Petru awǐlǒ tabǎ 5 - Kawyaw RC

Cǒmara sophû̌ tṳgumṳ

¹ He mî̌ pwa̤yṳǎta̤ aprṳ̂aho wè̤pwa̤ hǐkǒdû̌ tapwa̤, htodě he mî̌ pwa̤khòlṳ bǎ Khrî̌stu a ta̤khòjîkhòjû awi̤akè̌ tapwa̤. Htohǒtò̤ htû̌꤮ Cǒmara dǔlṳ kò ta a ta̤sîrîdû̌sîrîhtû akhapěnu, he bǎbǎ, he ǒkû̌ tû̌ta a ta̤sîrîdû̌sîrîhtû htǒonu pě. Khònò̤dě he kwigwèbǎǐ sî pwa̤yṳǎta̤ aprṳ̂aho wè̤khǔwè̤pwa̤ htě a htû hǐkǒdû̌ toǒ ta,

² Sî htû pwa̤yṳǎta̤ aprṳ̂aho hǐkǒdû̌kûshû̌htû htě alò̤ta pwa̤gèǐsophû̌ sî toǒnu, kè̌ǐkhwè̌ǐ lǒkho Cǒmara asophû̌mṳ htě a ǐ sî htǒonutṳgumṳ, dě ǒpo̤kè̌ǐwǒ lǒkho pwa̤yṳǎphû̌nu toǒ. Dě sò̌phlǒǒ kè̌ǐwǒ lǒkho asî pwǐ Cǒmara sò̌yṳ nokè̌ǐ sînu nî̌꤮. Ma̤ pûma̤ pwǐ kò noshû̌ sî dě sî ma̤pwǎnu ma̤ nî̌꤮. Kè̌dû̌ lǒkho khû̌kǎ dě ma̤ lǒkho pûma̤ nî̌꤮. Mî̌tanu, sî glè htû khǒtû̌ta kòyò htě a sò̌phlǒsho ma̤ Cǒmara a ta̤phî̌ta̤ma̤ toǒ nî̌꤮.

³ Pwa̤yṳǎta̤ aprṳ̂ahophû̌ htě Cǒmara nokè̌ǐkhwè̌ǐ sî htǒotoǒnu, noǎ sî ta̤sîrîshû̌sho dě pǒǐshû̌pǒǐsho pûma̤ asî ma̤ nî̌꤮. Mî̌tanu, htûtû̌ bǎ sophû̌nu tṳmṳ ala̤kè̌mò̌mṳ sî nî̌꤮.

⁴ Dě bǎ pwa̤gèǐsophû̌ ahǐkǒdû̌khlo Khrî̌stu htǒo hè akhapěnu, a ǐ sî ta̤sîrîdû̌sîrîhtû akhû̌glûhta htě asîrî hǎmǎpè̤pe dǐkhò̌꤮ tò̤ htǒonu pě.

⁵ Pwǐ he hî̌hto bǎ sî ta ta̤shò̌lò̤sò̌ awi̤akè̌nu hǒ, sî phijaû̌khlo toǒnu, sî bǎ shò̌lò̤ lǒkho sî sò̌phlǒ dě wè̤khǔwè̤pwa̤ toǒ ala̤. Sî pṳ̂̌꤮ tapwa̤ tobǎ kûsǒhtò̌ lǒkho ta̤shò̌lò̤ sò̌phlǒ tapwa̤ ta tapwa̤ sǒsǒta sî kûsǒhtò̌ hǐdohǐyò̤nu, ma̤tè̤hî̌dě, lî̤cahtǐkû hî̌, “Cǒmara ma̤dǐdòshǔkè kòyò htě a bè̌htò̌yî̤ asò̌phlǒnu toǒ pwǎ̤tadě ta̤bwǐta̤sîrî htǒonu, a ǐlò̤ nû̌ûta kòyò htě a shò̌lò̤ asò̌phlǒnu toǒ pwǎ.”

