1 Kiŋ 15 - Krio Fɔs Oli Baybul

Kiŋ Abija Na Juda

¹ Di ia we mek Jɛroboam we na Nebat in bɔypikin etin ia as kiŋ na Izrɛl, na da sem ia de Abija bi kiŋ na Juda,

² ɛn i rul na Jerusɛlɛm fɔ tri ia. In mama na Maaka, Absalɔm in gyal pikin.

³ Ɔl di bad bad tin dɛn we Abija in papa bin de du, nain insɛf falamakata; in at nɔ bin de to in Gɔd we na PAPA GƆD atɔl lɛkɛ aw in grampa Devid in yon at bin de to am.

⁴ Bɔt pan ɔl dat, in GƆD we na in Gɔd sɔri fɔ am fɔseka Devid nɔmɔ ɛn gi am bɔypikin fɔ tek in ples ɛn fɔ gyad Jerusɛlɛm.

⁵ Wɛn Devid in bin de, i bin de du ɔl wetin rayt na PAPA GƆD in yay, ɛn kip to ɔl in lɔ dɛn; na we nɔmɔ i kil Yuraya da Itayt ɛn tek in wɛf.

⁶ Di tɛm we Abija bin de, bɔku fɛt bin de bitwin Jɛroboam ɛn Rɛoboam.

⁷ As fɔ di ɔda tin dɛn we Abija du we i bin de rul as kiŋ, dɛn ɔl rayt na di istri buk bɔt dɛn kiŋ dɛn na Juda. Wa sɛf bin de bitwin Abija ɛn Jɛroboam.

⁸ Abija day ɛn dɛn bɛr am usay dɛn bɛr in papa dɛn na Devid in siti. In bɔypikin Asa tek in ples as kiŋ.

Kiŋ Asa Na Juda

⁹ Di ia we mek Jɛroboam twɛnti ia as kiŋ na Izrɛl, na da sem ia de Asa bi kiŋ na Juda,

¹⁰ ɛn i rul na Jerusɛlɛm fɔ fɔti-wan ia. In grani na Maaka, Absalɔm in gyal pikin.

¹¹ Asa in du wetin rayt na PAPA GƆD in yay jɛs lɛkɛ aw in grampa Devid bin du.

¹² I drɛb ɔl dɛn rare gyal ɛn ple bɔy dɛn na dɛn say we in papa mek fɔ wɔship lay lay gɔd ɛn trowe ɔl di lay lay gɔd dɛn.

¹³ I ivin pul in grani Maaka kɔmɔt nain chia as Mami Kwin bikɔs insɛf bin de mek lay lay gɔd fɔ wɔship Ashɛra. Asa brok di lay lay gɔd ɛn bɔn am dɔŋ Kidrɔn Vali.

¹⁴ Ivin we i nɔ bin pwɛl dɛn ples ɔp dɛn il we dɛn mek fɔ wɔship lay lay gɔd, i mek shɔ se ɔl in at de wit PAPA GƆD te i day.

¹⁵ Dɛn gold, silva ɛn ɔda tiŋs dɛn we in ɛn in papa bin dɔn kɔnsikret, i mek shɔ se i kɛr ɔl go bak na PAPA GƆD in os.

¹⁶ Wa bin de bitwin Asa ɛn Kiŋ Baasha na Izrɛl ɔl di tɛm we dɛn tu bin de rul as kiŋ.

¹⁷ Baasha we na kiŋ na Izrɛl go fɛt wa agens Juda. I mek gud sikyɔriti na Rama fɔ lɛ nɔbɔdi nɔ go go insay usay Asa de rul na Juda ɔ kɔmɔt de.

¹⁸ Asa insɛf tek ɔl di silva ɛn gold we bin lɛf na PAPA GƆD in os ɛn in insɛf yon os ɛn gi in ɔfisa dɛn fɔ go gi kiŋ Bɛnadad na Eram we bin de rul Damaskɔs na Tabrimɔn.

