1 Kiŋ 4 - Krio Fɔs Oli Baybul

Sɔlɔmɔn In Ɔfisa Ɛn In Gɔvna Dɛn

¹ Kiŋ Sɔlɔmɔn na bin kiŋ fɔ di wanol Izrɛl.

² Na dɛn man yaso na bin di bigman dɛn nain gɔvmɛnt: Di man we de mek sakrifays fɔ pipul sin na Azaraya we na Zedɔk in bɔypikin;

³ di sɛktri dɛn na Ɛliorɛf ɛn Aija, dɛn na Shisha in bɔypikin dɛn; di klak na Jɛoshafat we na Ailud in bɔypikin.

⁴ Di chif kɔmanda fɔ di ami na Bɛnaya, we na Jɛoyada in bɔypikin. Di man dɛn we de mek sakrifays fɔ pipul sin na Zedɔk ɛn Abiata.

⁵ Di bɔsman fɔ di distrikt ɔfisa dɛn na Azaraya we na Nethan in bɔypikin; Zabud we na Nethan in ɔda bɔypikin na bin man we de mek sakrifays fɔ pipul sin ɛn di kiŋ in advaysa.

⁶ Di man we de inchaj ɔf di wokman dɛn na di kiŋ in kiŋ os na Aisha; di man inchaj ɔf dɛn man we de wok bay fos na Adoniram we na Abda in bɔypikin.

⁷ Sɔlɔmɔn pik twɛlv man dɛn as distrikt ɔfisa dɛn na Izrɛl, ɛn na dɛn bin rɛspɔnsibul fɔ sɔplay ɔl wetin di kiŋ ɛn in kiŋ os want. Dɛn bin de tek am bay tɔn fɔ de sɔplay bay mɔnt te di ia dɔn.

⁸ Na di man dɛn dɛn wan ya: Bɛnɔ in rɛspɔnsibul fɔ Ifrem we de ɔp di il;

⁹ Bɛndɛka in rɛspɔnsibul fɔ Makaz Shaalbim, Bɛtshɛmɛsh ɛn Ɛlɔn Bɛthanan;

¹⁰ Bɛnɛsɛd in rɛspɔnsibul fɔ Arubɔth. Sɔkɔ ɛn Ɛfɛr bin de insay Arubɔth.

¹¹ Bɛnabinadab in rɛspɔnsibul fɔ Nafɔth Dɔ; nain bin mared Sɔlɔmɔn in gyal pikin we nem Tafath.

¹² Baana, Ailud in bɔypikin in bin rɛspɔnsibul fɔ Taanak, Mɛgido te rich na Bɛth Shan nia Zarɛthan te go dɔŋ to Jɛzril. In bawndri de frɔm Bɛth Shan to Ebɛl Mɛola te go oba to Jokmeam.

¹³ Bɛn Gɛbɛr in rɛspɔnsibul fɔ Ramɔt Giliad ɛn ɔl dɛn vilej we Manasɛ in bɔypikin Jair gɛt na Giliad. Nain gɛt Agɔb Distrikt na Beshan wit ɔl di siksti siti dɛn we gɛt ayɛn get.

¹⁴ Ainadab, Ido in bɔypikin rɛspɔnsibul fɔ Maanaim.

¹⁵ Aimaaz rɛspɔnsibul fɔ Naftali, ɛn nain bin mared Sɔlɔmɔn in ɔda gyal pikin we nem Basimath.

¹⁶ Baana we na, Ushay in bɔypikin rɛspɔnsibul fɔ Asha ɛn Bialɔth.

¹⁷ Jɛoshafat we na, Parva in bɔypikin rɛspɔnsibul fɔ Isaka.

¹⁸ Shimɛay we na, Ila in bɔypikin rɛspɔnsibul fɔ Bɛnjamin.

