Pwa̤nophû̌ 11 - Kawyaw RC

Petru pwe̤ǐlṳhtò̌ge ta̤wi̤ta̤kè̌ dě Ye̤rǔshèlèwî̤ pwa̤yṳǎta̤ aprṳ̂aho a ǒ

¹ Pwa̤nophû̌ ta pwa̤yṳǎphû̌ htě a ǒ dě Yṳ̌daga pṳ̂̌꤮ tò̤glò toǒnu, a gana̤de ta Yṳ̌daphû̌ mè̤tò̤ toǒ nî̤bǎdǒ Cǒmara ale̤ayo̤.

² Hǐnudě bǎ Petru cû̌ dě Ye̤rǔshèlèwî̤ akhanu, pwa̤yṳǎna̤ǎphû̌ htě a dǔtṳphěkhi toǒnu, a bè̌ nû̌ûkhû̌ ta̤sǔ.

³ Dě asî hî̌ Petru, “Na cû̌ǒlè kû̌tǒ̤ Yṳ̌daphû̌ mè̤tò̤ htě a dǔtṳ kû̌kò phě tò̤ toǒ ahǐ dě na cû̌ǎcû̌o kû̌dǒ tǒ̤ ta asî.”

⁴ Dě Petru pwe̤ǐlṳphlobò bǎ asî ta̤wi̤ta̤kè̌ htě a htûhtò̌ sakhû̌lû̌ akòshî̌ to̤htû̌ agutṳnu toǒ pṳ̂̌tacǎ.

⁵ Dě a pwe̤ǐlṳphlo bǎ asî, “Bǎ he ǒ Yǔpewî̤ dě he kwisaba akhanu, he kè̌shǐnǎ ta̤tacǎ. He ta̤kè̌shǐnǎ htǒonu, a ǒ mǒkhû̌ dě a jèlò̤te̤ bǎ he asǒsǒta hǔgòdû̌ htě ane̤ ǒ lǐ̤ne̤ tṳpṳnu. Htodě a jèlò̤te̤ phǔtînî̌ nû̌û bǎ he kòshî̌.

⁶ He kè̌nṳ te̤mǎ hǔgòdû̌ htǒoakûnu dě he kè̌shǐ ta̤phû̌ta̤li̤ htě a khò̌lopo̤ǒ lǐ̤kho toǒ, ta̤mi̤ta̤mò̤ toǒ ta ta̤phû̌ta̤li̤ htě alo̤cû̌ toǒ ta htû̌phû̌yṳphû̌ htě a wi̤ dě mǒla̤ toǒ.

⁷ Htǒotaplǎdě he gana̤de yo̤po̤htò̌ dě a hî̌ he, ‘Petru, ihtǒ ma̤siǎkèmò̌ ta̤htǒotoǒ.’

⁸ “Pwǎ̤tadě he hî̌shǔ, ‘Běcǎ꤮ he ǎnǒ dî̌kî̌꤮ tò̤. Ta̤ htě kò bè̌ yǎta a cahtǐ tò̤ toǒ ta a mṳ̂plîtò̤ toǒnu, he ǎnǒ dǐkhò̌꤮ tò̤.’

⁹ “Dě yo̤po̤htò̌ dě mǒkhû̌ htǒonu hî̌ po̤ ta, ‘Cǒmara dèhî̌ ta a mṳ̂plî hî̌numî̌, a cahtǐ tò̤, bǎ gènè̤ yǎtò̤.’

¹⁰ Dě a lò̤te̤be suplǎ dě gutṳ̌lò̤ taplǎnu, kò phî̌htò̌wǒkè yǎ dě mǒkhû̌.

¹¹ “Kò phî̌htò̌kèkè ta taplǎpa kòyò Kèsarǐwî̤phû̌ sò̌su htě kò nohè asî htǒotoǒnu, lû̌꤮, a hèto̤ bǎ pa la̤cû̌ǒkǔǐ hǐnu tama.