¹⁹ I sɛn mɛsej to Bɛnadad se lɛ wanwɔd de bitwin dɛn tu lɛkɛ aw wanwɔd bin de bitwin dɛn papa dɛn. I se in dɔn sɛn gold ɛn silva fɔ am, ɛn in want am fɔ brok di wanwɔd we de bitwin in di Bɛnadad ɛn Baasha we na kiŋ na Izrɛl fɔ lɛ i go blo fɔ de atak am.

²⁰ Bɛnadad du wetin Kiŋ Asa se; i sɛn di kɔmanda dɛn nain ami fɔ go fɛt Izrɛl. I fɛt Ijɔn, Dan, Ebɛl Bɛth Maaka, Kinɛrɛth te rich Naftali.

²¹ Wɛn Baasha yɛri wetin Bɛnadad dɔn du, i tap fɔ bil di sikyɔriti wɔl i bin de bil na Rama ɛn go bak na Tiza.

²² Nain Kiŋ Asa gi ɔda se ɔlman fɔ go na Rama fɔ go pul di ston ɛn bod we Baasha bin de yuz de, ɛn nɔbɔdi nɔ fɔ balans. Kiŋ Asa yuz di ston ɛn bod fɔ bil Giba, Bɛnjamin ɛn Mizpa.

²³ As fɔ di ɔda tin dɛn we Asa du we i bin de rul, lɛkɛ dɛn siti dɛn we i bil ɛn ɔl wetin i gɛt, dɛn ɔl rayt na di istri buk bɔt dɛn kiŋ dɛn na Juda. Wɛn i dɔn ol, bad bad sik ol in fut dɛn.

²⁴ Asa day dɔn dɛn bɛr am na di siti usay dɛn bɛr Devid. In bɔypikin Jɛoshafat tek in ples fɔ rul as kiŋ.

Kiŋ Nadab Na Izrɛl

²⁵ Di ia we mek kiŋ Asa tu ia we i de rul Juda, na da sem ia de Nadab we na Jɛroboam in bɔypikin bi kiŋ na Izrɛl, ɛn i rul fɔ tu ia.

²⁶ Insɛf falamakata in papa pan di bad ɛn sin to PAPA GƆD. I mek Izrɛl kɔmit sin to PAPA GƆD.

²⁷ Aija in bɔypikin we nem Baasha we kɔmɔt to Isaka fambul mek ku pan am ɛn kil am na Gibɛthɔn we na wan siti na Filistia. Dat bi di tɛm we Nadab gɛda di wanol Izrɛl fɔ atak Gibɛthɔn ɛn kapchɔ am.

²⁸ Baasha kil Nadab di ia we mek tri ia we Asa bin de rul Juda, dɔn in tek ova fɔ de rul.

²⁹ As Baasha bigin rul so, i kil ɔlman na Jɛroboam in famili. I nɔ lɛf wan sol sɛf. Ɔl dis bi fɔ mek wetin PAPA GƆD bin tɛl prɔfɛt Aija we kɔmɔt Shaylo bi;

³⁰ bikɔs Jɛroboam in sin bin dɔn pasmak, ɛn i nɔ tap de, i mek di wanol Izrɛl kɔmit sin to PAPA GƆD, ɛn dat mek PAPA GƆD vɛks bad, bad wan.

³¹ As fɔ di ɔda tin dɛn we Nadab du we i bin de rul, dɛn ɔl rayt na di istri buk bɔt dɛn kiŋ dɛn na Izrɛl.

³² Di tɛm we Asa ɛn kiŋ Baasha fɔ Izrɛl bin de rul, na soso fɛt bin de bitwin dɛn tu.

Kiŋ Baasha Na Izrɛl

³³ Di ia we mek kiŋ Asa na Juda tri ia we i de rul, na da sem ia de Aija in bɔypikin we na Baasha bigin rul Izrɛl, bɔt na Tiza in bin tap ɛn rul fɔ twɛnti-fo ia.

³⁴ Insɛf du bad bad tin na PAPA GƆD yay; i fala Jɛroboam in futstɛp we mek Izrɛl kɔmit sin to PAPA GƆD.