Rṳ̂̌me̤ 4 - Kawyaw RC

Cǒmara bè̌cǒbè̌tè̤ Abraham hî̌tè

¹ Dèhî̌hǐnudě, pa Yṳ̌daphû̌ toǒ apha Abraham htǒonulè, pa bǎ hî̌ yǎ hî̌tè? Cǒmara bè̌cǒbè̌tè̤ kòyòhǎkhû̌phû̌ ta a ta̤yṳta̤nǎ pwǎ pwǎ̤ta Abraham cû̌kè̌shǐ sî̌yabǎ kû̌kò ta̤cǒta̤tè̤ hî̌tè?

² Cǒmara dè bè̌cǒbè̌tè̤ Abraham ta a ma̤wǒ ta̤ khû̌khî dèhî̌dě a phî̌htò̌yî̤ tû̌ ana̤ ta a ma̤ ta̤wǒ htǒotoǒ khû̌khî hî̌numî̌ anî̤ pwǎ. Pwǎ̤ta Cǒmara a lo̤mo̤nu, a phî̌htò̌yî̤ ta ta̤htǒotoǒ akhû̌akhînu anî̤ tò̤.

³ Lî̤cahtǐkû hî̌, “Abraham yṳǎ Cǒmara ta ata̤yṳ akhû̌akhî, Cǒmara bè̌cǒbè̌tè̤ nû̌û.”

⁴ Kòyò tapwa̤pwa̤ dè cû̌ma̤ bǎ kòta̤ dě kò dè ǐnû̌û akhû̌akǎ hî̌nu, a nî̤bǎ akhû̌akǎ htǒonumî̌ a nî̤bǎko pwǐ sûnu mè̤ dǐkhò̌꤮ tò̤. A wè̤ta̤ dě a nî̤bǎpwǎ akhû̌akǎ.

⁵ Pò̤̌ta kòyò htě a yṳǎ a ta̤ma̤wǒ htǒotoǒ tò̤, dě a yṳǎpwǎ Cǒmara htě a ma̤cǒma̤tè̤ ge kòyòjî kòyòphû̌mò̤ htǒo tapwa̤ pwǎ dèhî̌dě, Cǒmara kè̌shǐ nû̌û ta̤yṳhtǒo dě a bè̌cǒbè̌tè̤ nû̌û ta ana̤nu pě.

⁶ Khwǐdǎ̤wi̤ hî̌ sǒsǒta hǐnu děnukha ta, kòyò htě a nî̤bǎ ta̤howi̤ toǒ numî̌ kòyò htě Cǒmara bè̌cǒbè̌tè̤ asî ta a ta̤ma̤wǒta̤nu toǒ akò mè̤tò̤.

⁷ Khwǐdǎ̤wi̤ hî̌, “Kòyò htě Cǒmara bòlû̌ nû̌ûta̤sǔ dě ma̤bǐkèbò nû̌ûta̤sǔ toǒnu, a nî̤bǎ ta̤howi̤ hǒ.

⁸ Kòyò htě Běcǎ khwè̌mǎnǎpe nû̌ûta̤sǔ tò̤ toǒnu, a nî̤bǎ ta̤howi̤ hǒ.”

⁹ Ta̤howi̤ htǒonumî̌ nî̤bǎjò pwǎpǒ̤ Yṳ̌daphû̌ htě a dǔtṳphěnu toǒ pwǎ ya? Asî nî̤bǎ tû̌ mè̤tò̤. Yṳ̌daphû̌ mè̤tò̤ dě a dǔtṳ kû̌kò phě tò̤nu toǒ mî̌ a ǒpadǒ pwǎ. Pa hî̌htotû̌hǒ, Abraham ata̤yṳ akhû̌akhî, Cǒmara bè̌cǒbè̌tè̤ nû̌û.

