Pwa̤nophû̌ 20 - Kawyaw RC

Pò̌lu cû̌po̤ dě Makedò̌niaga ta Greekga

¹ Bǎ ta̤shû̌shǎ ǒsǔhto akhanu, Pò̌lu kaǎplǒ pwa̤yṳǎphû̌ toǒ dě a ǐkhû̌ǐǎ asî, a hî̌mo̤hî̌wǒ asî htodě a hǎhtò̌cû̌ Makedò̌nia gakû.

² Bǎ a cû̌kǎbò̌ do ǒ bǎ klè̌lo̤ toǒ akhanu, a ǐkhû̌ǐǎ cû̌plṳ̂ bǎ kò. Htodě a cû̌ sělěpo̤ dě Greekga.

³ A cû̌ǒ bǎnu sula htodě a ma̤wǒnǎ ana̤ ta a glè hǎhtò̌cû̌ Shurǐaga ta sǒkhlidû̌ hǐnudě a sî̌ya ta Yṳ̌daphû̌ toǒ guma̤si nû̌û yo̤ akhû̌akhî, a bè̌lò̤ gesǒ asò̌phlǒ ta a glè ginṳ cû̌tûlû̌ gesǒ Makedò̌niaga ta akhò̌lopo̤.

⁴ Berǐwî̤phû̌ Phǔrǔ aphû̌khû Sophata ta Tè̌shalò̌niawî̤phû̌ Arǐtakǔ ta Sěkadǔ, htodě Debiwî̤phû̌ Kayǔ, Timò̤̌te, Ashǎgaphû̌ Tǔkǐkǔ ta Trò̌phǐmǔ toǒ gûcû̌ kû̌ta yǎ.

⁵ Asî cû̌ǒpo̤wǐ pa dě Tarò̌wî̤kû.

⁶ Pwè mû̌ shodota̤bû htohǒta, pa htò̌dò̌nṳ sǒkhlidû̌ bǎ Phǐlǐpiawî̤nu dě pa hèkè̌shǐ ta asî bǎ Tarò̌wî̤. Pa hè klè̌lo̤nu a ǒ yè̌sa. Dě pa hè ǒyî̤ bǎnu susǒti̤ni̤.

Pò̌lu cû̌ǒlèkû̌ pwa̤yṳǎphû̌ toǒ dě Tarò̌wî̤ gutṳ̌lò̤ taplǎ

⁷ Bǎ mṳgòtò̤ lṳmṳhǎ akhanu, pa ǒhtuǒplǒ gesǒnû̌û ta bǎ bî̌phò̌ mû̌ aya. Pe̤wo̤pěnu Pò̌lu glè̌ hǎhtò̌cû̌ akhû̌akhî, a hî̌bǎ to̤ kòyò saprṳ̂ htǒotoǒnu bǎ lṳmṳna̤kha.

⁸ Hǐdǒkû akhû̌to̤to̤ bǎ pa la̤ǒkǔ agûla̤nu, kò dǎlîplṳ̂ mî̌.

⁹ Makhû phû̌sǎphû̌ htě ami̤ ta Ǔtǔkhǔ htǒo tapwa̤nu a hǎnòò̌ dě takhaphû̌khû̌. Pò̌lu dǒhtû̌ yî̤ mè̤mè̤̌ dě Ǔtǔkhǔ hǎmoǒkhwe dě a hǎmoǒ shope̤kè. Htǒotaplǎnu a ǒ dě hǐkhû̌ suto̤ to̤to̤ dě a lò̤te̤ to̤dě hǎkhû̌. Bǎ kò cû̌ phǒhtò̌ yǎ akhanu, a sikèhǒ.

¹⁰ Pò̌lu hǎte̤ hǐla̤ dě a û̌lò̤ phǒ nû̌û dě a hî̌, “Bǎgu pûma̤. A htûpwa̤pe pwǎ!”

