1 Kiŋ 12 - Krio Fɔs Oli Baybul

Di Izrɛl Fambul Dɛn Na Di Nɔth Barɔf Pan Rɛoboam

¹ Rɛoboam go na Shɛkɛm ɛn na de ɔl di Izrɛlayt dɛn bin dɔn gɛda fɔ mek am kiŋ.

² Wɛn Nebat in bɔypikin, Jɛroboam yɛri bɔt dat, bikɔs in bin de na Ijipt we i rɔnawe pan Sɔlɔmɔn, i tɔn bak.

³ Di pipul dɛn sɛn kɔl am so i fala dɛn go to Rɛoboam.

⁴ Dɛn tɛl Rɛoboam se in papa bin mek dɛn de wok lɛk slev, bɔt if in pul da lod de na dɛn ed, dɛn go wok wit am.

⁵ Rɛoboam ansa dɛn se lɛ dɛn go fɔs ɛn kam bak to am afta tri de, da tɛm de in go dɔn gɛt ansa fɔ dɛn.

⁶ Kiŋ Rɛoboam gɛda ɔl di bigman dɛn we bin de wok ɔnda in papa Sɔlɔmɔn ɛn aks dɛn se uskayn advays dɛn go gi am fɔ di pipul dɛn.

⁷ Dɛn advays am se if nɔmɔ i put insɛf dɔŋ, tɔk to di pipul dɛn fayn ɛn wok lɛkɛ savant fɔ dɛn, dɛn go de sav am ɔltɛm.

⁸ Bɔt Rɛoboam nɔ yɛri di bigman dɛn advays; bifo dat i go ɛŋed wit in kamaranks dɛn bikɔs na dɛn bin de ɛŋ biɛn am.

⁹ I aks dɛn lɛ dɛn advays am bɔt aw in fɔ ansa dɛn pipul we se in fɔ pul di lɔd we in papa bin dɔn put na dɛn ed.

¹⁰ In padi dɛn we na dɛn ɔl de rakpala advays am se lɛ i ansa di pipul dɛn se, ɛnti dɛn de se in papa gi dɛn ebi lod fɔ tot bɔt dɛn want in fɔ pul di lod kɔmɔt, wɛl in de tɛl dɛn se wetin in papa bin du na bin smɔl wan.

¹¹ I se ɛnti in papa gi dɛn ebi lod fɔ tot, in go gi dɛn di wan we pas dat; ɛn if na ken in papa bin de tek flag dɛn, na tik in go tek wok dɛn.

¹² Afta tri de, Jɛroboam ɛn ɔl di pipul dɛn go bak to Rɛoboam lɛkɛ aw i bin tɛl dɛn nɔmɔ.

¹³ I fityay dɛn gud fashin, ɛn nɔ yɛri di advays we di bigman dɛn gi am.

¹⁴ Bifo dat, di advays we in kamaranks dɛn gi am se, in papa bin gi pipul dɛn ebi lod fɔ tot, bɔt in go gi dɛn di wan we pas dat; in papa bin de flag dɛn wit ratlan in go tek tik wok dɛn, na da advays de i fala.

¹⁵ Di kiŋ nɔ lisin to wetin di pipul dɛn se. Ɔl dis yaso we bi na PAPA GƆD bin dɔn mak am fɔ bi so lɛk aw prɔfɛt Aija we kɔmɔt Shaylo, tɔk to Jɛroboam we na Nebat in bɔypikin se na so PAPA GƆD go mek tin bi.

¹⁶ Wɛn ɔl di Izrɛlayt dɛn si se di kiŋ fityay dɛn ɛn nɔ lisin to dɛn, dɛn ansa am se, afta ɔl dɛn nɔ gɛt nɔn biznɛs wit Devid in sid, lɛ ɔlman go nain os, lɛ dɛn lɛf Rɛoboam to insɛf. Na so ɔlman tek kɔmɔt biɛn am.

¹⁷ Bɔt as fɔ dɛn Izrɛlayt we bin tap na di siti dɛn na Juda, na Rɛoboam bin stil de rul dɛn.

