Petru ginǐ̤bǎ tabǎ 2 - Kawyaw RC

Sara sûlûlòho ana̤ toǒ

¹ Pwa̤po̤ sûlûlòho ana̤ toǒ ǒhtò̌lṳhto kòyò saprṳ̂ akla dě awǐkha hǒ. Sǒsǒta hǐnuakho, sara sûlûlòho ana̤ toǒ hè ǒhtò̌lṳdǒ sîkla pě. Asî phî̌hèǐhǔ ta̤sû̌ǐtòwòǐsǔ htě a ma̤pî̌ta̤ toǒ pě. A la̤lò̤kè Běcǎ htě a htè̌gehto asînu tapwa̤ pě. Asî ma̤hǐnu akhû̌akhî, Cǒmara ma̤pî̌phwèkè asî pě.

² Dě kòyò gûkû̌plṳ̂ mè̤mè̤̌ asî klè̌ htě a lṳ̂ sǐshi a ta̤sò̌yṳ phû̌mò̤shî̌hto htǒonu toǒ pě. Asî ma̤hǐnu akhû̌akhî, kòyò ahǔwa̤ toǒ hî̌bǎ pi̤jishǐcǒ ta̤te̤ta̤mǎ aklè̌ pě.

³ Sara sûlûlòho ana̤ htǒotoǒnu, dě a ta̤kè̌lǎ ǎtû̌ aya ta a dǒkènè lòhojò bǎ sî ta̤dǒnè htě kò sî̌jòdǒkènènu toǒ akhû̌akhî, a kè̌lǎ ma̤ǎshǎ dě sîkhû̌ pě. Pwa̤ htě a glè cèrò asînu a tîwî̌tòwònǎ yî̤ ana̤ hǒ, htodě a glè ma̤pî̌kè asî ayanu a hǎmoǒ shope̤ tò̤.

⁴ Mǒkhû̌tanaphû̌ htě a ma̤sǔta̤ toǒnu, Cǒmara bè̌lû̌kè asî tò̤. A wîlòte̤kè asî dě ngariǒkû. A dǒnṳ asî hǎkû khǐsuwu toǒ akû dě a bè̌ǒ to̤ asî bǎ ta̤cèrò a mṳni̤nu ti̤ni̤ pě.

⁵ Kòyòhǎkhû̌phû̌ htě a bè̌dubè̌na̤ Cǒmara tò̤ děwǐkha toǒnu, Cǒmara bè̌lû̌kè asî tò̤tò̤, a nodû̌bǐ sikèbò asî ta shi. A ma̤lû̌htò̌ge pwǎpǒ̤ Nǒa htě a dǒhtû̌ǐ bǎ kò ta ta̤cǒta̤tè̤ htǒonu tapwa̤ ta ahǔwa̤ susǒtapwa̤ pwǎ.

⁶ Cǒmara cèrò Sò̌dowî̤ ta Gòmò̤̌rawî̤, dě a nolòte̤gè pî̌kèbò nû̌ûta mî̌. A ma̤htûhtò̌pwǎ bǎ kòyò dě anǒkò toǒ htě a bè̌dubè̌na̤ kû̌kò Cǒmara tò̤ toǒ ala̤kè̌mò̌mṳ aya.

⁷ A ǐ lû̌htò̌kè kòyò cǒtè̤ tapwa̤ htě ami̤ ta Lò̌tǎ. Dě kòyòjono̤ htǒotoǒ asǐshi a ta̤sò̌yṳ phû̌mò̤shî̌hto toǒ akhû̌akhî, Lò̌tǎ sò̌phlǒmo̤ dî̌kî̌꤮ tò̤.

⁸ Kòyò cǒtè̤ htǒotapwa̤ ǒhtûpwa̤kû̌ asîkla dě bǎ a kè̌shǐ gana̤debǎ asî ǒhtûpwa̤ phû̌mò̤shî̌hto ti̤ni̤ hto ti̤ni̤ akhanu, ajî mè̤mè̤̌ nû̌ûsò̌phlǒ.