¹¹ Htodě a kihtò̌ gesǒ hǐdǒkû a htò̌bî̌phò̌ mû̌ dě a glè ǎhtuohtu kû̌ta pwa̤yṳǎphû̌ toǒ. A hî̌bǎyî̤ kû̌dǒ ta asî to̤htû̌ lṳmṳlîbû dě a hǎhtò̌cû̌kè nǒ pwǎ.

¹² Asî gesû makhûphû̌sǎ Ǔtǔkhǔ htǒo dě ahǐ. A htûpwa̤ pepwǎ akhû̌akhî, a mo̤ge mè̤mè̤̌ asî sò̌phlǒ.

Pò̌lu ǒ Tarò̌wî̤ dě hǎhtò̌cû̌ Mǐlětǔwî̤

¹³ Pò̌lu mǎnǎ pa ta cû̌dò̌ sǒkhlidû̌ dě hǎhtò̌cû̌ wǐ Ashǔwî̤nu, dě Pò̌lu cû̌dò̌ kû̌ pa bǎnu pě. Ma̤tè̤hî̌nu a dě a cû̌ ta akhò̌lopo̤ dě khokhû̌ tokho pě.

¹⁴ Pa kè̌shǐshǔ yǎ dě Ashǔwî̤, dě pa dò̌cû̌ plǒnû̌û sǒkhlidû̌ dě Mǐtalewî̤.

¹⁵ Pa dò̌ cû̌ sǒkhlidû̌htǒo pe̤wo̤ ti̤ni̤nu, pa cû̌to̤ dě Kǐǔ shikholophû̌jo. Děnǒkòti̤ni̤ pa cû̌dǒ dě Tamǔ shikholophû̌jo. Děnǒkòti̤ni̤ po̤ dě pa cû̌to̤lè̌ dě Mǐlětǔwî̤.

¹⁶ Ma̤pûhǐ ta̤akhîakha hǎbòkè pû bǎ Ashǎgakû htǒo tò̤nu, Pò̌lu bè̌lò̤ asò̌phlǒ ta a glè cû̌tûlû̌kè Ephè̌shiawî̤. A dèwǒ dě Pò̌lu sò̌yṳ cû̌to̤ phwè Pètèkò̌sètèpwè akhîakha bǎ Ye̤rǔshèlèwî̤kûnu.

Pò̌lu hî̌bǎ ta Ephè̌shiawî̤ pwa̤yṳǎta̤ aprṳ̂aho wè̤khǔwè̤pwa̤ hǐkǒdû̌ toǒ gutṳ̌lò̤ taplǎ

¹⁷ Bǎ Pò̌lu ǒbǎ Mǐlětǔwî̤ akhanu, a mǎhè pwa̤yṳǎta̤ aprṳ̂aho wè̤khǔwè̤pwa̤ htě a htû hǐkǒdû̌ dě a ǒ lǒkho Ephè̌shiawî̤kûnu toǒ a ǒ. Dě a hî̌ asî ta a glè hè kè̌shǐ glashǔ nû̌û bǎ Mǐlětǔwî̤ akûbǎo.

¹⁸ Bǎ asî hèto̤ akhanu, Pò̌lu hî̌ asî, “Tèhtò̌ bǎ he hèto̤ dě Ashǎganu ti̤ni̤ tǒ̤khònò̤nu, he ihtǒhǎnòò̌ kû̌dǒta sî pwî̌tèpwî̌tènu sî sî̌ya htotû̌hǒ.

¹⁹ Bǎ he kè̌shǐbǎ ta ta̤pò̤ta̤sha dě Yṳ̌daphû̌ toǒ shokhû̌ye̤yo̤ ma̤phû̌mò̤shî̌hto he akha hǐnudě he ma̤ta̤ ta Cǒmara aya akhû̌akhî, he bǎ mi̤sǎshilò̤. Htohǒtò̤ he bǎ shò̌lò̤ mè̤mè̤̌ he sò̌phlǒ.