¹⁰ Dè ma̤hǐnu hî̌dě bǎ Cǒmara bè̌cǒbè̌tè̤ Abraham akhanumî̌ ato bò̌khòtè? Mî̌ awǐ ta a dǔtṳphěnu ya? Mè̤tò̤mî̌ anǒkhlo ta hǐnu ya? Anǒkhlo ta hǐnu mè̤tò̤, awǐkhlonu.

¹¹ A dǔtṳphě numî̌ anǒkò pwǎ. Bǎ a dǔtṳphě hǒtò̤ akhanu, ata̤yṳ akhû̌akhî, Cǒmara bè̌ a pwǐ kòyòcǒkòyòtè̤ tapwa̤hǒ, hǐnudě a ma̤měma̤glekè nû̌û ta ta̤dǔtṳphě hǐnu tacǎ pwǎ. Hǐnudě kòyò htě a dǔtṳ kû̌kò phě tò̤ pwǎ̤tadě, a yṳǎ Cǒmara toǒnu, Abraham htûbò kòyò hǐnu toǒ apha hǒ. Hǐnu akhû̌akhî, Cǒmara bè̌cǒbè̌tè̤ dǒ asî hǒ.

¹² Htohǒtò̤, pa Yṳ̌daphû̌ htǒotoǒnu, pa dǔtṳphě pwǎ̤tadě pa dè nǎla̤ǐ ta̤dǔtṳphě htǒo tò̤ toǒnu, Abraham mî̌ a htû dǒ paphapha. Bǎ papha Abraham dǔtṳphě hǒtò̤ kha a ta̤yṳta̤nǎ htǒonu, pa glè gû kè̌mò̌mṳ kû̌ yǎ.

Ta̤yṳ akhû̌akhî, nî̤bǎ Cǒmara a ta̤olò̤

¹³ Cǒmara olò̤ Abraham ta akhlialè toǒ dě wǐnukha ta hǎkhû̌bǎo teběbònu, a htûhtò̌ asîta pě. Pò̤̌ta asî jûle̤phî̌yo̤ lṳ̂kû̌ma̤kû̌ ta̤sû̌ta̤tòwò akò dě a htûhtò̌ asîta pě, a olò̤ nû̌û hǐnu mè̤tò̤. Cǒmara bè̌cǒbè̌tè̤ asî ta a ta̤yṳta̤nǎ akhû̌akhî, a olò̤ ta a ǐpwǎ asî pě.

¹⁴ Cǒmara dè olò̤ ta kòyò htě a lṳ̂kû̌ma̤kû̌ ta̤sû̌ta̤tòwò htǒotoǒnu a nî̤bǎ Cǒmara a ta̤olò̤ pě dèhî̌dě ta̤yṳta̤nǎ htǒonu abwǐsîrî ǒpe tò̤ hǒ. Ta̤olò̤ htǒonu amûasǎ ǒpe dǐcǎ꤮ tò̤.

¹⁵ Ma̤tè̤hî̌dě ta̤sû̌ta̤tòwò mî̌ a ma̤ sò̌phlǒdû̌ Cǒmara sò̌phlǒ. Kòyòhǎkhû̌phû̌ lṳ̂bò̌ ta̤sû̌ta̤tòwò pṳ̂̌꤮ taplǎ tò̤ akhû̌akhî, a ma̤sò̌phlǒdû̌ Cǒmara asò̌phlǒ dě a cèrò asî pě. Ta̤sû̌ta̤tòwò dè ǒtò̤nu kòyò tapwǎ̤ mî̌ a cû̌tûlû̌khatî̤lî̤ ta̤sû̌ta̤tòwò tò̤.

¹⁶ Hǐnudě, pa nî̤bǎjò Cǒmara a ta̤olò̤ ta pa ta̤yṳ tacǎ꤮ pa pwǎ. Ma̤tè̤hî̌dě ma̤pûhǐ pa nî̤bǎ ta̤htǒonu ta abwǐasîrî khû̌khî tû̌pwǎ ayanu, pa bǎ ǒ ta ta̤yṳ. Htohǒtò̤, Abraham akhlialè lǒ̤꤮ bò toǒnu a nî̤bǎbò ta̤olò̤ htǒo pě. Kòyò htě a lṳ̂kû̌ma̤kû̌ Yṳ̌daphû̌ a ta̤sû̌ta̤tòwònu toǒ nî̤bǎ tû̌ mè̤tò̤, kòyò htě a yṳǎna̤ǎ sǒsǒta Abrahamnu toǒ nî̤bǎbòdǒ pě. Abraham mî̌ pa lǒ̤꤮ bò apha.

