Rṳ̂̌me̤ 13 - Kawyaw RC

Khrî̌stuphû̌ toǒ to gana̤de kòyò htě a pǒǐ nû̌û toǒ ayo̤

¹ Kò pṳ̂̌꤮ tapwa̤ tobǎ jûle̤phî̌yo̤ gana̤de Khwǐcophǎ htě a pǒǐshiga toǒ ayo̤, ma̤tè̤hî̌dě Cǒmara dè nopǒǐ asî tò̤ hî̌nu, asî htò̌htûbò̌ Khwǐ tò̤. Kòyò htě a pǒshipǒga khònò̤htǒo toǒ numî̌ Cǒmara bè̌htò̌bòpwǎ asî.

² Hǐnu dě, kòyò htě a shěshǔ pwa̤pǒshipǒga toǒ numî̌, a shěshǔ Cǒmara tîwî̌tòwò bè̌htò̌ ta̤htǒonu hǒ. Htohǒtò̤ kòyò htě a ma̤ hǐnu toǒnu, a bǎ khòbǎ ta̤cèrò pě.

³ Kòyò htě a ma̤ta̤wǒ toǒnu, a lo̤bǎ ǐsha ta pwa̤pǒshipǒga htǒotoǒ ala̤ tò̤. Pwǎ̤tadě kòyò htě a ma̤ta̤sǔ toǒnu, a ǐsha asîla̤ pě. Hǐnudě sî dè sò̌yṳ ǐsha asîla̤ tò̤ hî̌dě, ma̤ ta̤wǒnu, sî ma̤hǐnu akhû̌akhî, pwa̤pǒǐta̤ htǒotoǒ htû̌sò̌ǐ sî pě.

⁴ Ma̤tè̤hî̌dě, ma̤pûhǐ a htûbwǐhtûsîrî ta sîya dě Cǒmara bè̌htò̌ bǎ sîkhwǐ htǒotoǒ hǒ. Sî dè ma̤sǔ hî̌dě sî tobǎ ǐsha mè̤mè̤̌, ma̤tè̤hî̌dě Cǒmara ǐ mè̤mè̤̌ nû̌û ta̤shû̌ta̤sho dě a cèrò sî pě. A mî̌ Cǒmara pwa̤ma̤ta̤ tapwa̤. Bǎ a cèrò kòyò htě a ma̤sǔta̤ toǒ hǐnu akhanumî̌ mè̤hǒ a cèrò bǎ Cǒmara agûla̤.

⁵ Hǐnudě, sî tobǎ gana̤de kòyò htě a pǒǐ sî toǒ ayo̤. Sî ma̤sǔ akhû̌akhî, a cèrò sî pě hǐnu tû̌ mè̤tò̤, ma̤pûhǐ sî sî̌yalò̤ kû̌po̤ sîna̤ ta ma̤hè̌o mî̌ awǒwǒ hǐnu pwǎ.

⁶ Hǐnu akhû̌akhî, sî tobǎ ǐpa̤dǒ Khwǐ ta̤kûta̤kò̌, ma̤tè̤hî̌dě asî mî̌ a htû Cǒmara apwa̤ma̤ta̤ toǒ. Htodě asî mî̌ a ǐlò̤ asò̌ dě a ma̤bò bǎ kò khîkha ta a ta̤pǒǐ htǒo aya.

⁷ Hǐnudě, sî lo̤bǎ ǐ kò toǒnu, ǐ lǒkho, sî dè lo̤bǎ ǐ sana̤ tû̌ ta̤kûta̤cî̌ dèhî̌dě ǐ lǒkho nî̌꤮. Sî dè lo̤bǎǐ ta̤kûta̤cî̌ ahǔwa̤ toǒ hî̌dě tûrû̌ ǐ lǒkho nî̌꤮. Sî to bè̌dubè̌na̤ kò toǒnu bè̌dubè̌na̤ lǒkho kò nî̌꤮. Sî to bè̌dû̌bè̌htû kò toǒnu bè̌dû̌bè̌htû lǒkho kò nî̌꤮.

