Ta̤dǔlè̌nǎ 19 - Kawyaw RC

¹ Ta̤htûhtò̌hto hǐnudě he gana̤de yo̤po̤htò̌ te̤we̤tososhû̌ mǒkhû̌ dě alò̤ta kòyò mṳdû̌ hî̌bǎnu, dě a hî̌ lǒkho, “Htû̌sò̌ǐ lǒkho Cǒmara! Ta̤ma̤lû̌htò̌ge ta ta̤sîrîdû̌sîrîhtû ta ta̤po̤ta̤phǎ sîtoǒ mî̌ pa Cǒmara atabò pwǎ.

² Ma̤tè̤hî̌dě a ta̤cèrò sî toǒnu atomî̌ atoto. Anò̤mî̌ anò̤nò̤. A cèròkèhto mamǔpò̤lò̤ mi̤dû̌ htě a ma̤pî̌ma̤lṳ̂kè hǎkhû̌ toǒ ta asǐshi a ta̤sò̌yṳ patǎ phû̌mò̤shî̌hto toǒnu tapwa̤ hǒ. A ma̤si Cǒmara ajû toǒ akhû̌akhî, Běcǎ Cǒmara ma̤geshǔlè̌ a li̤ hǒ.”

³ Asî yi̤kǒhtò̌ gesǒ ta, “Htû̌sò̌ǐ lǒkho Cǒmara! Mî̌ htě a gèkè wî̤dû̌ htǒotî̤wî̤nu a khǔhtò̌ gutṳpè̤ dǐkhò̌꤮ tò̤, a khǔhtò̌ tû̌ta tûjûpwa̤ nî̌꤮.”

⁴ Wè̤khǔwè̤pwa̤ gini̤shi ta sò̌li̤ ta ta̤htûpwa̤nu lǐ̤donu, a gene̤lò̤ subusabahtò̌ Běcǎ Cǒmara, dě a hǎnòò̌ Khwǐcophǎ gògohtahtò̌yî̤khû̌nu tapwa̤ dě asî hî̌ lǒkho, “Amè̤! htû̌sò̌ǐ Cǒmara!”

Sophû̌ a khòmò̤pwè

⁵ Htodě yo̤po̤htò̌ Khwǐcophǎ gògohtahtò̌yî̤khû̌ nudě a hî̌, “Bò꤮ Cǒmara ajûphû̌ toǒ ta bò akòyò htě aǒ ta a ta̤sîrîshû̌sho toǒ bǎbǎ, aǒtò̤ toǒ bǎbǎ, htě a ǐsha bè̌dubè̌na̤ nû̌û toǒnu, htû̌sò̌ǐ lǒkho pa Cǒmara.”

⁶ Bǎnuakha he gana̤de yo̤ htě alò̤ta kòyò tṳ̂prṳ̂taphǎ hî̌bǎnu. Htodě alò̤ta shi dû̌hèlòte̤ po̤pè̤tè̤plò̤nu, dě a po̤te̤we̤tososhû̌ sǒsǒta tî̌lî̌lò̤ toǒnu. He gana̤de asî hî̌, “Htû̌sò̌ǐ Cǒmara, ma̤tè̤hî̌dě pa Běcǎ Cǒmara htě a jòta̤lǒ̤bò sî̌yata̤lǒ̤bò htǒotapwa̤nu, a pǒǐta̤ hǒ.

⁷ Pa sò̌le̤sò̌lò̤ bè̌dû̌bè̌htû plǒnû̌û ta pa Cǒmara hò̌. Ma̤tè̤hî̌dě sophû̌nu tado glè tobǎ ge khòmò̤ akhîakha to̤hǒ. Akhòmò̤ mamǔ tîwî̌tòwò bǎ nû̌û hǒ.

⁸ Khòmò̤ mamǔ htǒonu kò ǐkûǐsǒ nû̌û ta hǐdohǐyò̤ bǎplo̤bû plò̌kîtrî̌wǒ tṳpṳ.” Hǐdohǐyò̤ bǎplo̤bû plò̌kîtrî̌wǒ mî̌ mî̌pwǎ Cǒmara akòyò toǒ a ta̤phî̌ta̤ma̤ htě acǒatè̤ toǒnu hǒ.

⁹ Htodě tanaphû̌ hî̌ he, “Khwè̌mǎkè mò̌ htǒonu. Kòyò htě kò mǎhè kû̌dǒ nû̌û dě sophû̌ htǒotado apwè htǒotoǒnu, a nî̤bǎ ta̤howi̤.” Htodě tanaphû̌ hî̌po̤, “Yo̤sǎ htǒotoǒ mî̌ Cǒmara ale̤ayo̤ mè̤na̤cè̌.”

¹⁰ He gene̤lò̤ alo̤mo̤ dě he glè̌ sabahtò̌ a hǐnudě a hî̌ he, “Saba pûma̤ he ma̤, he ta na, ta na pṳwè̤ Khrî̌stuphû̌ sî toǒ numî̌ jûphû̌ sǒsǒpwǎ nû̌û. Pa mî̌ kòyò toǒ htě a khòlṳ bǎ kò ta Ye̤shǔ awi̤akè̌ toǒ dě pṳ̂měǐ ta̤te̤ta̤mǎ htě Ye̤shǔkhrî̌stu dǔlṳkè bǎ pa htǒonu. Hǐnudě, saba pûma̤ kò dǐpwǎ̤ ma̤, saba dě Cǒmaranu. Ma̤tè̤hî̌dě ta̤te̤ta̤mǎ htě Ye̤shǔkhrî̌stu dǔlṳ htǒonumî̌ asǒsǒta Cǒmara nohî̌bǎ pwa̤po̤ toǒnu hǒ.”

