Pwa̤nophû̌ 6 - Kawyaw RC

Pwa̤ma̤jè kò susǒtapwa̤.

¹ Bǎnu akha, pwa̤yṳǎphû̌ toǒ sǔ ǒhtò̌dû̌ dě Yṳ̌daphû̌ htě a hî̌bǎ Greek yo̤ toǒ ta Yṳ̌daphû̌ htě a hî̌bǎ tû̌ ayo̤ toǒ htè̌kè̌khînû̌û. Yṳ̌daphû̌ htě a hî̌bǎ Greek ayo̤ toǒ hî̌ ta kòyò htě a yṳ̂ǎyṳ̂o shǎǎshǎo ti̤ni̤ ta ti̤ni̤ toǒnu a kè̌bò̌khû̌kè asî mamǔǒkhwè̌ toǒ, a hî̌ lǒkho hǐnu.

² Hǐnudě pwa̤nophû̌ shǐsò̌gini̤htǒo, a kaǎplǒbò pwa̤yṳǎphû̌ toǒ dě a hî̌ asî, “Pa dè bè̌ǒkǔkè ta̤dǒhtû̌ǐ bǎ kò ta Cǒmara ale̤ayo̤ htǒotoǒ dě pa glè yṳ̂pa̤ bǎ kò shǎǎshǎo ta ta̤ma̤shû̌ma̤jo kò wû numî̌ a totò̤.

³ Hǐnu akhû̌akhî pṳwè̤ sî꤮, wû̌lǎ lǒkho kòyò susǒtapwa̤ htě a lǒbe ta Běcǎ sǎcahtǐ ta ta̤sî̌ta̤jò toǒ dě pa noma̤ asî ta̤ma̤ htě a bǎ yṳ̂ǎyṳ̂o bǎ kò shǎǎshǎo ta ma̤shû̌ma̤jo kò wû toǒ.

⁴ Pa htǒotoǒ lè̌dě pa tobǎ ǐlò̤bòlè̌ akhîakha ta ta̤kwisaba, ta̤dǒhtû̌ǐ bǎ kò ta Cǒmara ale̤ayo̤ tokho.”

⁵ Pwa̤nophû̌ pwe̤ǐlṳhtò̌ htǒotoǒnu kòyò lǒ̤꤮ bò ǒ aprṳ̂ahokû htǒotoǒ sò̌phlǒto kû̌bò nû̌û, dě asî wû̌lǎ Stephen htě a lǒbe ta ta̤yṳta̤nǎ ta Běcǎ sǎcahtǐ htǒotapwa̤, htodě a wû̌lǎ kû̌po̤ Phǐlǐpo, Prokhò̌rǎ, Nikanò, Tǐmo, Pamenǎ. Htodě a wû̌lǎnṳdǒ Nikò̌la, a mî̌ Yṳ̌daphû̌ mè̤tò̤, a mî̌ Atiǒwî̤phû̌ tapwa̤ dě a genṳkû̌ Yṳ̌da a ta̤subusaba akû.

⁶ Asî aprṳ̂ahohtǒo nohè kòyòhtǒo susǒtapwa̤ dě pwa̤nophû̌ toǒ a lo̤mo̤. Dě a kwisabahto bǎ asî dě a bè̌htò̌ lǒkho acǔde dě asî htǒotoǒ alo̤.

⁷ Hǐnudě Cǒmara ale̤ayo̤htǒo sǔ a lṳpîshîcû̌kè. Htodě Ye̤rǔshèlèwî̤kûnu, kòyò htě a yṳǎna̤ǎta̤ toǒ ǒwo̤ǒplṳ̂htò̌. Htohǒtò̤ pwa̤lṳhtò̌ta̤ toǒnu, a yṳǎna̤ǎplṳ̂ kû̌ mè̤mè̤̌.

Kò pṳ̂ Stephen

⁸ Stephen htě a lǒbe ta Cǒmara abwǐasîrî ta a ta̤po̤ta̤phǎ htǒotapwa̤nu, a ma̤lṳ bǎ kò ǒ bǎnu toǒ ta ta̤ma̤ cǒklî̌kî̌ya ta ta̤sû̌pi̤sò̌pi̤ toǒ bǎnu.

⁹ Pwǎ̤tadě kòyò htě a htè̌shǔ nû̌û dě ajû nû̌ûtò̤nu a ǒ toǒ. Asî mî̌ kòyò tṳmṳ dě a nṳ ǒkû̌dǒ (pwǐ kò kaǎ asî ta) Yṳ̌daphû̌ htě a nî̤bǎ ta̤ǒpelesesǎ toǒ a ta̤sabahǐ aprṳ̂aho akû. Asî mî̌ a ǒ dě Cyrenewî̤ ta Alexandriawî̤kû. Asî htǒotoǒ ta Yṳ̌daphû̌ ahǔwa̤ htě a ǒ dě Kǐlǐkǐaga ta Ashǎga sî toǒnu, a tèhtò̌ gègoshǔ ta Stephen bǎnu.

¹⁰ Pwǎ̤tadě bǎ Stephen hî̌bǎ akhanu, Běcǎ sǎcahtǐ ǐ nû̌û ta̤sî̌ta̤jò toǒ akhû̌akhî, asî gègo geshǔjòpe nû̌û dǐcǎ꤮ tò̤.

¹¹ Hǐnudě asî cû̌ lǒplò̤hǔ kòyò ahǔwa̤ dě a nohî̌lòho asî, “Pa gana̤debǎhto Stephen hî̌bǎhtè̌shǔ phû̌mò̤shî̌hto Mǒ̤jè a ta̤sû̌ta̤tòwò toǒ ta Cǒmara.”

¹² Asî cû̌ dě kòyò saprṳ̂ toǒ a ǒ, Yṳ̌daphû̌ hǐkǒdû̌ toǒ ta pwa̤sû̌ǐ ta̤sû̌ta̤tòwò asara toǒ aǒ dě a cû̌ tûhtû̌bǎ nû̌ûdě a cû̌ noma̤shû̌shǎhtò̌ asî. Kòyò htǒotoǒ cû̌ pṳ̂ Stephen dě cǐhè nû̌û kòyò htû hǐkǒdû̌ toǒ a lo̤mo̤.

¹³ Htodě asî kaǎhè kòyò htě a glè khòlòho asò̌ ta Stephen awi̤akè̌ toǒ. Dě kòyò htǒotoǒnu a hî̌ lǒkho, “Kòyò htǒotapwa̤ mî̌ a hî̌pî̌hî̌lṳ̂bòkè pa ta̤lṳhtò̌ho cahtǐ ta Mǒ̤jè a ta̤sû̌ta̤tòwò toǒ pṳ̂̌꤮ taplǎ nî.

¹⁴ Pa gana̤de a hî̌ ta Nǎ̤sèrèwî̤phû̌ Ye̤shǔ htǒo ma̤lò̤te̤jakè ta̤lṳhtò̌ho htǒonu pě dě a htû̌lè̌ tèplè̌kè pa la̤bò̌la̤klo htě Mǒ̤jè ǐhtokè pa htǒonu toǒ pě” a hî̌ hǐnu.

¹⁵ Kòyò lǒ̤꤮ bò htě a hǎnòò̌ bǎ kòyò htû hǐkǒdû̌ agûla̤ htǒonu toǒ kè̌lò̤dǒbò Stephen, dě asî kè̌shǐ nû̌û mi̤sǎnu a sǒsǒta mǒkhû̌tanaphû̌ ami̤sǎ.