¹² Htǒotaplǎdě Běcǎ sǎcahtǐ hî̌ he ta ma̤pò̤ya̤ pûma̤, gûcû̌ kû̌mò̌ asînu. Dě pṳwè̤ htě Yǔpewî̤ apwa̤susǒ htǒo gûcû̌kû̌ ta he to̤htû̌ Kèsarǐwî̤ dě pa nṳkû̌ Gòne̤lǐa ahǐkû pṳ̂̌꤮ tapwa̤.

¹³ Gòne̤lǐa pwe̤ǐ bǎ pa ta a kè̌shǐ mǒkhû̌tanaphû̌ tapwa̤ hèihtǒ ǒ a hǐdǒkû awi̤akè̌ dě a hî̌ nû̌û, ‘Nocû̌ kòyò tapwa̤ dě Yǔpewî̤ nocû̌kaǎhè yǎta kòyòmi̤ ta Shîmǒ̤nè̤ htě kò kaǎdǒ nû̌ûmi̤ta Petrunu tapwa̤.

¹⁴ Petru hî̌bǎ ta na pě dě a hî̌bǎ sî akhû̌akhî, na ta na hǐphû̌phòphû̌ lǒ̤꤮ bò nî̤bǎ ta̤ma̤lû̌htò̌ge pě.’

¹⁵ “Dě bǎ he bòhtò̌ hî̌bǎta̤ akhanu, Běcǎ sǎcahtǐ hèlò̤ asî lo̤ pwǐ a hèlò̤hto palo̤ dě khû̌lû̌kha taplǎnu.

¹⁶ Htǒotaplǎdě he sî̌yahtò̌bǎ to̤ ta̤hî̌bǎ dě Běcǎ hî̌, ‘Jowǎ̤ni̤ plo sî ta shi, pwǎ̤ta kò plo sî ta Běcǎ sǎcahtǐ pěnu tûmû.’

¹⁷ Ma̤hǐnudě pa yṳǎ Běcǎ Ye̤shǔkhrî̌stu dě Cǒmara ǐ pa sû. Hǐnudě Yṳ̌daphû̌ mè̤tò̤ htě a yṳǎ sǒsǒkû̌ta pa htǒotoǒnu, Cǒmara dè ǐ sǒsǒ asî sû pwǐ a ǐhto panu dèhî̌dě he mî̌ kòyò tapwa̤ htě a ma̤dǐdò Cǒmara aklè̌aklò tapwa̤ ya,” Petru hî̌ asî hǐnu.

¹⁸ Bǎ asî gana̤de ta̤wi̤ta̤kè̌ htǒo akhanu, asî pi̤jishǐcǒpe Petru tò̤. Dě a htû̌sò̌ǐ lǒkho Cǒmara, “A dè mè̤mè̤̌ hǐnuhî̌dě Cǒmara ǐpa̤dǒ Yṳ̌daphû̌ mè̤tò̤ toǒ ta̤ashuakhwèwǒ dě a glè yò̤lò̤ge lǒkho asò̌ ta a glè nî̤bǎ lǒkho ta̤htûpwa̤ hǒ.”

Pwa̤yṳǎta̤ aprṳ̂aho dě Atiǒwî̤

¹⁹ Dě kò ma̤si Stephen akhû̌akhî, tèhtò̌ bǎnudě kò ma̤jîma̤jû kòyò htě a yṳǎna̤ǎ Ye̤shǔ toǒ hǐnudě asî nûpò̌nûshî cû̌bò. Toǒǒnu a cû̌to̤ dě Phoněga, Kǔprǔ shikholophû̌jo ta Atiǒwî̤. Asî dǒhtû̌ǐ bǎ tû̌pwǎ Yṳ̌daphû̌ sî toǒnu ta Cǒmara ale̤ayo̤ pwǎ.

²⁰ Pò̤̌ta Kǔprǔ shikholophû̌jo ta Cyrenewî̤phû̌ htě a yṳǎna̤ǎta̤ akla toǒǒnu, a cû̌to̤ Atiǒwî̤ dě a dǒhtû̌ǐ bǎ Greek khlilèhǔwa̤phû̌ toǒ ta Ye̤shǔkhrî̌stu a ta̤sò̌le̤sò̌lò̤ awi̤akè̌.