²⁰ Sî sî̌yatû̌ ta ta̤dǒhtû̌ǐ tacǎcǎ htě a htûhtò̌ ta sîya ta̤ma̤jè hî̌nu, he ma̤bǐhǔkè nǒ dǐcǎ꤮ tò̤. Dě kòyò saprṳ̂ akla bǎbǎ, dě sîhǐsîphò akû bǎbǎ, he sû̌ǐtòwòǐhto bǎ sî hǒ.

²¹ Yṳ̌daphû̌ toǒ bǎbǎ, Yṳ̌daphû̌ mè̤tò̤ toǒ bǎbǎ, he hî̌lò̤shû̌ mè̤mè̤̌ asî ginǐ̤prṳ̂bò, yò̤lò̤ge lǒkho sî sò̌phlǒ dě yṳǎna̤ǎ lǒkho Běcǎ Ye̤shǔ, he hî̌ bǎ asî hǐnu.

²² “Khònò̤htǒo, he gana̤de Běcǎ sǎcahtǐ ayo̤ dě he glè cû̌ Ye̤rǔshèlèwî̤. Bǎnupědě ta̤ glè̌ ma̤ana̤ ta he hî̌tèhî̌tè pěnu, he sî̌yatò̤.

²³ He sî̌ya pwǎ tacǎ꤮ pa ta, dě wî̤ pṳ̂̌tî̤wî̤ akûnu, Běcǎ sǎcahtǐ ǐǒsè̌rè̌ he ta kò bǎ coklomě he pě, dě pwa̤ ma̤pò̤ma̤sha he toǒnu, a ǒpo̤nǎ heklè̌ hǒ.

²⁴ Pwǎ̤tadě ma̤pûhǐ he ma̤htokè ta̤ma̤ htě Běcǎ Ye̤shǔ ǐlò̤ hehtǒo ayanu, he sò̌le̤ǐpe he sò̌phlǒ htûpwa̤ htǒonu tò̤ hǒ. Ta̤ma̤ htě a noma̤ he htǒotoǒ numî̌ mî̌pwǎ he bǎ khò hesò̌ ta Cǒmara abwǐasîrî a ta̤sò̌le̤sò̌lò̤ awi̤akè̌ htǒonu hǒ.

²⁵ “Khònò̤htǒo he sî̌ya ta lǒ̤꤮ bò sî htě he dǒhtû̌ǐ bǎhtobò ta Cǒmara ashiaga awi̤akè̌ htǒotoǒnu, tèhtò̌ khònò̤htǒo tǒ̤hè sî kè̌shǐpe he dǐpwǎ̤꤮ tò̤ hǒ.

²⁶ Hǐnu akhû̌akhî, khò̌ti̤ni̤, he pwe̤ǐ sî̌ya te̤mǎ bǎ sî ta sî lǒ̤꤮ bò htǒotoǒnu, sî dè yolahtûpwa̤ pî̌kè tapwa̤pwa̤ dèhî̌numî̌ he ta̤sǔ mè̤pe tò̤ hǒ.

²⁷ Ma̤tè̤hî̌dě ta̤ lǒ̤꤮ bò htě Cǒmara ta̤yè̤lò̤ǒnǎ toǒnu, he bè̌hǔ nǒ dǐcǎ꤮ tò̤. He pwe̤ǐsî̌ya htobò bǎ sî hǒ.

²⁸ Kè̌ǐkhwè̌ǐ tû̌ lǒkho sîna̤ dě kè̌ǐkhwè̌ǐ lǒkho bò꤮ sophû̌ htě Běcǎ sǎcahtǐ ǐlò̤ bǎ sî dě sî bǎ kè̌ǐkhwè̌ǐ htǒonu toǒ nî̌꤮. Htû lǒkho pwa̤gèǐsophû̌ htě a kè̌ǐkhwè̌ǐ asophû̌ htǒotoǒnu nî̌꤮. Kè̌ǐkhwè̌ǐ lǒkho Cǒmara a pwa̤yṳǎta̤ aprṳ̂ahophû̌ htě aphû̌khû pwî̤gehto nû̌ûta asǐ htǒonu nî̌꤮.

