1 Kɔrint 16 - Krio Fɔs Oli Baybul

Di Mɔni we fɔ Gɛda fɔ Wi Kɔmpin Kristiɛn dɛn

¹ Wɛn una want gɛda di mɔni fɔ tek ɛp Gɔd in pipul dɛn na Judia; una fɔ de du wetin a tɛl dɛn Kristiɛn we de na dɛn chɔch na Galeshya fɔ du.

² Ɛvri Sɔnde, ɔlman fɔ put sɔm mɔni wansay, bay di mɔni we i de wok; una fɔ gɛda dɛn mɔni ya, so dat di tɛm we a kam, una nɔ go gɛt fɔ gɛda mɔni igen.

³ Wɛn a kam, a go sɛn pipul we una trɔs fɔ kɛr di mɔni go Jerusɛlɛm, a go gi dɛn lɛta fɔ mek di pipul dɛn na Jerusɛlɛm no se na wi sɛn dɛn.

⁴ Bɔt if i go bɛtɛ mek misɛf go, dɛn go go wit mi.

Wetin Pɔl Mekɔp Fɔ Du

⁵ A go kam to una wɛn a kɔmɔt Masidonia, bikɔs a go pas na Masidonia.

⁶ I luk lɛkɛ se di tɛm we a go de wit una go lɔŋ lili bit, sɔntɛm a go de wit una ɔl di kol sizin; dɛn una go ɛp mi mek a go di ɔda say we a want go, ilɛk usay dat go bi.

⁷ Wɛn a go to una a nɔ go jɛs want fɔ de shɔt tɛm nɔmɔ. If Gɔd gri, a go lɛk fɔ de lɔŋ wit una.

⁸ Bɔt na Ɛfisɔs ya a go de te di de we na Pɛntikɔst.

⁹ Chans de na ya fɔ du big wok ɛn bɛtɛ wok fɔ Gɔd, pan ɔl we plɛnti pipul de we nɔ want mek di wok go bifo.

¹⁰ Bɔt if Timoti rich to una, una mek i fil se una gladi fɔ we i go to una, bikɔs insɛf de wok fɔ di Masta lɛkɛ mi.

¹¹ Nɔbɔdi nɔ fɔ luk se we i yɔŋ, i nɔ go ebul du bɛtɛ wok, bɔt una fɔ ɛp am mek i go gɛt kol at wɛn i de go dɛn ɔda say dɛn we i gɛt fɔ go, so dat i go kam bak kam mit mi; mi ɛn di ɔda Kristiɛn brɔda dɛn de luk in rod fɔ mek i kam bak to wi.

¹² As fɔ brɔda Apɔlɔs, plɛnti tɛm a kin tɛl am mek i de go fɛn una wit dɛn ɔda Kristiɛn brɔda dɛn, bɔt i nɔ fil se in fɔ go naw. Bɔt wɛn i gɛt chans, i go go.

Di Las Wɔd we Pɔl Tɔk na dis Lɛta

¹³ Una fɔ waydawek, una fɔ tinap traŋa pan di biliv we una biliv pan Gɔd, una fɔ gɛt kɔrej, una nɔ fɔ mek ɛnitin pul una pan di wok we una de du fɔ Gɔd.

¹⁴ Ɛni tin we una de du, una fɔ sho se una lɛk ɔlman.

¹⁵ Una dɔn yɛri bɔt Stɛfanas ɛn in fambul dɛn; na dɛn fɔs biliv pan Krays na Gris, ɛn dɛn dɔn gi ɔl dɛn layf fɔ wok fɔ Gɔd in pipul dɛn. Mi kɔmpin Kristiɛn dɛn, a de beg una

¹⁶ mek una fala dɛn kayn lida ya, ɛn ɛni ɔda pɔsin we de wok wit dɛn traŋa wan.

¹⁷ A gladi we Stɛfanas, Fɔtunetɔs, ɛn Akeikɔs dɔn kam; we una nɔ ebul kam, dɛn dɔn kam,

¹⁸ dɛn dɔn mek mi at gladi, lɛkɛ aw dɛn bin mek una at gladi. Man lɛkɛ dɛn kayn ya fit fɔ mek una rɛspɛkt dɛn.

¹⁹ Dɛn chɔch na Eshya de tɛl una adu; Akwila ɛn Prisila ɛn dɛn Kristiɛn we de gɛda na dɛn os, de tɛl una plɛnti plɛnti adu wit ɔl dɛn at.

²⁰ Ɔl dɛn Kristiɛn brɔda dɛn sɛn adu fɔ una. Una fɔ sho se una lɛk una kɔmpin bay di we we una de tɛl dɛn adu.

²¹ Na misɛf yon an a tek rayt dis pat: Na mi, Pɔl, de tɛl una adu.

²² Ɛnibɔdi we nɔ lɛk di Masta, kɔs de pan am. Wi Masta de kam!

²³ Mek di Masta Jizɔs sho una aw i gud.

²⁴ A de tɛl una se a lɛk una bikɔs wi ɔl na Krays Jizɔs yon pipul.