Mǒhtûlû̌hǎhtûsa 4 - Kawyaw RC

Kaî̌no ta Abělè

¹ Ada hǎmoǒhtu ta ama Ěwa̤ dě a mo̤do a phû̌ǒnṳ aphû̌makhû tapwa̤ dě Ěwa̤ hî̌, “Cǒmara tûjûpwa̤ ma̤jè he dě he phû̌ǒnṳ he phû̌makhû tapwa̤ hǒ,” dě a kaǎ nû̌ûmi̤ ta Kaî̌no.

² Děnǒkòdě a phû̌ǒnṳpo̤ apṳ makhû Abělè htě a htû pwa̤gèǐsophû̌. Awè̤ Kaî̌no dě a htû pwa̤ma̤hǔklaphû̌.

³ Akhîakha to̤hèta sǒsǎpwa̤ sǒsǎmi akha, Kaî̌no phî̌hènṳ sǒsǎwû̌pho htě ashǒǐ toǒ dě a hè lṳhtò̌ǐ nû̌ûta Cǒmara tûjûpwa̤.

⁴ Pwǎ̤ta Abělènu a phî̌hènṳ sophû̌ phû̌wè̤pwa̤ apo̤kû htǒotado dě a lṳhtò̌ asû̌abè̌ htě awǐgutṳ̌ toǒ ta Cǒmara tûjûpwa̤. Dě Cǒmara sò̌phlǒto Abělè ta ata̤lṳta̤tò̌.

⁵ Pwǎ̤ta Kaî̌no ata̤lṳta̤tò̌ htǒonu, a to Cǒmara tûjûpwa̤ sò̌phlǒ tò̤ akhû̌akhî, Kaî̌no sò̌phlǒdû̌ tûlû̌shû̌ dě ami̤sǎ pî̌kè.

⁶ Dě Cǒmara tûjûpwa̤ gwè Kaî̌no, “Na cû̌ sò̌phlǒdû̌ tǒ̤ ma̤tè? Nami̤sǎ cû̌pî̌tǒ̤ ma̤tè?

⁷ Na dè ma̤to ta̤ dèhî̌dě he jû na tò̤ ya? Na dè ma̤to ta̤ tò̤ hî̌dě ta̤sǔ htǒonu alò̤ta sî̌ò̌ htě a ǒphǔ nakòshî̌ dě a gupṳ̂ǎ nayo̤, dě a sò̌yṳ pǒǐ na pò̤̌ta na bǎ ma̤pè̤kè a.”

⁸ Ti̤ni̤kha Kaî̌no hî̌ apṳ Abělè, “Pa hǎhtò̌cû̌ hǔklakhû̌ hò꤮,” bǎ asî ǒ hǔklakhû̌ akhanu, a sò̌phlǒdû̌ apṳ Abělè dě a ma̤sikè nû̌û.

⁹ Dě Cǒmara tûjûpwa̤ gwè Kaî̌no, “Napṳ Abělè ǒ bǎtè?” Dě a hî̌shǔ nû̌û, “He sî̌ya tò̤, he mî̌ pwa̤ǒkè̌ǐ hepṳ mè̤tò̤?”

¹⁰ Cǒmara tûjûpwa̤ hî̌ yǎ, “Na cû̌ma̤tǒ̤ hè̌o ma̤tè? Gana̤demò̌! Napṳsǐnu a ǒ hǎla̤ dě yi̤kǒhtò̌ heǒ hǒ.

¹¹ Hǐnuakhû̌akhî, ma̤pûhǐ hǎkhû̌ cî̌o napṳ asǐ htě na ma̤sisǐlò̤ nû̌û htǒo sǎhtò̌phohtò̌ bǎpe pû ta naya tò̤nu, he ǐshokè na hǒ.

¹² Htû̌꤮ naǎnawè̤ shǒǐ kû̌kò bǎ hǎkhû̌bǎo pěnu a sǎhtò̌phohtò̌ bǎ na pě tò̤. Nashodohǐ shodophò pě, na bǎ khlè̌htokhlè̌lò̤ hǎkhû̌bǎo pě,” a hî̌ nû̌û hǐnu.

¹³ Kaî̌no hî̌ Cǒmara tûjûpwa̤, “Pha Běcǎ, nata̤cèròhtǒo apò̤asha mè̤mè̤̌ heya, he khòbò̌pè̤ nòtò̤hǒ.

¹⁴ Khònò̤dě Cǒmara tûjûpwa̤ wṳ̂hǎhtò̌ tepheyî̤kè he ta hǎkhû̌ htě he la̤shǒǎǐ htǒo dě Cǒmara tûjûpwa̤ alo̤mo̤ hǒ. He glè htû pwa̤cû̌lète̤we̤ shodola̤ǒkǔ hǎkhû̌bǎo hǒ. Ûpèpè̌ bǎbǎ htě a kè̌shǐ he toǒnu, a ma̤sinò he pě.”