Ta̤mo̤ǐ nû̌û tapwa̤ ta tapwa̤

⁸ Plělîbò sîmi̤sîshû̌ nî̌꤮, noǒkè pûyǎ dǐcǎ꤮ ma̤ nî̌꤮. Noǒkè pwǎpǒ̤ mi̤shû̌ htě sî lo̤bǎ mo̤ǐ nû̌û tapwa̤ ta tapwa̤nu pwǎ nî̌꤮. Ma̤tè̤hî̌dě kòyò htě a mo̤ǐ kònu, a ma̤lǒbe ta̤sû̌ta̤tòwò hǒ.

⁹ Cǒmara a ta̤mǎlò̤ toǒ hî̌, “Cû̌sǔnṳ ma̤ kòphû̌kòma ma̤ nî̌꤮,” “Ma̤si ma̤ kòyò ma̤ nî̌꤮,” “Ǎhǔ ma̤ kòta̤ ma̤,” “Sò̌yṳ ma̤ kò ta̤kî̌ta̤kû̌ ma̤,” bò ta̤htǒotoǒ, ta ta̤mǎlò̤ ahǔwa̤toǒ bè̌plǒbò pwǎ nû̌û tûmûpa dě a hî̌, “Mo̤ǐ kòyò htě a ǒphǔ ta nanu toǒ pwǐ na mo̤ǐlò̤ nana̤nu nî̌꤮.”

¹⁰ Sî dè mo̤ǐ kònu sî ma̤sǔpe kò tò̤ hǒ. Hǐnudě kòyò htě a mo̤ǐ kònu, a gû ma̤lǒbebò ta̤sû̌ta̤tòwò hǒ.

¹¹ Sî bǎ mo̤ǐ kò ma̤tè̤hî̌dě khònò̤ htǒonu sî sî̌ya ta khîkha htě a lo̤bǎdû̌ mè̤mè̤̌ htǒotacǎnu a glè phǔ hèto̤hǒ. Ihtǒ lǒkhomò̌, khîkha to hǎmoǒ mè̤petò̤ hǒ. Ta̤ma̤lû̌htò̌ge pa htǒonu, a hèto̤phǔkhlo ta htě pa yṳǎ yǎ khanu hǒ.

¹² Lṳmṳkhǐ glè cû̌tûlû̌kè hǒ, lṳmṳ glè lîbû hǒ. Hǐnudě pa bè̌lò̤te̤kèbò ta̤ma̤phû̌mò̤ htě pa ma̤ yǎ dě ta̤khǐkla htǒotoǒ hò̌꤮. Dě pa kûsǒhtò̌ ta̤lî ahǐdo te̤htò̌ htǒotoǒ hò̌꤮.

¹³ Htǒotaplǎdě, pa ǒhtûpwa̤ ǎo sara kû̌kò pwǐ kòyò htě a ǒhtûpwa̤ dě lṳmṳshanu toǒ hò̌꤮. Ma̤ pi̤ti̤pṳ̂tṳ̂ pwèkla bǎbǎ, ǎmṳopǒ bǎbǎ, sǐshi a ta̤sò̌yṳ phû̌mò̤ toǒ bǎbǎ, ta̤gènè̤ putupatǎ toǒ bǎbǎ, ta̤to̤klî̌ toǒ bǎbǎ, ta̤gènè̤ sò̌khě nû̌û toǒ bǎbǎ, pa ma̤petò̤ hò̌꤮.

¹⁴ Gû kè̌mò̌mṳ Ye̤shǔkhrî̌stu a ta̤ǒhtûpwa̤ htǒonu nî̌꤮. Pwǐ sî kûsǒhtò̌ hǐdopo̤to̤nu, kûsǒhtò̌ tèplè̌lè̌ Běcǎ Ye̤shǔkhrî̌stu dě gènè̤pe pû lǒkho ta̤lṳ̂ ma̤mo̤ sǐshi a ta̤sò̌yṳ aklè̌aklò toǒ ma̤ nî̌꤮.