1 Kiŋ 11 - Krio Fɔs Oli Baybul

Sɔlɔmɔn Tɔn In Bak Pan PAPA GƆD

¹ Sɔlɔmɔn bin lɛk fɔrina uman dɛn bad ɛn apat frɔm di kiŋ na Ijipt in pikin we i bin mared, i bin mared ɔda uman dɛn we na bin Moabayt, Amonayt, Idɔmayt, Sidonian ɛn Itayt uman dɛn.

² Ɔl dɛn uman yaso na dɛn PAPA GƆD bin dɔn tɛl di Izrɛlayt dɛn se dɛn nɔ fɔ mared bikɔs, dɛn go tɔn dɛn at fɔ de wɔship dɛn yon gɔd dɛn. Bɔt Sɔlɔmɔn nɔ bin bisin, bifo dat na dɛn i bin de mek lɔv wit.

³ I mared sɛvin ɔndrɛd wɛf ɛn dɛn ɔl na bin kiŋ pikin dɛn, ɛn i bin gɛt tri ɔndrɛd smɔl wɛf; Ɔl dɛn uman dɛn yaso bin lid am astre.

⁴ Aw Sɔlɔmɔn bin de ol na so in wɛf dɛn bin de tɔn in at fɔ wɔship ɔda gɔd dɛn; in at nɔ kam de to PAPA GƆD igen lɛkɛ aw in papa Devid in at bin de to PAPA GƆD.

⁵ I bigin wɔship Ashtorɛt, di Sidonian dɛn gɔd, dɔn i wɔship Molɛk, di Amonayt dɛn gɔd we PAPA GƆD et bad bad wan.

⁶ Na so Sɔlɔmɔn tek du bad na PAPA GƆD yay. I nɔ biev lɛkɛ in papa Devid we put ɔl in at pan PAPA GƆD.

⁷ Na pantap wan il na Jerusɛlɛm Sɔlɔmɔn bil ples fɔ de wɔship Kɛmɔsh, dat na di Moabayt dɛn yon gɔd, di ɔda gɔd we PAPA GƆD et bad bad wan. I bin bil ples bak fɔ di ɔda gɔd we nem Molɛk, di Amonayt dɛn gɔd we PAPA GƆD bin et insɛf bad bad wan.

⁸ I bil bɔku ples dɛn fɔ in ɔda wɛf dɛn gɔd dɛn fɔ lɛ dɛnsɛf go de bɔn insɛns ɛn ɔfa sakrifays to dɛn.

⁹ PAPA GƆD vɛks bad bad wan pan Sɔlɔmɔn we i tɔn in bak pan in we na di PAPA GƆD we Izrɛl de wɔship ɛn mɔ so we i bin dɔn apia to am tu tɛm.

¹⁰ Ivin we i bin dɔn wɔn Sɔlɔmɔn nɔ fɔ wɔship ɔda gɔd dɛn i nɔ yɛri in wɔd.

¹¹ PAPA GƆD tɛl Sɔlɔmɔn se fɔ we i dɔn biev da we de ɛn nɔ kip to in Kɔvinant ɛn nɔ du ɔl wetin i tɛl am, in go tek di kindɔm nain an ɛn gi am to wan pan in ɔfisa dɛn.

¹² I se na fɔseka in papa Devid nɔmɔ mek in nɔ go du dat da tɛm de, bɔt na wɛn in pikin go de rul in go du dat.

¹³ PAPA GƆD se in nɔ go tek di wanol kindɔm nain an, bɔt in go lɛf wan pan di fambul dɛn na Izrɛl fɔ an fɔ de rul, ɛn na fɔ in savant Devid in sek ɛn bikɔs i bin dɔn pik Jerusɛlɛm fɔ insɛf.

Sɔlɔmɔn In Ɛnimi Dɛn

¹⁴ PAPA GƆD mek Adad tɔn pan Sɔlɔmɔn. Adad na di kiŋ na Idɔm in bɔypikin.

¹⁵ Di tɛm we Devid bin de fɛt wit Idɔm, na Joab we na di ami kɔmanda bin go Idɔm fɔ go bɛr di man dɛn we day, dɔn in kil ɔl di man dɛn we bin de na Idɔm.

¹⁶ Dɛn tek siks mɔnt na Idɔm de kil ɔl di man dɛn.

¹⁷ Bɔt da tɛm de Adad na bin smɔl bɔbɔ so i rɔnawe go Ijipt wit sɔm ɔfisa dɛn na Idɔm we bin de wok fɔ in papa.

¹⁸ Dɛn waka frɔm Midian te go Paran, dɔn dɛn tek sɔm man dɛn na Paran fɔ fala dɛn go Ijipt te dɛn rich to di kiŋ. Di kiŋ gi Adad os ɛn land fɔ tap wit tin fɔ it.

¹⁹ Di kiŋ bin so lɛk Adad dat i gi am in wɛf we na Kwin Tapiniz in sista fɔ mared.

²⁰ Tapiniz in sista bɔn wan bɔypikin fɔ am we nem Gɛnubath. Na Tapiniz insɛf sɛf mɛn di bɔbɔ na di kiŋ in kiŋ os ɛn i gro wit di kiŋ in yon bɔypikin dɛn.

²¹ Wɛn Adad de na Ijipt nain i yɛri se Devid dɔn day ɛn Joab we na bin kɔmanda na di ami insɛf dɔn day. Nain i tɛl di kiŋ se in want fɔ go bak nain kɔntri.

