Rṳ̂̌me̤ 6 - Kawyaw RC

Ye̤shǔkhrî̌stu akhû̌akhî pa ǒhtûpwa̤

¹ Dè ma̤hǐnu hî̌dě, pa bǎ hî̌ hî̌tè? Ma̤pûhǐ sǔ Cǒmara abwǐasîrî ǒdû̌htò̌ ayanudě, pa tobǎ ma̤ sělěpo̤ ta̤sǔ ya?

² Hǐnu mè̤tò̤. Pa mî̌ asǒsǒta kòyò htě a si dě a ma̤ sělějòpe ta̤sǔ tò̤ htǒonu tapwa̤ hǒ. Hǐnudě pa cû̌ ǒhtûpwa̤ ma̤ sělějòpe ta̤sǔ hî̌tè?

³ Tò̤mî̌, sî shope̤kè hǒ ya? Bǎ pa lǒ̤꤮ bò plo pana̤ ta shi akha numî̌ pa dǔlṳ ta pa htûhtò̌ ta Ye̤shǔkhrî̌stu tacǎnǔ꤮ pa, dě pa si kû̌dǒ ta a numî̌ sî sî̌yapwǎ mè̤tò̤ya?

⁴ Hǐnu akhû̌akhî, bǎ pa ploshi akhanu, a lò̤ta pa si kû̌dǒ ta Khrî̌stu hǒ, dě kò lǔlò̤kû̌dǒ pa ta Khrî̌stu dě lṳkû. Dě papha Cǒmara a ta̤bwǐdû̌sîrîhtû po̤phǎ akhû̌akhî, pwǐ a ma̤htûpwa̤gesǒ Khrî̌stu ta ta̤si akûnu, a ǐ htûpwa̤ tû̌ pa htǒotoǒ ta ta̤htûpwa̤ asa pě.

⁵ Pa dè si kû̌dǒ ta Khrî̌stu ata̤sikû hî̌dě pa bǎ htûpwa̤ge mè̤mè̤̌ kû̌dǒ ta a pě.

⁶ Ma̤tè̤hî̌dě, ma̤pûhǐ ta̤sǔ a ta̤po̤ta̤phǎ ashû̌asho htǒo pǒǐpe pû pa tò̤, htohǒtò̤ ma̤pûhǐ pa htûpe pû ta̤sǔ ajû tò̤nu, sî sî̌ya ta pa ta̤ǒhtûpwa̤ ali̤ htǒonu, Cǒmara ma̤sihtò̌ kû̌dǒhto ta Khrî̌stu hǒ.

⁷ Ma̤tè̤hî̌dě, bǎ kòyò tapwa̤pwa̤ si akhanu, ta̤sǔ a ta̤po̤ta̤phǎ shû̌shohtǒo pǒǐjòpe nû̌û tò̤ hǒ.

⁸ Pa si kû̌dǒ ta Khrî̌stu akhû̌akhî, pa yṳǎ ta pa ǒhtûpwa̤ kû̌dǒ ta a hǒ.

⁹ Ma̤tè̤hî̌dě pa sî̌ya ta Khrî̌stu htûpwa̤gesǒ ta ta̤si dě a sijòpetò̤. Ta̤simo̤pha pǒǐjòpe nû̌û tò̤ hǒ.

¹⁰ Dě Ye̤shǔ si akhû̌akhî, ta̤sǔ a ta̤po̤ta̤phǎ shû̌sho lò̤jûbò nû̌ûla̤ hǒ. A si taplǎpa dě ahtoaphlǔbò hǒ, a lo̤bǎsipe tò̤. Pwǎ̤tadě khònò̤htǒo a htûpwa̤ dě a ǒhtûpwa̤ ta Cǒmara aya hǒ.

¹¹ Sǒsǒta hǐnuakho, sî to hî̌lò̤ lǒkho sîna̤ ta, ta̤sǔ ata toǒnu, pa bǎbè̌kè yǎ pwǐ kòyòsi dě a ma̤jòpe ta̤sǔ tò̤nu. Pò̤̌ta sî ta Ye̤shǔkhrî̌stu mî̌ sî htûhtò̌ nû̌û tacǎ꤮ pa akhû̌akhî, sî tobǎ ǒhtûpwa̤ ma̤lîma̤rakhahtò̌ lǒkho Cǒmara.

¹² Hǐnudě, ma̤pûhǐ sî gûma̤kû̌pe pû ta̤sò̌yṳ putupatǎ phû̌mò̤ toǒ tò̤nu, nopǒǐpe pûma̤ sî na̤klû htě a sijò htǒonu ta ta̤sǔ htǒonu ma̤ nî̌꤮.

¹³ Ǐ pûma̤ sî na̤klû aphwǐaphrû̌ htǒonu ta ta̤phû̌mò̤shî̌hto glè noǎ nû̌û ta a ta̤wè̌ta̤htò la̤ma̤ ta̤sǔ toǒ ayanu ma̤ nî̌꤮. Cǒmara ǐ na ta̤ǒhtûpwa̤ asa akhû̌akhî, ǐ lǒkho sî na̤klû htǒonu dě a ǒnu. Ǐlò̤bò sî na̤klû aphwǐaphrû̌ htǒotoǒ dě Cǒmara a ǒnu, pwǐ sî noǎ ta̤wè̌ta̤htònu, noǎ lǒkho sî na̤klû aphwǐaphrû̌ htǒonu ta sî la̤ma̤ ta̤cǒta̤tè̤ aya nî̌꤮.