Kòyò dò̌ tîsî̌bû tapwa̤

¹¹ Bǎnuakha he kè̌shǐ mǒkhû̌ lṳ̂mohto dě tîsî̌phabû ihtǒ ǒ bǎnu tado. Kòyò dò̌ tîsî̌ htǒotapwa̤nu kò kaǎ nû̌ûmi̤ ta, “Cǒtè̤ ta yo̤” ta “Ma̤to ta̤.” Kòyò htǒotapwa̤nu, bǎ a cèrò kò akhanu, a cèrò topwǎ htě a shěshǔ ta pwa̤htě a sò̌khě nû̌û toǒ.

¹² A mi̤sǎphlǒ dě alò̤ta mî̌ gèhtò̌nu, htodě a glûhtò̌plṳ̂ khû̌glûhta, dě kò khwè̌ ami̤ tophlǒ dě ana̤lo̤nu hǐnudě kò sî̌ya dǐpwǎ̤tò̤, ana̤ Běcǎ tapwa̤ sî̌ya tû̌ pwǎ.

¹³ Hǐdopo̤to̤htû htě a sǒǐ htǒo tṳpṳnu, a wî̌bò ta sǐ. Dě “Cǒmara ale̤ayo̤,” kò kaǎ nû̌ûmi̤ hǐnu.

¹⁴ Mǒkhû̌ akliphû̌ toǒ kûsǒ htò̌nṳbò hǐdohǐyò̤ bǎplo̤, hǐdohǐyò̤bû, hǐdohǐyò̤ amṳ̂aplî toǒ htodě dò̌htò̌ lǒkho tîsî̌bû dě gûkû̌ nû̌ûkò.

¹⁵ Tǒ̤phû̌ htě a htòwǒ dě a glè ma̤pè̤kèbò shiga tebě toǒnu a ǒ nû̌û gokû hǎhtò̌. Dě a pǒǐ asî ta khî̌po̤ te̤htò̌ pě. Dě Cǒmara htě a jòta̤lǒ̤bò sî̌yata̤lǒ̤bò htǒotapwa̤ glè dǔlṳ a ta̤sò̌dû̌ dě a cèrò asî sǒsǒta kò wî̤hǎhtò̌ sobîshi nu pě.

¹⁶ Dě a hǐdopo̤to̤htû alo̤ ta akhò̌lo̤nu, kò khwè̌nǎ ami̤ tophlǒ ta, “Khwǐcophǎ toǒ akhwǐcophǎ, Běcǎ toǒ a Běcǎ,” kò khwè̌nǎ hǐnu.

¹⁷ Hǐnuhtodě he kè̌shǐ tanaphû̌ tapwa̤ ihtǒ ǒ lṳmṳkû dě a jipwi̤ yi̤kǒhtò̌bò htû̌phû̌yṳphû̌ lǒ̤bò mǒla̤nu toǒ dě a hî̌,

¹⁸ “Ma̤pûhǐ sî hèǎ kû̌ lǒkho Khwǐcophǎ toǒ ayî̌, klihǐkǒdû̌ ta kliphû̌ toǒ ayî̌, tîsî̌ toǒ ta pwa̤dò̌ nû̌û toǒ ayî̌, jûphû̌ ta kòyò htě a nî̤bǎ ta̤pelesesǎ toǒ ayî̌, kòyò htě ami̤ lṳshilṳga toǒ ta kòyò htě kò gènè̤ pî̌tî̌ nû̌û toǒ ayî̌nu, hèǒplǒbò mò̌ nû̌û dě Cǒmara apwèdû̌ akûbǎo.”

¹⁹ Bǎnuakha he kè̌shǐ ta̤mi̤ta̤mò̤nu tado, ta hǎkhû̌ Khwǐcophǎ toǒ ta asî kliphû̌ toǒ ǒplǒdǒbò nû̌û dě a glè shě kòyò htě a dò̌ tîsî̌nu tapwa̤ ta akliphû̌nu toǒ.

²⁰ Kò pṳ̂nṳkè ta̤mi̤ta̤mò̤nu tado dě kò pṳ̂nṳ kû̌dǒpo̤ pwa̤po̤ lòho htě a ma̤lṳ bǎ kò ta̤cǒklî̌kî̌ya dě ta̤mi̤ta̤mò̤nu tado alo̤mo̤nu tapwa̤. Dě a ma̤ cǒklî̌kî̌ya bǎ kò akhû̌akhî, a lǒplò̤bò kòyò htě a nî̤bǎ ta̤mi̤ta̤mò̤nu tado a ta̤ma̤dòǐ dě a saba nû̌ûnu toǒ. Ta̤mi̤ta̤mò̤nu tado ta pwa̤po̤ htě a lǒplò̤ kònu tapwa̤ sò̌gini̤bò kò wîlòte̤ samṳkè asî dě mî̌ htě kò shû̌gè nû̌ûta ya̤sû̌bònu toǒ akû.

²¹ Bò꤮ a kliphû̌ htě a ǒkè toǒnu, kò ma̤sikè asî ta tǒ̤phû̌ htě a hǎhtò̌ dě kòyò dò̌ tîsî̌nu tapwa̤ agokûnu tabǎ, dě bò꤮ htû̌tî̤pî̤nu toǒ hè cǒ ǎkǒobebò asî yî̌.