Ta̤dǔlè̌nǎ 11 - Kawyaw RC

Pwa̤lò̤sasî̌ sò̌gini̤

¹ Bǎnuakha kò ǐ he gopo̤phomṳ htě alò̤ta la̤tè nò̌plè tabo dě kò hî̌ he, “Cû̌tèkè̌ Cǒmara ta̤lṳhtò̌ho ta ta̤lṳwa̤nu, htodě dǒmǎ kòyò htě a subusabahtò̌ bǎ ta̤lṳhtò̌ho akûnu toǒ.

² Pwǎ̤ta ta̤lṳhtò̌ho akhlo we̤kûnu tèbǎ to̤pû yǎ ma̤ nî̌꤮, ma̤tè̤hî̌dě kò ǐlò̤hto yǎ dě Yṳ̌daphû̌ mè̤tò̤ toǒ a cǔdekû hǒ. Asî htò̌kha yî̤lò̤bò wî̤cahtǐ htǒotî̤wî̤nu li̤shi ta ginǐ̤la akû pě.

³ He kòyò htě a glè lò̤sasî̌htǒo sò̌gini̤nu, he ǐ asî ta̤po̤ta̤phǎ pě. Asî kûsǒhtò̌ hǐdohǐyò̤bǒ tûphrû toǒ pě. Asî hî̌po̤phǎnǎ bǎ kòyò ta Cǒmara ta̤wi̤ta̤kè̌ pě dě a ǒyî̤ amṳni̤ tîrî̌ ta ginǐ̤ya̤ ta shisusǒ pě.”

⁴ Pwa̤lò̤sasî̌ htǒosò̌gini̤ numî̌ a sǒsǒta Olivemṳ ginǐ̤bo ta mî̌ko ginǐ̤ma dě a ihtǒ ǒ Cǒmara htě a pǒǐ hǎkhû̌ htǒotapwa̤ alo̤mo̤nu hǒ.

⁵ Kòyò tapwa̤pwa̤ dè ma̤pò̤ma̤sha asî hî̌nu, mî̌ hǎhtò̌ dě asî gokû, dě a gèkèbò kòyò htě a sò̌khě nû̌û toǒ. Dě kòyò tapwa̤pwa̤nu a glè̌ ma̤pò̤ma̤sha asî hî̌nu a ma̤sikè asî hǐnu pě.

⁶ Bǎ asî hî̌po̤phǎnǎ bǎ kò ta Cǒmara ale̤ayo̤ akhanu, ma̤pûhǐ khwè̌ju pû dî̌kî̌꤮ ma̤ nudě, asî ǒ ta a ta̤po̤ta̤phǎ dě a ma̤bǐjòkè mǒkhû̌ atakha pě. Htohǒtò̤ a ta̤po̤ta̤phǎ ǒpe ta a glè ma̤htûhtò̌ shihtǒonu ta sǐ numî̌ a ma̤ jòjò. Htohǒtò̤ a ta̤po̤ta̤phǎ ǒpe ta a dè sò̌yṳ nohtûhtò̌ sala̤ ta̤shasila̤ sîtoǒ hî̌nu, a phlělò̤ hǎkhû̌ dě a ma̤htûhtò̌ numî̌, a ma̤ jòjò pwǎ.

⁷ Bǎ asî khòlṳhto asò̌ akhanu, ta̤mi̤ta̤mò̤ tado ǒ khokûdû̌ khokûyo̤ dě a hèhtò̌ pě. A hǎhtò̌ shěshǔ asî htǒosò̌gini̤ pě. A ma̤pè̤ asî htǒosò̌gini̤ dě ma̤sikè asî pě.

⁸ A ma̤sihto asî dě kò bè̌lò̤ asî na̤saklû bǎ wî̤dû̌nu tî̤wî̤ a klè̌dakûnu pě. Wî̤nu tî̤wî̤ mî̌ wî̤ htě kò la̤ma̤si a Běcǎ dě nò̌dòhtǔlo̤nu tò̤glò hǒ. Wî̤htǒo tî̤wî̤ numî̌ kò kaǎ nû̌ûta ta̤htě kò la̤kè̌mò̌mṳ ta Sò̌dowî̤ tò̤mî̌ Egyptganu pwǎ.

⁹ Pṳ̂̌taga, pṳ̂̌tikhli, pṳ̂̌tacǎ, pṳ̂̌to̤yo̤, ta pṳ̂̌tṳgumṳ kè̌bò asî na̤klûhtǒo pě dě kò lǔ asî tò̤. Kò nobè̌ǒ asî hǐnu suni̤ ta tûkû̌ni̤ pě.

¹⁰ Dě asî htǒosò̌gini̤ si akhû̌akhî, kòyò ǒ hǎkhû̌bǎo pṳ̂̌꤮ tapwa̤ sò̌le̤sò̌lò̤bò pě. Asî ma̤lṳ̂ma̤pwè dě a sûcû̌ bǎ nû̌û sû tapwa̤ ta tapwa̤ pě, ma̤tè̤hî̌dě pwa̤po̤ htǒosò̌gini̤nu a ma̤htûhtò̌dû̌ bǎ asî ta̤jîta̤jû dě kòyòhǎkhû̌phû̌ toǒ khòbǎbò akhû̌akhî, a si bǎ asî dě a sò̌le̤sò̌lò̤bò.