²⁹ He hǎhtò̌cû̌kèhto pěnu, he sî̌ya ta kòyò htě asǒsǒ ta Chyǐmi̤ dě akhuaha toǒ hènṳ dě sîklapě, dě a nṳma̤shabò sophû̌ htǒotoǒmṳ pě.

³⁰ Dě sîklanu kòyò ǒlṳhtò̌ toǒǒ pě. Dě ma̤pûhǐ asî lǒǎplò̤ǎ cû̌ pwa̤yṳǎphû̌ toǒ aya nudě, a lǒplò̤ cû̌ asî pě.

³¹ Hǐnu akhû̌akhî, sè̌rè̌ǐ lǒkho sîna̤ nî̌꤮. Dě he sû̌ǐtòwòǐ sî lṳmṳkhǐkhǐ lṳmṳshasha suně akû. Htohǒtò̤ pṳ̂̌꤮ plǎplǎ꤮ he mi̤sǎshilò̤ sîyanu gènè̤htò̌bǎ lǒkho tû̌nî̌꤮.

³² “Khònò̤htǒo, he ǐlò̤kè sî dě Cǒmara a ta̤kè̌ǐkhwè̌ǐ akû ta abwǐdû̌sîrîhtû a ta̤wi̤ta̤kè̌ htǒonu akû hǒ. A ta̤wi̤ta̤kè̌ htǒonu a ma̤dû̌htò̌htûhtò̌jò sî dě a ǐ sî û̌cata̤bî̌ htě a bè̌wǒnǎ nû̌ûta a kòyòcahtǐ lǒ̤꤮ bò htǒotoǒ ayanu pě.

³³ Wû bǎbǎ, hta bǎbǎ, hǐdohǐyò̤ la̤kûla̤sǒ bǎbǎ, he sò̌yṳ kû̌nǒ kòta̤ dǐpwǎ̤꤮ tò̤.

³⁴ Bò꤮ ta̤ htě he ta he khobǒsû̌ lo̤bǎ toǒnu, he ma̤jè tû̌yǎ ta hena̤ numî̌ sî sî̌yabò tû̌hǒ.

³⁵ Ma̤pûhǐ pa ma̤jè bò̌kû̌ kòyò htě a khû̌ǎyû̌lò̤ toǒnudě, he ma̤kè̌mò̌mṳ bòhto bǎ sî pṳ̂̌꤮ tacǎ ta pa tobǎ goǎgowè̤ ta̤, hǐnu. Dě gènè̤htò̌bǎ lǒkho Běcǎ Ye̤shǔ a ta̤hî̌bǎ htě a hî̌ ta, ‘Ǐta̤nu ta̤howi̤ bǎ dû̌khlope ta nî̤bǎta̤,’” Pò̌lu hî̌ bǎ asî hǐnu.

³⁶ Bǎ Pò̌lu hî̌bǎhto akhanu, a gene̤lò̤ kû̌dǒbò ta asî pṳ̂̌꤮ tapwa̤ dě a kwisaba.

³⁷ Dě asî phǒ gomo̤ hî̌mo̤hî̌wǒ Pò̌lu dě a hǎ lǒkho pṳ̂̌꤮ tapwa̤.

³⁸ Asî sǎpla̤ gutṳ̌mî̌ Pò̌lu hî̌ asî ta sî kè̌shǐpe he dǐkhò̌꤮ pě tò̤, a hî̌ asî htǒotûmûnu. Dě asî sûcû̌ nû̌û dě kò la̤bè̌ǒ sǒkhlidû̌ gûla̤.