1 Kiŋ 10 - Krio Fɔs Oli Baybul

Di Kwin Na Shiba Go Fɛn Sɔlɔmɔn

¹ Wɛn di kwin na Shiba yɛri bɔt wetin Sɔlɔmɔn de du ɛn aw in ɛn PAPA GƆD de tayt wan, i go fɛn am ɛn tɛst am wit at at kwɛshɔn dɛn.

² I rich Jerusɛlɛm wit bɔku pipul dɛn, we go wit kamɛl dɛn. Di kamɛl dɛn tot lod wit ɔlkayn tiŋs lɛkɛ spays, gold ɛn miniral ston dɛn. I tɛl Sɔlɔmɔn ɔl wetin i bin mekɔp fɔ tɛl am.

³ Sɔlɔmɔn ansa ɔl in kwɛshɔn dɛn ɛn nɔn nɔ bin traŋa fɔ am fɔ ansa.

⁴ Wɛn di kwin si aw Sɔlɔmɔn sho in sɛns ɛn di os we i bil,

⁵ di difrɛn kayn it na di tebul, di we aw in ɔfisa dɛn sidɔm na tebul, di wokman dɛn insay dɛn yunifɔm, di man dɛn we de sav wayn, di we aw di kiŋ de ɔfa bɔn sakrifays, in mɔt ful.

⁶ Nain i tɛl di kiŋ se ɔl wetin in bin de yɛri bɔt am nain kɔntri,, bɔt wetin i dɔn du ɛn wetin i dɔn gɛt, na tru.

⁷ I se in nɔ bin biliv pas we in dɔn si fɔ insɛf wit in yon yay. I se ɔl wetin in yɛri nɔ du sɛf bikɔs wetin in dɔn si so pas ɔl wetin i dɔn yɛri.

⁸ I se in no se in ɔfisa dɛn ɛn wokman dɛn ɔl go de gladi fɔ sidɔm wit am fɔ de yɛri wetin de kɔmɔt nain mɔt nɔmɔ.

⁹ I prez PAPA GƆD se, “Lɛ wi Prez PAPA GƆD, we na yu PAPA GƆD we sho yu se i lɛk yu ɛn dɔn mek yu kiŋ fɔ Izrɛl. Bikɔs PAPA GƆD in lɔv nɔ de dɔn fɔ Izrɛl, na dat mek i mek yu bi kiŋ fɔ lɛ jɔstis, fia ple ɛn tret biznɛs go de.”

¹⁰ I gi Sɔlɔmɔn fo tawzin kilo gold, bɔku bɔku spays ɛn miniral ston dɛn. Wande nɔbɔdi nɔ kɛr bɔku spays lɛkɛ di wan we di kwin na Shiba gi kiŋ Sɔlɔmɔn.

¹¹ Iram in ship dɛn pul bɔku gold kɔmɔt na Ofir; dɛn briŋ almɔg bod ɛn miniral ston dɛn.

¹² Sɔlɔmɔn yuz di ɔlmɔg bod fɔ mek relin na PAPA GƆD in os ɛn in yon kiŋ os we i bil fɔ insɛf; ɛn yuz am bak fɔ mek ap ɛn laya fɔ di myuzishian dɛn. Dɛn nɔ pul da kayn fayn almɔg bod de te tide.

¹³ Kiŋ Sɔlɔmɔn gi di kwin we kɔmɔt Shiba ɔl wetin i aks fɔ. Dat nɔ miks pan di ɔda tiŋs dɛn we in as kiŋ fɔ gi am. Di kwin ɛn ɔl in pipul dɛn we fala am tɔn bak go na dɛn kɔntri.

Kiŋ Sɔlɔmɔn In Jɛntri

¹⁴ Ɛvri ia Kiŋ Sɔlɔmɔn kin gɛt lɛkɛ twɛnti-tri tawzin kilo gold.

¹⁵ Dat nɔ miks pan di taks we dɛn biznɛsman dɛn de pe, ɛn di ɔda taks we dɛn kiŋ dɛn na Arebia ɛn dɛn gɔvna na dɛn ɔda distrikt dɛn de pe.

¹⁶ Kiŋ Sɔlɔmɔn mek tu ɔndrɛd big big shild ɛn kɔba ich wan wit sɛvin kilo gold.

¹⁷ I mek tri ɔndrɛd ɔda smɔl shild dɛn ɛn kɔba ich wan wit bɔt sɔm tu kilo gold. I put ɔl na Libanɔn Fɔrɛst Ɔl.

¹⁸ Di kiŋ mek in chia wit ayvri ɛn kɔba sɔm pat wit gold.

¹⁹ Di chia gɛt siks stɛp, dɔn i mek pantap di bak rɛst, rawnd. Di tu sayd dɛn gɛt say fɔ rɛst an, dɔn i kav tu layɔn ɛn put dɛn fɔ tinap na di tu sayd.

²⁰ Di stɛp dɛn ɔl gɛt tu tu layɔn; wan na lɛft an wan na raytan. Dɛn nɔ mek dis kayn chia ya wande fɔ ɛni ɔda kiŋ.

²¹ Ɔl di kiŋ in kɔp dɛn we i de drink pan na gold, ɛn ɔl di plet ɛn kɔp dɛn na Libanɔn Fɔrɛst Ɔl na piɔ gold. Nɔn silva nɔ bin de de bikɔs silva nɔ bin gɛt wan bɛtɛ valyu Sɔlɔmɔn in tɛm.

²² Di kiŋ gɛt ship dɛn we de go si wit Iram insɛf yon ship dɛn. Dɛn kin kam ɛvri tri ia wit gold, silva, ayvri, ep ɛn babu dɛn.

²³ Kiŋ Sɔlɔmɔn bin pas ɔl di kiŋ dɛn na di wɔl pan sɛns ɛn jɛntri.

²⁴ Ɔlman na wɔl bin de kam fɔ tɔk wit am fɔ yɛri nɔmɔ di kayn sɛns we PAPA GƆD gi am.

²⁵ Ɛvri ia wɛn pipul dɛn go fɛn am dɛn kin kɛr gold, silva, klos, spays, ɔs ɛn myul.

²⁶ Sɔlɔmɔn gɛda bɔku bɔku ɔs ɛn karej. I gɛt wan tawzin fo ɔndrɛd karej ɛn twɛlv tawzin ɔs we i kip na di siti dɛn we i bil fɔ dɛn. I kip sɔm sɛf na Jerusɛlɛm.

²⁷ I mek silva de ɔlɔbɔt na Jerusɛlɛm lɛk ston ɛn lɛ sida tik bɔku ɔlsay lɛkɛ aw sikamɔ tik bɔku na Juda.

²⁸ Na Kyu ɛn Ijipt Sɔlɔmɔn bay ɔl in ɔs dɛn ɛn nain biznɛsman dɛn bay dɛn fɔ am.

²⁹ I bay wan karej siks ɔndrɛd silva kɔpɔ ɛn wan ɔs wan ɔndrɛd ɛn fifti. Na to dɛn man we bin de sɛl ɔs gi dɛn Itayt ɛn Sirian kiŋ dɛn Sɔlɔmɔn bin bay.