¹¹ Pwǎ̤ta bǎ suni̤ ta tûkû̌ni̤ behtò̌nu, yolahtûpwa̤ ǒ Cǒmara ǒ htǒonu, a hèlò̤nṳ asîkû dě asî htûpwa̤gesǒ. Dě kòyò pṳ̂̌꤮ pwa̤ kè̌shǐ asî ihtǒge htǒotoǒnu, a sò̌gònò̤ ǐshabò.

¹² Hǐnuhtodě pwa̤lò̤sasî̌ htǒosò̌gini̤ gana̤de yo̤po̤htò̌ mǒkhû̌ dě a hî̌ asî, “Hèhtò̌ lǒkho bǎo” a hî̌ nû̌û hǐnu. Dě bǎ kòyò htě a sò̌khě nû̌û toǒ ǒpo̤kè̌ asî akhanu, asî gekihtò̌nṳ poǒlṳ tebě akla dě a htò̌ mǒkhû̌.

¹³ A ge kihtò̌htò̌ ta tṳtṳhtû̌dî̌ ma̤shû̌ mè̤mè̤̌. Wî̤ lòte̤jakè a lè̌shǐtalè̌ dě kòyòsikè apwa̤ susǒtîrî̌. Kòyò htě a ǒkè toǒnu, a te̤pe̤ ǐshabò lǒkho dě htû̌sò̌ǐ mǒkhû̌ a Cǒmaradû̌ a ta̤po̤ta̤phǎ.

¹⁴ Ta̤jîta̤jû ginǐ̤hutuhu ma̤htoana̤ hǒ hǐnudě yî̤hǒtò̤nu ta̤jîta̤jû sucǎtacǎ hèlǎpo̤ pě.

Tǔ ama susǒtama

¹⁵ Htodě bǎ tanaphû̌ apwa̤ susǒtapwa̤ htǒotapwa̤ ǔhtò̌ atǔ akhanu, yo̤toǒ po̤htò̌shû̌ mè̤mè̤̌ mǒkhû̌ dě a hî̌, “Khònò̤htǒo ta̤po̤ta̤phǎ htě a glè pǒǐ hǎkhû̌ htǒonumî̌ a htû pa Běcǎ ta a Mè̤shǐa ata dě a glè pǒta̤ tûjûpwa̤ talakhǎ hǒ.”

¹⁶ Htodě wè̤khǔwè̤pwa̤ gini̤shi ta sò̌li̤ htě a hǎnòò̌ bǎ Khwǐcophǎ gògohtahtò̌yî̤khû̌ dě Běcǎ Cǒmara alo̤mo̤ htǒotoǒnu, a gene̤lò̤ sabahtò̌ Cǒmara dě a hî̌ lǒkho,

¹⁷ “Jòta̤lǒ̤bò sî̌yata̤lǒ̤bò a Běcǎ Cǒmara htě a ǒhtûpwa̤ bǎ nukha, a ǒhtûpwa̤ tǒ̤lò̤khònò̤ tapwa̤, na noǎ na ta̤po̤ta̤phǎ adû̌ dě na tèhtò̌ pǒǐta̤ akhû̌akhî, pa hî̌bwǐhî̌sîrî na.

¹⁸ Khlilèhǔwa̤phû̌ toǒnu, a sò̌phlǒdû̌ lǒkho na hǒ. Pwǎ̤ta, hî̌tètè̌ bǎbǎ, na ta̤sò̌dû̌ akhîakha hèto̤hǒ. Akhîakha hèto̤nò ta na glèbǎ cèrò kòyòsi toǒ hǒ. Akhîakha hèto̤hǒ dě na glèbǎ ǐ na pwa̤po̤ htě a ma̤ na ta̤ma̤ toǒ bǎbǎ, na kòyò aprṳ̂ahonu toǒ bǎbǎ, kòyò pṳ̂̌꤮ tapwa̤ htě a bè̌dubè̌na̤ nanu toǒ bǎbǎ, kòyò mi̤dû̌sǎhtû toǒ bǎbǎ, kòyò htě kò gènè̤ pî̌tî̌ nû̌û toǒ bǎbǎ akhîakha hèto̤hǒ dě Cǒmara glèbǎ ǐ asî akhû̌akǎ hǒ. Akhîakha hèto̤hǒ dě na glè ma̤pî̌kè kòyò htě a ma̤pî̌kè hǎkhû̌nu toǒ hǒ.”

¹⁹ Bǎnukha kò bòmohtò̌ Cǒmara a ta̤lṳhtò̌ho dě mǒkhû̌nu tama. Dě kò kè̌shǐ ata̤olò̤mèlò̤ a tǒcahtǐ ǒ dě ta̤lṳhtò̌ hokûnu. Htodě laû̌shě, ta̤po̤pè̤tè̤, mǒgo tî̌lî̌lò̤, tṳtṳhtû̌dî̌ma̤, sèwèji phlǒdû̌ toǒ julòte̤ sǒsǒpwǐ khwè̌junu.