Fɔs Lɛta To Timoti 5 - Krio Fɔs Oli Baybul

Wetin Fɔ Du fɔ dɛn Wan we Biliv Gɔd

¹ Yu nɔ fɔ ala pan man we big pas yu, yu fɔ tɔk to am lɛkɛ se na yu papa. Yu fɔ tek dɛn yɔŋman lɛkɛ yu brɔda dɛn;

² dɛn big uman dɛn lɛkɛ yu mama; dɛn yɔŋ uman lɛkɛ yu sista dɛn, yu nɔ fɔ go tu fa wit dɛn.

³ Yu fɔ rɛspɛkt dɛn mared uman we dɛn man dɔn day, we nɔ gɛt nɔbɔdi fɔ ɛp dɛn.

⁴ Bɔt if uman we in man dɔn day gɛt pikin ɔ grampikin, in pikin ɔ grampikin fɔ du wetin ɔl pikin ɛn grampikin fɔ du fɔ dɛn mami ɛn dadi ɛn fɔ dɛn grani ɛn grandadi dɛn fɔ gi dɛn ɔl wetin dɛn fɔ gɛt, bikɔs if dɛn du dat, Gɔd go satisfay wit dɛn.

⁵ Uman we in man dɔn day we nɔ gɛt nɔbɔdi fɔ mɛn am go abop pan Gɔd ɛn i go de pre de ɛn nɛt de aks Gɔd fɔ ɛp am.

⁶ Bɔt uman we in man dɔn day we jɛs liv fɔ ɛnjɔy layf, na uman we dɔn day pan ɔl we i gɛt layf.

⁷ Tɛl dɛn pipul ya fɔ du dɛn tin we a tɛl dɛn fɔ du, so dat nɔbɔdi nɔ go blem dɛn fɔ ɛnitin.

⁸ If ɛnibɔdi nɔ de mɛn in fambul dɛn, pati kla in yon mami ɛn dadi, da pɔsin de de du lɛkɛ se fɔ biliv pan Gɔd nɔ min natin, i wɔs pas pɔsin we nɔ biliv pan Gɔd wande.

⁹ Nɔ put ɛni uman we in man dɔn day in nem dɔŋ na rɛjista wit dɛn ɔda uman dɛn we dɛn man dɔn day te i dɔn rich siksti ia. Pantap dat, na wan tɛm nɔmɔ i fɔ dɔn mared,

¹⁰ ɛn ɔlman fɔ no am fɔ di gud tin dɛn we i de du: i fɔ bi uman we tren in pikin dɛn gud, we kin du gud fɔ trenja, we kin wok fɔ di Kristiɛn dɛn, we kin ɛp dɛn pipul we de pan trɔbul, ɛn we kin du ɔl kayn gud wok.

¹¹ Nɔ put dɛn yɔŋ uman we dɛn man dɔn day we nɔ rich siksti ia yet dɛn nem dɔŋ, bikɔs wɛn dɛn want mared bad bad, dɛn kin lɛf fɔ fala Krays,

¹² so dɛn kin mek Gɔd kɔndɛm dɛn bikɔs dɛn brok di prɔmis we dɛn bin dɔn prɔmis fɔs fɔ fala Krays.

¹³ Pantap dat, dɛn kin jɛs de go frɔm os to os aydul wan, dɛn kin de koŋosa, de bizabɔdi, ɛn tɔk bɔt tin we dɛn nɔ fɔ tɔk bɔt.

¹⁴ So a fil se i bɛtɛ mek dɛn yɔŋ uman we dɛn man dɔn day mared bak, gɛt pikin ɛn wok mek dɛn man ɛn pikin biznɛs rayt, so dat dɛn pipul we nɔ lɛk wi nɔ go ebul tɔk ɛni bad tin bɔt wi.

¹⁵ Sɔm pan dɛn uman we dɛn man dɔn day dɔn lɛf fɔ fala Krays, na Setan dɛn de fala naw.

¹⁶ Bɔt if ɛni Kristiɛn uman gɛt sɔm fambul dɛn we dɛn man dɔn day, nain fɔ mɛn dɛn, i nɔ fɔ mek di chɔch gɛt da wɔri de, so dat di chɔch kin fri fɔ mɛn dɛn uman we dɛn man dɔn day, we nɔ gɛt nɔbɔdi fɔ mɛn dɛn.

¹⁷ Dɛn bigman we de du dɛn chɔch lida wok gud, pati kla di wan dɛn we de wok traŋa wan fɔ tɛl pipul bɔt Gɔd ɛn tich, fɔ gɛt gud pe ɛn rɛspɛkt.

¹⁸ Lɛkɛ aw dɛn rayt na Gɔd in Buk, we dɛn se, “Nɔ fɔ tay dɛn ebi kaw dɛn mɔt wɛn dɛn de mas rɛs fɔ mek di kanda kɔmɔt” ɛn igen “Wokman fɔ gɛt di pe we i wok fɔ”.

¹⁹ Yu nɔ fɔ lisin if dɛn se wan bigman du tin we nɔ rayt, pas if na tu ɔ tri pɔsin we si, tɔk am.

²⁰ Yu fɔ tɔk pan ɔl dɛn wan we nɔ gri lɛf fɔ sin, bifo dɛn kɔmpin, mek dɛn kɔmpin go fred fɔ sin.

²¹ Bifo Gɔd, Jizɔs Krays, ɛn in gud enjɛl dɛn, a de tɛl yu fɔ du dɛn tin ya; trit ɔlman di sem we, pɔsin we na yu padi ɛn pɔsin we nɔto yu padi.

²² Nɔ ɔri fɔ put yu an pan pɔsin ed fɔ pre fɔ am fɔ mek i go du Gɔd wok. Nɔ miks wit ɔda pipul fɔ sin; sin nɔ fɔ de na yu layf.

²³ Nɔ jɛs de drink wata nɔmɔ, tek lili wayn fɔ mek yu it go go dɔŋ gud ɛn fɔ we yu kin de sik sik.

²⁴ Sɔm pipul kin sin ɛn ɔlman kin si wetin dɛn de du ɛn dɛn kin no se Gɔd ɔ mɔtalman go jɔj dɛn, bɔt sɔm pipul kin sin ɛn nɔbɔdi nɔ no naw, bɔt pipul go no bambay.

²⁵ Semwe so, ɔlman kin si ɛn no wok we gud, bɔt if dɛn nɔ si am wantɛm so sɛf, di gud wok nɔ go ayd te go.