Ta̤dǔlè̌nǎ 15 - Kawyaw RC

Tanaphû̌ susǒtapwa̤ ta ta̤jî susǒtacǎ

¹ Hǐnuhtodě he kè̌shǐ ta̤cǒklî̌kî̌ya dû̌ ahǔwa̤ tacǎ ǒlṳhtò̌ dě mǒla̤. He kè̌shǐ tanaphû̌ susǒtapwa̤ dě a pṳ̂měǐ ta̤jîta̤jû susǒtacǎ. Htǒotoǒ mî̌ ta̤jîta̤jû nǒkò gutṳ̌lò̤ hǒ, ma̤tè̤hî̌dě, htǒotoǒ htûhtò̌ htopěnu, Cǒmara sò̌phlǒdû̌pe tò̤hǒ.

² He kè̌shǐ ta̤ htě alò̤ta shidû̌shite̤we̤ dě ashěkîtrî̌lò̤ dǒta mî̌ ǒ tokoǒ. He kè̌shǐpo̤ kòyò toǒ dě a ma̤pè̤ ta̤mi̤ta̤mò̤ htǒotado ta apwa̤yo̤, ta alî̤phlǒ dǒmǎnǎ ya̤susǒ ta shisusǒ ta susǒnu tado. Asî ihtǒ ǒ shidû̌shite̤we̤ htě ashěkîtrî̌ htǒo ahtunu, dě a pṳ̂měǐ lǒkho tǐtu htě Cǒmara ǐ asînu toǒ.

³ Dě asî sò̌po̤htò̌ǐ lǒkho Cǒmara ajûphû̌ Mǒ̤jè a ta̤sò̌po̤ ta sophû̌ a ta̤sò̌po̤ htǒo dě a hî̌, “Jò ta̤lǒ̤꤮ bò a Běcǎ Cǒmara na ta̤ma̤ toǒnu adû̌ayǒ dě a cǒklî̌kî̌ya mè̤mè̤̌. Na mî̌ shiphû̌gaphû̌ toǒ akhwǐcophǎ, naklè̌naklò sî toǒ numî̌ atoabǎ acǒatè̤ mè̤mè̤̌.

⁴ Kǒ꤮ Běcǎ꤮, kò ǐsha nala̤ tò̤, na sîrîdû̌sîrîhtû htǒo kò olò̤ tò̤nu kò ǒjòpe dǐpwǎ̤꤮ tò̤. Cǒmara cahtǐnu a ǒ pwǎpǒ̤ na tapwǎ̤꤮ pa. Shiphû̌gaphû̌ lǒ̤꤮ bò kè̌shǐ nama̤ ta̤tota̤bǎ akhû̌akhî, a hè subusabahtò̌bò na pě.”

⁵ Htodě he kè̌shǐ mǒkhû̌ a ta̤lṳhtò̌ho dě ta̤wṳ̂dò hǐphû̌dû̌ cahtǐkû agûla̤ cahtǐgutṳ̌nu tò̤glò lṳ̂mohtò̌.

⁶ Dě tanaphû̌ susǒtapwa̤ htě a pṳ̂měǐ ta̤jîta̤jû susǒtacǎ htǒotoǒnu, a ǒ ta̤lṳhtò̌hokû dě a hǎhtò̌. Asî kûsǒnṳ hǐdohǐyò̤ bûplî shěrakha toǒ dě a shenṳ lǒkho htabě tîbî̌dû̌ dě a soolo̤ pṳ̂̌tapwa̤.

⁷ Bǎnuakha ta̤htûpwa̤ lǐ̤do akla tadonu, a ǐ tanaphû̌ susǒtapwa̤ htǒonu toǒ balo̤htadû̌ susǒtabǎ htě a ǒbe ta Cǒmara dě a ǒhtûpwa̤ tûjûpwa̤ talakhǎ htǒotapwa̤ a ta̤sò̌phlǒdû̌.

⁸ Mî̌ htě a mî̌ Cǒmara a ta̤sîrîdû̌sîrîhtû ta a ta̤po̤ta̤phǎ htǒonu, a khǔtoo betî̌pî̌bò dě ta̤lṳhtò̌hokû. Htodě ta̤jîta̤jû susǒtacǎ htě tanaphû̌ htǒo susǒtapwa̤ phî̌hènṳ htǒo, a dè htohǒtò̤ hî̌nu, kò nṳjò dě ta̤lṳhtò̌hokû dǐpwǎ̤tò̤.