Rṳ̂̌me̤ 14 - Kawyaw RC

Bè̌pe pûma̤ nû̌û tapwa̤ ta tapwa̤ ta̤sǔ ma̤

¹ Kaǎshǔ Khrî̌stuphû̌ htě ata̤yṳ pî̌tî̌pe tû̌ayanu toǒ nî̌꤮. Asî ta̤gènè̤ toǒnu, a kî̌ya ta na bǎbǎ, gègoshǔ pûma̤ asî ma̤ nî̌꤮.

² Kòyò toǒǒnu a yṳǎ ta ǎ titè꤮ mî̌ anî̤pwǎ a hî̌ pwǎ̤tadě kòyò htě ata̤yṳ pî̌tî̌pe htǒotapwa̤nu a ǎ pwǎpǒ̤ sǒlǎsǒdo pwǎ.

³ Kòyò htě a ǎbò ta̤pṳ̂̌꤮ tacǎ tapwa̤nu, a bǎ gènè̤ pî̌tî̌ kòyò htě a ǎ kû̌kò ta̤pṳ̂̌꤮ tacǎ tò̤ htǒonu tapwa̤ tò̤. Hǐnudě kòyò htě a ǎ kû̌kò pṳ̂̌꤮ tacǎ tò̤ htǒotapwa̤nu, a bǎ bè̌nî̤ ta̤sǔ dě kòyò htě a ǎ ta̤pṳ̂̌꤮ tacǎ htǒotoǒnu tò̤, ma̤tè̤hî̌dě Cǒmara kaǎshǔ kòyò htǒotapwa̤.

⁴ Na cû̌bè̌ tǒ̤ kò pwa̤ma̤ta̤ ta̤sǔ dě na mî̌ kòyò hî̌tè tapwa̤? A ma̤ htûhtò̌ ata̤ma̤ bǎbǎ, a ma̤ htûhtò̌ tò̤ bǎbǎ, aběcǎ ǒtû̌ dě a hî̌tû̌ nû̌û pě kò̌, ma̤tè̤hî̌dě Běcǎ Cǒmara htǒonu, a ma̤jèbò̌jò bǎ asî akhû̌akhî, asî ma̤htûhtò̌bò̌ pě.

⁵ Sǒsǒta hǐnuakho, kòyò toǒǒnu a gènè̤ lǒkho ta, mṳni̤ toǒǒnu kò bè̌cahtǐ khǒtû̌ yǎ agènè̤ hǐnu pwǎ̤tadě toǒǒnu a gènè̤ ta mṳni̤ lǒ̤꤮ bònu alò̤bò pwǎ nû̌û a gènè̤ lǒkho hǐnu. Kòyò tapwa̤ ta tapwa̤nu, a bǎ yṳǎ měgle tû̌ a ta̤gènè̤ pwǎ.

⁶ Kòyò htě a gènè̤ ta mṳni̤ toǒǒnu, kò tobǎ bè̌cahtǐ khǒtû̌ yǎ a dè gènè̤ hî̌dě, bè̌cahtǐ mṳni̤ htǒonu ta ta̤bè̌dû̌bè̌htû Běcǎ ayanu. Kòyò htě a ǎ ta̤pṳ̂̌꤮ tacǎ toǒnu, ǎ yǎta ta̤bè̌dû̌bè̌htû Běcǎ ayanu, ma̤tè̤hî̌dě a hî̌bwǐhî̌sîrîhto Cǒmara dě a ǎ ta̤ akhû̌akhî, a bè̌dû̌bè̌htû Cǒmara hǒ. Hǐnudě kòyò htě a dǔǎshǎ toǒnu, a hî̌bwǐhî̌sîrî dǒ Cǒmara dě a bè̌dû̌bè̌htûhtò̌ Cǒmara ami̤ akhû̌akhî, a sǒsǒpwǎ nû̌û.

⁷ Pa ǒhtûpwa̤ tû̌ paya mè̤tò̤. Htodě pa si tû̌ paya mè̤tò̤.

⁸ Pa dè htûpwa̤ hî̌dě, pa ǒhtûpwa̤ ta Běcǎ aya. Pa dè si hî̌dě pa si ta Běcǎ aya. Hǐnudě pa htûpwa̤ bǎbǎ, pa si bǎbǎ, pa mî̌ Běcǎ ata toǒ.

⁹ Ta̤wi̤ta̤kè̌ htǒotoǒ akhû̌akhî, ma̤pûhǐ Khrî̌stu htûhtò̌ kòyò htûpwa̤ toǒ ta kòyò si toǒ a Běcǎ dě, a si htodě a htûpwa̤gesǒ ta ta̤si hǒ.

¹⁰ Hǐnudě, na cû̌bè̌tǒ̤ na pṳwè̤ ta̤sǔ ma̤tè? Mè̤tò̤dě, na cû̌ gènè̤ pî̌tî̌tǒ̤ na pṳwè̤ htǒotapwa̤ ma̤tè? Pa lǒ̤꤮ bò htǒotoǒnu, pa bǎ ihtǒbò dě Cǒmara la̤cèrò agûla̤ lo̤mo̤nu pě.

¹¹ Ma̤tè̤hî̌dě, dě lî̤cahtǐkûnu, Běcǎ hî̌, “Pwǐ he htûpwa̤ mè̤mè̤̌nu, he olò̤ sî ta, kòpṳ̂̌꤮ tapwa̤ hè gene̤lò̤ shǐtikhlǐlò̤bò dě he lo̤mo̤ pě dě a olò̤ lǒkho pṳ̂̌꤮ tapwa̤ ta he mî̌ Cǒmara na̤cè̌ tapwa̤ pě.”

