1 Kɔrint 14 - Krio Fɔs Oli Baybul

Dɛn Tin we Gɔd In Spirit Mek Mɔtalman Sabi Du

¹ So una fɔ tray fɔ lɛk una kɔmpin mɔtalman pas ɛni ɔda tin. Una fɔ tray mek una gɛt dɛn tin we Gɔd de gi pɔsin fɔ mek di pɔsin ebul du in wok; di wan we una fɔ tray fɔ pas ɔl na fɔ mek una ebul tɔk wɔd we Gɔd insɛf tɛl una fɔ tɔk.

² Di pɔsin we ebul tɔk laŋwej we insɛf nɔ ɔndastand, nɔ de tɔk to in kɔmpin mɔtalman, na Gɔd i de tɔk to bikɔs in kɔmpin mɔtalman nɔ de ɔndastand am. Bay di pawa we Gɔd in Spirit gi am, i de tɔk dɛn tru tin we pipul nɔ no.

³ Bɔt di pɔsin we de tɔk wɔd we Gɔd tɛl am fɔ tɔk, de tɔk to in kɔmpin mɔtalman ɛn i de ɛp dɛn, i de kɔrej dɛn, i de mek dɛn at nɔ pwɛl.

⁴ Di pɔsin we de tɔk laŋwej we insɛf nɔ ɔndastand de ɛp insɛf nɔmɔ fɔ kam klos Gɔd, bɔt di wan we de tɔk wɔd we Gɔd tɛl am fɔ tɔk, de ɛp di wan ol chɔch.

⁵ A lɛk mek una ɔl de tɔk laŋwej we unasɛf nɔ ɔndastand, bɔt wetin a lɛk pas dat na fɔ lɛ Gɔd mek una ɔl ebul fɔ tɔk wɔd we i tɛl una fɔ tɔk. Di pɔsin we de tɔk wɔd we Gɔd tɛl am de ɛp di chɔch mɔ pas di wan we de tɔk laŋwej we insɛf nɔ ɔndastand, pas nɔmɔ if pɔsin de we de ɛksplen wetin i de tɔk so dat di wɔd we i de tɔk kin ɛp di chɔch.

⁶ So, mi kɔmpin Kristiɛn dɛn, wɛn a kam to una, if a bigin tɔk laŋwej we misɛf nɔ ɔndastand ɛn we una nɔ ɔndastand, aw dat go ɛp una? Nɔ we nɔ de we a go ɛp una, pas nɔmɔ a tɛl una tin we Gɔd sho mi, ɔ tin we i mek a sabi, ɔ tin we i tɛl mi, ɔ tin we una fɔ lan bɔt am.

⁷ If pɔsin de ple flut ɔ ap sɛf we nɔ gɛt layf, aw in kɔmpin dɛn go no wetin i de ple, if i nɔ de ple dɛn gud?

⁸ Ɔ if pɔsin we de blo bigul fɔ wa, nɔ blo am klia wan, udat go rɛdi fɔ go fɛt?

⁹ Semwe, aw pɔsin go ɔndastand wetin una de tɔk if una de tɔk dɛn laŋwej we unasɛf nɔ ɔndastand? Una wɔd dɛn go jɛs lɛf na briz!

¹⁰ Plɛnti difrɛn laŋwej de na di wɔl, bɔt nɔn nɔ de we nɔ gɛt minin.

¹¹ Bɔt if a nɔ de ɔndastand di laŋwej we pɔsin de tɔk, di pɔsin we de tɔk am go bi trenja to mi, misɛf go bi trenja to am.

¹² Una want bad bad wan mek Gɔd in Spirit gi una ɔl dɛn tin we i de gi, so una fɔ tray fɔ gɛt dɛn tin we Gɔd de gi we go mek una ɛp di chɔch.

¹³ Di man we de tɔk dɛn laŋwej we insɛf nɔ ɔndastand fɔ pre mek Gɔd mek i ebul ɛksplen wetin i de tɔk.

¹⁴ If a pre wit dɛn laŋwej ya, mi spirit de pre fɔ tru, bɔt a nɔ de tink bɔt wetin a de tɔk, ɛn a nɔ de ɔndastand wetin a de tɔk.

¹⁵ So wetin a fɔ du? A go pre wit mi spirit, bɔt semwe so a go tink bɔt wetin a de pre: a go siŋ wit mi spirit, bɔt semwe so a go tink bɔt wetin a de siŋ.

¹⁶ Wɛn una tɛl Gɔd tɛnki wit una spirit nɔmɔ, aw pɔsin we kam chɔch, bɔt we nɔ sabi bɔt dɛn tin ya, go se “Emɛn” wɛn una dɔn dɔn? Aw i go sabi wetin una de tɔk bɔt?

¹⁷ If na tɛnki sɛf una de tɛl Gɔd, una nɔ de ɛp di pɔsin we de lisin atɔl.

¹⁸ A tɛl Gɔd tɛnki we a de tɔk dɛn laŋwej we misɛf nɔ ɔndastand pas ɛni wan pan una.

¹⁹ Bɔt wɛn wi de pre na chɔch, a fil se, i bɛtɛ mek a tɔk fayv wɔd we pipul go ɔndastand, ɛn we go mek dɛn lan sɔntin, pas fɔ tɔk tɛn tawzin wɔd na laŋwej we dɛn nɔ ɔndastand.

²⁰ Mi kɔmpin Kristiɛn dɛn, una nɔ fɔ de tink lɛkɛ pikin, una fɔ tan lɛkɛ pikin wɛn i kam pan bad, bɔt una fɔ tink lɛkɛ bigman.

