1 Kiŋ 20 - Krio Fɔs Oli Baybul

Eram Fɛt wa Wit Siria

¹ Kiŋ Bɛnadad na Eram gɛda in wanol ami fɔ atak Sameria. I kɔl tati-tu ɔda kiŋ dɛn wit dɛn ɔs ɛn karej fɔ jɔyn am. I sɔrawnd Sameria ɛn atak am.

² Dɔn i sɛn mɛsej to kiŋ Eab na di siti na Izrɛl se,

³ di silva, di gold ɛn ɔl di gud uman dɛn ɛn pikin dɛn nain yon.

⁴ Eab sɛn mɛsej bak to am se in di Bɛnadad na di masta, ɛn in di Eab wit ɔl wetin i gɛt na Bɛnadad yon.

⁵ Di mɛsenja dɛn go bak to Eab go tɛl am se Bɛnadad se in bin dɔn sɛn to am fɔ in silva, gold, in wɛf dɛn ɛn pikin dɛn.

⁶ So da sem awa de di nɛks de, in de sɛn in ɔfisa dɛn fɔ sach in os ɛn ɔl in ɔfisa dɛn os. Dɛn go siz ɔl wetin gɛt valyu ɛn kɛr am go.

⁷ Di kiŋ na Izrɛl sɛn kɔl ɔl dɛn bigman dɛn na di kɔntri ɛn tɛl dɛn se Bɛnadad de fɛn plaba. I se wɛn Bɛnadad sɛn to am se nain gɛt ɔl in wɛf dɛn, pikin dɛn, gold wit in silva, in nɔ se nɔ.

⁸ Di bigman dɛn tɛl di kiŋ se lɛ i nɔ lisin to wetin Bɛnadad de se, ɔ du wetin i want.

⁹ So di kiŋ gi Bɛnadad in mɛsenja mɛsej fɔ go tɛl am se, di fɔs tɛm in bin gri fɔ du wetin i se, bɔt dis wan ya in nɔ go du am. Dɛnsɛf kɛr di mɛsej go.

¹⁰ Na de Bɛnadad sɛn ɔda mɛsej to am se lɛ in gɔd dɛn pɔnish am bad bad wan if in lɛf dɔti na di grɔn sɛf na Sameria.

¹¹ Di kiŋ sɛn riplay bak to Bɛnadad se tru soja na we i dɔn fɛt dɔn i de blɔf, nɔto bifo i fɛt.

¹² Dis mɛsej mit Bɛnadad di tɛm we in ɛn di ɔda kiŋ dɛn bin de drink na dɛn tɛnt. Wantɛm nain i gi ɔda to in man dɛn se dɛn fɔ rɛdi fɔ atak Sameria. Dɛnsɛf rɛdi fɔ di atak.

¹³ We ɔl dat de bi, wan prɔfɛt go to Kiŋ Eab na Izrɛl ɛn tɛl am se, PAPA GƆD se lɛ i nɔ fred ɔl dɛn bɔku, bɔku sojaman dɛn de we i si. I se in go mek i kɔnka dɛn ɔl da vɛri de de; ɛn na da tɛm de in di Eab go no se in na PAPA GƆD we na Gɔd.

¹⁴ Eab aks di prɔfɛt se udat go lid di atak. Di prɔfɛt ansa am se PAPA GƆD se na di yɔŋ sojaman dɛn we de ɔnda di distrikt ɔfisa dɛn kɔmand. I aks am bak se udat go stat di fɛt. Di prɔfɛt ansa am se nain di Eab.

¹⁵ Eab gɛda ɔl di yɔŋ soja ɔfisa dɛn we de ɔnda di distrikt ɔfisa dɛn kɔmand. Na bin dɛn tu ɔndrɛd ɛn tati-tu. Dɔn i gɛda ɔl di ɔda Izrɛlayt man dɛn; na bin dɛn sɛvin tawzin.

¹⁶ Dɛn lɛf santɛm, di tɛm we Bɛnadad ɛn di ɔda tati-tu kiŋ dɛn we jɔyn gɛŋ wit am bin de na dɛn tɛnt de drink ɛn drɔnk.

