Ta̤dǔlè̌nǎ 16 - Kawyaw RC

Cǒmara a ta̤sò̌dû̌ balo̤dû̌ toǒ

¹ Htodě he gana̤de yo̤pwe̤ te̤we̤tososhû̌ ta̤lṳhtò̌hokû dě a hî̌ tanaphû̌ susǒtapwa̤nu toǒ, “Cû̌ glolò̤te̤ Cǒmara a ta̤sò̌dû̌ balo̤dû̌ susǒtama htǒo dě hǎkhû̌nu.”

² Tanaphû̌ awǐgutṳ̌ tapwa̤ cû̌ glolò̤te̤ a balo̤dû̌ dě hǎkhû̌. Htǒotaplǎdě kòyò htě a phî̌shǔ ta̤mi̤ta̤mò̤ a ta̤ma̤dòǐ dě sabahtò̌ nû̌ûpwa̤yo̤ htǒotoǒnu, a wesha shuphǔshèwè mè̤mè̤̌.

³ Htodě tanaphû̌ ginǐ̤pwa̤ tapwa̤ glolò̤te̤lè̌ a balo̤dû̌ shidû̌shite̤we̤kû dě shi toǒ htûhtò̌ sǒsǒta kòyòsi asǐnu. Bò꤮ ta̤phû̌ta̤li̤ ǒ shidû̌shite̤we̤kû toǒnu a sikèbò.

⁴ Htodě tanaphû̌ supwa̤tapwa̤ glolò̤te̤ a balo̤dû̌ dě shilo̤ toǒ ta shipo̤htǎkhû̌ toǒ akû dě shi htûhtò̌bò ta sǐ.

⁵ Dě he gana̤de tanaphû̌ htě a ǒpo̤ shinu tapwa̤ hî̌, “Pwa̤htě acahtǐ, pwa̤htě a ǒ bǎ nukha tǒ̤lò̤khònò̤ htǒotapwa̤, na ta̤cèrò htǒotoǒnu, acǒatè̤ pwǎ.

⁶ Dě asî ma̤sǐlò̤ ma̤si na kòyò ta na pwa̤po̤ toǒ akhû̌akhî, na ǐo gesǒ asî ta sǐ ali̤ htǒonu hǒ. Asî bǎoge pwǐhè̌o numî̌ atoabǎ pwǎ.”

⁷ Htodě he gana̤de yo̤po̤htò̌ dě ta̤lṳwa̤lo̤ nudě a hî̌, “Jòta̤ lǒ̤꤮ bò a Běcǎ Cǒmara, na ta̤cèrò htǒotoǒnu acǒatè̤, atoabǎ mè̤mè̤̌.”

⁸ Htǒotaplǎ lè̌dě tanaphû̌ lǐ̤pwa̤ tapwa̤ cû̌ glolò̤te̤lè̌ a balo̤dû̌ lṳmṳlo̤ dě Cǒmara nogûshěhè lṳmṳ dě agûlû̌bò kòyòhǎkhû̌phû̌ htǒotoǒ.

⁹ Asî khòbǎbò lṳmṳlû̌ asî dě a ǐshoǐbě lǒkho Cǒmara htě a ta̤sîrîshû̌sho dě a ǐhtûhtò̌ ta̤shasila̤ toǒ htǒonu tapwa̤. Asî khòbǎ pwǐhè̌o hǐnudě a shò̌lò̤sû̌shò̌lò̤sò̌ gesǒ lǒkho asò̌phlǒ tò̤. Htohǒtò̤ a jûle̤phî̌yo̤ kû̌kò ta̤sîrîdû̌sîrîhtû dî̌kî̌ tò̤.

¹⁰ Tanaphû̌ yè̤̌pwa̤ tapwa̤ glolò̤te̤ a balo̤dû̌ ta̤mi̤ta̤mò̤ a gògohtò̌yî̤ htǒonu akhû̌ dě ta̤khǐ ǒhtò̌ dě ta̤mi̤ta̤mò̤ ashiagakû. Dě a khòbǎ ta̤jîta̤jû htǒo akhû̌akhî, asî ěbò lǒkho aplî̤.

¹¹ Dě asî wesha dě ashawè̤ nû̌û toǒ akhû̌akhî, a ǐshoǐběbò lǒkho mǒkhû̌ a Cǒmara htǒotapwa̤. A khòbǎ hǐnu pwǎ̤ta a shò̌lò̤ge lǒkho asò̌ tò̤.