²¹ Dě Cǒmara a ta̤po̤ta̤phǎ ǒkû̌ ta asî akhû̌akhî, kòyò yṳǎgeplṳ̂gephǎ nû̌ûdě asò̌phlǒ htû̌lè̌geto lǒkho dě Běcǎ Ye̤shǔ ǒ.

²² Ta̤wi̤ta̤kè̌ htǒo lṳcû̌to̤ dě Ye̤rǔshèlèwî̤ pwa̤yṳǎta̤ aprṳ̂aho a ǒ akhû̌akhî, asî sûcû̌ Banabǎ dě Atiǒwî̤.

²³ Dě bǎ a cû̌to̤ akha, a cû̌kè̌shǐ ta kòyò htǒotoǒ nî̤bǎ Cǒmara abwǐasîrî akhû̌akhî, a sò̌le̤sò̌lò̤ mè̤mè̤̌ dě ma̤pûhǐ asî ǒhtûpwa̤ cǒtè̤ hèsělě ta Běcǎ dě, a ǐkhû̌ǐǎ tûsû kû̌po̤ asî kò.

²⁴ Banabǎ mî̌ kòyò wǒ dě a lǒbe ta Běcǎ sǎcahtǐ tapwa̤. Dě a mî̌ kòyò htě a ta̤yṳta̤nǎshû̌sho tapwa̤. Dě a ma̤jèplṳ̂ kò dě kò yṳǎna̤ǎplṳ̂ Běcǎ.

²⁵ Hǐnuhtodě nǒkònu, Banabǎ cû̌kè̌lǎ Saulǔ dě Tashǔwî̤kû.

²⁶ Bǎ a kè̌shǐ nû̌û akhanu, a kaǎge nû̌û dě Atiǒwî̤. Dě asî htǒosò̌gini̤ geǒplǒhî̌bǎhtu ta pwa̤yṳǎta̤ aprṳ̂ahophû̌ bǎnu toǒ taně꤮ bǎ akû. Dě a sû̌ǐtòwòǐlò̤ nṳplṳ̂ kòyò ǒbǎnu toǒ. Kò kaǎwǐgutṳ̌ pwa̤yṳǎphû̌ toǒ ta Khrî̌stuphû̌ mî̌ bǎ Atiǒwî̤ htǒonu hǒ.

²⁷ Bǎnuakha, pwa̤po̤ toǒ ǒ Ye̤rǔshèlèwî̤ dě a hè Atiǒwî̤.

²⁸ Asî aklanu ami̤ ta Agabǔ ǒtapwa̤. Dě Běcǎ sǎcahtǐ a ta̤po̤ta̤phǎ akhû̌akhî, a ihtǒ dě a hî̌po̤phǎnǎ ta̤hî̌bǎ ta ta̤hǒwi̤shèwè jîajû ǒhtò̌bò hǎkhû̌tebě pě. (Htǒonumî̌ a htûhtò̌ bǎ Klò̌dǐ htû Khwǐ akhanu.)

²⁹ Pwa̤yṳǎphû̌ pṳ̂̌꤮ tapwa̤ bè̌lò̤ lǒkho asò̌phlǒ dě pwî̌ asî ǐbò̌nu, a glè sûcû̌dǒ ta̤ma̤jè ta asî pṳwè̤ ǒ bǎ Yṳ̌dagakûnu toǒ.

³⁰ Hǐnudě a sûcû̌nṳ wûhtǒo ta Saulǔ ta Banabǎ. Saulǔ ta Banabǎ phî̌cû̌nṳ wûhtǒo dě a cû̌ ǐlò̤ tṳtṳ nû̌ûdě pwa̤yṳǎta̤ aprṳ̂aho wè̤khǔwè̤pwa̤ htě a htû hǐkǒdû̌ toǒ a cǔdekû.