¹⁸ Kiŋ Rɛoboam sɛn Adoniram we bin de mek pipul wok bay fos to di Izrɛlayt dɛn, bɔt dɛn kech am ston am te i day. Wɛn dis bi, Kiŋ Rɛoboam mekes jomp nain ɔs ɛn karej ɛn rɔnawe go Jerusɛlɛm.

¹⁹ Frɔm da de de, nain di Izrɛlayt dɛn bigin barɔf pan Devid in pikin dɛn.

²⁰ Wɛn ɔl di Izrɛlayt dɛn yɛri se Jɛroboam dɔn tɔn bak, dɛn sɛn kɔl am ɛn mek am kiŋ na Izrɛl. Na Juda fambul nɔmɔ bin de biɛn Devid in pikin.

Wetin Shɛmaya Se

²¹ Wɛn Rɛoboam rich na Jerusɛlɛm, i gɛda wan ɔndrɛd ɛn eti tawzin soja man dɛn na Juda ɛn Bɛnjamin fɔ go fɛt wa na di nɔth pat na Izrɛl fɔ lɛ i go rul bak.

²² Bɔt PAPA GƆD tɔk to Prɔfɛt Shɛmaya.

²³ I se, “Go tɛl Rɛoboam, Sɔlɔmɔn in bɔypikin, ɛn ɔl di Juda ɛn Bɛnjamin fambul dɛn se,

²⁴ mi PAPA GƆD se, dɛn nɔ fɔ mistek fɔ go fɛt dɛn brɔda dɛn. Lɛ dɛn ɔl go om bikɔs nain mek ɔl wetin de bi so bi.” Ɔlman yɛri wetin PAPA GƆD se ɛn tɔn bak go na dɛn os.

Jɛroboam Tɔn In Bak Pan PAPA GƆD

²⁵ Kiŋ Jɛroboam bil militri bes na Shɛkɛm we de ɔp di il na Ifrem bikɔs na de i bin tap. Wɛn i lɛf de i go na Pɛniɛl ɛn go bil ɔda bes de.

²⁶ Jɛroboam bigin de tink to insɛf se di kindɔm go go bak to Devid in pikin dɛn,

²⁷ nɔ lɛk we if di pipul dɛn de go na Jerusɛlɛm fɔ go ɔfa sakrifays na PAPA GƆD in os. I bigin skyad se dɛn go bigin go bak to kiŋ Rɛoboam, dɔn dɛn go kil am.

²⁸ Wɛn i dɔn aks advays dɔn, i mek tu gold kaw, dɔn i tɛl di pipul dɛn se Jɛrusɛlɛm tu fa fɔ dɛn fɔ de go wɔship. I se in dɔn mek di gɔd dɛn we pul dɛn kɔmɔt na Ijipt.

²⁹ I put wan pan di kaw dɛn na Bɛthɛl dɔn i put di ɔda wan na Dan.

³⁰ Dis na bin bad bad tin bikɔs di pipul dɛn bin de go te rich Dan fɔ go wɔship di kaw we de de.

³¹ Jɛroboam bil ples dɛn fɔ de wɔship pantap dɛn il, dɔn i pik man dɛn we nɔto Livay fambul dɛn kɔmɔt fɔ de mek sakrifays fɔ pipul sin.

PAPA GƆD Kɔndɛm Wetin Dɛn Du Na Bɛthɛl

³² Jɛroboam mek dɛn bigin fɔ mek fɛstival di fiftin de insay di et mɔnt lɛkɛ di kayn we aw dɛn kin du na Juda, dɔn i mek dɛn de ɔfa sakrifays na di ɔlta. I mek sakrifays to di lay lay gɔd dɛn we dɛn mek na Bɛthɛl, dɔn i pik man dɛn fɔ de mek sakrifays fɔ pipul sin ɔp di il dɛn.

³³ I du ɔl dis di de we mek fiftin de insay di et mɔnt, ɛn nain fiks di det. I mek shɔ se i ɔfa sakrifays na di ɔlta we i bil na Bɛthɛl. Nain bigin dis fɛstival fɔ di Izrɛlayt dɛn ɛn nain fɔs go ɔp na di ɔlta fɔ ɔfa sakrifays.