⁹ Hǐnudě Běcǎ Cǒmara ma̤lû̌htò̌ge kòyò htě a ma̤to nû̌ûsò̌phlǒ dě a ǒ ta ta̤jîta̤jû akûnu toǒ hî̌tè pěnu a sî̌ya pwǎ. Htohǒtò̤ a pṳ̂měǐ kòyòjono̤ htǒotoǒ dě a cèrò sělěbò asî to̤htû̌ ta̤cèrò amṳni̤nu ti̤ni̤ pě.

¹⁰ Kòyò lǒ̤꤮ bò htě a gûma̤kû̌ pwǐ asî sò̌phlǒ a ta̤sò̌yṳ patǎ phû̌mò̤ akhû̌akhî, a ma̤ tukutakǎshǔ Cǒmara a sîrîshû̌sho toǒnu, Cǒmara cèrò jîkhlo asî pě. Kòyò hǐnu toǒ mî̌ kòyò khu, kòyò bè̌htò̌yî̤ ana̤ toǒ. Mǒkhû̌phû̌ htě kò bè̌dû̌bè̌htû nû̌û toǒnu, asî pi̤jishǐcǒ lǒkho, a ǐsha kû̌kò dî̌kî̌꤮ tò̤.

¹¹ Mǒkhû̌tanaphû̌ htě a khû̌ǎshû̌shokhlo dě a ta̤sîrîshû̌shokhlo ta sara sûlûlòho ana̤nu toǒ dě, a bè̌ mǒkhû̌phû̌ ta̤sǔ toǒ bǎbǎ, a pi̤jishǐcǒ asî bǎbǎ, a ma̤nǒ hǐnu dě Běcǎ a lo̤mo̤ dǐkhò̌꤮ tò̤.

¹² Asî mî̌ alò̤ta ta̤phû̌ta̤li̤ htě a gènè̤jò kû̌kò tò̤ toǒ. Htodě a ma̤ lǒkho pwǐ ala̤klo sò̌yṳǒnu dě a ǒlò̤ ta kòyò la̤lṳ̂pṳ̂ ma̤sipwǎ asî aya. Kòyò htǒotoǒ numî̌ ahtè̌còwò shǔ, pi̤jishǐcǒ shǔ ta̤ htě a sî̌ya phlǔtò̤nu toǒ. Kò ma̤sikè asî pwǐ kò ma̤si ta̤mi̤ta̤mò̤nu pě.

¹³ Dě asî ma̤jîma̤jû kò akhû̌akhî, Cǒmara ma̤geshǔsǒ asî ta li̤ hǐnu pě. Lṳmṳsha bǎbǎ asî sò̌le̤sò̌lò̤ lṳ̂ma̤mo̤ shope̤ lǒkho asǐshi a ta̤sò̌yṳ patǎphû̌mò̤nu toǒ. Bǎ sî ma̤lṳ̂ma̤pwè akhanu, asî hè ǎhtuohtu khǒbǐaǒkû̌ ta sî dě, asî ma̤ sadape lǒkho ta̤sǔ htě kò wi̤janu toǒ, a dè lòho sî hî̌nu amo̤shope̤ asî. Hǐnudě a ma̤mi̤pi̤sidǒ sî mi̤ toǒ, htohǒtò̤ a ma̤sòwò̤bò sî.

¹⁴ Asî kè̌ mamǔ tapwa̤pwa̤ hî̌dě a sò̌yṳ hǎmoǒplǒ còcè̌. Asî ma̤ta̤sǔnu a ǒkǔpe tò̤ hǒ. Asî lǒplò̤ pî̌cû̌ kòyò htě ata̤yṳsho hǒtò̤ toǒ glè ma̤dǒ ta̤sǔta̤plě toǒ. Dě asî sû̌ǐlò̤wǒ lǒkho ana̤ ta akè̌lǎ ǎtû̌ aya. Asî ǒ lǒkho dě Cǒmara a ta̤ǐsho ala̤ hǒ.