¹⁷ Lî̤cahtǐkû pwe̤ǐnǎ ta, “He nohtûhtò̌ na ta khlilèphû̌ tṳ̂prṳ̂taphǎ apha hǒ.” A htû bǎ papha dě Cǒmara alo̤mo̤. Cǒmara htǒotapwa̤ numî̌ a mî̌ papha Abraham yṳǎnu tapwa̤ hǒ. A mî̌ Cǒmara htě a ma̤htûpwa̤gesǒ kòyòsi, htohǒtò̤ a hî̌lò̤ pwǎ ayo̤ tûmû pwǎ dě ta̤ htě a ǒ hǒtò̤ toǒnu a htûhtò̌bò.

¹⁸ Cǒmara hî̌ Abraham, “Na htû khlilèphû̌ tṳ̂prṳ̂taphǎ apha pě. Nakhlinalè ǒplṳ̂ǒphǎ lò̤kèta shǎ dě mǒla̤nu toǒ pě.” Cǒmara hî̌ ta̤htǒonu ala̤ htûhtò̌ ta Abraham glè phû̌ ǒwo̤ǒhtò̌ ayanu ayûpe tò̤ pwǎ̤tadě a yṳǎ ǒpo̤kè̌shuǐ ta a htûhtò̌.

¹⁹ Abraham sî̌ya ana̤ ta aně ǒ ta̤ya̤ hǒ, a mo̤pwa̤ glè sihǒ, htohǒtò̤ ama Shǎra bǎbǎ, a shodophû̌ pwǎ̤tadě Abraham ata̤yṳ pî̌tî̌ yû̌lò̤ to̤tò̤.

²⁰ Abraham yṳǎ Cǒmara a ta̤olò̤ htǒonu asò̌phlǒ nûhtonûlò̤ dî̌kî̌꤮ tò̤. A ta̤yṳta̤nǎnu, ta̤pǎ̤ ta a shû̌htò̌shohtò̌ dě a htû̌sò̌ hî̌bwǐhî̌sîrîhtò̌ Cǒmara.

²¹ Cǒmara ma̤ pwǐ a olò̤nu, a yṳǎ lǒ̤sû̌lǒ̤sò̌ hǒ.

²² Abraham a ta̤yṳta̤nǎ ǒhǐnu akhû̌akhî, “Cǒmara bè̌ yǎ pwǐ kòyòcǒkòyòtè̤ tapwa̤.”

²³ Dě ta̤hî̌bǎ hî̌, “Cǒmara bè̌ Abraham pwǐ kòyòcǒkòyòtè̤ tapwa̤,” htǒotûmû numî̌, kò khwè̌ tû̌bǎ Abraham tapwa̤ ayanu mè̤tò̤.

²⁴ Ta̤hî̌bǎ htǒotûmû numî̌, paya mî̌ a ǒnṳdǒ mè̤mè̤̌. Pa dè yṳǎ ta Cǒmara htě a ma̤htûpwa̤gesǒ pa Běcǎ Ye̤shǔ ta ta̤si htǒotapwa̤ hî̌numî̌ a bè̌dǒ pa pwǐ kòyòcǒkòyòtè̤ toǒ pě.

²⁵ Pa ta̤sǔta̤plě akhû̌akhî, Cǒmara noma̤si kò ta a phû̌makhû. Ma̤pûhǐ a bè̌cǒbè̌tè̤ pa ayanu, a ma̤htûpwa̤gesǒ nû̌û ta ta̤si hǒ.