Fɔs Lɛta To Timoti 6 - Krio Fɔs Oli Baybul

¹ Ɔl dɛn Kristiɛn pipul we na slev fɔ luk se dɛn masta dɛn na pipul we dɛn fɔ rɛspɛkt, so dat nɔbɔdi nɔ go tɔk bad bɔt Gɔd in nem ɔ tɔk bad bɔt dɛn tin we wi de lan dɛn.

² Dɛn slev we dɛn masta na Kristiɛn nɔ fɔ se bikɔs dɛn ɔl na brɔda, dɛn nɔ go gi dɛn rɛspɛkt. Dɛn fɔ du dɛn wok bɛtɛ sɛf, bikɔs di wok we dɛn de du go bɛnifit dɛn masta we na Kristiɛn ɛn we lɛk Gɔd, lɛkɛ dɛnsɛf. Yu fɔ de lan pipul dɛn tin ya ɛn yu fɔ de tɛl pipul bɔt dɛn.

Dɛn Tin we Tru ɛn Dɛn Tin we Nɔ Tru

³ Ɛnibɔdi we de lan pipul difrɛn tin ɛn we nɔ gri wit di tru wɔd dɛn we wi Masta Jizɔs tɔk, dat na aw wi de lan pipul fɔ waka wit Gɔd,

⁴ da pɔsin de prawd bad ɛn i nɔ sabi natin; i jɛs lɛk fɔ de agyu ɛn mek plaba fɔ wan wan wɔd dɛn, ɛn dat bad bikɔs i de mek pipul jɛlɔs dɛn kɔmpin, i de mek dɛn nɔ gɛt wanwɔd, i de mek dɛn kɔs dɛn kɔmpin ɛn mek dɛn luk se dɛn kɔmpin want du dɛn bad;

⁵ ɛn i de mek dɛn man we nɔ de tink rayt ɛn we nɔ sabi igen wetin tru bɔt Krays, agyu ɔltɛm. Dɛn fil se Gɔd yon we nain fɔ tek jɛntri. Yu nɔ fɔ gɛt natin fɔ du wit dɛn.

⁶ Fɔ du wetin Gɔd want de mek pɔsin jɛntri, if da pɔsin de satisfay wit in layf ɛn gladi fɔ di wok we i de du.

⁷ Wi nɔ briŋ natin kam na dis wɔl, wi nɔ go kɛr natin go.

⁸ If wi gɛt it fɔ it ɛn klos fɔ wɛr nɔmɔ, wi fɔ satisfay.

⁹ Bɔt dɛn wan we want jɛntri go want du bad, ɛn dɛn fulish tin we dɛn want we nɔ gud fɔ dɛn, na trap we de mek dɛn layf pwɛl ɔltogɛda.

¹⁰ Fɔ lɛk mɔni de mek pɔsin du ɔl kayn bad tin. Sɔm Kristiɛn dɛn we bin want mɔni bad bad dɔn lɛf fɔ fala Gɔd, bɔku waala dɔn pwɛl dɛn at.

Dɛn Tin we Pɔl Tɛl Timoti fɔ Du

¹¹ Bɔt yu we de wok fɔ Gɔd nɔ fɔ miks pan ɔl dɛn tin ya. Tray fɔ de waka tret, fɔ de du lɛkɛ aw Gɔd want, fɔ biliv Gɔd, fɔ lɛk pipul, fɔ de bia ɛn fɔ de du tin saful, saful.

¹² Fɛt fɔ di biliv we yu biliv pan Krays we gud, ɛn ol di layf we go de sote go we yu gɛt wit Gɔd, gud; na Gɔd kɔl yu fɔ gi yu da layf de ɛn na bɔt dat yu dɔn tɔk plen wan bifo plɛnti pipul.

¹³ Bifo Gɔd we de gi ɔltin na layf, ɛn bifo Jizɔs Krays we nɔ fred fɔ tɔk bɔt insɛf bifo da gɔvna we dɛn kɔl Pɔnchɔs Paylet, a de tɛl yu dɛn tin ya:

¹⁴ Yu fɔ du ɔl wetin a dɔn tɛl yu, yu nɔ fɔ miks pan sin, so dat nɔbɔdi nɔ go blem yu frɔm naw te wi Masta Jizɔs kam bak.

¹⁵ Gɔd we na di wangren Rula we gɛt prez, di Kiŋ fɔ ɔl dɛn kiŋ, di Masta fɔ ɔl dɛn masta go mek pipul si Krays wɛn di rayt tɛm rich.

¹⁶ Nain wangren nɔ de day, ɛn i de na layt we mɔtalman nɔ ebul kam klos, nɔ mɔtalman nɔ si am yet ɛn nɔ mɔtalman nɔ ebul si am. Mek wi rɛspɛkt am ɛn mek in pawa rul di wɔl sote go! Emɛn.

¹⁷ As fɔ dɛn wan we jɛntri na dis wɔl, tɛl dɛn mek dɛn nɔ prawd, ɛn mek dɛn nɔ abop pan dɛn jɛntri, we sɔntɛm nɔ go de tumara; mek dɛn abop pan Gɔd we de gi wi ɔltin plɛnti plɛnti fɔ mek wi at gladi.

¹⁸ Dɛn yon jɛntri fɔ bi di plɛnti plɛnti gud wok we dɛn de du, dɛn fɔ fri an ɛn dɛn fɔ lɛk fɔ sheb wetin dɛn gɛt.

¹⁹ If dɛn du dat dɛn go rɛdi fɔ di tɛm we gɛt fɔ kam, so dat dɛn go gɛt da layf we na di tru layf.

²⁰ Duya, Timoti, kip ɔl dɛn tin we a dɔn tɛl yu insay yu at ɛn du dɛn ɔltɛm. Nɔ miks pan dɛn tɔk ɛn dɛn fulish plaba we nɔ gɛt natin fɔ du wit Gɔd, we sɔm pipul de mistek kɔl “sabi”.

²¹ Sɔm pipul we bin se dɛn “sabi” dɛn tin ya, nɔ no usay dɛn de tide, dɛn nɔ biliv Gɔd igen. Mek Gɔd sho una ɔl aw i gud.