Ta̤dǔlè̌nǎ 8 - Kawyaw RC

Ta̤ma̤mě ta̤ma̤dòǐ akǔ susǒtukǔ htǒotukǔ

¹ Bǎ sophû̌ kèè̌mo ta̤ma̤mě a ta̤ma̤dòǐ akǔ susǒtukǔ htǒo akha, dě mǒkhû̌nu, ta̤sî̌tukǔ ǒhtò̌yî̤ te̤we̤ wò̌wè̌ mî̌nî̌ sushi bǎnu.

² Bǎnuakha he kè̌shǐ tanaphû̌ susǒtapwa̤nu a ma̤ Cǒmara ata̤ma̤ dě a ihtǒ ǒ nû̌ûlo̤mo̤ pṳ̂̌꤮ taplǎ, dě kò ǐ asî tǔ susǒtama.

³ Tanaphû̌ ahǔwa̤tapwa̤ dě a pṳ̂měǐ dîbahtataa htě kò la̤shû̌gèhtò̌ nû̌ûta ta̤nṳmû̌ htǒotapwa̤nu, a hèihtǒ ǒ bǎ ta̤lṳwa̤ akòshî̌nu. Kò ǐplṳ̂ nû̌û ta̤nṳmû̌ toǒ dě a glè shû̌nṳbe dǒbǎ nû̌ûta Cǒmara akòyò cahtǐ lǒ̤꤮ bò toǒ a ta̤kwisaba. Htodě a glè lṳhtò̌ htǒotoǒ dě ta̤lṳwa̤hta alo̤. Ta̤lṳwa̤hta htǒonumî̌ a ǒ dě Khwǐcophǎ a gògohtahtò̌yî̤ alo̤mo̤nu.

⁴ Ta̤nṳmû̌ akhǔ htǒonu ta kòyòcahtǐ toǒ a ta̤kwisaba toǒnu, a ǒ tanamǒkhû̌phû̌ htǒotapwa̤ a cǔdekû dě a khǔhtò̌ plǒnû̌û Cǒmara ǒ.

⁵ Hǐnuhtodě tanaphû̌ htǒotapwa̤nu, a phî̌ mî̌klû̌ ta̤lṳwa̤htǒo alo̤ dě a shû̌nṳbe nû̌û la̤shû̌gè ta̤nṳmû̌ a dîbahtataa htǒo akû. Htǒotaplǎdě a hělòte̤ nû̌û hǎkhû̌ dě laû̌shě, mǒgomǒyi̤, tî̌lî̌lò̤ htodě tṳtṳhtû̌dî̌ htûhtò̌ hǎkhû̌bǎo.

Tǔtoǒ

⁶ Bǎnuakha tanaphû̌ susǒtapwa̤ dě a pṳ̂měǐ atǔ susǒtama htǒotoǒ ma̤wǒnǎ lǒkho ana̤ dě a glè ǔhtò̌ atǔ toǒ.

⁷ Bǎ tanaphû̌ awǐgutṳ̌ tapwa̤ ǔhtò̌ atǔ akhanu, kò hělòte̤ sèwèji. Htodě kò hělòte̤ sǐ htě a shîlo̤ ta mî̌ hǎkhû̌bǎo. Htǒotaplǎdě mî̌ gèbòkè hǎkhû̌htǒo sulè̌tèlè̌, sǒmṳ toǒ sulè̌tèlè̌, htodě a gèbò mi̤mṳ ta sǒgoto̤ lǒ̤ bò.

⁸ Hǐnuhtodě bǎ tanaphû̌ ginǐ̤pwa̤ tapwa̤ ǔhtò̌ atǔ akhanu, ta̤tacǎ htě alò̤ta mî̌gèplo̤htò̌ kholodû̌ tama htǒonu kò wîlòte̤ a dě shidû̌shite̤we̤kû. Shidû̌shite̤we̤ sulè̌tèlè̌nu a htûhtò̌bò ta sǐ.

⁹ Ta̤phû̌ta̤li̤ ǒ shidû̌shite̤we̤kû toǒnu, a sikè sulè̌tèlè̌, htodě sǒkhlidû̌ pî̌kè sulè̌tèlè̌.

¹⁰ Htodě tanaphû̌ supwa̤ tapwa̤ ǔhtò̌ atǔ akhanu, shǎdû̌ tama htě a lîrakha sǒsǒta mî̌ko htǒotama ǒ mǒla̤ lòte̤ dě a lòte̤nṳ shikhî̌ toǒ akû sulè̌tèlè̌, a lòte̤nṳ dě shipo̤htǎkhû̌ toǒ akû sulè̌tèlè̌.

¹¹ Dě shǎ htǒotamanu, ami̤ mî̌ “Ta̤khǎ,” dě shi khǎkèbò sulè̌tèlè̌. Kòyò o lǒkho shikhǎhtǒo akhû̌akhî, a siplṳ̂siphǎ.

¹² Bǎ tanaphû̌ lǐ̤pwa̤ tapwa̤ ǔhtò̌ atǔ akhanu, lṳmṳ, la, shǎ sî toǒnu, a pî̌kè sulè̌tèlè̌. Ata̤lî shěrakha toǒnu, a hǎmǎkè sulè̌tèlè̌. Lṳmṳsha khǐkè sulè̌tèlè̌, dě lṳmṳkhǐ akhanu, la, shǎ toǒ a khǐkè sulè̌tèlè̌.

¹³ Bǎnuakha he kè̌shǐ lòtò̌ tabǎ wi̤ mǒla̤ dě he gana̤de apo̤htò̌ ta, “Tanaphû̌ ahǔwa̤nu sò̌su glè̌ ǔhtò̌ atǔ akhû̌akhî, kòyò lǒ̤bò ǒ hǎkhû̌akhû̌ htǒotoǒ glè ǒ ta ta̤jîta̤jû, ta̤jîta̤jû, ta̤jîta̤jû,” a po̤htò̌ hǐnu.