Pita In Fɔs Lɛta 4 - Krio Fɔs Oli Baybul

Aw dɛn Kristiɛn fɔ Liv

¹ So, bikɔs Krays sɔfa wɛn i day na di krɔs, unasɛf fɔ rɛdi wɛn una de sɔfa, fɔ tink lɛkɛ aw Krays bin de tink ɛnitɛm we i de sɔfa, bikɔs pɔsin we de sɔfa dɔn dɔn wit sin.

² So, frɔm naw sote una day, nɔto una at una fɔ de fala, bɔt na wetin Gɔd want una fɔ du.

³ Una nɔ wes mɔ tɛm igen. Di tɛm dɔn pas we una bin de du dɛn tin we dɛn pipul we nɔ no Gɔd lɛk fɔ du. Dɛn man ɛn uman bin de du tin we dɛn nɔ fɔ du wit dɛn bɔdi, una bin de fala una at fɔ du dɛn bad tin ya ɛn ɔda bad tin dɛn, una bin de drɔnk, una bin de mek dɛn wayl wayl pati, ɛn dɛn pati we pipul fɔ go drink sote dɛn drɔnk. Una bin de pre to dɛn tin we mɔtalman mek fɔ pre to pan ɔl we di Lɔ se mek una nɔ du dat, ɛn na tin dat we una fɔ shem fɔ du.

⁴ Dɛn pipul we nɔ no Gɔd, we una ɔl bin kia fri, de wɔnda naw bikɔs una nɔ de jɔyn dɛn igen fɔ liv bad layf; so dɛn de tɛl una tin we fɔ mek una fil bad.

⁵ Bɔt dɛn go gɛt fɔ ansa to Gɔd, we go jɔj dɛn wan we nɔ day yet ɛn dɛn wan we dɔn day, i nɔ go te igen.

⁶ Na dat mek dɛn wan we bin dɔn day sɛf bin dɔn yɛri di Gud Nyuz we Krays tɛl dɛn, so dat, pan ɔl we Gɔd bin dɔn jɔj dɛn fɔ wetin dɛn bin du wɛn dɛn de na dis layf, i bin want gi dɛn chans fɔ de wit am na ɛvin.

Ɛnitin we Gɔd Mek Una Sabi Du, Una Du Am Gud

⁷ Di tɛm we di wɔl go dɔn nɔ fa igen, so una ed fɔ stɛdi ɛn una fɔ waydawek fɔ de pre ɔltɛm.

⁸ Bɔt di tin we pas ɔl, na fɔ mek una lɛk una kɔmpin wit ɔl una at, bikɔs dɛn pipul we lɛk dɛnsɛf kin rɛdi ɔltɛm fɔ padin dɛn kɔmpin wɛn dɛn kɔmpin du dɛn bad.

⁹ Una fɔ gladi wɛn una kɔmpin Kristiɛn dɛn kam fɛn una, una nɔ fɔ de grɔmbul wɛn dɛn kam.

¹⁰ Ɛni tin we Gɔd mek una sabi du, una fɔ du am gud, so dat ɔda pipul go bɛnifit, lɛkɛ aw ɛnibɔdi we Gɔd gi sɔntin kin ol am fayn.

¹¹ Ɛnibɔdi we de tɛl pipul bɔt Gɔd, fɔ tɔk di mɛsej we Gɔd gi am; ɛn ɛnibɔdi we de ɛp fɔ du ɛni kayn wok, fɔ ɛp fɔ du da wok de wit ɔl di trɛnk we Gɔd gi am, so dat, pan ɔl wetin una de du, Gɔd go gɛt prez bikɔs una de waka wit Krays we wɔndaful ɛn we gɛt pawa sote go! Emɛn.

Una Go Sɔfa Lɛkɛ Aw Krays Bin Sɔfa

¹² Mi padi dɛn we a lɛk, una nɔ fɔ wɔnda we big big waala de mit una lɛkɛ na tin dat we nɔba bi,

¹³ bɔt una fɔ gladi bikɔs unasɛf de sɔfa lɛkɛ aw Krays bin sɔfa, so dat wɛn Krays kam bak wit ɔl in pawa, una go gladi fawe pas aw una gladi naw.

¹⁴ Una gɛt blɛsin wɛn pipul tɛl una tin we go at una bikɔs una biliv pan Krays, dat sho se Gɔd in Spirit, we gɛt pawa, de insay una.

¹⁵ If ɛni wan pan una gɛt fɔ sɔfa mek i nɔ bi se na bikɔs i kil pɔsin ɔ bikɔs i tif ɔ i du ɛni ɔda bad bad tin we dɛn jelman de du, ɔ bikɔs i go put in an pan ɔda pipul biznɛs.

¹⁶ Bɔt if na fɔseka Krays mek waala mit una, dat nɔ fɔ mek una shem, bɔt una fɔ tɛl Gɔd tɛnki we una na Kristiɛn.

¹⁷ Di tɛm we Gɔd go jɔj di wɔl nɔ fa igen, ɛn nain yon pipul dɛn fɔs i go jɔj. If Gɔd bigin wit wi we nain yon, aw tin go tan fɔ dɛn wan we nɔ biliv di Gud Nyuz we Gɔd sɛn to mɔtalman?

¹⁸ Dɛn rayt na Gɔd in Buk se, “If i traŋa fɔ pipul, we de du wetin Gɔd want, fɔ sev; wetin go bi to dɛn pipul we nɔ bisin bɔt Gɔd, we de pan sin?”

¹⁹ A tɛl una ɔl dis fɔ mek dɛn pipul we de sɔfa bikɔs dɛn no se na dat Gɔd want, lɛf dɛnsɛf na Gɔd an, ɛn du gud mɔ ɛn mɔ, bikɔs na Gɔd mek dɛn, ɛn i de du ɛnitin we i dɔn prɔmis se in go du.