1 Kiŋ 1 - Krio Fɔs Oli Baybul

Kiŋ Devid Rich Ol Ej

¹ Kiŋ Devid bin dɔn ol naw. We dɛn kin kɔba am wit blankit i kin stil fil kol.

² So in savant dɛn tɛl am se lɛ dɛn go fɛn wan yɔŋ vajin gyal fɔ am we go tek kia ɔf am. Dɛn se di titi go de lidɔm nia am fɔ lɛ i go de kɔt kol.

³ Dɛn wirɔn ɔlɔbɔt na Izrɛl de fɛn dis fayn yɔŋ ledi na de dɛn go si wan we nem Abishag we kɔmɔt Shunam ɛn briŋ am to di kiŋ.

⁴ Di ledi bin fayn ɛn i bin tan lɛk in nɔsi we bin de du ɔltin fɔ di kiŋ, bɔt di kiŋ nɔ bin lidɔm wit am.

Adonayja Put Insɛf Ɔp Fɔ Bi kiŋ

⁵ Naw, Adonayja, we in yon mami na Agit put insɛf ɔp se nain fɔ bi kiŋ. I rɛdi ɔs ɛn karej dɛn ɛn fifti man fɔ de lid am.

⁶ Na bɔbɔ we wande in dadi nɔ vɛks pan am se i ambɔgin, na man wit gud trenin. Na bin fayn yɔŋman ɛn dɛn bɔn am afta Absalɔm.

⁷ Adonayja ɛŋed wit Joab, dat na Zɛruaya in bɔypikin, ɛn wit Abiata, di man we de mek sakrifays fɔ pipul sin. Dɛn bato am.

⁸ Bɔt Zedɔk we insɛf na man we de sakrifays fɔ pipul sin dɛn, Bɛnaya we na Jɛoyada in bɔypikin, Prɔfɛt Nethan, Shimɛay wit Rɛy ɛn Devid in raytan man dɛn nɔ bin jɔyn kabudu wit Adonayja.

⁹ Adonayja mek ship, got ɛn dɛn fat kaw sakrifays, pantap Snek Rɔk nia Ɛnrogɛl. I invayt ɔl in brɔda dɛn we na di kiŋ in ɔda bɔypikin dɛn, ɛn ɔl di ɔda bigman dɛn na Juda we bin de na di kiŋ in gɔvmɛnt;

¹⁰ bɔt i nɔ invayt Prɔfɛt Nethan ɔ Bɛnaya, ɔ di kiŋ in sikyɔriti ɔ in ɔda brɔda we na Sɔlɔmɔn.

Devid Mek Sɔlɔmɔn Bi kiŋ

¹¹ Nethan go mit Sɔlɔmɔn in mama we na Bathshiba ɛn aks if i nɔ yɛri se Agit in bɔypikin we na Adonayja dɔn bi kiŋ ɛn Kiŋ Devid insɛf sɛf nɔ no natin.

¹² I advays am se if i wan sev in yon layf ɛn in bɔypikin Sɔlɔmɔn in layf,

¹³ lɛ i go to kiŋ Devid ɛn aks am se if i nɔ bin dɔn swɛ to am se nain bɔypikin Sɔlɔmɔn go sidɔm nain chia ɛn bi kiŋ afta am, ɛn if na so, wetin mek Adonayja dɔn bi kiŋ.

¹⁴ Nethan se we in di Bathshiba go de tɔk to di kiŋ, in go go insay de go mit dɛn ɛn tɔk se na so di tin bin bi.

¹⁵ Bathshiba insɛf go mit di kiŋ na di rum usay Abishag we kɔmɔt na Shuma bin de atɛnd to am. Di kiŋ bin dɔn ol.

¹⁶ Bathshiba nildɔŋ to di kiŋ fɔ sho rɛspɛkt, nain di kiŋ aks am wetin i want.

¹⁷ I ansa di kiŋ se, “Mi lɔd, yu bin dɔn prɔmis mi ɛn swɛ to PAPA GƆD we na yu PAPA GƆD se na yu bɔypikin Sɔlɔmɔn nain go tek yu ples go rul afta yu.

¹⁸ Naw, Adonayja dɔn mek insɛf kiŋ, ɛn kiŋ, yu we na kiŋ nɔ no natin sɛf.

¹⁹ I dɔn sakrifays bɔku bɔku fat ship, got ɛn kaw dɛn, dɔn i invayt ɔl yu bɔypikin dɛn wit Abiata we de mek sakrifays fɔ pipul sin ɛn Joab sɛf we na di ami kɔmanda, bɔt i nɔ invayt Sɔlɔmɔn.

