Fɔs Lɛta To Timoti 2 - Krio Fɔs Oli Baybul

Aw fɔ Pre na Chɔch

¹ Fɔs tin, a de beg una fɔ pre to Gɔd fɔ unasɛf ɛn fɔ ɔda pipul ɛn tɛl Gɔd tɛnki fɔ ɔlman na wɔl;

² fɔ dɛn wan we de rul ɛn ɔl dɛn bigman, so dat waala nɔ go de na wi layf, wi go gɛt kol at, wi go de waka klos Gɔd ɛn wi nɔ go du ɛnitin we go mek wi shem.

³ Na so wi fɔ pre; na dat go mek Gɔd we de sev wi, satisfay.

⁴ Gɔd want mek ɔlman sev ɛn mek dɛn no wetin tru.

⁵ Na wangren Gɔd de, ɛn wan pɔsin de midul Gɔd ɛn mɔtalman fɔ briŋ dɛn togɛda, dat na Jizɔs Krays we insɛf na mɔtalman,

⁶ i sakrifays in layf fɔ tek bay mɔtalman bak. Na di tin dat we, wɛn di rayt tɛm rich, Gɔd sho mɔtalman fɔ mek dɛn no se in want sev dɛn.

⁷ Na dat mek Gɔd pik mi fɔ bi in apɔsul, ɛn fɔ lan dɛn wan we nɔto Ju aw fɔ biliv pan Krays ɛn fɔ mek dɛn no wetin tru. Na tru a de tɔk, a nɔ de lay.

⁸ So a want mek dɛn man dɛn ɔlɔbɔt pre. Dɛn fɔ bi pipul we dɔn gi Gɔd dɛn layf, so dat wɛn dɛn es dɛn an ɔp fɔ pre, dɛn nɔ go vɛks pan pipul ɛn dɛn nɔ go de mɛmba bad fɔ dɛn pipul we ambɔg dɛn.

⁹ A nɔ want mek di uman dɛn de kɔl atɛnshɔn bay di we we dɛn drɛs, dɛn fɔ tek tɛm pik di klos we dɛn de wɛr, ɛn dɛn fɔ drɛs gud, dɛn nɔ fɔ de wɛr dɛn dia klos; dɛn nɔ fɔ de plant dɛn ia fayn tumɔs; dɛn nɔ fɔ wɛr gold ɔ pal.

¹⁰ Bɔt dɛn fɔ de du dɛn gud wok we uman we kɔl insɛf Gɔd uman fɔ du.

¹¹ Uman fɔ sidɔm saful de lan, i fɔ put in yay dɔŋ.

¹² A nɔ de gri mek uman tich ɔ tinap oba man ed, i fɔ sidɔm saful.

¹³ Bikɔs na Adam fɔs Gɔd mek, bifo i mek Iv;

¹⁴ nɔto Adam di snek bin mek ful, na di uman; na dat mek di uman sin.

¹⁵ Bɔt uman go sev wɛn i de bɔn pikin, if i biliv Krays, if i lɛk pipul, if i de fɔ Gɔd ɛn if i de kɔntrol insɛf pan ɔltin.