1 Kiŋ 2 - Krio Fɔs Oli Baybul

Devid Gi Sɔlɔmɔn In Las Advays

¹ Wɛn Devid in tɛm bin dɔn de rich fɔ day, i kɔl in bɔypikin Sɔlɔmɔn ɛn gi am in las advays.

² I se, “Mi tɛm dɔn de rich fɔ go to mi pipul dɛn. Gɛt kɔrej, ɛn sho yusɛf to ɔlman se yu na bɔypikin,

³ ɛn du wetin yu PAPA GƆD we na PAPA GƆD tɛl yu fɔ du. Kiaful fɔ obe ɔl in lɔ ɛn kɔmandmɛnt we rayt na di lɔ we Mozis gi, so dat ɛnisay we yu go, bɛtɛ go fala yu pan wetin yu de du.

⁴ If yu obe PAPA GƆD, i go kip to di prɔmis we i mek to mi se ‘na mi jɛnareshɔn nɔmɔ go de rul Izrɛl if dɛn kip to wetin in se ɛn obe am wit ɔl dɛn at ɛn sol.’

⁵ Wan ɔda tin igen, nɔ fɔgɛt wetin Joab du mi we i kil dɛn tu Izrɛl kɔmanda dɛn, dat na Abna, we na Nain bɔypikin ɛn Amasa, Jɛtha in yon bɔypikin. I kil dɛn di tɛm we pis de we wi se nɔn fɛt nɔ fɔ de, dɔn i se in rivɛnj bikɔs dɛn bin kil di tɛm we wi bin de fɛt wa. I kil inosɛnt pipul dɛn dɔn naw na mi tot di trɔbul ɛn mek a de sɔfa fɔ dat.

⁶ Nɔ lɛf am so, dil wit am gud ɛn prɔpa; lɛ i nɔ de te i ol.

⁷ Bɔt nɔ ambɔgin Bazilay, da Giliadayt in bɔypikin dɛn, lɛ dɛn de nia yu, lɛ dɛn de it wit yu na tebul ɔltɛm; wɛn a bin de rɔnawe pan yu brɔda Absalɔm, na dɛn bin ɛp mi.

⁸ Nɔ lɛ Shimɛay, dat na Gera, da Bɛnjamin in fambul we kɔmɔt Baurim in bɔypikin go fri. I bin kɔs mi bad, bad kɔs di tɛm we a bin de go Maanaim. Wɛn i kam mit mi na Riva Jɔdan, a bin swɛ to am bifo PAPA GƆD se a nɔ go kil am.

⁹ Bɔt naw, nɔ luk se i nɔ du natin; yu na man we gɛt sɛns; yu no wetin fɔ du wit am so lɛ in wet ia nɔ te nain ed, lɛ i day.”

Kiŋ Devid Day

¹⁰ Devid day ɛn dɛn bɛr am na Devid in siti.

¹¹ “I rul Izrɛl fɔ fɔti ia; sɛvin ia na Ɛbrɔn ɛn tati-tri ia na Jerusɛlɛm.

¹² Sɔlɔmɔn sidɔm nain papa Devid in chia fɔ rul, ɛn pawa nɔ wande lɛf am.

Adonayja Day

¹³ Adonayja, Agit in bɔypikin go fɛn Bathshiba, dat na Sɔlɔmɔn in mama. So Bathshiba aks am if na fayn fɛn i go fɛn am. I ansa se yɛs,

¹⁴ bɔt se in gɛt sɔntin fɔ tɛl am. So Bathshiba tɛl am lɛ i tɔk wetin i go fɛn am fɔ.

¹⁵ Adonayja tɛl Bathshiba se in di Bathshiba no se nain di Adonayja fɔ de rul as kiŋ, bikɔs nain di wanol Izrɛl bin de luk ɔp to, bɔt tiŋs dɔn chenj ɛn nain brɔda naw de rul, bikɔs na so PAPA GƆD want am fɔ bi.

¹⁶ I se in want am fɔ du wan tin fɔ am bɔt lɛ i nɔ se nɔ So Bathshiba se lɛ i tɔk wetin i want.