¹⁷ Na di yɔŋ soja ɔfisa dɛn we de ɔnda di distrikt ɔfisa dɛn fɔs lɛf. Bɛnadad sɛn man dɛn fɔ go wach wetin de apin. Dɛn go ripɔt bak to am se dɛn si man dɛn de kɔmɔt na Sameria.

¹⁸ So i tɛl dɛn se wɛda na pis ɔ wa dɛn kam fɔ, nɔ fɔ lɛf dɛn so, na fɔ kech dɛn layf wan.

¹⁹ Di yɔŋ soja ɔfisa dɛn we de ɔnda di distrikt ɔfisa dɛn mach go bifo wit ɔl di ɔda sojaman dɛn biɛn dɛn.

²⁰ As dɛn de go na so dɛn de kil di ɛnimi. Wɛn di Aramean dɛn si se di Izrɛlayt dɛn de kil, kil dɛn, dɛn rɔnawe bɔt di Izrɛlayt dɛn rɔnata dɛn. As fɔ Bɛnadad we na kiŋ na Eram, in ɛn sɔm pan in man dɛn jomp pantap ɔs ɛn rɔnawe.

²¹ Di kiŋ na Izrɛl rɔnata dɛn, kech dɛn wit dɛn ɔs ɛn karej ɛn kil bɔku pan dɛn. Nɔto kɔmɔn day di Aramean dɛn day da de de.

²² Afta dat di prɔfɛt go to di kiŋ na Izrɛl ɛn tɛl am se lɛ i gɛda insɛf bak bikɔs di nɛks spriŋ sizin di kiŋ na Eram go atak am bak.

Sirian Atak Di Sɛkɛn Tɛm

²³ Na de di kiŋ na Eram in yon ɔfisa dɛn go tɛl am se di Izrɛlayt dɛn gɔd dɛn na di gɔd dɛn we de inchaj ɔf dɛn il. So na dat mek dɛn nɔ bin ebul di Izrɛlayt dɛn. Dɛn se if dɛn fɛt dɛn na lɛvul grɔn, dɛn go kɔnka dɛn.

²⁴ Dɛn advays am se lɛ i pul ɔl di kiŋ dɛn kɔmɔt na dɛn post ɛn put ɔda ɔfisa dɛn de;

²⁵ dɔn i fɔ bil ɔda ami lɛkɛ di wan we i dɔn lɔs; nyu ɔs fɔ tek di wan we dɔn day in ples ɛn nyu karej fɔ tek di wan we dɔn pwɛl in ples, so dat dɛn go ebul fɛt di Izrɛlayt dɛn na lɛvul grɔn da tɛm de naw dɛn go ebul dɛn. Di kiŋ gri wit ɔl wetin dɛn se ɛn du am.

²⁶ Di nɛks spriŋ sizin, Bɛnadad gɛda ɔl di Aramean dɛn go ɔp na Efɛk fɔ fɛt di Izrɛlayt dɛn.

²⁷ Di Izrɛlayt dɛnsɛf gɛda dɛnsɛf prɔpa wan wit ɔl dɛn provishɔn fɔ brakɛt dɛn. Di Izrɛlayt dɛn bin fiba lɛk yɔni bifo di Aramean dɛn. Di Aramean dɛn bin prɛd ɔlɔbɔt na di kɔntri.

²⁸ Di prɔfɛt go mit di kiŋ na Izrɛl ɛn tɛl am se PAPA GƆD se bikɔs di Aramean dɛn de tink se in na PAPA GƆD fɔ di il bɔt nɔto PAPA GƆD fɔ di vali, in go mek shɔ se dɛn bit dɛn gud fashin, dɔn na da tɛm de in di kiŋ go no se in na PAPA GƆD.

