Mǒhtûlû̌hǎhtûsa 7 - Kawyaw RC

Shidû̌htò̌ awi̤akè̌

¹ Dě Cǒmara tûjûpwa̤ hî̌ Nǒa, “Kaǎnṳ nahǐphû̌phòphû̌ dě nṳmò̌ sǒkhlidû̌kûnu nî̌꤮. Dě kòyò htǒotuhtu aklanu he kè̌shǐ na ta na mî̌ kòcǒkòtè̤ tapwa̤ hǒ.

² Ta̤phû̌ta̤li̤ lǒ̤꤮ bò htě amṳ̂plî toǒnu pṳ̂nṳ sûkhû̌ amo̤ susǒtado ta apha susǒ tado nî̌. Dě ta̤phû̌ta̤li̤ htě a mṳ̂plî kû̌kò tò̤ dě a gwa lṳhtò̌ ta Cǒmara tò̤ toǒnu, pṳ̂nṳ a tacǎ mî̌ tûphû̌, amo̤ tado ta apha tado pwǎ nî̌.

³ Dě htû̌tî̤pî̤ khli pṳ̂̌꤮ tacǎnu, pṳ̂nṳ a tacǎ mî̌ susǒtûphû̌, tacǎ mî̌ susǒtûphû̌, dě pṳ̂nṳ amo̤ tabǎ apha tabǎ pṳ̂̌꤮ tacǎ nî̌. Ma̤pûhǐ asî phû̌phǎhtò̌dû̌ sělěhè hǎkhû̌teběbò ayanu, ma̤ hǐnu nî̌.

⁴ Ma̤tè̤hî̌dě susǒti̤ni̤ behtò̌ pěnu, he nojulò̤yî̤ khwè̌ lṳmṳkhǐkhǐ lṳmṳshasha ani̤ li̤shi, asa li̤shi pě. Kòyòhǎkhû̌phû̌ ta ta̤phû̌ta̤li̤ lǒ̤꤮ bò htě he bǒlò̤ yǎ hǎkhû̌ bǎotoǒnu he ma̤sikèbò asî pě.”

⁵ Dě Nǒa ma̤bò pwǐ꤮ Cǒmara tûjûpwa̤ hî̌lò̤ nû̌ûnu toǒ.

⁶ Bǎ shidû̌htò̌ hǎkhû̌bǎo akhanu, Nǒa něǒ aya̤susǒ hǒ.

⁷ Ma̤pûhǐ Nǒa, ama, aphû̌makhû ta adè̌ sîtoǒ lû̌htò̌ ta shidû̌ htǒonu dě asî nṳ lǒkho sǒkhlidû̌ kû.

⁸ Ta̤phû̌ta̤li̤ adû̌dû̌ apî̌tî̌tî̌ ta htû̌phû̌yṳphû̌ lǒ̤꤮ bò toǒnu a mṳ̂plî bǎbǎ, a mṳ̂plî tò̤ bǎbǎ, htě a ǒ lǒkho hǎkhû̌ bǎoteběbònu,

⁹ Amo̤ tabǎ apha tabǎ asî nṳ sûkhû̌bò lǒkho nû̌û sǒkhlidû̌kû pwǐ Cǒmaradû̌ mǎnǎ Nǒanu.

¹⁰ Susǒti̤ni̤ behtò̌ dě shidû̌htò̌bǐkè hǎkhû̌ hǒ.

¹¹ Bǎ Nǒa něbehtò̌ ya̤susǒ, ginǐ̤la tala, shǐsusǒnu ti̤ni̤ akha, bò shihtǎpo̤ hǎla̤nu toǒ a shǐhǎhtò̌bò. Shitakha dě mǒkhû̌nu toǒ bǎbǎ a mo sǒsǒta takha lṳ̂monu

¹² Htodě khwè̌julò̤ lṳmṳkhǐkhǐ lṳmṳshasha dě a ju ani̤ li̤shi.