¹⁷ I tɛl Bathshiba se lɛ i aks Kiŋ Sɔlɔmɔn lɛ i gi am Abishag, da Shunamayt uman fɔ bi in wɛf; i se in no se if nain aks Sɔlɔmɔn i nɔ go se nɔ.

¹⁸ Bathshiba ansa am se oke, in go tɔk to di kiŋ fɔ am.

¹⁹ Bathshiba go to Kiŋ Sɔlɔmɔn fɔ go tɔk to am fɔ Adonayja. Wɛn di kiŋ si in mama, i grap nain chia baw to am ɛn sidɔm bak; dɔn i mek dɛn briŋ ɔda ay chia fɔ am fɔ lɛ i sidɔm nain raytan.

²⁰ Bathshiba tɛl am se in gɛt wan smɔl tin we in want lɛ i du fɔ am, ɛn i nɔ want am fɔ se nɔ. Di kiŋ se lɛ i tɔk nɔmɔ in go du wetin i se.

²¹ So i tɛl am se in want lɛ i gi Abishag, da Shunamayt titi to in brɔda Adonayja fɔ mared.

²² Kiŋ Sɔlɔmɔn tɛl in mama se if i kin aks am fɔ lɛ i mek Abishag mared to Adonayja, i fɔ jɛs aks am wantɛm fɔ mek Adonayja bi kiŋ sins nain na di big wan ɛn Abiata we de mek sakrifays fɔ pipul sin wit Joab we na Zɛruaya in bɔypikin dɛn ɔl go de biɛn am.

²³ Kiŋ Sɔlɔmɔn swɛ to PAPA GƆD se if in nɔ dil wit Adonayja gud ɛn prɔpa wan ɛn kil am, lɛ PAPA GƆD mek i alaki.

²⁴ I se in swɛ to PAPA GƆD we put am nain papa Devid in chia, ɛn dɔn se na de i go de te i day, in mɔs mek shɔ se Adonayja day da de de.

²⁵ So Kiŋ Sɔlɔmɔn gi ɔda to Bɛnaya, Jɛoyada in bɔypikin se Adonayja fɔ day; ɛn dɛn kil am da de de.

Sɔlɔmɔn Drɛb Abiata Ɛn Gi Ɔda Fɔ Kil Joab

²⁶ Kiŋ Sɔlɔmɔn drɛb Abiata we de mek sakrifays fɔ pipul sin fɔ lɛf di siti ɛn go bak na Anatɔt usay i kɔmɔt. I se in bin fɔ kil am bɔt na we nɔmɔ nain bin de wit in papa Devid wɛn i bin gɛt ɔl in prɔblɛm, ɛn na we bak nain bin de tot PAPA GƆD we na dɛn PAPA GƆD in Kɔvinant Bɔks ɛnisay we in papa bin de go.

²⁷ Sɔlɔmɔn sak Abiata pan di wok as man we de mek sakrifays fɔ pipul sin. Ɔl dis bi fɔ lɛ wetin PAPA GƆD bin se kam tru. I bin tɔk na Shaylo to Ilaɛl se in jɛnareshɔn nɔ go wok fɔ am igen as man dɛn we de mek sakrifays fɔ pipul sin.

²⁸ Wɛn Joab yɛri wetin Sɔlɔmɔn dɔn du to Abiata ɛn insɛf na bin wan we jɔyn wit Adonayja pan di ku, i rɔn go na PAPA GƆD in Tɛnt go grip di ɔn dɛn na di ɔlta. Bɔt in nɔ bin jɔyn wit Absalɔm pan da fɔs ku.

²⁹ Dɛn tɛl Kiŋ Sɔlɔmɔn se Joab dɔn go na di ɔlta na PAPA GƆD in Tɛnt. Sɔlɔmɔn insɛf gi Bɛnaya, Jɛoyada in bɔypikin ɔda se lɛ i go kil am de.

³⁰ Bɛnaya go mit Joab de ɛn tɛl am se di kiŋ se lɛ i kɔmɔt de. Bɔt Joab nɔ gri, i se na de i go day. Bɛnaya insɛf go tɛl di kiŋ wetin i se.