¹⁹ Gɛbɛr we na, Yuri in bɔypikin rɛspɔnsibul fɔ Giliad; nain gɛt di Amɔrayt dɛn kɔntri usay Siɔn bin de rul as kiŋ ɛn Beshan usay Ɔg insɛf na bin kiŋ. Nain nɔmɔ na bin di onli gɔvna we de inchaj ɔf wanol distrikt.

Di Tin Dɛn We Sɔlɔmɔn Ɛnjɔy We I De Rul

²⁰ Di pipul dɛn na Juda ɛn Izrɛl bin bɔku lɛkɛ sansan na bich; dɛn bin gɛt ɔltin fɔ it ɛn drink ɛn ɔlman bin gladi.

²¹ Sɔlɔmɔn rul ɔl di kindɔm dɛn frɔm Riva Yufretis, to Filistia te rich na di bɔda fɔ go Ijipt. Ɔl dɛn kɔntri ya bin de ɔnda Sɔlɔmɔn ɛn bin de pe taks to am ɔl di tɛm we i bin de rul.

²² Di sɔplay we Sɔlɔmɔn bin de gɛt ɛvride na wan ɔndrɛd ɛn fifti bushɛl fayn flawa;

²³ tɛn kaw we de it spɛshal it, twɛnti kaw we de it gras, wan ɔndrɛd ship, wit dia, antilop, fritambo ɛn fɔl.

²⁴ Sɔlɔmɔn bin de rul ɔl di kindɔm frɔm di wɛst pat na Riva Yufretis to Tifsa to Gaza, ɛn pis bin de na di wanol kindɔm.

²⁵ Di tɛm we Sɔlɔmɔn bin de rul Juda ɛn Izrɛl frɔm ɔp na Dan te go dɔŋ na Biashiba bin gɛt pis, ɔlman bin de ɛnjɔy fɔ sidɔm ɔnda in vayn ɛn fig tik dɛn.

²⁶ Sɔlɔmɔn bin gɛt fɔti tawzin ples fɔ kip in ɔs dɛn we gɛt karej ɛn twɛlv tawzin ɔs dɛn fɔ fɛt wa.

²⁷ Di twɛlv gɔvna dɛn we i gɛt na di twɛlv distrikt bin de tek am bay tɔn fɔ de sɔplay in ɛn in trenja dɛn provishɔn fɔ wan wan mɔnt. Dɛn nɔ wande fel pan dɛn dyuti.

²⁸ Dɛn bin de sɔplay bali ɛn strɔ fɔ di ɔs dɛn we de drɔ karej ɛn di ɔda ɔs dɛn.

²⁹ PAPA GƆD gi Sɔlɔmɔn sɛns we nɔbɔdi nɔ wande gɛt. I mek i no ɛn sabi bɔku tin we pas sansan sɛf na bich.

³⁰ Sɔlɔmɔn bin gɛt sɛns pas di sɛnsman dɛn na di Ist ɛn di sɛnsman dɛn na Ijipt.

³¹ I bin gɛt sɛns pas ɔlman na wɔl; i gɛt sɛns pas Ithan di Ɛzrayt, pas Ɛman, Kalkɔl, ɛn Dada we dɛn na Maɔl in bɔypikin dɛn. Dɛn bin de tɔk bɔt am na ɔl dɛn ɔda kɔntri dɛn.

³² Sɔlɔmɔn pul tri tawzin parebul ɛn rayt pas wan tawzin ɛn fayv siŋ dɛn.

³³ I tɔk bɔt dɛn plant dɛn layf, bɔt dɛn sida tik dɛn na Libanɔn, ɛn dɛn isɔp plant we de gro na dɛn wɔl. I tɔk bɔt dɛn animal we de waka wit dɛn bɛlɛ na grɔn, di ɔda animal dɛn, dɛn bɔd ɛn dɛn fish.

³⁴ Kiŋ dɛn na difrɛn pat na di wɔl yɛri bɔt Sɔlɔmɔn in sɛns ɛn dɛn sɛn pipul dɛn fɔ go lisin to am we i de tɔk.