Ta̤dǔlè̌nǎ 7 - Kawyaw RC

Israel akòyò apwa̤ tesě lǐ̤sò̌ ta lǐ̤rî̌

¹ Ta̤ma̤ana̤ pwǐhè̌o htodě hǎkhû̌bǎo bǎbǎ, shidû̌shite̤we̤ htǒotoǒ bǎbǎ, sǒmṳ toǒ bǎbǎ, ma̤pûhǐ gili̤sǎ hèbǎ pû asî tò̤nu, he kè̌shǐ tanaphû̌ sò̌li̤ ihtǒ ǒ lǒkho hǎkhû̌ lǐ̤ne̤ dě a ma̤dǐdòshǔkèbò gili̤sǎ klè̌.

² He kè̌shǐ tanaphû̌ ahǔwa̤tapwa̤ ǒ mṳhtò̌ tokho hè dě a phî̌hènṳ Běcǎ Cǒmara htě a htûpwa̤ htǒotapwa̤ a ta̤ma̤dòǐ tukǔ. Htodě a jipwi̤ yi̤kǒhtò̌ tanaphû̌ htǒosò̌li̤ htě Cǒmara ǐhto asî ata̤po̤ta̤phǎ dě a glè ma̤pî̌kè hǎkhû̌ ta shidû̌shite̤we̤ htǒotoǒ.

³ Tanaphû̌ htǒotapwa̤ hî̌, “Bǎ pa ma̤dòǐhto Běcǎ Cǒmara ajûphû̌ htǒotoǒ ta ta̤ma̤dòǐ dě a me̤htò̌lo̤ hǒtò̤nu, hǎkhû̌ bǎbǎ, shidû̌shite̤we̤ bǎbǎ, sǒmî̌wû̌ bǎbǎ, tobǎ ma̤pò̤ma̤sha asî dǐcǎ꤮ hǒtò̤.”

⁴ Dě kò pwe̤ǐ he ta kòyò htě kò ma̤dò a ta Cǒmara a ta̤ma̤dòǐ dě a me̤htò̌lo̤ toǒnu, aǒ apwa̤ tesě lǐ̤sò̌ ta lǐ̤rî̌. Asî toǒ mî̌ mî̌pwǎ Israelphû̌ shǐginǐ̤gumṳbò htǒotoǒ hǒ.

⁵ Dě Yṳ̌da tṳmṳtacǎ akla numî̌ apwa̤ tòsò̌ ta ginǐ̤rî̌, Dě Rǔbe tṳmṳtacǎ akla numî̌ tòsò̌ ta ginǐ̤rî̌, Dě Gǎ tṳmṳtacǎ akla numî̌ tòsò̌ ta ginǐ̤rî̌,

⁶ Dě Asha tṳmṳtacǎ akla numî̌ tòsò̌ ta ginǐ̤rî̌, Dě Natali tṳmṳtacǎ akla numî̌ tòsò̌ ta ginǐ̤rî̌, Dě Manǎshe tṳmṳtacǎ akla numî̌ tòsò̌ ta ginǐ̤rî̌,

⁷ Dě Simeo tṳmṳtacǎ akla numî̌ tòsò̌ ta ginǐ̤rî̌, Dě Lě̤wǐ tṳmṳtacǎ akla numî̌ tòsò̌ ta ginǐ̤rî̌, Dě Isakarǒ tṳmṳtacǎ akla numî̌ tòsò̌ ta ginǐ̤rî̌,

⁸ Dě Sabulo tṳmṳtacǎ akla numî̌ tòsò̌ ta ginǐ̤rî̌, Dě Jǒjè tṳmṳtacǎ akla numî̌ tòsò̌ ta ginǐ̤rî̌ ta dě Bejame tṳmṳtacǎ akla numî̌ apwa̤ tòsò̌ ta ginǐ̤rî̌.

