Phǐlǐpǐ 4 - Kawyaw RC

¹ Hǐnu akhû̌akhî, he pṳwè̤ sî꤮, sî mî̌ kòyò htě he mo̤ǐ toǒ dě he nǎsǔ mè̤mè̤̌ sî, sî mî̌ pwa̤ htě a ma̤ sò̌le̤sò̌lò̤ na̤cè̌ he dě he phî̌htò̌dû̌ mè̤mè̤̌ hena̤ ta sîkhû̌khî hǒ. Khobǒsû̌bǒmo̤ sî꤮, htǒo mî̌ mè̤hǒ sî to ǒměǒgle lǒkho dě Běcǎ akû hî̌tènu hǒ.

² Yuǒdia ta Sutakhě sî꤮, sî pṳtawè̤ nû̌û dě Khrî̌stu akû akhû̌akhî, he kwigwèbǎǐ sî ta sî glè sò̌phlǒto kè̌khînû̌û tapwa̤ ta tapwa̤.

³ Na mî̌ kòyò htě a ma̤plǒta̤ ta he dě acǒtè̤ ta ayo̤ tapwa̤ hǒ. Dě he sò̌yṳ kwi na ta̤ma̤jè tacǎ, ma̤pûhǐ mamǔhtǒo sò̌gini̤ mo̤klaǐ kè̌khînû̌û ayanu, ma̤jè pû asî nî̌꤮. Ma̤tè̤hî̌dě asî htǒosò̌gini̤ numî̌ a jipwi̤ htǒkhû̌htǒǎ ma̤htukû̌ ta̤wi̤lò̤ ta̤sò̌le̤sò̌lò̤ awi̤akè̌ ata̤ma̤ ta he nî. Asî ma̤htukû̌ ta Kleme ta hekho dě pa ma̤plǒnû̌û ta̤ ahǔwa̤nu toǒ, dě asî lǒ̤꤮ bònu toǒ ami̤ mî̌ a ǒbò dě Běcǎ a lî̤htûpwa̤ akûnu hǒ.

⁴ Sò̌le̤sò̌lò̤ lǒkho dě Běcǎ akû pṳ̂̌꤮ taplǎ nî̌꤮, dě he hî̌ gesǒ sî, sò̌le̤sò̌lò̤ lǒkho nî̌꤮.

⁵ Na sò̌phlǒ sò̌dohobî̌ htǒonu nokè̌shǐbò yǎta kòpṳ̂̌꤮ tapwa̤ nî̌꤮. Běcǎ glè̌ hènu aphǔhǒ.

⁶ Bǎgu lǒkho pûma̤ dǐcǎ꤮ ma̤ nî̌꤮. Pwǎ̤ta ta̤ lǒ̤꤮ bò akûnu, kwisaba dě kwi lǒkho ta̤ htě sî lo̤bǎnu toǒ, dě kwi lǒkho ta ta̤hî̌bwǐhî̌sîrî Cǒmara nî̌꤮.

⁷ Cǒmara ǐ sî ata̤gûjûkabǎ htě kòyòhǎkhû̌phû̌ gènè̤htûtò̤ htǒonu pě. Dě sî htûhtò̌ kû̌ta Ye̤shǔkhrî̌stu tacǎnǔ꤮ pa akhû̌akhî, Cǒmara a ta̤gûjûkabǎ ǒpo̤ǐtû̌ sî sò̌phlǒsǔshi ta sî ta̤gènè̤ toǒ pě.

⁸ Pṳwè̤sî, gana̤de lǒkho he ta̤hî̌bǎ gutṳ̌lò̤ htǒotoǒ nî̌꤮. Dě sî sò̌phlǒkûnu sî to gènè̤ kwè̌꤮ hî̌tèhî̌dě, sî to gènè̤ pwǎpǒ̤ ta̤htě atoamè̤ toǒ, ta̤htě kò bè̌dubè̌na̤ yǎ toǒ, ta̤htě atoabǎ toǒ, ta̤htě a mṳ̂plî toǒ, ta̤htě kò sò̌yṳmo̤ǐ toǒ, ta̤bè̌sû̌bè̌sǎ htě awî̤awǒ toǒ, ta̤htě awǒ na̤cè̌ toǒ, ta̤htě kò to htû̌sò̌ǐ toǒnu pwǎ nî̌꤮.

⁹ Sî sû̌ǐphî̌nṳhtobò dě sî kè̌shǐ gana̤dehto he ta̤hî̌bǎhî̌sho toǒ ta he ta̤phî̌ta̤ma̤ dě he ǒ toǒnu, ǒhtûpwa̤ gûma̤kû̌ lǒkho hǐnu dě ta̤gûjûkabǎ a Cǒmara ǒkû̌ tû̌ta sî pě.

Pò̌lu hî̌bwǐhî̌sîrî sû htě a nî̤bǎko toǒ

¹⁰ He hî̌bwǐhî̌sîrî mè̤mè̤̌ Běcǎ dě he htû̌sò̌ǐ mè̤mè̤̌ yǎ, ma̤tè̤hî̌dě gutṳ̌lò̤ htǒonu, sî sûhèsǒ bǎ he ta̤ma̤jè htǒonumî̌ sî dǔlṳ gesǒ sî ta̤wǒ toǒ dě hekhû̌ hǒ. He sî̌ya ta sî wǒmè̤mè̤̌ dě hekhû̌ pṳ̂̌꤮ taplǎ pwǎ̤ta sî glè dǔlṳ gesǒ sî ta̤sò̌phlǒǒ he htǒotuhunu, Sî kè̌shǐ akhîakhawǒ ta sîya hǒtò̤ dě sî sûhè bǎ he hǒtò̤ hǐnupwǎ.