¹³ Nǒa ta aphû̌makhû sò̌su mî̌ Shemǎ, Hamǎ, Ya̤phè̌ ta Nǒa ama ta adè̌ sò̌su nṳ lǒkho sǒkhlidû̌kû bǎ khwè̌julò̤nu ti̤ni̤ hǒ.

¹⁴ Bò꤮ ta̤phû̌ta̤li̤ mi̤klanu toǒ ta ta̤phû̌ta̤li̤ htě kòbǔǐ a hǐphònu toǒ ta bò꤮ ta̤phû̌ta̤li̤ htě adû̌dû̌ apî̌tî̌tî̌nu toǒ ta ta̤phû̌ta̤li̤ htě a wi̤ dě mǒla̤nu toǒnu, a nṳǒ dǒkû̌bò ta asî.

¹⁵ Ta̤bǒlò̤ lǒ̤bò htě asò̌phlǒ htûpwa̤ toǒnu, amo̤ tado apha tado, tûphû̌ hto tûphû̌ a nṳplǒkû̌ lǒkho ta Nǒa sǒkhlidû̌kû.

¹⁶ Ta̤phû̌ta̤li̤ tacǎ꤮ ta tacǎ, amo̤ ta apha nṳ sûkhû̌ lǒkho nû̌û sǒkhlidû̌kû pwǐ Cǒmaradû̌ mǎnǎ Nǒanu, htodě Cǒmara tûjûpwa̤ ma̤bǐkè takha.

¹⁷ Khwè̌ju hèyî̤ ani̤li̤shi dě shidû̌htò̌ ta dû̌htò̌ hǎkhû̌bǎo a jo gojohtò̌kè sǒkhlidû̌htǒo shikhû̌ dě sǒkhlidû̌ ǒgojohtò̌yî̤khlokè ta hǎkhû̌.

¹⁸ Shi dû̌htò̌ ta dû̌htò̌ hǎkhû̌htǒo dě sǒkhlidû̌ lo̤cû̌ shikhû̌.

¹⁹ Shidû̌htò̌ yo̤ mè̤mè̤̌ akhû̌akhî, a plû̌bǐbò kholodû̌kholohtû to̤dě mǒla̤nu toǒ.

²⁰ Shidû̌htò̌ ta dû̌htò̌ dě a dû̌htò̌tûlû̌kè kholonu toǒ shǐyè̤̌ pla̤.

²¹ Htû̌phû̌yṳphû̌ toǒ bǎbǎ, ta̤phû̌ta̤li̤ a bî̌ htě kò bǔǐ nû̌û hǐnu toǒ bǎbǎ, ta̤mi̤ta̤mò̤ htě aplò̤nu toǒ bǎbǎ, kòyòhǎkhû̌phû̌ bǎbǎ, ta̤ lǒ̤꤮ bò htě a ta̤htûpwa̤ gugwè dě hǎkhû̌ htǒo toǒnu a sikèbò.

²² Ta̤bǒlò̤ lǒ̤꤮ bò htě ata̤htûpwa̤ ǒbò dě hǎkhû̌ htǒotoǒnu, a sikèbò.

²³ Ta̤ lǒ̤꤮ bò htě a ǒ htûpwa̤ gugwè dě hǎkhû̌ htǒotoǒnu a sikèbò hǒ, kòyòhǎkhû̌phû̌ bǎbǎ, bò꤮ ta̤phû̌ta̤li̤ htě a ǒ mi̤klanu toǒ bǎbǎ, bò꤮ ta̤phû̌ta̤li̤ htě kò bǔǐ hǐnu toǒ bǎbǎ, htû̌phû̌yṳphû̌ wi̤ dě mǒla̤ sîtoǒ bǎbǎ Cǒmara tûjûpwa̤ ma̤sikèbò hǒ. A ǒ htûpwa̤kè pwǎpǒ̤ Nǒa ta kòyò htě a ǒ kû̌ ta anu toǒ pwǎ.

²⁴ Shidû̌ bǎ hǎkhû̌ htǒonu ayî̤ mṳni̤ ta̤ya̤ ta yè̤shi.