Jɔn In Fɔs Lɛta 1 - Krio Fɔs Oli Baybul

Di Wɔd we na Layf

¹ Wi de rayt to una bɔt di Wɔd we gɛt layf, we bin dɔn de frɔm we Gɔd mek di wɔl. Wi dɔn yɛri am, wi dɔn si am wit wi yon yay, ɛn wi dɔn tɔch am wit wi an.

² Dis layf ya kam na wɔl ɛn wi si am; na dat mek wi de tɔk bɔt am ɛn wi de tɛl una se dis layf ya we go de sote go bin de wit di Papa ɛn na di Papa sɛn am to wi.

³ Wi de tɛl una bɔt wetin wi dɔn si ɛn yɛri, so dat wi ɔl go jɔyn an togɛda. We wi jɔyn an togɛda na wit di Papa ɛn in Pikin, Jizɔs Krays.

⁴ Wi de rayt ɔl dis to una fɔ mek wi ɔl gladi gud gud wan.

Gɔd na Layt

⁵ Dis na di mɛsej we Gɔd in Pikin tɛl wi ɛn nain wi de tɛl una: Gɔd na layt; daknɛs nɔ de pan am atɔl.

⁶ If wi se wi jɔyn an wit am, ɛn wi de waka na dak, dat min se wi de lay. Wi nɔ de tɔk tru ɛn wi nɔ de du wetin rayt.

⁷ Bɔt if wi de waka na di layt lɛkɛ we in na di layt, wi jɔyn an wit wi kɔmpin dɛn; Gɔd in Pikin, dat na Jizɔs, in blɔd go pul ɔl wi sin kɔmɔt pan wi ɛn mek wi klin.

⁸ If wi se sin nɔ de na wi layf, wi de mek wisɛf ful, ɛn wi nɔ de tɔk tru.

⁹ Bɔt if wi tɛl Gɔd bɔt wi sin dɛn, in we de du di rayt tin ɔltɛm ɛn ɔl wetin i prɔmis, wi kin abop se i go padin wi sin dɛn ɛn i go pul ɔltin we bad kɔmɔt na wi layf ɛn mek wi layf klin.

¹⁰ If wi se wi nɔ sin wande, wi de se Gɔd de lay, ɛn in wɔd nɔ gɛt ples na wi layf.