Mǒhtûlû̌hǎhtûsa 24 - Kawyaw RC

Isǎko ta Ribè̌ka

¹ Khònò̤dě, Abraham mo̤pwa̤ nědû̌lahtûkè hǒ dě Cǒmara tûjûpwa̤ howi̤homò̤bò nû̌û pṳ̂̌꤮ tacǎ.

² Ti̤ni̤kha, Abraham hî̌ apwa̤ma̤ta̤ ahǐkǒdû̌ gutṳ̌ htě a phî̌bòpè̤ nû̌û ta̤dò̌khû̌ pṳ̂̌꤮ tacǎ ahǐdǒkû htǒotapwa̤nu, “Bè̌ nacǔde hekhò̌la̤ htǒo dě bèlò̤mò̌ nayo̤ ta he.

³ He phû̌ aya, ma̤pûhǐ na wû̌lǎphî̌ pû bǎ ama ta Khana̤mo̤ bǎ Khana̤gakû htǒo tò̤nu, he sò̌yṳ nobè nayo̤ ta Cǒmara tûjûpwa̤ mî̌ Cǒmaradû̌ htě a pǒǐ mǒkhû̌ ta hǎkhû̌ tapwa̤.

⁴ Hǐnudě gemò̌ dě he ǒphijaû̌lò̤ ǐ agûla̤, hekhlihelè ǒnu taga dě ge kè̌lǎ kaǎgenṳ bǎ hephû̌makhû Isǎko ama nî̌.”

⁵ Pwa̤ma̤ta̤ma̤phû̌ gwè nû̌û, “Běcǎ ta̤adû̌, hî̌kû̌nǎ, mamǔhtǒo a dè sò̌le̤ge pagakû htǒo tò̤ hî̌dě he to ma̤ hî̌tè? He to kaǎgenṳ naphû̌makhû dě nakhlinalègakû htǒonu pě ya?”

⁶ Abraham hî̌shǔ yǎ, “Tò̤! anî̤nò tò̤! Kaǎge pûma̤ hephû̌makhû děnu dî̌kî̌꤮ ma̤.

⁷ Běcǎ Cǒmara tûjûpwa̤ mî̌ Cǒmaradû̌ htě a pǒǐ mǒkhû̌ dě a kaǎhtò̌ he dě hepha akhlialè ta kò la̤plulò̤ hedîplo gûla̤ htǒo, ta pwa̤htě abè ayo̤ dě a olò̤ he htǒotapwa̤ hî̌ he, ‘He ǐ nakhlinalè ta shiga htǒo pě.’ Hǐnudě ma̤pûhǐ na kè̌shǐ kaǎgenṳ bǎ hephû̌makhû ama bǎnu taga ayanu, Cǒmara sûhèwǐtû̌ bǎ na amǒkhû̌tanaphû̌ pě.

⁸ Mamǔ phû̌sǎnu tapwa̤ dè gûgekû̌ ta na tò̤ hî̌dě na lû̌htò̌tû̌ ta na bè nayo̤ htǒo pě. Kaǎcû̌ pûma̤ hephû̌makhû ganu taga dî̌kî̌꤮ ma̤ nî̌,” Abraham hî̌ hǐnu.

⁹ Hǐnudě Abraham pwa̤ma̤ta̤ bè̌nṳ acǔde aběcǎkhò̌la̤ dě abè nû̌ûyo̤ ta ta̤wi̤ta̤kè̌ htǒo bǎnu.

¹⁰ Dě apwa̤ma̤ta̤nu tapwa̤ cǐnṳ aběcǎ tîsî̌budû̌ ado shǐ dě a dò̌cû̌nṳ ta̤kî̌ta̤kû̌ ta sû htě awî̤awǒlǒnu toǒ dě a hǎhtò̌cû̌yî̤ Mèsopotamǐaga mṳlò̤ cǔcî̌ Nakhò ǒǐ wî̤ nutî̤wî̤.

¹¹ Dě bǎ a cû̌to̤ wî̤khlo akhanu, a nohǎmoǒlòkhǔbò tîsî̌budû̌ bǎ shikoǒ kòshî̌nu. Bǎnukha mî̌ lṳmṳhǎlṳmṳlòte̤ hǒ, dě a to bǎ mamǔ toǒ hèdò̌ lǒkho shi bǎnu.

¹² Dě a kwisabahtò̌, “Kǒ꤮ Cǒmara tûjûpwa̤, heběcǎ Abraham acǒmaradû̌, khò̌ti̤ni̤ dě khòsò̌do ma̤htoma̤phlǔ pû bǎ heta̤ma̤ htǒo dě dǔlṳtû̌ nata̤mo̤ǐ htě ahǎbòpè̤jò tò̤ htǒo ta heběcǎ Abraham nî̌꤮.