Kòyò saprṳ̂dû̌ tṳ̂prṳ̂

⁹ Ta̤ma̤ana̤ pwǐhè̌o htodě he kè̌shǐ kòyò ǒplṳ̂ǒphǎ mè̤mè̤̌ tṳ̂prṳ̂ dě kò dǒbòpè̤ asî dǐpwǎ̤꤮ tò̤. Asî ǒ kòyò khlilèphû̌ pṳ̂̌꤮ tacǎ, khlilè pṳ̂̌tṳmṳ, kòyò pṳ̂̌tṳmṳ, ta yo̤sǎ pṳ̂̌꤮ tacǎ hè dě asî hèihtǒ ǒ sophû̌ ta akhwǐcophǎ gògohtahtò̌yî̤ alo̤mo̤. Htodě asî kûsǒhtò̌nṳ hǐdopo̤to̤bûhtû dě pṳ̂měǐ lǒkho kolotṳphò toǒ.

¹⁰ Asî jipwi̤ yi̤kǒ dě a hî̌, “Tû̌pwǎ pa Cǒmara htě a hǎnòò̌ dě Khwǐcophǎ gògohtahtò̌yî̤ alo̤nu tapwa̤ ta sophû̌nu tado ma̤lû̌htò̌gepwǎ pa.”

¹¹ Mǒkhû̌tanaphû̌ lǒ̤bò toǒ ihtǒ ǒ te̤we̤bò ta Khwǐcophǎ gògohtahtò̌yî̤ htǒo ta wè̤khǔwè̤pwa̤nu toǒ ta ta̤htûpwa̤nu lǐ̤do. Bǎnuakha asî gene̤lò̤bò Khwǐcophǎ gògohtahtò̌yî̤ alo̤mo̤ dě subusabahtò̌ lǒkho Cǒmara.

¹² Dě a hî̌ lǒkho, “Amè̤, ta̤htû̌sò̌ǐ, ta̤sîrîdû̌sîrîhtû, ta̤sî̌ta̤jò, ta̤hî̌bwǐhî̌sîrî, ta̤bè̌dubè̌na̤, ta̤po̤ta̤phǎ, ta ta̤khû̌ta̤ǎ toǒnu, pa Běcǎ Cǒmara nî̤bǎ tû̌ta tûjûpwa̤ talakhǎ nî̌꤮ Amè̤.”

¹³ Htodě wè̤khǔwè̤pwa̤nu toǒ akla tapwa̤nu a gwè he, “Kòyò htě a kûsǒ hǐdopo̤to̤bûhtû htǒotoǒ numî̌ ûpè? Asî mî̌ a ǒ bǎtè hè?”

¹⁴ “Saradû̌, he sî̌yatò̤, na sî̌ya pwǎ,” he hî̌shǔ a hǐnu. Dě a hî̌shǔ he, “Asî toǒ numî̌ kòyò htě a cû̌ tûlû̌bò̌hto ta̤ma̤jîma̤jû dě a sò̌gònò̤ ǐsha htǒotacǎnu hǒ. Asî shǔjahto a hǐdopo̤to̤htû htǒotoǒ hǒ, htodě a ma̤bûhto nû̌ûta sophû̌nu tado asǐ hǒ.

¹⁵ Hǐnu akhû̌akhî, Asî ihtǒǒ bǎ Cǒmara akhwǐcophǎ gògohtahtò̌yî̤ alo̤mo̤ dě asî ma̤ nû̌û ta̤ma̤ lṳmṳkhǐkhǐ, lṳmṳshasha dě ta̤lṳhtò̌hokûnu hǒ. Pwa̤htě a hǎnòò̌ dě Khwǐcophǎ a gògohtahtò̌yî̤ alo̤ htǒotapwa̤nu, a ǒkû̌ ta asî dě a tò̤gòǐ asî pě.

¹⁶ Sǎǎsò̌ope dǐkhò̌꤮ tò̤. Lṳmṳ gûbǎpe asî dǐkhò̌꤮ tò̤. A khòbǎnǒpe ta̤agûalû̌ tò̤.

¹⁷ Ma̤tè̤hî̌dě sophû̌ ǒ Khwǐcophǎ gògohtahtò̌yî̤ akǎmakûnu tado gèǐ asî dě a sûcû̌ asî dě shi htě a ǐ asî ta̤htûpwa̤ a shihtǎpo̤khû̌ toǒ ǒ pě. Htodě Cǒmara htǔsûkè bǎ asî mi̤sǎshi pṳ̂̌tèmè pě.”