¹⁴ Sî ǒhtûpwa̤ dě ta̤sû̌ta̤tòwò ala̤ mè̤pe tò̤, sî ǒhtûpwa̤ ta Cǒmara abwǐasîrî ala̤ hǒ. Hǐnudě ta̤sǔ htǒonu a htûpe sîběcǎ mè̤petò̤hǒ.

Ta̤cǒta̤tè̤ ajû toǒ

¹⁵ Hǐnudě pa dè ǒpe dě ta̤sû̌ta̤tòwò ala̤ tò̤, pa ǒ dě ta̤bwǐta̤sîrî ala̤ hî̌dě, khònò̤htǒo pa ma̤ta̤sǔ mî̌ anî̤ pwǎ kò̌? Hǐnu mè̤tò̤.

¹⁶ Sî sî̌yanǒtò̤ ya? Bǎ sî ǐlò̤ sîna̤ dě kòyò tapwa̤pwa̤ a cǔdekû dě sî bǎ htû nû̌ûjû akhanu, sî gana̤de kòhǔwa̤ ayo̤ mî̌ a nî̤petò̤ hǒ. Sî bǎ gana̤de pwǎpǒ̤ ayo̤ pwǎ, mè̤tò̤ya? Hǐnudě bǎ sî htû ta̤sǔ ajû akhanu, a sûcû̌kè sî dě ta̤si ǒ pě. Pwǎ̤tadě sî dè gana̤de Cǒmara ayo̤ hî̌dě a noǒhtûpwa̤ sî dě sî ma̤to nû̌û sò̌phlǒ pě.

¹⁷ He hî̌bwǐhî̌sîrî Cǒmara, ma̤tè̤hî̌dě, děwǐkha sî htûbǎhto ta̤sǔ ajû taplǎ pwǎ̤ta khònò̤htǒo sî gana̤de lǒ̤sû̌lǒ̤sò̌ Cǒmara a ta̤sû̌ǐ asa dě sî nî̤bǎ htǒotoǒ hǒ.

¹⁸ Cǒmara bòphlǔ plûhǎhtò̌cû̌kè sî ta ta̤sǔta̤plě ajû htǒonu hǒ. Khònò̤htǒo sî htû ta̤cǒta̤tè̤ ajû hǒ.

¹⁹ He hî̌bǎ bǎ sî ta lṳmṳhǎlṳmṳlî a ta̤hî̌bǎ toǒ, ma̤tè̤hî̌dě sî mî̌ kòyòhǎkhû̌phû̌, sî sî̌yaphloyû kû̌kò Cǒmara a tatoǒ tò̤ akhû̌akhî, he hî̌bǎpwǎ bǎ sî hǐnu. Dě nukha mî̌ sî nohtû sî na̤klû aphwǐaphrû̌ htǒotoǒ ta sîběcǎ htě a phû̌mò̤shî̌htonu toǒ ajû, sî noma̤ asî ta ta̤putupatǎ phû̌mò̤shî̌hto toǒ dě sî ma̤sǔma̤plěbò Cǒmara a ta̤sû̌ta̤tòwò pṳ̂̌tacǎ. Hǐnudě khònò̤htǒo sî na̤klû aphwǐaphrû̌ htǒotoǒnu nohtûlè̌ yǎta Běcǎ htě awǒ htǒotapwa̤ ajûnu nî̌꤮. Ma̤pûhǐ sî bǎ htûhtò̌ kòyòcahtǐ ayanudě, nohtûhtò̌ mò̌ sî na̤klû aphwǐaphrû̌ htǒotoǒ ta ta̤cǒta̤tè̤ ajû htǒonu nî̌꤮.

²⁰ Bǎ sî htû ta̤ma̤sǔphû̌ ajû akhanu, ta̤cǒta̤tè̤ aběcǎ pǒǐ sî tò̤.

²¹ Bǎnukha na nî̤bǎ kû̌kò ta̤wî̤ta̤wǒ dǐcǎ꤮ tò̤. Dě na ma̤ hǐnu akhû̌akhî, khònò̤dě sî gènè̤ sòwò̤ǐ sîna̤ hǒ. Ta̤ma̤ hǐnutoǒ mî̌ a sûcû̌ kòyò ta ta̤si tûjûpwa̤ agûla̤ pwǎ.

²² Pò̤̌ta khònò̤htǒo Cǒmara bòphlǔ plûhǎhtò̌cû̌kè sî ta ta̤ma̤sǔphû̌ ajû hǒ. Dě sî htû Cǒmara jû asa toǒ hǒ. Dě sî htû hǐnu akhû̌akhî, a nî̤bwǐnî̤sîrî ta sîya mî̌ mè̤hǒ a sûcû̌ sî dě ta̤ǒhtûpwa̤ cahtǐ a klè̌dakû htǒonu hǒ. Dě pa ta̤htûpwa̤ cahtǐ akhû̌akhî, a nî̤bwǐnî̤sîrî ta sîya mî̌ sî nî̤bǎ yolahtûpwa̤ tûjûpwa̤ htǒonu.

²³ Ma̤tè̤hî̌dě, ta̤sǔ akhû̌akǎ mî̌ ta̤si. Pwǎ̤ta ta̤bwǐta̤sîrî asû htě Cǒmara ǐlò̤ko pa htǒonumî̌ yolahtûpwa̤ tûjûpwa̤ dě pa Běcǎ Ye̤shǔkhrî̌stu akû htǒonuhǒ.