Fɔs Lɛta Fɔ Tɛsalonayka 2 - Krio Fɔs Oli Baybul

Di Wok we Pɔl Du na Tɛsalonayka

¹ Wi brɔda dɛn, na sɔntin bin mek wi go to una ɛn unasɛf no se wi satisfay da say de, bikɔs wi nɔ wes wi tɛm.

² Una dɔn no bɔt di bad bad tin dɛn we dɛn du wi fɔ mek wi sɔfa ɛn aw dɛn tɔk bɔt wi fɔ mek wi at pwɛl na Fili pay bifo wi rich Tɛsalonayka. Ɛn pan ɔl we pipul tray fɔ tap wi mek wi nɔ tɔk, Gɔd ɛp wi mek wi nɔ fred fɔ tɛl una di Gud Nyuz we Gɔd tɛl wi fɔ tɛl una.

³ Di Gud Nyuz we wi tɛl una nɔto bay mistek, ɛn nɔto bad wi mɛmba wɛn wi tɛl una, wi nɔ bin jɛs want mek una ful nɔmɔ.

⁴ Bɔt wi de tɛl pipul wetin Gɔd want wi fɔ tɛl dɛn, bikɔs i gi wi dis wok we i si se in kin abop pan wi fɔ du am lɛkɛ aw i want wi fɔ du am. Wi nɔ de tray fɔ pliz mɔtalman, bɔt wi want fɔ pliz Gɔd we no wetin de na wi at.

⁵ Unasɛf no se wɛn wi bin de tɔk to una, wi nɔ bin de tɛl una dɛn tin we go mek una ed big, wi nɔ bin de abop na wi at se una go gi wi sɔntin, ɛn Gɔd no wetin de na wi at.

⁶ Wi nɔ bin de tray fɔ mek una ɔ ɛni ɔda pipul prez wi.

⁷ We wi na Krays in apɔsul dɛn, wi bin gɛt di rayt fɔ tɛl una fɔ du sɔntin fɔ wi, bɔt wi go kɛlɛkɛlɛ wit una lɛkɛ aw kombra kin bayo bayo in pikin dɛn.

⁸ Bikɔs wi lɛk una bad, wi bin rɛdi fɔ tɛl una di Gud Nyuz we Gɔd tɛl wi fɔ tɛl una ɛn fɔ day sɛf fɔ una. Wi bin lɛk una bad bad!

⁹ Wi brɔda dɛn, a no se una mɛmba aw wi bin de lebɔ traŋa wan! Wi bin de lebɔ de ɛn nɛt so dat una nɔ go gɛt fɔ wɔri fɔ gi wi mɔni, wɛn wi bin de tɛl una di Gud Nyuz we Gɔd tɛl wi.

¹⁰ Una no, una we biliv di Gud Nyuz, ɛn Gɔd sɛf no aw wi bin de du wɛn wi bin de wit una. Wi layf bin tan lɛkɛ aw Gɔd want am fɔ tan, i bin tret ɛn klin.

¹¹ Una no se wi trit una ɔl wan wan lɛkɛ aw dadi kin trit in pikin dɛn.

¹² Wi kin tɔk to una mek una at nɔ pwɛl, ɛn wi kin tɛl una ɔltɛm fɔ liv di kayn layf we go mek Gɔd satisfay wit una, bikɔs Gɔd kɔl una fɔ bi in yon pipul we i de rul ɛn fɔ gɛt pan di ɔna we i gɛt.

¹³ Di ɔda rizin we mek wi de tɛl Gɔd tɛnki ɔltɛm nain dis: wɛn wi tɛl una Gɔd in mɛsej, una lisin ɛn una biliv se nɔto mɛsej we mɔtalman briŋ, bɔt na Gɔd in wɔd ɛn na Gɔd in wɔd fɔ tru. Gɔd de wok insay una at, una we biliv pan am.

¹⁴ Mi brɔda dɛn, na di sem tin we bi to di Kristiɛn dɛn na Judia, de bi to una. Jɛs lɛkɛ aw di Ju pipul dɛn bin mek Gɔd in pipul dɛn we biliv pan Krays na Judia sɔfa, na semwe so una yon kɔntri man dɛn de mek una sɔfa.

¹⁵ Na dɛn sem Ju pipul ya kil di prɔfɛt dɛn, ɛn mek dɛn kil Masta Jizɔs ɛn mek wi sɔfa. Dɛn dɔn mek Gɔd vɛks pan dɛn bad wan! Dɛn wikɛd to ɔlman!

¹⁶ Dɛn tray fɔ tap wi mek wi nɔ tɛl dɛn pipul we nɔto Ju aw Gɔd go sev dɛn. Dɛn bin dɔn de sin plɛnti tɛm, ɛn dɛn nɔ bin tap fɔ sin, bɔt naw Gɔd dɔn vɛks pan dɛn ɛn i dɔn kɔndɛm dɛn.

Pɔl Want Go Bak to di Kristiɛn dɛn na Tɛsalonayka

¹⁷ Mi brɔda dɛn, di shɔt tɛm we wi bin jɛs gɛt fɔ lɛf una (na wi bɔdi nɔmɔ nɔ de wit una, bɔt wi de mɛmba una ɔltɛm), wi bin sɔri bad we wi nɔ de klos una ɛn wi bin de tray fɔ go to una bak.

¹⁸ Wi bin want tɔn bak go to una. Misɛf tray plɛnti tɛm fɔ go to una, bɔt Setan nɔ gri gi wi chans fɔ go.

¹⁹ Unasɛf no se na una ɛn ɔl dɛn ɔda pipul we biliv pan Krays de mek wi abop ɛn gladi ɛn una go mek wi prawd wɛn wi tinap bifo wi Masta Jizɔs wɛn i kam bak!

²⁰ Na una go mek wi prawd ɛn gladi, fɔ tru.