²⁰ Kiŋ, di wanol Izrɛl de luk ɔp to yu fɔ lɛ yu tɛl dɛn udat go bi kiŋ afta yu.

²¹ If yu nɔ du dat naw dɔn yu day, dɛn go trit mi ɛn mi bɔypikin Sɔlɔmɔn lɛkɛ ɛnimi.”

²² Wɛn Bathshiba bin de tɔk to di kiŋ, nain Prɔfɛt Nethan rich de.

²³ Wɛn dɛn anawns Nethan to di kiŋ, i go insay ɛn baw to am fɔ sho rɛspɛkt.

²⁴ Nethan aks di kiŋ se if i bin dɔn tɔk ɛnitɛm se na Adonayja fɔ sidɔm nain chia ɛn bi kiŋ afta am.

²⁵ I se da vɛri de de Adonayja dɔn mek big sakrifays; i se i kil bɔku bɔku fat kaw, got ɛn ship, dɔn i invayt di kiŋ in bɔypikin dɛn wit Joab we na kɔmanda fɔ di ami ɛn Abiata we na man we de mek sakrifays fɔ pipul sin. I se da momɛnt de sɛf we in de tɔk so, na big big pati Adonayja ɛn in kabudu dɛn de pan, ɛn ɔlman de ala se, “Lɛ Kiŋ Adonayja gɛt lɔŋ layf.”

²⁶ I se dɛn nɔ invayt in di Nethan, Zedɔk we de mek sakrifays fɔ pipul sin, Bɛnaya we na Jɛoyada in bɔypikin ɛn Sɔlɔmɔn sɛf.

²⁷ I aks di kiŋ if na so i mekɔp fɔ du we in nɔ tɛl dɛn udat go sidɔm nain chia.

²⁸ Kiŋ Devid gi ɔda se lɛ dɛn kɔl Bathshiba fɔ am, so dɛn kɔl Bathshiba. Ɛn i go tinap bifo di kiŋ.

²⁹ Di kiŋ mek prɔmis to ɔlman. I se, “A swɛ to PAPA GƆD we de oba mi we nain dɔn sev mi pan ɔlkayn trɔbul.

³⁰ Wetin a bin prɔmis yu Bathshiba trade, we a bin swɛ to PAPA GƆD we na di PAPA GƆD we Izrɛl se na yu pikin Sɔlɔmɔn go bi kiŋ afta mi, tide, da prɔmis de we a bin mek a de du am.”

³¹ Bathshiba nildɔŋ bifo di kiŋ ɛn butu in fes na grɔn ɛn se, “Lɛ di kiŋ we na mi lɔd gɛt lɔŋ layf!”

³² Kiŋ Devid se lɛ dɛn kɔl Zedɔk we de mek sakrifays fɔ pipul sin, Prɔfɛt Nethan ɛn Bɛnaya we na Jɛoyada in bɔypikin. Wɛn dɛn ɔl kam tinap bifo am,

³³ i tɛl dɛn se, “Una put mi bɔysɔn Sɔlɔmɔn pantap mi yon myul ɛn lɛ i rayd am te go dɔŋ na Giɔn.

³⁴ Na Giɔn, Zedɔk we de mek sakrifays fɔ pipul sin ɛn Prɔfɛt Nethan fɔ anɔynt am as kiŋ fɔ Izrɛl. Una blo lawd lawd trɔmpɛt ɛn ala se, ‘Lɛ Kiŋ Sɔlɔmɔn gɛt lɔŋ layf!’

³⁵ Dɔn una briŋ am kam bak na ya lɛ i kam sidɔm na mi chia fɔ rul as kiŋ na mi ples. Nain a dɔn pik fɔ bi kiŋ fɔ Juda ɛn Izrɛl.”

³⁶ Bɛnaya, dat na Jɛoyada in bɔypikin ansa di kiŋ se in go du wetin i se. I se mek PAPA GƆD we na di kiŋ in PAPA GƆD ansa wetin i dɔn se so.

³⁷ I se in de pre se lɛkɛ aw PAPA GƆD bin dɔn de wit di kiŋ, na so i go de wit Sɔlɔmɔn ɛn mek i femɔs pas in papa Kiŋ Devid.

