1 Kɔrint 13 - Krio Fɔs Oli Baybul

Di Lɛk we di Kristiɛn dɛn fɔ Lɛk Dɛnsɛf

¹ If a sabi tɔk ɔl dɛn laŋwej we mɔtalman de tɔk ɛn we enjɛl sɛf de tɔk, ɛn a nɔ lɛk mi kɔmpin mɔtalman, di tin we a de tɔk go jɛs tan lɛkɛ wɛn pɔsin de bit pan ɔ wɛn bɛl de riŋ lawd lawd wan.

² Ɔ if a gɛt di pawa fɔ tɔk wɔd we Gɔd tɛl mi fɔ tɔk; if a sabi ɔltin; ɔ if a kin ɔndastand ɔltin; if a ebul muf ay ay il bikɔs a biliv Gɔd lɛkɛ aw a fɔ biliv am, ɛn a nɔ lɛk mi kɔmpin mɔtalman, ɔl dɛn tin ya we a ebul du nɔ min natin.

³ If a giwe ɔl wetin a gɛt sɛf to po pipul, ɔ a gri sɛf mek dɛn bɔn mi bɔdi, bɔt a nɔ lɛk mi kɔmpin mɔtalman, ɔl dat nɔ min natin.

⁴ If una lɛk una kɔmpin mɔtalman una go de bia wit dɛn; una go gɛt gud at fɔ dɛn; una nɔ go de jɛlɔs dɛn; una nɔ go prawd; ɔ fil se una bɛtɛ pas dɛn.

⁵ Una nɔ go de du tin we go mek pipul nɔ rɛspɛkt una; una nɔ go want mek una yon biznɛs nɔmɔ go bifo; una nɔ go de vɛks; una nɔ go kip tin na una at;

⁶ una nɔ go gladi fɔ ɛnitin we nɔ rayt, bɔt una go gladi fɔ yɛri ɛnitin we na tru.

⁷ Una go ebul bia ɔltin we pipul du una; una go biliv gud tin bɔt pipul ɔltɛm; una go de abop ɔltɛm se bɛtɛ go fala dɛn; ɛn una nɔ go tap fɔ lɛk una kɔmpin mɔtalman wɛn tin traŋa.

⁸ Dɛn wɔd we Gɔd tɛl in prɔfɛt dɛn fɔ tɔk, tɛm de kam we dɛn nɔ go tɔk dɛn igen; dɛn difrɛn laŋwej we pipul kin tɔk, bɔt we dɛnsɛf nɔ ɔndastand, tɛm de kam we dɛn nɔ go tɔk dɛn igen; ɔl dɛn tin we sɔm pipul sabi, dɛn nɔ go sabi dɛn igen. Bɔt lɛk go de sote go.

⁹ Wi nɔ sabi ɔl di tin dɛn we wi fɔ sabi, na wan wan nɔmɔ wi sabi; pan ɔl dɛn wɔd we Gɔd tɛl wi fɔ tɛl ɔda pipul, na sɔm nɔmɔ wi de tɔk.

¹⁰ Wɛn di tɛm rich we ɔltin go dɔn bi lɛkɛ aw dɛn fɔ bi, wi go no ɔltin gud ɛn wi go lɛf fɔ du tin af ɛn af.

¹¹ Da tɛm we mi na bin pikin, na pikin tɔk bin de na mi mɔt, a bin de ɔndastand lɛkɛ aw pikin de ɔndastand, a bin de tink lɛkɛ aw pikin de tink; bɔt naw we a dɔn big a dɔn dɔn wit pikin biznɛs.

¹² Wetin wi de si naw tan lɛkɛ wetin pɔsin kin si na glas we nɔ klia; bɔt da tɛm de, wi go si gud gud wan wit wi yon yay. A nɔ sabi plɛnti tin naw, bɔt da tɛm de a go sabi ɔltin gud gud lɛkɛ aw Gɔd sabi mi gud gud.

¹³ Na dɛn tri tin ya pɔsin go de du sote go: biliv, abop, ɛn lɛk, bɔt di wan we pas dɛn ɔl na lɛk.