¹⁵ Asî hǎhtò̌cû̌pa̤kè ta klè̌to dě a cû̌ sò̌phlǒ shope̤kè. Asî gûcû̌kû̌ klè̌ htě Baora aphû̌khû Bela cû̌nu tabo. Klè̌nu tabo mî̌ klè̌ htě a kè̌dû̌ wû dě a nî̤bǎ lǒkho wû ta ta̤cǒta̤tè̤ akû mè̤tò̤.

¹⁶ Pwǎ̤tadě tîsî̌ mòû̌lǎ tado sû̌ǐ gesǒ pwa̤po̤ Bela ma̤ ta̤sǔ htǒonu. Mòû̌lǎ htǒotado hî̌bǎjòtò̤ pwǎ̤tadě a hî̌bǎhtò̌ nû̌û ta kòyòhǎkhû̌phû̌ ayo̤ dě a noǒkǔkè pwa̤po̤ htě a ma̤ ta̤kimisawa̤ htǒotapwa̤.

¹⁷ Kòyò htǒotoǒ mî̌ alò̤ta shipo̤htǎpe tò̤nu toǒ. Htodě alò̤ta poǒlṳ dě gili̤ htû̌cû̌kè nû̌ûnu toǒ. Cǒmara ma̤wǒnǎ bǎ asî gûla̤ dě a khǐsuwu tò̤glòhǒ.

¹⁸ Asî hî̌bǎ bè̌htò̌yî̤ lǒkho ayo̤ htě abwǐasîrî ǒtò̤ toǒ. Asî cû̌ sû̌ǐ kò ta kò glè ma̤ta̤sòwò̤ ta sǐshi a ta̤sò̌yṳ patǎ toǒ. Asî lǒcû̌ tephekè kò ta klè̌toklè̌bǎ toǒ. Kòyò htě asî lǒplò̤ toǒnu, a ǒkǔsa mǒ̤bòpepwǎ ta ta̤sǔ pwǐ asînu toǒ ma̤nu pwǎ.

¹⁹ Sara sûlûlòho ana̤ htǒotoǒnu, a olò̤ asî ta asî nî̤bǎ ta̤pelesesǎ pě, pwǎ̤tadě asî sana̤ tû̌nu, a htû ta̤phû̌mò̤shî̌hto a la̤klola̤bò̌ toǒ ajû, ma̤tè̤hî̌dě ta̤titètè̌꤮ bǎbǎ, a dè pè̤ na numî̌, a htû naběcǎ hǒ.

²⁰ Dě asî sî̌ya pa Běcǎ ta Ye̤shǔkhrî̌stu htě a ma̤lû̌htò̌ge pa htǒotapwa̤ akhû̌akhî, asî lû̌htò̌gekè ta hǎkhû̌ a ta̤phû̌mò̤shî̌hto htǒotoǒ hǒ. Pwǎ̤tadě khònò̤htǒo asî dè nṳma̤ shû̌shǎplǒgesǒ ta ta̤phû̌mò̤shî̌hto htǒotoǒ hî̌dě ta̤phû̌mò̤ htǒotoǒ htûkè nû̌ûběcǎ hǒ. Kòyò hǐnu toǒ a ta̤ǒhtûpwa̤ mî̌, a jîkhlope ta a gûla̤li̤nu.

²¹ Dě asî yanu, a dè sî̌yanǒ ta̤cǒta̤tè̤ aklè̌ dǐkhò̌꤮ tò̤ hî̌numî̌, awǒkhlope ta a sî̌yahtodě a cû̌ wîkèsǒ ta̤mǎlò̤ cahtǐ htě kò ǐlò̤hto asî htǒonu toǒ.

²² Ta̤ htě asî ma̤htonu toǒ mî̌, ato mè̤mè̤̌ pwǐ yo̤sǎkhěkhǒ hî̌ tûmû ta, “Chyǐ mî̌ a ǎjò gesǒ apǒ,” Htodě “Kò ishò̌bòhto htǒ, dě a kloge hǎpèè̌” a hî̌ hǐnu.