¹² Hǐnudě, pa ma̤hto kwè̌꤮ titènu pa bǎ pwe̤ǐhtò̌lṳbò Cǒmara pṳ̂̌꤮ pwa̤ pě.

Ǐ htûhtò̌ pûma̤ ta̤lòkhǔlòpo̤, ta̤sǔta̤plě ta kòyòya ma̤

¹³ Hǐnudě, bè̌ pûma̤ nû̌ûta̤sǔ tapwa̤ ta tapwa̤ ma̤ nî̌꤮. Ta̤ htě a htûhtò̌ ta̤lòkhǔlòpo̤, ta̤sǔta̤plě ta pṳwè̤ tapwa̤pwa̤ aya hî̌nu, na bǎ bè̌lò̤ khǒkè na sò̌phlǒ ta na ma̤pe ta̤nu toǒ dǐcǎ꤮ tò̤.

¹⁴ He htûhtò̌ ta Běcǎ Ye̤shǔ tacǎ꤮ pa akhû̌akhî, he sî̌ya te̤mǎ ta shǎǎ ǒtû̌ ana̤ dě a mṳ̂plî tò̤nu a ǒ dǐcǎ꤮ tò̤. A mṳ̂plîbò pwǎ. Pò̤̌ta na dè yṳǎ ta shǎǎ toǒǒnu a mṳ̂plî tò̤ dèhî̌dě shǎǎhtǒo a mṳ̂plî ta naya tò̤.

¹⁵ Dě na ǎ ta̤tacǎcǎ akhû̌akhî, na pṳwè̤ gènè̤mo̤ dî̌kî̌꤮ tò̤ dèhî̌dě, na ma̤ ta̤htǒonu dě ta̤mo̤ǐ akû mè̤tò̤. Dě na ǎshǎ akhû̌akhî, cû̌ma̤pî̌kè pûma̤ na pṳwè̤ htě Khrî̌stu khòsihto bǎ aya htǒonu tapwa̤ ma̤.

¹⁶ He dè ma̤ ta̤htǒotacǎ mî̌ awǒpwǎ ta heya, na gènè̤ pwǎ̤tadě, a dè htûhtò̌ pṳwè̤ Khrî̌stuphû̌ toǒ a ta̤gènè̤sǔ dèhî̌dě ma̤ pûma̤. Pěmî̌ asî pi̤jishǐcǒbò hè̌.

¹⁷ Ma̤tè̤hî̌dě, Cǒmara ashiaganu, shǎǎshǎo mî̌ ta̤ htě a lo̤bǎdû̌khlokò mè̤tò̤. Ta̤ htě a lo̤bǎdû̌khlo kò mî̌, ta̤cǒta̤tè̤, ta̤ǒsî̌tukǔ, ta ta̤sò̌le̤sò̌lò̤ htě Běcǎ sǎcahtǐ ǐ pa htǒotoǒnu pwǎ.

¹⁸ Kòyò htě a ǒhtûpwa̤ gûkû̌ hǐnu toǒ, dě a ma̤ Khrî̌stu a ta̤phî̌ta̤ma̤ toǒnu, Cǒmara bǎbǎ, kòyòhǎkhû̌phû̌ bǎbǎ asò̌phlǒ ǒ nû̌û hǒ.

¹⁹ Hǐnudě, pa jipwi̤ mo̤klaǐ nû̌û tapwa̤ ta tapwa̤ htodě pa phî̌jèma̤jè, ǐkhû̌ǐǎ nû̌û tapwa̤ ta tapwa̤ hò̌꤮.

²⁰ Ma̤pî̌kè pûma̤ Cǒmara a ta̤phî̌ta̤ma̤ ta shǎǎshǎo akò ma̤ nî̌꤮. Shǎǎ lǒ̤꤮ bò mî̌ a mṳ̂plîbòpwǎ pò̤̌ta shǎǎ hî̌tètè̌꤮ bǎbǎ, kòyò tapwa̤pwa̤ dè ǎyǎ dě a dè htûhtò̌ pṳwè̤ ahǔwa̤ tapwa̤ a ta̤lòkhǔlòpo̤ hî̌numî̌, a ma̤ ta̤htǒonumî̌ a sǔhǒ.

²¹ Ǎ ta̤yî̌ bǎbǎ, o sî̌yo̤ bǎbǎ, ma̤ta̤ tacǎcǎ dě a htûhtò̌ ta̤lòkhǔlòpo̤ ta pṳwè̤ aya bǎbǎ, pa dè dǔ mî̌ awǒkhlo.

²² Ta̤ htǒotoǒnu, na yṳǎ a hî̌tè bǎbǎ, hǔhǔ꤮ bè̌ǒyǎnu, nana̤ ta Cǒmara dè sî̌ya mî̌ pǒhǒ. Kòyò tapwa̤ dè sî̌ya ta a ma̤ ta̤htǒonumî̌ a topwǎ, a ma̤hto dě a sò̌phlǒkûnu, mo̤mo̤ a mo̤pwǎ, dě asò̌phlǒ dè cèrò nû̌û tò̤ hî̌nu, a nî̤bǎ ta̤howi̤ hǒ.

²³ Pò̤̌ta a ǎ dě a dè sò̌phlǒ dǐdò hî̌mò̌nu Cǒmara cèrò yǎ bǎ a ǎta̤ akhanu pě, ma̤tè̤hî̌dě a ǎ ta̤htǒo numî̌ a ǎ nû̌ûta ta̤yṳta̤nǎ mè̤tò̤. Na ma̤ ta̤hî̌tètè̌ bǎbǎ, ta̤yṳ dè ǒtò̤ hî̌nu a htû ta̤sǔ hǒ.