¹⁵ Pwǎ̤ta Cǒmara tûjûpwa̤ hî̌ yǎ, “A mè̤ tò̤. Kòyò tapwa̤pwa̤ a ma̤si nanu a khòbǎjîkhlo gesǒ ali̤ ta na pě susǒ taplǎ pě.” Htodě ma̤pûhǐ kòyò htě a kè̌shǐ Kaî̌no toǒ ma̤si pû nû̌û tò̤ ayanu, Cǒmara tûjûpwa̤ ma̤dòǐkè ta̤tacǎ ta Kaî̌nolo̤.

¹⁶ Ma̤hǐnudě Kaî̌no hǎhtò̌cû̌tephekè Cǒmara tûjûpwa̤ alo̤mo̤ dě a cû̌ǒ Nò̌dǎga, Edîwe̤ mṳhtò̌ tokho. (Nò̌dǎ amûasǎnu Ebrephû̌ ayo̤ mî̌ cû̌shido te̤we̤.)

Kaî̌no akhlialè

¹⁷ Dě Kaî̌no hǎmoǒkû̌ ta ama dě amo̤dohtò̌, dě aphû̌ǒnṳ ta Ěnò̌. Kaî̌no shǒhtò̌nṳ Ěnò̌wî̤ dě wî̤ htǒonu a kaǎ nû̌ûmi̤ ta aphû̌mi̤ Ěnò̌.

¹⁸ Ěnò̌ aphû̌ mi̤ ta Irǎ, Irǎ phû̌ mî̌ ami̤ta Mahuyaělè, Mahuyaělè aphû̌ mî̌ ami̤ta Matushaělè, Matushaělè aphû̌ mî̌ ami̤ta Lamè̌.

¹⁹ Lamè̌ phî̌nṳ ama sò̌gini̤, tapwa̤mî̌ ami̤ ta Adǎ, tapwa̤mî̌ ami̤ ta Sǐla.

²⁰ Adǎ phû̌ǒnṳ Yabalǎ dě Yabalǎ mî̌ a mî̌ phiphu htě a cû̌shǒ hǐphû̌ tò̤glò hto tò̤glò dě a bǔǐ ta̤phû̌ta̤li̤ awǐgutṳ̌ tapwa̤ hǒ.

²¹ Yabalǎ apṳ mî̌ ami̤ ta Jǔbalǎ. Jǔbalǎ mî̌ ahtû kòyò lǒ̤bò htě a dǒ tǐtu, a ǔ tî̌lû̌ ta a ǔ tǔnu toǒ apha hǒ.

²² Sǐla phû̌ǒnṳ Tǔbalǎkaî̌no. Amî̌ pwa̤de ta̤kî̌ta̤kû̌ ta tîlî ta te̤htò̌ lǒ̤bònu tapwa̤ hǒ. Tǔbalǎkaî̌no apṳmamǔ mî̌ ami̤ ta Namǎ.

²³ Lamè̌ hî̌ ama sî toǒ, “Kǒ꤮ phû̌ma sî! Gana̤de lǒkho he hî̌ bǎ sî htǒo, makhû phû̌sǎ tapwa̤ ma̤sha he dě he ma̤sikè a hǒ.

²⁴ Kòyò htě a ma̤si Kaî̌no tapwa̤pwa̤nu, a bǎ khòbǎ jîkhlo gesǒ ali̤ ta a susǒ taplǎ pě dèhî̌mî̌ kòyò htě a dè ma̤silè̌ he tapwa̤pwa̤ hî̌nu, a bǎ khòbǎ jîkhlo gesǒlè̌ ali̤ susǒ tishi ta susǒ taplǎ pě.”

²⁵ Ada hǎmoǒhtu gesǒ ta amanu a phû̌ǒnṳ aphû̌makhû tapwa̤ dě Ěwa̤ hî̌, “Abělè htě Kaî̌no ma̤sikè nû̌ûnu tapwa̤ agûla̤nu, Cǒmaradû̌ ǐtèplè̌ gesǒ bǎ he phû̌makhû tapwa̤ hǒ,” hǐnudě a kaǎ nû̌ûmi̤ ta Shěta. (Shěta amûasǎnu Ebrephû̌ ayo̤ mî̌ a ǐ.)

²⁶ Shěta phû̌ǒnṳ aphû̌makhû tapwa̤ dě a kaǎ nû̌ûmi̤ ta Ěno. Bǎnukha kòyò toǒ tèhtò̌ sabahtò̌ Cǒmara tûjûpwa̤ hǒ.