³⁸ So Zedɔk we de mek sakrifays fɔ pipul sin, Prɔfɛt Nethan, Bɛnaya we na Jɛoyada in bɔypikin, dɛn Kɛritayt ɛn dɛn Pɛlɛtayt, dɛn ɔl go wit Sɔlɔmɔn. Dɛn put am pantap Kiŋ Devid in myul ɛn go wit am na Giɔn.

³⁹ Zedɔk we de mek sakrifays fɔ pipul sin, go na di Tɛnt we oli ɛn tek di ɔn we di ɔyl de pan fɔ anɔynt Sɔlɔmɔn wit am. Dɔn dɛn blo trɔmpɛt ɛn ɔlman ala se “Lɛ Kiŋ Sɔlɔmɔn gɛt lɔŋ layf!”

⁴⁰ Ɔl di pipul dɛn go biɛn Sɔlɔmɔn ɛn fala am; dɛn ple flut ɛn bigin gladi. Di nɔys bin so bɔku dat di grɔn shek.

⁴¹ As Adonayja ɛn ɔl in pipul dɛn we i invayt nain pati de dɔn dɛn pati, dɛn yɛri di nɔys. Wɛn Joab yɛri di trɔmpɛt, i aks wetin mek dɛn de mek nɔys so na di siti.

⁴² I nɔ tɔk dɔn nain Jonɛtan bɔs pan dɛn. Jonɛtan na Abiata, dat na di man we de mek sakrifays fɔ pipul sin in bɔypikin. Adonayja kɔl am insay ɛn tɛl am se in na gud man ɛn in no se i mɔs gɛt gud nyuz fɔ dɛn.

⁴³ Jonɛtan ansa am se in nɔ gɛt nɔn gud nyuz fɔ am. I se Kiŋ Devid dɔn mek Sɔlɔmɔn bi kiŋ.

⁴⁴ I se infakt sɛf, di kiŋ dɔn sɛn am wit Zedɔk we de mek sakrifays fɔ pipul sin, Prɔfɛt Nethan, Bɛnaya we na Jɛoyada in bɔypikin, dɛn Chɛrɛtayt ɛn dɛn Pɛlɛtayt dɛn, ɛn se dɛn fɔ put am fɔ mek i rayd pantap in yon myul.

⁴⁵ I se Zedɔk we de mek sakrifays fɔ pipul sin, ɛn Prɔfɛt Nethan dɔn anɔynt Sɔlɔmɔn na Giɔn fɔ bi kiŋ. I se di pipul dɛn gladi fɔ am ɛn di wanol siti de sɛlibret, so na di nɔys dat dɛn bin de yɛri.

⁴⁶ I se fɔ mek tin swit, Sɔlɔmɔn dɔn sidɔm na di chia usay kiŋ fɔ sidɔm.

⁴⁷ I se di kiŋ in wokman dɛn ɔl dɔn go kɔŋratyulet Kiŋ Devid ɛn tɛl am se lɛ PAPA GƆD mek Sɔlɔmɔn in nem go ɔlɔbɔt na wɔl ɛn femɔs pas in di Devid. Di kiŋ sidɔm nain bed ɛn baw in ed ɛn wɔship PAPA GƆD. I se,

⁴⁸ “Lɛ wi prez PAPA GƆD, di PAPA GƆD we Izrɛl de wɔship, nain mek am pɔsibul fɔ mi fɔ si di wan we de tek mi ples na di chia tide.”

⁴⁹ Wɛn ɔl di pipul dɛn we Adonayja invayt yɛri di stori, dɛn ɔl fred, ɛn grap ɛn tɔn dɛn bak.

⁵⁰ Adonayja insɛf bigin fred Sɔlɔmɔn, so i grap go na di ɔlta ɛn go grip di ɔn dɛn we de, de.

⁵¹ Pipul dɛn go tɛl Sɔlɔmɔn se Adonayja de fred so i dɔn go na di ɔlta go grip di ɔn dɛn we de, de. Dɛn se i de ala se Kiŋ Sɔlɔmɔn fɔ swɛ se i nɔ go kil am.

⁵² Sɔlɔmɔn sɛn wɔd go gi am se if i biev insɛf, wan pin nɔ go krach am; bɔt if i de pan yuki yuki, i go day.

⁵³ Kiŋ Sɔlɔmɔn sɛn man dɛn fɔ go pul am kɔmɔt na di ɔlta. Adonayja go to am ɛn baw to am fɔ sho rɛspɛkt. Kiŋ Sɔlɔmɔn tɛl am lɛ i go nain os saful.