¹² Htodě tanaphû̌ apwa̤ susǒ htǒotapwa̤ cû̌ glolò̤te̤lè̌ abalo̤dû̌ dě shilo̤dû̌ htě kò kaǎ yǎta Uphrětǐ htǒotabo akû. Ma̤pûhǐ a ma̤jè Khwǐ dě mṳhtò̌ toǒ hè klè̌ ayanudě, shilo̤dû̌ htǒotabo khwesǔkè bǎ asî.

¹³ Htodě he kè̌shǐ ta̤htûpwa̤ phû̌mò̤ sudo htě alò̤ta dî̌phû̌ toǒ. Dě asî ǒ wṳ̂sapo̤pṳ gokû ta ta̤mi̤ta̤mò̤ dě awǐnu tado agokû ta pwa̤po̤ lòhonu mî̌ ta̤mi̤ta̤mò̤ ginǐ̤do tadonu tapwa̤ agokû dě a hǎhtò̌.

¹⁴ Asî mî̌ khînǎkhîno htě a ma̤jò ta̤cǒklî̌ toǒ. Ta̤htûpwa̤ htǒosudonu a glè hǎhtò̌cû̌bò hǎkhû̌ Khwǐ toǒ a ǒ, dě a glè cû̌ htěplǒcǐhtubò asî, ma̤tè̤hî̌dě htû̌ Cǒmara htě a jòta̤lǒ̤bò a Běcǎ htǒotapwa̤ cèrò kò a ni̤dû̌ni̤mo̤ pě ti̤ni̤nu, asî shě lǒkho Běcǎ pě.

¹⁵ Ye̤shǔkhrî̌stu hî̌, “Gana̤de lǒkho, he hè sǒsǒta pwa̤ǎhǔ hènu pě. Kòyò tapwa̤pwa̤ htě a ǒ sòklò dě a ǒ wǒnǎ a ta̤kûta̤sǒ toǒnu, a nî̤bǎ ta̤howi̤ pě. Asî dè ǒtîwî̌tòwònǎ a ta̤kûta̤sǒ pě hî̌dě, asî glè cû̌ koyo tò̤, htohǒtò̤ asî sòwò̤ kòkla tò̤.”

¹⁶ Bǎnuakha ta̤htûpwa̤ phû̌mò̤ htǒosudonu, a nocû̌ ǒpo̤ǐ Khwǐ htǒotoǒ gûla̤ tò̤glò htě Ebrephû̌yo̤ hî̌ nû̌ûta Amekado.

¹⁷ Htodě anǒkònu tanaphû̌ apwa̤ susǒtapwa̤nu tapwa̤ cû̌ glolò̤te̤ abalo̤dû̌ gili̤kla dě yo̤po̤htò̌shû̌ bǎ Khwǐcophǎ gògohtahtò̌yî̤ bǎ ta̤lṳhtò̌ho akûnu dě a hî̌, “A htohǒ,” hǐnu.

¹⁸ Dě laû̌shě, mǒgomǒyi̤, tî̌lî̌lò̤, tṳtṳhtû̌dî̌ shû̌sho sîtoǒ ǒhtò̌bò. Tèhtò̌ bǎ kò bǒlò̤ kòyòhǎkhû̌phû̌ to̤ akhîakha bǎnukha pěnu, tṳtṳhtû̌dî̌ ma̤shû̌sho lò̤tahǐnu a htûhtò̌ nǒ dǐkhò̌꤮ tò̤. Htǒo mî̌ tṳtṳhtû̌dî̌ mî̌ ashû̌ashokhlo kò hǒ.

¹⁹ Wî̤dû̌nu tî̤wî̤ nûkǒkîkè sukǒkî dě shiga pṳ̂̌tebě awî̤ toǒnu, a nûpò̌nûshîkèbò. Cǒmara gènè̤htò̌ to̤ wî̤dû̌ Babulo htě a ǐo Babulowî̤ htǒonu ta a ta̤sò̌dû̌ shû̌sho ashisî̌yo̤ a balo̤htǒo.

²⁰ Bò꤮ shikholophû̌jotoǒ hǎmǎkèbò, htodě bò꤮ kholo htǒotoǒnu, kè̌shǐpe yǎtò̤hǒ.

²¹ Sèwèji phlǒdû̌ tamanu a phǔ꤮ lò̤ ajè sushi toǒnu a ǒ mǒkhû̌ lòte̤ dě a lòte̤ bǎjîbǎjû mè̤mè̤̌ kòyò htǒotoǒ akhû̌akhî, a ǐshoǐběbò Cǒmara.