Fɔs Lɛta To Timoti 3 - Krio Fɔs Oli Baybul

Ovasia

¹ Na tru dɛn kin tɔk we dɛn kin se: If man want bi ovasia na gud gud wok i want du so.

² Ovasia nɔ fɔ gɛt bɔt nain layf; na wan wɛf nɔmɔ i fɔ gɛt, i fɔ bi siriɔs pɔsin, i fɔ ebul kɔntrol insɛf, i fɔ de biev lɛkɛ pɔsin wit sɛns; i fɔ opin in os to trenja; i fɔ ebul tich pipul;

³ i nɔ fɔ de drɔnk, i nɔ fɔ de vɛks kwik kwik, i nɔ fɔ de mek plaba; i nɔ fɔ lɛk mɔni;

⁴ i fɔ si dat ɔltin de go fayn nain os, i fɔ mek in pikin dɛn rɛspɛkt am ɛn yɛri in wɔd.

⁵ If pɔsin nɔ ebul mek ɔltin fayn nain yon os, aw i go ebul mek ɔltin fayn na Gɔd in chɔch?

⁶ I nɔ fɔ bi man we jɛs no Krays bikɔs sɔntɛm i go prawd, ɛn dat go mek Gɔd kɔndɛm am lɛkɛ aw i bin kɔndɛm Setan.

⁷ I fɔ bi man we pipul we nɔto Kristiɛn sɛf de tɔk gud bɔt, so dat shem nɔ go mit am ɛn i nɔ go fɔdɔm insay Setan in trap.

Dɛn Wan we de Ɛp na Chɔch

⁸ Dɛn wan we de ɛp fɔ du Gɔd wok na chɔch, dɛnsɛf fɔ siriɔs, dɛn fɔ min wetin dɛn se; dɛn nɔ fɔ de drɔnk, dɛn nɔ fɔ want plɛnti tin fɔ dɛnsɛf;

⁹ dɛn fɔ biliv di tru tin we Gɔd tɛl dɛn wit ɔl dɛn at; ɛn dɛn nɔ fɔ dawt se wetin dɛn biliv na di rayt tin.

¹⁰ Na fɔ tray dɛn fɔs, if dɛn du wɛl, una kin mek dɛn bigin ɛp fɔ du Gɔd wok na chɔch.

¹¹ Dɛn wɛf sɛf fɔ siriɔs, dɛn nɔ fɔ de koŋosa; dɛn fɔ soba, dɛn fɔ ebul kɔntrol dɛnsɛf, ɛn dɛn fɔ de waka tret ɔltɛm.

¹² Man we de ɛp fɔ du Gɔd wok na chɔch fɔ gɛt wan wɛf ɛn fɔ ebul manej in wɛf ɛn pikin dɛn biznɛs gud.

¹³ Dɛn wan we du dɛn wok gud go gɛt rɛspɛkt ɛn dɛn nɔ go de dawt ɛn fred wɛn dɛn de tɔk bɔt di biliv we dɛn biliv pan Jizɔs.

Di Big Sikrit

¹⁴ A de abop fɔ kam fɛn yu, i nɔ go te igen, bɔt a de rayt dɛn tin ya so dat

¹⁵ if sɔntin sɛf mek a te fɔ kam, dis lɛta ya go mek yu no aw wi fɔ de du wɛn wi de wit Gɔd in pipul dɛn, dat na Gɔd we gɛt layf sote go, in chɔch, ɛn Gɔd in chɔch na di bakbon fɔ di tru tin we wi de tɛl pipul.

¹⁶ Nɔbɔdi nɔ go dinay se di sikrit we de insay wi rilijɔn na big wan: I kam lɛkɛ mɔtalman, Gɔd in Spirit sho se i rayt fɔ du dat. Enjɛl dɛn si am. Pipul tɔk bɔt am ɔlɔbɔt na dɛn difrɛn neshɔn. Pipul na wɔl bin biliv pan am, Gɔd tek am go ɛvin, ɛn put am nain raytan.