl fo kɔna. I mek am wit ɔliv bod.

³⁴ I mek tu af do wit payn bod we de fol na ɔltu di sayd dɛn.

³⁵ I kav chɛryubim dɛn, pam tri dɛn ɛn opin flawa pan dɛn do ya ɛn kɔba ɔl wit gold.

³⁶ I bil ay wɔl rawnd di kɔmpawnd. Fɔ ɛni tri ston blɔk we i put, i de put wan big sida bod midul dɛn.

³⁷ Sɔlɔmɔn le di fawandeshɔn fɔ PAPA GƆD in os insay Ziv mɔnt, fo ia afta we i dɔn bi kiŋ.

³⁸ I bil am dɔn insay Bul mɔnt, di ia we mek am ilɛvin ia we i bi kiŋ. I put ɔl wetin i bin mekɔp fɔ put de, ɛn na sɛvin ia i tek fɔ bil am.