1 Kɔrint 11 - Krio Fɔs Oli Baybul

¹ So una fɔ de du lɛkɛ aw a de du, bikɔs a de du lɛkɛ aw Krays bin de du.

Uman fɔ Kɔba in Ed Wɛn I de Pre

² Una du wɛl: una de mɛmba mi ɔltɛm ɛn una de mɛmba dɛn tin we a bin lan una, ɛn una de du dɛn.

³ Bɔt a want mek una ɔndastand sɔntin: Na Krays de oba ɔlman, na di man de oba in wɛf, ɛn na Gɔd in wangren de oba Krays.

⁴ So ɛni man we de kɔba in ed wɛn i de pre ɔ wɛn i de tɛl pipul Gɔd in wɔd wɛn dɛn ɔl gɛda fɔ pre, nɔ rɛspɛkt Krays.

⁵ Ɛni uman we nɔ de kɔba in ed wɛn i de pre ɔ wɛn i de tɛl pipul Gɔd in wɔd wɛn dɛn ɔl gɛda fɔ pre, de mek in man shem, i jɛs tan lɛkɛ uman we in ed shayn.

⁶ If di uman nɔ want kɔba in ed, mek i kɔt in ia. Na shem fɔ mek uman shayn in ed ɔ kɔt in ia, so i fɔ kɔba in ed.

⁷ Man nɔ fɔ kɔba in ed bikɔs nain de sho aw Gɔd tan ɛn aw Gɔd de rul, bɔt di uman de mek di man gɛt rɛspɛkt ɛn de sho se man de oba am.

⁸ Nɔto pat pan uman dɛn tek mek man, na pat pan man dɛn tek mek uman.

⁹ Ɛn nɔto fɔseka uman Gɔd mek man, bɔt na fɔseka man Gɔd mek uman.

¹⁰ Fɔseka we di enjɛl dɛn de luk wi, uman fɔ kɔba in ed fɔ sho se nain de ɔnda man.

¹¹ Bɔt wɛn wi de wok fɔ di Masta, man fɔ gɛt uman fɔ ɛp am, uman fɔ gɛt man fɔ ɛp am.

¹² Jɛs lɛkɛ aw Gɔd tek pat pan man mek uman, semwe so na uman de bɔn man; na Gɔd mek ɔltin so.

¹³ Wetin unasɛf tink, i rayt fɔ uman fɔ pre to Gɔd wɛn Gɔd in pipul dɛn gɛda fɔ pre ɛn in ed nɔ kɔba?

¹⁴ Unasɛf no se aw Gɔd mek man sho se na shem fɔ mek man gɛt lɔŋ ia,

¹⁵ bɔt lɔŋ ia de mek uman gɛt rɛspɛkt. Gɔd gi am lɔŋ ia fɔ kɔba in ed.

¹⁶ If ɛnibɔdi want fɔ agyu bɔt dat, a go jɛs tɛl am se frɔm tɛm na di rul dat we uman ɛn man de kip wɛn wi de pre na wi chɔch, ɛn na di rul dat we dɛn ɔda Kristiɛn dɛn de kip wɛn dɛn de pre na dɛn yon chɔch.

Di It we Wi de It fɔ Mɛmba di Masta

¹⁷ Bɔt a nɔ go se una du wɛl pan dɛn tin we a de kam tɛl una naw, bikɔs dɛn mitin we una de gɛt na chɔch de ambɔg una pas aw dɛn de ɛp una.

¹⁸ Di fɔs tin we a want tɔk nain dis: a yɛri se wɛn una mit, una nɔ kin gɛt wanwɔd; a biliv se sɔm tru de pan wetin a yɛri.

¹⁹ I mɔs bi se una nɔ fɔ gɛt wanwɔd fɔ mek ɔda pipul no dɛn wan we de du wetin Gɔd want.

²⁰ Wɛn una mit nɔto di bred ɛn wayn we di Masta dɔn blɛs, una kam fɔ it.

²¹ Bɔt we ɔlman kin jɛs de it ɔmɔs i ebul, sɔm pipul nɔba gɛt ɛnitin fɔ it; ɔda pipul kin drink te dɛn drɔnk.

²² If una want it ɛn drink te una satisfay, una nɔ gɛt una yon os fɔ du dat? Ɔ una want mek shem kam pan Gɔd in chɔch ɛn mek dɛn pipul we po, shem? Wetin una fil se a go tɔk bɔt dɛn kayn tin ya? Mek a tɛl una se una du wɛl? Unasɛf no se a nɔ go du dat.

^23-24 Na di Masta insɛf tɛl mi dɛn tin we a tɛl una we a se: di sem nɛt we dɛn kɛr Masta Jizɔs go to dɛn wan we bin want kil am, i tek bred, i tɛl Gɔd tɛnki fɔ am, i kɔt am, kɔt am, dɔn i se, “Na mi bɔdi dis, na fɔ una a brok brok am so. Una fɔ de du di sem tin fɔ mɛmba mi.”

²⁵ Semwe so, wɛn dɛn dɔn it, i tek di kɔp we di wayn de, i se, “Dis kɔp we ful wit wayn na di nyu agrimɛnt we Gɔd mek wit mɔtalman wit mi blɔd. Una fɔ mɛmba mi ɛnitɛm we una de drink di wayn we una blɛs lɛkɛ dis.”

²⁶ Sote di Masta kam bak, ɛnitɛm una de it dis bred ɛn drink dis wayn, una de mek pipul no se di Masta day fɔ mɔtalman.

²⁷ So, if ɛnibɔdi de drink dis wayn ɛn it dis bred lɛkɛ se dɛn nɔ min natin, da pɔsin de dɔn sin bikɔs i nɔ rɛspɛkt di Masta in bɔdi ɛn in blɔd.

²⁸ Na dat mek ɔlman fɔ luk insay in at gud fɔ si if i rayt wit Gɔd, bifo i it di bred ɛn drink di wayn.

²⁹ Ɛnibɔdi we nɔ mɛmba se na di Masta in bɔdi i de it ɛn wetin dat min, bifo i bigin it di bred ɛn drink di wayn, Gɔd go kɔndɛm da pɔsin de.

³⁰ Na dat mek plɛnti pan una sik ɛn plɛnti nɔ gɛt trɛnk, ɛn plɛnti dɔn day.

³¹ If wi jɔj wisɛf fɔ tru, Gɔd nɔ go jɔj wi.

³² Bɔt di Masta de jɔj wi ɛn pɔnish wi naw so dat i nɔ go kɔndɛm wi wit dɛn ɔda pipul na di wɔl.

³³ So, mi kɔmpin Kristiɛn dɛn, wɛn una gɛda fɔ it dis bred ɛn drink dis wayn, una fɔ wet te ɔlman kam.

³⁴ If pɔsin aŋri, nain os i fɔ go it fɔ bɛlful, mek Gɔd nɔ go kɔndɛm una wɛn una gɛda. A go tɔk bɔt dɛn ɔda biznɛs wɛn a kam to una.