⁶ Hǐnu akhû̌akhî, shò̌lò̤ lǒkho sî sò̌phlǒ dě Cǒmara a ta̤po̤ta̤phǎ ala̤ htǒonu nî̌꤮. Htû̌꤮ akhîakha tobǎ ta Cǒmara asò̌phlǒ pěnu, a bè̌htò̌yî̤ sî pě.

⁷ Cǒmara sò̌phlǒǒ kè̌ǐkhwè̌ǐ sî akhû̌akhî, bè̌htò̌ lǒkho sî ta̤bǎgubǎgè lǒ̤꤮ bò dě Cǒmara alo̤nu.

⁸ Sû̌ǐlò̤ tû̌ sîna̤ dě ǒsè̌rè̌ tû̌ lǒkho, ǒsòklò tû̌ lǒkho nî̌꤮. Khînǎmo̤pha hǐkǒdû̌ htě a sò̌khě sî htǒo tadonu a cû̌shido kè̌jo kò sǒsǒta sî̌ò̌ htě agoakrû̌ a cû̌kè̌lǎ kòyò dě a û̌nṳ asî pěnu toǒ.

⁹ Ǒměǒgle lǒkho sî ta̤yṳta̤nǎ akû. Dě ma̤dǐdòshǔ lǒkho khînǎmo̤pha hǐkǒdû̌ nî̌꤮, ma̤tè̤hî̌dě, sî sî̌ya ta sîpṳsîwè̤ htě a ǒ hǎkhû̌ teběbò dě a yṳǎna̤ǎta̤ sǒsǒta sî htǒotoǒnu, a khòbǎdǒ ta̤jîta̤jû pwǐ sî khòbǎ htǒonu hǒ.

¹⁰ Cǒmara mî̌ ta̤bwǐta̤sîrî lǒ̤꤮ bò a Běcǎ htě a kaǎ sî ta a ǐ sî ata̤sîrîdû̌sîrîhtû tûjûpwa̤ dě Ye̤shǔkhrî̌stu akû htǒonu pě. Bǎ sî khòbǎ ta̤jîta̤jû teděsǎphû̌ htǒo tûlû̌hto pěnu, Cǒmara sana̤nu a ma̤měma̤gle tònòwǒgesǒ sî pě, htodě a ǐshû̌ǐshohtò̌ sîkhû̌sîǎ pě.

¹¹ Cǒmara pǒǐ tû̌ta ta̤po̤ta̤phǎ tûjûpwa̤ talakhǎ nî̌꤮. Amè̤.

Ta̤hî̌mo̤hî̌wǒ gutṳ̌lò̤

¹² He khwè̌phǒpwǎ bǎ sî lî̤htǒo pwǎ. He ǐkhû̌ǐǎ sî, htodě he khò hesò̌ ta ta̤htǒomî̌ Cǒmara abwǐasîrî mè̤mè̤̌. Ǒměǒgle lǒkho ta ta̤htǒonu akû nî̌꤮. Sǐla dě he bè̌yǎ pwǐ he pṳwè̤ htě acǒatè̤ ta ayo̤htǒo tapwa̤nu, a khwè̌jèdǒ he lî̤htǒotabǎ.

¹³ Hephû̌khû Mǎ̤riko ta sî pṳwè̤ pwa̤yṳǎta̤ aprṳ̂ahophû̌ Babulowî̤kû htě Cǒmara wû̌lǎ yǎ sǒsǒta sî htǒonu toǒ, sû cû̌dǒ bǎ sî ta̤hî̌mo̤hî̌wǒ toǒ.

¹⁴ Hî̌mo̤hî̌wǒ kè̌khînû̌û dě gomo̤ kè̌khînû̌û ta Khrî̌stuphû̌ ata̤mo̤ǐ htǒonu nî̌꤮. Sî lǒ̤꤮ bò htě a htû Khrî̌stu ata htǒotoǒnu, Cǒmara a ta̤gûjûkabǎ ǒkû̌ tû̌ta sî nî̌꤮.