²² Di kiŋ aks am wetin i want so we i nɔ gɛt we mek i want fɔ go bak. Adad ansa am se natin ɛn beg am se lɛ i lɛf am fɔ go.

²³ PAPA GƆD mek ɔda ɛnimi tinap pan Sɔlɔmɔn. Dis wan na Rezɔn, Ɛlayada in pikin we bin dɔn rɔnawe kɔmɔt to in masta Kiŋ Adadeza na Zoba.

²⁴ Rezɔn gɛda man dɛn fɔ de wit am ɛn fɔ fɔm rebɛl grup. Dis grup yaso fɔm wɛn Devid bin dɔnawe wit di ami na Zoba, Dɛn go tap na Damaskɔs ɛn bin kam bi kiŋ.

²⁵ Rezɔn na bin wan man we bin de mɔna Izrɛl di tɛm we Sɔlɔmɔn na bin kiŋ, ɛn insɛf bin ad to di prɛzhɔ we Adad bin de gi Sɔlɔmɔn. Rezɔn bin de rul Eram ɛn i nɔ bin lɛk Izrɛl.

PAPA GƆD Mek Prɔmis To Jɛroboam

²⁶ Di ɔda pɔsin we bin de mɔna Sɔlɔmɔn na Jɛroboam. In papa na Nebat bɔt in bin dɔn day, In mama nem Pɛrua. Jɛroboam na bin wan pan Sɔlɔmɔn in ɔfisa dɛn, ɛn na Zɛrida in kɔmɔt to Ifrem fambul.

²⁷ Na dis kayn we i bin de mɔna Sɔlɔmɔn: Sɔlɔmɔn bin de mek wan ples na di ist pat na Jerusɛlɛm ɛn de bil di wɔl rawnd in papa Devid in siti bak.

²⁸ Jɛroboam na bin gud wokman, ɛn wɛn Sɔlɔmɔn si se i de wok fayn, i put am fɔ de inchaj ɔf di wokman dɛn we dɛn bin fos fɔ wok we kɔmɔt na Ifrem ɛn Manasɛ dɛn famili eria.

²⁹ Wande Jɛroboam bin de travul kɔmɔt Jerusɛlɛm wɛn in ɛn prɔfɛt Aija we kɔmɔt Shaylo mitɔp na rod. Aija bin wɛr nyu klos ɛn na dɛn tu nɔmɔ bin de de.

³⁰ Aija chɛr di nyu klos we i bin wɛr to twɛlv pis,

³¹ dɔn i tɛl Jɛroboam fɔ tek tɛn pan di twɛlv pis. I tɛl am se PAPA GƆD, di PAPA GƆD fɔ Izrɛl se in go skata di kindɔm na Sɔlɔmɔn in an ɛn gi in di Jɛroboam tɛn pan di fambul dɛn na Izrɛl fɔ de rul.

³² Bɔt fɔseka in savant Devid ɛn Jerusɛlɛm we na de in dɔn pik, in go mek Sɔlɔmɔn gɛt wan fambul nɔmɔ fɔ rul.

³³ I se wetin mek in de du dat na bikɔs dɛn dɔn kɔmɔt to am ɛn go wɔship Ashtorɛt, dɛn Sidonian dɛn gɔd wit Kɛmɔsh, dɛn Moabayt yon gɔd, ɛn Molɛk, dɛn Amonayt dɛnsɛf yon gɔd. I se dɛn nɔ du wetin i tɛl dɛn, ɛn sɛf nɔ obe in lɔ we Sɔlɔmɔn in papa Devid bin de obe.

³⁴ I se in nɔ go pul di wanol kindɔm na Sɔlɔmɔn in an. I se in go lɛf am fɔ bi kiŋ te i day bikɔs ɔf in savant Devid we bin de obe am.

³⁵ I se in go tek di kindɔm na Sɔlɔmɔn in bɔypikin in an ɛn gi in di Jɛroboam tɛn pan di Izrɛl fambul dɛn fɔ rul.

³⁶ I se na wan fambul nɔmɔ in go gi to Sɔlɔmɔn in bɔypikin fɔ rul; ɛn in de du dat bikɔs in nɔ want in savant Devid in nem fɔ ɔt ɛn fɔseka Jerusɛlɛm we na de in dɔn pik lɛ dɛn de wɔship am

³⁷ I se in go mek Jɛroboam rul di wanol Izrɛl ɛn ɔl usay i want,

³⁸ ɛn if i obe am ɛn du ɔl wetin i tɛl am fɔ du lɛkɛ aw Devid bin de du, in PAPA GƆD go de wit am ɛn mek in Jɛnareshɔn dɛnsɛf rul afta am.

³⁹ I se in go pɔnish Devid in jɛnareshɔn bikɔs ɔf Sɔlɔmɔn in sin, bɔt i nɔ go bi fɔ ɛva.

⁴⁰ Sɔlɔmɔn tray fɔ kil Jɛroboam bɔt i nɔ ebul bikɔs Jɛroboam rɔnawe go Ijipt to kiŋ Shishak. I de de te Sɔlɔmɔn day.

Sɔlɔmɔn Day

⁴¹ Ɔl di ɔda tin dɛn we Sɔlɔmɔn du lɛkɛ di wok we i du ɛn di sɛns sɛf we i gɛt, ɔl rayt na di istri buk we dɛn rayt bɔt Sɔlɔmɔn.

⁴² Sɔlɔmɔn rul Izrɛl fɔ fɔti ia,

⁴³ dɔn i day ɛn dɛn bɛr am nain papa Devid in siti. Nain bɔypikin Rɛoboam bigin rul afta am as kiŋ.