²⁹ Di Aramean ɛn di Izrɛlayt dɛn de na dɛn kamp fɔ sɛvin de, ɔlman de ɔpozit in kɔmpin, dɔn di de we mek sɛvin dɛn bigin fɛt. Na wan ɔndrɛd tawzin man dɛn di Izrɛlayt dɛn kil pan di Aramean dɛn insay waŋren de;

³⁰ di balans dɛn rɔnawe go na Efɛk ɛn di wɔl na Efɛk fɔdɔm pan twɛnti-sɛvin tawzin pan dɛn ɛn kil dɛn. Bɛnadad rɔnawe go na di siti go ayd na wan biɛn rum na wan os.

³¹ Na de i de we in ɔfisa dɛn tɛl am se dɛn yɛri se di kiŋ dɛn na Izrɛl na pipul dɛn we gɛt sɔri at, so lɛ dɛn wɛr saklɔth Dɛn kin wɛr am fɔ munin; fɔ we pɔsin sɔri fɔ in sin; fɔ pre fɔ PAPA GƆD fɔ sev pɔsin rawnd dɛn wes ɛn tay rop na dɛn ed se sɔntɛm di kiŋ go sɔri fɔ dɛn.

³² Di man dɛn wɛr saklɔth rawnd dɛn wes ɛn tay rop na dɛn ed go mit di kiŋ na Izrɛl ɛn tɛl am se in savant Bɛnadad de beg am se lɛ i spia in layf. Di kiŋ aks dɛn se if Bɛnadad stil de alayv bikɔs nain brɔda.

³³ As di kiŋ tɔk se nain brɔda dɛn rid ɔp kwik ɛn ansa am bak kwik wan se Bɛnadad nain brɔda. Di kiŋ se lɛ dɛn go briŋ am kam. Wɛn Bɛnadad kɔmɔt na do, di kiŋ mek i klem ɔp in karej.

³⁴ Bɛnadad tɛl am se in go gi am bak dɛn siti dɛn we in papa bin siz nain yon papa in an, dɔn if Eab want sɛf i kin bil in yon makit na Damaskɔs lɛkɛ aw in di Bɛnadad in papa bin du na Sameria. Eab tɛl am se if dɛn tu gri pan dat in go lɛf am lɛ i go fri. I tay bagin wit am.

Wan Prɔfɛt Pas Jɔjmɛnt Pan Eab

³⁵ PAPA GƆD tɔk to wan prɔfɛt, so i go mit in kɔmpin prɔfɛt ɛn tɛl am se lɛ i slap am, bɔt i nɔ gri;

³⁶ so i tɛl am se bikɔs i nɔ yɛri PAPA GƆD in wɔd, as i lɛf am so layɔn go mit am na rod ɛn kil am. Ɛn as di man lɛf fɔ go so, layɔn mit am na rod ɛn kil am.

³⁷ Di prɔfɛt go mit ɔda pɔsin ɛn tɛl am se lɛ i slap am, so di pɔsin insɛf slap am ɛn wund am.

³⁸ Dɔn di prɔfɛt go tinap na rod de wet fɔ di kiŋ. I tek di tin we i de wɛr nain ed kɔba in fes fɔ lɛ dɛn nɔ go no udat i bi.

³⁹ As di kiŋ de pas, nain i ala am se, “kiŋ, yu savant bin de fɛt na wɔfrɔnt, wantɛm nain wan man kam mit mi wit wan man we i kech se lɛ a kip am na tayt ples te i kam. I se if di man lɔs, insɛf go lɔs mi layf ɔ a pe tati-fo kil silva kɔpɔ.

⁴⁰ We a bin de ɔp ɛn dɔŋ nɔmɔ nain di man lɔs.” Di kiŋ ansa am se na dat fɔ bi in pe bikɔs nain yon mɔt dɔn tɔk am.

⁴¹ Di prɔfɛt kwik, kwik wan pul di tin we i tek kɔba in fes; dɔn di kiŋ no wantɛm se in na wan pan di prɔfɛt dɛn.

⁴² I tɛl di kiŋ se PAPA GƆD se i dɔn fri pɔsin we in PAPA GƆD bin dɔn se fɔ day; so nain go day fɔ di man, dɔn in pipul dɛn go day bikɔs i mek di man in yon pipul dɛn rɔnawe.

⁴³ Di kiŋ swɛl ɛn vɛks bad, bad wan ɛn go bak nain os na Sameria.