Biblia Todo Logo
Bìoball air-loidhne

- Sanasan -

1 Kiŋ 21 - Krio Fɔs Oli Baybul


Nebɔth In Vayn Fam

1 Wan tɛm bin de we wan Jɛzrilayt we nem Nebɔth gɛt wan vayn fam. Dis bin de na Jɛzril nia to Kiŋ Eab we na kiŋ na Sameria in os.

2 Eab tɛl Nebɔth se lɛ i gi am di vayn frut fam fɔ de plant vɛjitebul bikɔs i de neba to in yon kiŋ os, dɔn in go gi am ɔda wan we bɛtɛ pas da wande, ɔ if i nɔ want am, in kin pe am ɛnitin we i aks fɔ.

3 Bɔt Nebɔth ansa am se PAPA GƆD sɛf nɔ go gri fɔ lɛ i gi am in fɔstɛm-papa dɛn prɔpati.

4 Dat mek Eab go om swɛl wit vɛksteshɔn we Nebɔth tɛl am se mek PAPA GƆD nɔ gri sɛf fɔ mek i gi am in fɔstɛm-papa dɛn prɔpati. I lidɔm kwayɛt wan nain bed ɛn tɔn in fes to di wɔl, ɛn nɔ gri it natin.

5 In wɛf Jɛzibɛl go mit am ɛn aks am wetin mek i vɛks we mek i nɔ gri it sɛf.

6 I ansa am se in beg Nebɔth da Jɛzrilayt fɔ lɛ i sɛl in vayn fam gi am, i nɔ gri; i se pan ɔl we i se in go gi am ɔda vayn frut fam fɔ da wande, Nebɔth stil nɔ gri.

7 Jɛzibɛl aks am if in nɔto kiŋ na Izrɛl we i de biev so; i se lɛ i it ɛn lɛ i nɔ wɔri insɛf bikɔs in go mek shɔ se in gi am Nebɔth da Jɛzrilayt in vayn fam.

8 Jɛzibɛl yuz Eab in nem rayt lɛta dɛn ɛn yuz Eab in yon nem stamp, sɛn dɛn to di bigman dɛn na di siti we Nebɔth de.

9 Di lɛta se dɛn fɔ mek di wanol siti fast, dɔn lɛ dɛn put Nebɔth na ay pozishɔn lɛk fɔ se dɛn wan ɔna am.

10 Dɔn lɛ dɛn fɛn tu bad man dɛn we go lay pan Nebɔth se i tɔk bad bɔt PAPA GƆD ɛn di kiŋ, dɔn lɛ dɛn pul am kɔmɔt de ɛn ston am te i day.

11 Di bigman dɛn na di siti we Nebɔth de, du wetin Jɛzibɛl se.

12 Dɛn tɛl ɔlman fɔ fast, dɔn dɛn put Nebɔth na ay pozishɔn lɛk fɔ se dɛn wan ɔna am.

13 Di tu badman dɛnsɛf go sidɔm bifo Nebɔth ɛn lay pan am se dɛn yɛri we i de tɔk bad bɔt PAPA GƆD ɛn di kiŋ. Di pipul dɛn pul Nebɔth kɔmɔt na di siti ɛn ston am te i day.

14 Dɔn dɛn sɛn to Jɛzibɛl se dɛn dɔn ston Nebɔth ɛn i dɔn day.

15 As Jɛzibɛl yɛri se dɛn dɔn ston Nebɔth ɛn i dɔn day, i tɛl Eab se lɛ i go tek Nebɔth da Jɛzrilayt in vayn fam we i nɔ bin gri fɔ sɛl gi am. I se Nebɔth dɔn day.

16 As Eab insɛf yɛri se Nebɔth dɔn day, insɛf grap go tek in vayn frut fam.

17 Nain PAPA GƆD tɔk to Ilayja da Tishbayt se,

18 “Grap, go dɔŋ na Sameria go mit Eab we na kiŋ fɔ Izrɛl, i dɔn go naw naw na Nebɔth in vayn frut fam fɔ go tek am.

19 Tɛl am se mi PAPA GƆD se, i dɔn grap i dɔn kil mɔtalman, dɔn naw i go kapu di pɔsin in prɔpati; so da sem ples usay dɔg lik Nebɔth in blɔd, na di vɛri ples dɔg go lik insɛf yon blɔd.”

20 Wɛn Eab si Ilayja, i tɛl am se “E bo mi ɛnimi! Yu kam fɛn mi na yaso bak!?” Ilayja ansa am se yɛs, in go fɛn am bikɔs i jɛs mekɔp in maynd fɔ de du bad bifo PAPA GƆD in yay.

21 Ilayja tɛl am se PAPA GƆD se in go briŋ big big waala nain layf. I se wɛn in dɔn dɔn wit Eab, wan sid pan di man dɛn nɔ go lɛf biɛn am, i lɛk sɛf di pɔsin na slev ɔ fribɔn na Izrɛl.

22 I se in go mek Eab in os tan lɛk let Jɛroboam, Nebat in bɔypikin in os; dɔn i mek am lɛk Baasha, Aija insɛf yon bɔypikin in os, bikɔs i dɔn ambɔgin am bad, bad wan ɛn mek Izrɛl sɛf kɔmit sin.

23 Ilayja se as fɔ Jɛzibɛl in yon say, PAPA GƆD se na dɔg dɛn go it in dedebɔdi midul di siti na Jɛzril.

24 I se ɛnibɔdi we de na Eab in os we day na di siti, na dɔg go it in dedebɔdi; dɔn di wan dɛn we day na bush, na dɛn bɔd dɛn go it am.

25 Nɔbɔdi nɔ bin de we pas Eab fɔ du bad bifo PAPA GƆD in yay bikɔs nain wɛf Jɛzibɛl bin de push am.

26 I du ɔlkayn bad bad tin we nɔ fɔ du; i wɔship lay lay gɔd dɛn lɛkɛ dɛn Amɔrayt we PAPA GƆD bin drɛb kɔmɔt bifo di Izrɛlayt dɛn.

27 Wɛn Eab yɛri wetin Ilayja tɔk, i chɛr in klos, wɛr saklɔth ɛn fast. Na di saklɔth in bin de slip wit. Wɛn i kin de waka na so i kin luk ɔmbul.

28 Na de PAPA GƆD tɔk to Ilayja da Tishbayt bak se,

29 “Yu nɔ si aw Eab dɔn ɔmbul insɛf to mi? Wɛl, bikɔs i dɔn ɔmbul insɛf so, ɔl wetin a dɔn tɔk se a go du, a nɔ go du am we i de alayv; nain pikin dɛn naw a go mek sɔfa ɛn na wɛn in bɔypikin de rul a go du dat.”

Krio Bible © The Bible Society of Sierra Leone, 2013.

Bible Society in Sierra Leone
Lean sinn:



Sanasan