Fɔs Lɛta Fɔ Tɛsalonayka 4 - Krio Fɔs Oli Baybul

Di Layf we Gɔd Lɛk

¹ Mi brɔda dɛn, bifo a dɔn wetin a de tɔk, mek a tɛl una dis las tin. Una fɔ mɛmba se wi bin dɔn sho una aw una fɔ liv fɔ mek Gɔd satisfay, ɛn na so una liv, bɔt wi de tek Masta Jizɔs in nem beg una fɔ mek una tray fɔ liv layf we bɛtɛ sɛf pas di layf we una liv naw.

² Una no dɛn tin we wi bin dɔn tɛl una fɔ du we Masta Jizɔs insɛf se wi fɔ tɛl una.

³ Gɔd want mek una layf bi in yon, ɛn i nɔ want ɛnibɔdi fɔ tek in kɔmpin man ɔ wɛf.

⁴ Maredman fɔ no aw fɔ liv wit in wɛf di we we rayt na Gɔd ɛn mɔtalman yay;

⁵ i nɔ fɔ jɛs want in wɛf fɔ slip wit am nɔmɔ, lɛkɛ aw dɛn pipul we nɔ bisin bɔt Gɔd de du.

⁶ Wɛn i kam pan dis kayn tin, dat na, aw man fɔ biev to uman, i nɔ fɔ du in kɔmpin Kristiɛn bad. Wi bin dɔn wɔn una traŋa wan se Gɔd go pɔnish ɛnibɔdi we de du ɔl dɛn kayn tin ya.

⁷ Gɔd nɔ kɔl wi fɔ mek wi liv fri layf, wi nain yon pipul so wi fɔ liv di kayn layf we go sho se wi nain yon pipul.

⁸ So ɛnibɔdi we tɔn in bak pan dɛn tin ya we wi de lan dɛn, nɔto mɔtalman di pɔsin tɔn in bak pan, na Gɔd we gi wi in Spirit i tɔn in bak pan.

⁹ Nid nɔ de fɔ rayt tɛl una aw una fɔ lɛk una kɔmpin Kristiɛn dɛn, bikɔs Gɔd insɛf dɔn lan una dat.

¹⁰ Ɛn na so una lɛk ɔl di Kristiɛn dɛn we de ɔlɔbɔt na Masidonia. Bɔt, wi Kristiɛn pipul dɛn, wi de beg una fɔ lɛk dɛn pas dat.

¹¹ Una fɔ mekɔp fɔ liv kwayɛt layf, una nɔ fɔ put mɔt pan ɔda pipul biznɛs, ɛn una fɔ wok fɔ unasɛf fɔ gɛt wetin una want, jɛs lɛkɛ aw wi bin dɔn tɛl una wɛn wi bin de wit una.

¹² If una du dat una go mek dɛn pipul we nɔto Kristiɛn rɛspɛkt una, ɛn una nɔ go gɛt fɔ abop pan ɛnibɔdi fɔ ɛnitin.

Di Masta Go Kam Bak

¹³ Wi brɔda dɛn, wi want mek una no di tru tin bɔt dɛn pipul we dɔn day, so dat una nɔ go sɔri lɛkɛ aw dɛn pipul we nɔ abop fɔ gɛt layf sote go na ɛvin kin sɔri.

¹⁴ Wi biliv se Jizɔs day, bɔt i rayz frɔm di grev, so wi biliv se, semwe so Gɔd go tek dɛn pipul we bin biliv pan Jizɔs sote dɛn day go na di say we Jizɔs de.

¹⁵ Di tin we wi de kam lan una naw na tin we di Masta bin dɔn lan una. I bin se, wi we nɔ go day yet wɛn i kam bak, nɔ go rich na ɛvin bifo dɛn pipul we bin dɔn day.

¹⁶ Pipul go yɛri lawd vɔys de tɛl dɛn wetin dɛn fɔ du, dɛn go yɛri di edman fɔ ɔl di enjɛl dɛn in vɔys, Gɔd in trɔmpɛt go blo, ɛn di Masta insɛf go kɔmɔt na ɛvin kam dɔŋ. Na dɛn pipul we bin biliv pan Krays sote dɛn day fɔs go rayz frɔm dɛn grev;

¹⁷ afta dat, Gɔd go mek wi we nɔ go dɔn day yet ɛn dɛn wan we bin dɔn day, go ɔp na di klawd, ɛn wi ɔl go gɛda rawnd di Masta. So wi go de wit di Masta ɔltɛm.

¹⁸ Una tek dɛn wɔd ya fɔ kɔrej una kɔmpin Kristiɛn dɛn.