1 Kiŋ 5 - Krio Fɔs Oli Baybul

Sɔlɔmɔn Rɛdi Di Bildin Matirial Fɔ Bil PAPA GƆD In Os

¹ Kiŋ Ayrɛm na Taya na bin Devid in gud, gud padi. Wɛn i yɛri se dɛn dɔn anɔynt Sɔlɔmɔn fɔ tek in papa Devid in ples as kiŋ, i sɛn in ambasedɔ dɛn to am.

² Na dis riplay Sɔlɔmɔn insɛf bin sɛn to Ayrɛm:

³ “Yu no se mi papa Devid nɔ bin ebul fɔ bil os fɔ de wɔship in PAPA GƆD we na PAPA GƆD bikɔs in bin de fɛt bɔku wa wit in neba kɔntri dɛn, bɔt PAPA GƆD mek i kɔnka dɛn.

⁴ Naw, PAPA GƆD we na mi PAPA GƆD, dɔn gi mi pis ɔlɔbɔt, a nɔ gɛt nɔn ɛnimi ɛn nɔ prɔblɛm nɔ de igen

⁵ PAPA GƆD bin dɔn tɛl mi papa Devid se nain pikin we i go mek rul afta am go bil os fɔ am. A dɔn mekɔp mi maynd naw fɔ bil di os fɔ de wɔship mi PAPA GƆD, we na PAPA GƆD.

⁶ Yu no se mi wokman dɛn nɔ sabi kɔt timba lɛk yu yon wokman dɛn so duya, sɛn sɔm pan yu wokman dɛn fɔ go kɔt timba fɔ mi na Libanɔn. Misɛf yon wokman dɛn go jɔyn dɛn ɛn a go pe ɛni amawnt fɔ di wok we yu go aks fɔ.”

⁷ Wɛn Ayrɛm yɛri Sɔlɔmɔn in mɛsej, i gladi bad ɛn prez PAPA GƆD se nain dɔn gi Devid pikin we gɛt sɛns fɔ rul da big big kɔntri de.

⁸ Ayrɛm insɛf ansa Sɔlɔmɔn se i dɔn gɛt in mɛsej ɛn i go gi am wetin i aks fɔ. I se i go sɛn di sida ɛn di payn timba.

⁹ I se in wokman dɛn go go kɔt dɛn na Libanɔn, dɔn dɛn go kɛr dɛn go na di si usay dɛn go tay tay dɛn fɔ lɛ dɛn go flot pantap di si ɛn krɔs dɛn go oba to am. I se wɛn dɛn rich oba usay i want dɛn, dɛn go lus am ɛn an dɛn ova to in yon man dɛn. I se wetin in want fɔ di pe na it fɔ ɔl udat de nain os.

¹⁰ Ayrɛm sɔplay Sɔlɔmɔn ɔl di sida ɛn payn timba we i want;

¹¹ Sɔlɔmɔn insɛf gi am wan ɔndrɛd tawzin bushɛl wit ɛn wan ɔndrɛd ɛn tɛn tawzin galɔn piɔ ɔliv ɔyl. Sɔlɔmɔn bin de gi Ayrɛm dis kota ɛvri ia.

¹² PAPA GƆD gi Sɔlɔmɔn sɛns jɛs lɛkɛ aw i bin dɔn tɔk nɔmɔ. Di padi biznɛs bitwin Sɔlɔmɔn ɛn Ayrɛm bin fayn ɛn dɛn tu bin gɛt wanwɔd.

¹³ Kiŋ Sɔlɔmɔn gɛda tati tawzin man na di wanol Izrɛl fɔ wok bay fos pan di os we i de bil fɔ PAPA GƆD,

¹⁴ dɔn i put Adoniram inchaj ɔf dɛn ɔl. I mek di wokman dɛn sheb to tri grup, tɛn tawzin na wan grup. Wan grup de go wan mɔnt na Libanɔn ɛn kam bak kam tek tu mɔnt na os.

¹⁵ Sɔlɔmɔn gɛt eti tawzin man we de kɔt ston ɔp il, dɔn i gɛt sɛvinti tawzin we de tot ston.

¹⁶ I put tri tawzin, tri ɔndrɛd fɔman dɛn fɔ de supavays di wok.

¹⁷ Di kiŋ gi ɔda fɔ lɛ dɛn kɔt fayn big ston dɛn fɔ di os we i de bil fɔ PAPA GƆD, in fawndeshɔn.

¹⁸ Sɔlɔmɔn ɛn Ayrɛm dɛn wokman dɛn, ɛn di man dɛn we kɔmɔt Gebal kɔt ston ɛn timba fɔ bil di os fɔ PAPA GƆD.