1 Kɔrint 4 - Krio Fɔs Oli Baybul

Krays In Apɔsul dɛn

¹ Una fɔ no se wi de du Gɔd wok, ɛn wi no plɛnti tin bɔt Gɔd we ɔda pipul nɔ ɔndastand ɛn na wi Gɔd pik fɔ ɛksplen dɛn to ɔda pipul.

² Ɛn igen, ɔl dɛn wan we de du ɛni kayn wok we dɛn masta tɛl dɛn fɔ du, fɔ put ɔl dɛn at pan di wok.

³ Bɔt a nɔ wɔri if una ɔ ɛni ɔda pipul tink se mi na gud pɔsin ɔ mi na bad pɔsin, ɛn a nɔ de jɔj misɛf.

⁴ Mi kɔnshɛns klia, bɔt dat nɔ min se a nɔ gɛt fɔlt. Na di Masta nɔmɔ go jɔj mi.

⁵ So una nɔ fɔ jɔj ɛnibɔdi bifo di rayt tɛm rich, dat na bifo di Masta kam. Dɛn tin we de na dak naw go kam na layt wande ɛn di Masta go mek ɔlman no wetin pipul bin de mekɔp na dɛn at fɔ du. Da tɛm de Gɔd go prez ɔl dɛn wan we fɔ gɛt prez.

⁶ Mi Kristiɛn brɔda dɛn, na fɔseka una mek a tek Apɔlɔs ɛn misɛf fɔ sho una fɔ mek una ɔndastand wetin a bin min wɛn a bin pul da parebul we se, “Una fɔ jɛs fala dɛn tin we rayt nɔmɔ, una nɔ fɔ du ɛni ɔda tin.” Una nɔ fɔ es wan pɔsin ɔp ɛn tɔn una bak pan ɔda wan.

⁷ Udat mek una bɛtɛ pas ɔda pipul? Nɔto Gɔd gi una ɔl wetin una gɛt? If na so, wetin fɔ mek una bost, lɛkɛ se nɔto gi Gɔd gi una ɔl wetin una gɛt?

⁸ Una fil naw se una dɔn gɛt ɔl wetin una fɔ gɛt? Una dɔn jɛntri? Una bin liv lɛkɛ kiŋ, we wi nɔ bin de wit una, a wish una na bin kiŋ fɔ tru, so dat wisɛf bin go rul wit una.

⁹ A tink se Gɔd dɔn put wi we na apɔsul biɛn ɔlman na di layn lɛkɛ pipul we dɛn kɔndɛm fɔ day bifo ɔda pipul! I dɔn put wi de fɔ mek ɔlman na wɔl ɛn ɔl di enjɛl dɛn si wi.

¹⁰ Fɔseka Krays wi na fulman, bɔt Krays dɔn mek una gɛt sɛns! Wi nɔ gɛt pawa, bɔt una gɛt pawa! Nɔbɔdi nɔ de luk wi, bɔt pipul rɛspɛkt una!

¹¹ Sote nɔ, tɛm kin de we wi nɔba it; tɛm kin de we wi nɔba drink ɛnitin; na chɛr chɛr klos wi kin wɛr; pipul kin bit wi; wi kin jɛs de go frɔm ples to ples, wi nɔba gɛt wan ples fɔ tap;

¹² wi kin de wok traŋa traŋa wan. Wɛn pipul se mek bad fala wi, wi kin se mek bɛtɛ fala dɛn; wɛn pipul dɛn mek wi sɔfa, wi kin bia;

¹³ wɛn dɛn tɔk bad bɔt wi, wi kin tɔk gud bɔt dɛn; plɛnti pipul tink se wi tan lɛkɛ tin we fɔ trowe ɛn te naw pipul de tink se wi layf nɔ bɛtɛ!

¹⁴ A nɔ de rayt dɛn tin ya fɔ mek una shem; na sho a de sho una aw una fɔ waka, bikɔs una na lɛkɛ mi yon pikin dɛn.

¹⁵ If una gɛt ɔmɔs tawzin ticha dɛnsɛf, we una de wit Krays, na wangren papa nɔmɔ una gɛt. We una de waka wit Krays Jizɔs, a dɔn bi una papa we a dɔn briŋ di Gud Nyuz kam to una.

¹⁶ Na dat mek, a de beg una fɔ waka wit Gɔd lɛkɛ aw a de waka wit am.

¹⁷ Na di rizin dis we mek a de sɛn Timoti go to una. I tan lɛkɛ mi pikin we a sho di Masta in we; a lɛk am bad; i de du wetin di Masta tɛl am fɔ du. I go mɛmba una bɔt dɛn rul we de gayd mi we a de waka na di nyu layf we Krays Jizɔs gi mi, ɛn we a de tich pipul na ɔl dɛn chɔch.

¹⁸ Sɔm pan una dɔn fil prawd bikɔs una tink se a nɔ go kam to una.

¹⁹ Bɔt if di Masta gri, i nɔ go te igen a go kam to una, ɛn da tɛm de a go si wetin dɛn prawd pipul ya ebul du, nɔto wetin dɛn ebul tɔk nɔmɔ.

²⁰ Gɔd in rul nɔto plɛnti tɔk gɛt am, na Gɔd in pawa gɛt am.

²¹ Wetin una want? Mek a tɔk pan una ɛn pɔnish una ɔ mek a tɔk saful to una bikɔs a lɛk una?