³¹ So di kiŋ tɛl am se lɛ i du wetin Joab tɛl am, dat na fɔ kil am de, dɔn i bɛr am; so dat in di kiŋ ɛn in famili nɔ go rɛspɔnsibul fɔ di inosɛnt pipul dɛn we Joab bin kil.

³² Di kiŋ se PAPA GƆD go pe Joab fɔ we i shɛd inosɛnt blɔd, bikɔs in papa Devid insɛf nɔ bin no se Joab go gɛt maynd fɔ atak tu ami kɔmanda dɛn ɛn kil dɛn, dat na Abna we na Nain bɔypikin we na bin kɔmanda fɔ di Izrɛl ami; ɛn Amasa we in na Jɛtha in yon bɔypikin, we insɛf na bin di kɔmanda fɔ Juda ami. I se dɛn bin bɛtɛ pas in di Joab.

³³ I se Abna ɛn Amasa dɛn sin go fɔdɔm na Joab in ed ɛn in jɛnareshɔn dɛn sote go. Bɔt as fɔ Devid ɛn in yon jɛnareshɔn ɛn in wanol famili, PAPA GƆD go mek pis de de sote go.

³⁴ So Benaya, Jɛoyada in bɔypikin go de go kil Joab. Dɛn bɛr am nain yon grev na di ɛmti land we pɔsin nɔ go ebul tap.

³⁵ Di kiŋ put Bɛnaya na Joab in ples na di ami, dɔn i put Zedɔk we de mek sakrifays fɔ pipul sin na Abiata in ples.

Aw Shimɛay Day

³⁶ Di kiŋ sɛn kɔl Shimɛay ɛn tɛl am se lɛ i bil os fɔ insɛf na Jɛrusɛlɛm ɛn tap de, ɛn lɛ i nɔ muf in fut kɔmɔt de.

³⁷ I se if i muf wan inch krɔs Kidrɔn Vali i go day, ɛn da tɛm de nainsɛf i go gɛt fɔ blem.

³⁸ Shimɛay ansa di kiŋ se dat na fayn aydia, ɛn in go du wetin i se. So i tap na Jerusɛlɛm fɔ lɔŋ.

³⁹ Bɔt afta tri ia, tu pan Shimɛay in slev dɛn rɔnawe go to Ekish. Ekish na Kiŋ Maaka na Gath in bɔypikin. Shimɛay yɛri se in slev dɛn de na Gath.

⁴⁰ Shimɛay insɛf tek dɔŋki go to Ekish na Gath fɔ go fɛn in slev dɛn. Wɛn i si dɛn i briŋ dɛn kam bak.

⁴¹ Bɔt dɛn go koŋosa to Sɔlɔmɔn se Shimɛay dɔn lɛf Jerusɛlɛm go na Gath ɛn dɔn tɔn bak.

⁴² Di kiŋ sɛn kɔl Shimɛay ɛn aks am se if i nɔ bin dɔn wɔn am ɛn mek i swɛ to PAPA GƆD se di de we i lɛf di siti go ɛnisay i go day; ɛn if in di Shimɛay nɔ bin ansa am se dat na gud aydia.

⁴³ I aks am wetin mek i nɔ kip to di kɔmand we i gi am ɛn di swɛ we i bin dɔn swɛ.

⁴⁴ I se in di Shimɛay no nain at ɔl wetin i bin du to in papa Devid, ɛn naw PAPA GƆD go pe am fɔ ɔl di bad we i du.

⁴⁵ Bɔt in di kiŋ Sɔlɔmɔn go de gɛt blɛsin mɔ ɛn mɔ, ɛn Devid in kindɔm go de sote go bifo PAPA GƆD.

⁴⁶ Di kiŋ gi ɔda to Bɛnaya we na Jɛoyada in bɔypikin fɔ kil Shimɛay, so Bɛnaya insɛf kɛr am go na do go kil am. Frɔm da tɛm de naw, Sɔlɔmɔn kam sidɔm gud na di kindɔm ɛn nɔ gɛt wan ambɔgin.