²¹ Dɛn rayt na Gɔd in Buk se, “Gɔd we na wi Masta se, a go mek pipul we kɔmɔt ɔda kɔntri tɔk to dɛn pipul ya laŋwej we dɛn nɔ ɔndastand, ɛn pan ɔl dat dɛn nɔ go yɛri mi.”

²² So, we Gɔd mek pɔsin ebul tɔk laŋwej we insɛf nɔ ɔndastand, na fɔ sho di pɔsin we nɔ biliv se in gɛt pawa, nɔto fɔ di pɔsin we biliv Gɔd; bɔt we Gɔd mek pɔsin ebul tɔk wɔd we i tɛl am fɔ tɔk, na fɔ mek di pɔsin we biliv Gɔd si in pawa, nɔto fɔ di pɔsin we nɔ biliv Gɔd.

²³ So, if di wan ol chɔch gɛda, dɛn ɔlman stat fɔ tɔk laŋwej we dɛnsɛf nɔ ɔndastand, if dɛn pipul we nɔ no bɔt dɛn kayn tin ya, ɛn dɛn wan we nɔ biliv Gɔd kam insay di chɔch, dɛn nɔ go se una ɔl kres?

²⁴ Bɔt if ɔlman de tɔk di mɛsej we Gɔd gi am fɔ tɔk, wɛn dɛn pipul we nɔ no bɔt dɛn kayn tin ya ɔ dɛn wan we nɔ biliv Gɔd kam insay di chɔch, wɛn dɛn yɛri wetin una de tɔk, dɛn go biliv fɔ tru se dɛn de pan sin. Ɔl wetin dɛn yɛri go mek dɛn jɔj dɛnsɛf.

²⁵ Dɛn go no ɔl dɛn tin we ayd insay dɛn at, so dɛn go fɔdɔm na grɔn ɛn pre to Gɔd; dɛn go se, “Fɔ tru, Gɔd de wit una na ya!”

Ambɔg Nɔ Fɔ De na Chɔch

²⁶ Mi Kristiɛn brɔda dɛn, na di tin dis we a min: wɛn una gɛda fɔ pre, wan man go gɛt siŋ fɔ siŋ; ɔda wan go gɛt sɔntin we i fɔ lan in kɔmpin dɛn; Gɔd go sho ɔda wan sɔntin fɔ tɛl in kɔmpin dɛn; ɔda wan go tɔk wɔd na laŋwej we insɛf nɔ ɔndastand; ɔda pɔsin go ɛksplen wetin i se. Ɔl dɛn tin ya na fɔ ɛp di chɔch.

²⁷ If sɔm pipul gɛt fɔ tɔk dɛn laŋwej we dɛn nɔ ɔndastand, mek dɛn nɔ pas tu ɔ tri, wan afta in kɔmpin, ɛn sɔmbɔdi fɔ ɛksplen wetin dɛn tɔk.

²⁸ Bɔt if pɔsin nɔ de fɔ ɛksplen, dɛn dɛn pipul ya we de tɔk laŋwej we dɛnsɛf nɔ ɔndastand nɔ fɔ tɔk natin na di mitin, dɛn fɔ tɔk na dɛn at nɔmɔ ɛn tɔk to Gɔd.

²⁹ Tu ɔ tri pipul we Gɔd gi mɛsej fɔ tɔk di mɛsej, ɛn ɔda pipul fɔ lisin fɔ no if na Gɔd in mɛsej fɔ tru dɛn de tɔk.

³⁰ Bɔt if Gɔd sɛn mɛsej to pɔsin we de na di mitin, di pɔsin we bin de tɔk fɔs fɔ tap.

³¹ Una ɔl kin tɔk di mɛsej we Gɔd gi una, wan bay wan, so dat ɔlman go lan ɛn ɔlman go tek kɔrej.

³² Pɔsin we Gɔd gi di pawa fɔ tɔk in mɛsej fɔ ebul kɔntrol wetin i de tɔk,

³³ bikɔs Gɔd nɔ want mek wi we i kɔl fɔ du in wok, kɔnfyus pan ɛnitin we wi de du. I want mek ɔltin waka fayn. Lɛkɛ aw i de bi na ɔl dɛn chɔch,

³⁴ dɛn uman nɔ fɔ tɔk na dɛn mitin na chɔch; na so dɛn rayt na di Ju Lɔ.

³⁵ If di uman dɛn want no bɔt ɛnitin, dɛn fɔ tɔk to dɛn man na os. Na shem tin fɔ mek uman tɔk opin wan na dɛn mitin na chɔch.

³⁶ Na una fɔs bigin tɛl pipul bɔt Gɔd in wɔd? Na una nɔmɔ dɔn yɛri Gɔd in wɔd?

³⁷ If ɛnibɔdi tink se in de tɔk mɛsej we Gɔd gi am, ɛn if Gɔd in Spirit mek i ebul du sɔm ɔda tin dɛn, da pɔsin de fɔ no se wetin a de rayt so na Gɔd tɛl mi fɔ rayt am.

³⁸ If i nɔ tek wetin a de tɔk, una nɔ fɔ notis am.

³⁹ So, mi kɔmpin Kristiɛn dɛn, una fɔ want bad wan mek Gɔd gi una di pawa fɔ tɔk in mɛsej, bɔt una nɔ fɔ tap dɛn pipul we de tɔk dɛn laŋwej we dɛnsɛf nɔ ɔndastand.

⁴⁰ Una fɔ du ɔltin di rayt we ɛn natin nɔ fɔ kɔnfyus Gɔd in wok.