¹¹ He hî̌ htǒo mî̌ amè̤ ta he lo̤bǎwû hǐnu mè̤tò̤, ma̤tè̤hî̌dě he kè̌shǐbǎ ta̤ma̤ana̤ ta he hî̌tètè̌ bǎbǎ, Cǒmara sû̌ǐhto he ta he glè bè̌mo̤jò he sò̌phlǒ pwǎ.

¹² He ǒhtûpwa̤ shodo û̌cata̤bî̌ bǎbǎ, he ta̤ ǒplṳ̂ǒphǎ bǎbǎ, he ǒhtûpwa̤hè bǎ lǒ̤bò hǒ. He la̤ǎla̤o ǒlǒǒbe bǎbǎ, a ǒ koyoklî̌ pwǎ bǎbǎ, he û̌cata̤bî̌ ǒplṳ̂ǒphǎ bǎbǎ, a ǒ pî̌tî̌ pwǎ bǎbǎ, he sû̌ǐ hèbòhto hena̤ ta ta̤htûhtò̌ ta he hî̌tètè̌ bǎbǎnu, he ǒhtûpwa̤ sò̌phlǒmo̤jò pwǎ.

¹³ Ye̤shǔkhrî̌stu htě a ǐ he ta̤shû̌ta̤sho htǒotapwa̤ ma̤jè he akhû̌akhî, he ma̤bò̌bò ta̤pṳ̂̌꤮ tacǎ hǒ.

¹⁴ Pwǎ̤ta sî htǒotoǒnu, sî ma̤wǒ mè̤mè̤̌ he. Bǎ he kè̌shǐ shěto̤bǎ ta ta̤pò̤ta̤sha akhanu, sî ma̤shû̌ma̤jo he.

¹⁵ Phǐlǐpiawî̤phû̌ sî꤮. Bǎ he cû̌ dǒhtû̌ǐ sî ta̤sò̌le̤sò̌lò̤ awi̤akè̌ dě he hǎhtò̌cû̌kè Makedò̌nia gakû akhanu, pwa̤ htě a ma̤jè he ta wû numî̌ tǒ̤pwǎ sî pwa̤yṳǎta̤ aprṳ̂aho htǒotṳmṳ pwǎ numî̌ sî sî̌ya te̤mǎbòtû̌ hǒ.

¹⁶ Bǎ he ǒ dě Tè̌shalò̌niawî̤kû akhanu bǎbǎ, he lo̤bǎ ta̤ma̤jo dě sî sûcû̌ bǎ he ta̤ma̤jo ginǐ̤suplǎ hǒ.

¹⁷ He kè̌lǎ dě kò glè ǐko he sû hǐnu mè̤tò̤. Ma̤pûhǐ Cǒmara ǐ sî ta̤ma̤khû̌kǎnu dě he sò̌phlosho sò̌yṳ kè̌shǐkhlo ta̤pǎ̤꤮ htě sî glè ma̤ dû̌htò̌po̤ ta̤wǒ toǒ pwǐ sî ma̤htonu toǒ.

¹⁸ Sî sûhèbò bǎ he toǒnu he nî̤bǎbò hǒ, dě a lǒbe tûlû̌shû̌ ta heya. Sî ǐbò toǒnu Ěpaprò̌dǐtǔ phî̌hè bǎ he, dě khònò̤htǒo, he lo̤bǎ lǒ̤꤮ bò toǒnu aǒbò hǒ. Ta̤ǐ htǒotoǒnu, asǒsǒta ta̤lṳnṳmû̌ htě kò lṳhtò̌ Cǒmara ǒnu. Ta̤lṳ htě ato Cǒmara asò̌phlǒ, dě a ma̤mo̤ nû̌û sò̌phlǒnu toǒ hǒ.

¹⁹ Ye̤shǔkhrî̌stu akhû̌akhî, Cǒmara ma̤jèbò sî lǒ̤꤮ bò sî lo̤bǎnu toǒ pě. Pwǐ a dû̌yò̤htò̌sa lǒbetî̌pî̌ hî̌jòpe tò̤ htǒonu, a ma̤jètû̌ sî hǐnu pě.

²⁰ Papha Cǒmara nî̤bǎ tû̌ta ta̤sîrîdû̌sîrîhtû tûjûpwa̤ talakhǎ nî̌꤮. Amè̤.

Ta̤hî̌mo̤hî̌wǒ gutṳ̌lò̤

²¹ He hî̌mo̤hî̌wǒ cû̌ Cǒmara akòyò pṳ̂̌꤮ tapwa̤ htě a yṳǎ Ye̤shǔkhrî̌stu toǒ. Pṳwè̤ Khrî̌stuphû̌ htě a ǒkû̌ ta he bǎo toǒ sûcû̌dǒ bǎ a ta̤hî̌mo̤hî̌wǒ toǒ dě sîǒ.

²² Cǒmara akòyò lǒ̤꤮ bò bǎo toǒ sûcû̌dǒ bǎbò a ta̤hî̌mo̤hî̌wǒ toǒ dě sîǒ. Dû̌shǐ mî̌ pṳwè̤ htě a ma̤ ta̤ma̤ dě Khwǐdû̌hokûnu toǒ hî̌mo̤hî̌wǒ cû̌nṳdǒ bǎ sî.

²³ Běcǎ Ye̤shǔkhrî̌stu abwǐasîrî ǒkû̌ tû̌ta sî lǒ̤꤮ bò nî̌꤮. Amè̤.