Ta̤dǔlè̌nǎ 5 - Kawyaw RC

Lî̤ tûlû toklo ta sophû̌

¹ He kè̌shǐ lî̤ tûlû toklo ǒ pwa̤hǎnòò̌ dě Cophǎ gògohtahtò̌yî̤khû̌nu tapwa̤ acǔdemûnu tokho akû. Lî̤tûlû htǒonu, kò khwè̌nǎbò nû̌ûta lî̤phlǒ cî̌htè̌cî̌khobò dě kò klǎměhtu nû̌û ta ta̤ma̤dòǐ susǒtukǔ.

² Dě he kè̌shǐ tanaphû̌ khû̌ǎshû̌ htě a yi̤kǒhtò̌shû̌ tapwa̤ dě a ǐsî̌ya bǎ kò ta, “Kòyò htě a gwa kèè̌mo bǎ kò ta̤ma̤dòǐ htě kò klǎměhtu htǒotoǒ dě a bòmohtò̌ lî̤tûlû htǒonumî̌ ûpè?”

³ Pò̤̌ta mǒkhû̌ bǎbǎ, hǎkhû̌ bǎbǎ, lṳnǎkhwǎ adonu bǎbǎ, lî̤tûlû htǒonu, kò kèè̌mo nû̌û dǐpwǎ̤꤮ tò̤, kò dǒ꤮ dǐpwǎ̤ tò̤tò̤.

⁴ Kòyò htě a gwata glè bòmo lî̤tûlûhtǒo dě dǒ anu aǒ dǐpwǎ̤tò̤ akhû̌akhî, he hǎsihǎǒkè.

⁵ Htǒotaplǎdě bǎ mo̤pwa̤ toǒ akla tapwa̤nu, a hî̌ he, “Hǎ pûma̤, Yṳ̌da khlilèphû̌ sî̌ò̌ htǒotado, Dǎ̤wi̤ akhlilè gilò̤ tṳtṳ htǒotapwa̤nu, a nî̤bǎ ta̤ma̤pè̤ hǒ, dě a glè kèè̌kè ta̤ma̤dòǐ susǒtukǔ htǒo dě a bòmo bǎ pa lî̤tûlû htǒonumî̌ anî̤ hǒ.”

⁶ Bǎnuakha he kè̌shǐ sophû̌ tado ihtǒ ǒ Cophǎ gògohtahtò̌yî̤ kamakû nutò̤glò. Ta̤htûpwa̤ lǐ̤do htǒonu ta wè̤khǔwè̤pwa̤ htǒotoǒ ǒte̤we̤bò nû̌û. Sophû̌ htě a ǒlṳhtò̌ htǒotadonu a lò̤ta kò ma̤sihto nû̌ûnu. Ane̤ ǒ susǒtòphò, htodě a mi̤sǎphlǒ ǒ susǒtophlǒ, htǒomî̌ a mî̌ Cǒmara a yolahtûpwa̤ susǒtama dě sûcû̌ asî gûla̤ pṳ̂̌꤮ tò̤glò bǎ hǎkhû̌ bǎonuhǒ.

⁷ Sophû̌ htǒonu, a cû̌phî̌ lî̤tûlû htě a ǒ dě pwa̤hǎnòò̌ bǎ Cophǎ gògohtahtò̌yî̤ akhû̌ htǒotapwa̤ acǔdemû akûnu.

⁸ Bǎ a pṳ̂měǐ lî̤tûlûhtǒo akhanu, ta̤htûpwa̤ lǐ̤dohtǒo ta wè̤khǔwè̤pwa̤ gini̤shi sò̌li̤ htǒo gene̤lò̤ sophû̌nu tado a lo̤mo̤. Asî tado ta tado, tapwa̤ ta tapwa̤nu, a la̤dǒ tǐtute̤gwè ǒ htodě aǒ ta abahta toǒ. Bahta htǒotoǒnu aǒbe ta ta̤nṳmû̌nṳshu. Ta̤nṳmû̌nṳshu htǒotoǒ mî̌ mî̌pwǎ Cǒmara akòyò a ta̤kwisabanu toǒ hǒ.

⁹ Asî sò̌po̤ lî̤sò̌po̤ asa to̤to̤, “Na gwatû̌ ta na glè phî̌ lî̤tûlûhtǒo dě kèè̌kè ta̤ma̤dòǐ htǒotoǒ. Ma̤tè̤hî̌dě kò ma̤sihto na akhû̌akhî, ma̤pûhǐ kòyò toǒ htûhtò̌ Cǒmara atanu, na htè̌ge asî ta nasǐ dě kòyòhǎkhû̌phû̌ toǒǒ htě a ǒ dě kòyò pṳ̂̌tṳgumṳ, yo̤ pṳ̂̌to̤yo̤, khlilèphû̌ pṳ̂̌꤮ tacǎ ta ga pṳ̂̌taga akla toǒnu, na htè̌gehto bǎ Cǒmara hǒ.

¹⁰ Asî glè ma̤ Cǒmara a ta̤phî̌ta̤ma̤ ayanu, na dǔlṳhtò̌ asî ta pwa̤lṳhtò̌ta̤ toǒ dě Cǒmara ashiagakû hǒ. Dě asî glè pǒta̤ hǎkhû̌bǎo pě.”

¹¹ Htǒotaplǎdě, he kè̌shǐ ta he gana̤de mǒkhû̌tanaphû̌ ǒ a sěkû ta a sěkû dǒbǎpè̤tò̤ htǒotoǒ ayo̤po̤htò̌. Dě asî ǒte̤we̤ lǒkho ta Cophǎ gògohtahtò̌yî̤ htǒo ta ta̤htûpwa̤nu lǐ̤do ta wè̤khǔwè̤pwa̤nu toǒ.

¹² Dě asî yi̤kǒ sò̌po̤shû̌ lǒkho ta, “Sophû̌ htě kò ma̤si yǎ htǒonu, a gwa nî̤bǎdû̌ ta̤sîrîpo̤phǎ, ta̤dû̌yò̤htò̌sa, ta̤sî̌ta̤jò, ta̤khû̌ta̤ǎ, ta̤bè̌dubè̌na̤ nû̌û, ta̤bè̌dû̌bè̌htû nû̌û, ta ta̤htû̌sò̌ǐ nû̌ûnu nî̌꤮.”

¹³ Dě he gana̤de bò꤮ ta̤htě ata̤htûpwa̤ ǒnu toǒ dě a ǒ mǒkhû̌ toǒ bǎbǎ, hǎkhû̌ toǒ bǎbǎ, hǎla̤ toǒ bǎbǎ, shidû̌shite̤we̤ ala̤ toǒ bǎbǎ, bò꤮ ta̤bǒ ǒ dě mǒla̤ toǒnu bǎbǎ, a sò̌po̤htò̌ dě a hî̌ lǒkho pwǐhè̌o, “Ta̤htû̌sò̌ǐ, ta̤sîrîdû̌sîrîhtû, ta̤bè̌dubè̌na̤ ta ta̤po̤ta̤phǎnu a ǒkû̌ tû̌ta kòyò htě a hǎnòò̌ dě Cophǎ gògohtahtò̌yî̤ akhû̌nu tapwa̤ ta sophû̌nu tado tûjûpwa̤ talakhǎ nî̌꤮.”

¹⁴ Ta̤htûpwa̤ lǐ̤dohtǒonu a hî̌shǔ, “Amè̤” htodě wè̤khǔwè̤pwa̤ toǒ gene̤lò̤ dě subusabahtò̌ Cǒmara ta sophû̌nu tado.