¹³ Khònò̤dě he ihtǒ ǒ bǎ shikoǒ kòshî̌ htǒo, dě mamǔphû̌sǎ bǎ wî̤kû toǒ hèdò̌ lǒkho shi.

¹⁴ Dě he kwigwèbǎǐ mamǔphû̌sǎ asîkla tapwa̤pwa̤ pě, dě he glè hî̌ yǎ, ‘Khòsò̌do bè̌lò̤ nashio dě ǐokû̌ he shi,’ dě na dè wû̌lǎphî̌ mè̤mè̤̌ bǎ najû Isǎko aya hî̌dě a glè hî̌shǔtû̌ he, ‘O mò̌, dě he dò̌opo̤ bǎ na tîsî̌budû̌ shi pěpě.’ A dè ma̤ pwǐhè̌o hî̌numî̌ he sî̌ya tû̌ta na dǔlṳ nata̤mo̤ǐ ta heběcǎ hǒ.”

¹⁵ Bǎ a kwisabahto hǒtò̤ akhanu, a kè̌shǐ mamǔ tapwa̤ ami̤mî̌ Ribè̌ka ò̌hèǐ shio. A mî̌ Betuělè aphû̌mamǔ. Betuělè mî̌ Mǐlakha aphû̌makhû. Dě Mǐlakha mî̌ Abraham awè̤makhû Nakhò ama.

¹⁶ Mamǔphû̌sǎ htǒonu amo̤wî̤ mè̤mè̤̌, a hǎmoǒkû̌ nǒta makhû dǐkhò̌꤮ hǒtò̤. A hǎte̤ dò̌shi shikoǒkû a dò̌be ashio dě a ge kihtò̌ gesǒ.

¹⁷ Dě Abraham apwa̤ma̤ta̤nu ta̤pwa̤ khlè̌cû̌ a ǒ dě a cû̌hî̌ nû̌û, “Khòsò̌do ǐokû̌ he shi ta nashiokûnu tîkî̌phû̌ hò̌.”

¹⁸ Dě a hî̌shǔ nû̌û, “Kǒ꤮ phadû̌, o mò̌,” a tṳplṳtî̤wî̤ jolòte̤ ashio dě a ǐo nû̌û.

¹⁹ A ǐohto nû̌û shi dě a hî̌po̤ nû̌û, “He dò̌okǒnṳwǒpo̤ bǎ na tîsî̌budû̌nu toǒ shi pěpě.”

²⁰ Dě a tṳplṳtî̤wî̤ bè̌lò̤ ashio dě a lò̌nṳ nû̌û shiklǒkû htodě a khlè̌lò̤ dò̌hto dò̌sǒsǒ shi shikoǒkû dě a ǐokǒ ǐobebò bǎ nû̌ûtîsî̌budû̌ pṳ̂̌꤮ tado.

²¹ Bǎnuakha, makhûnu tapwa̤ kè̌johǔ ǐ nû̌û dě htǒomî̌ Cǒmara tûjûpwa̤ ma̤htoma̤phlǔ bǎ heta̤ma̤ ya, mî̌ amè̤tò̤ya a gènè̤ ata hǐnu.

²² Bǎ tîsî̌budû̌ toǒ okǒbò shi akhanu, makhûnu tapwa̤ phî̌htò̌ nò̌sèhta la̤sè nò̌khilo̤ htě ale̤dû̌pwî̤htû tukǔ dě a sè bǎ nû̌û, dě a kǒnṳ bǎ nû̌û cǔkǒbohta le̤dû̌pwî̤htû ginǐ̤bo.

²³ Dě a gwè nû̌û, “Khòsò̌do, na hî̌ bǎmò̌ he, na mî̌ ûpè aphû̌mamǔ pè? Naphahǐnu mî̌ he ta hekòyò toǒ la̤hǎmoǒ khò̌ta̤na̤ aya mî̌ a ǒ ya?”

²⁴ Mamǔnu tapwa̤ hî̌shǔ yǎ, “Hepha mî̌ Betuělè. Amo̤apha mî̌ Nakhò ta Mǐlakha.”

²⁵ Htodě a hî̌po̤, “Dě pa ǒnu, phadû̌ sîta̤phû̌ta̤li̤ la̤ǎ aya, îlo̤sî mi̤sî ǒbe htodě phadû̌ la̤hǎmoǒ gûla̤ mî̌ aǒǒ.”

²⁶ A hî̌hto nû̌û hǐnudě makhû htǒonu tapwa̤ gene̤lò̤ sabahtò̌ Cǒmara tûjûpwa̤.

²⁷ Dě a hî̌, “Htû̌sò̌ǐ Cǒmara tûjûpwa̤, heběcǎ Abraham acǒmaradû̌. A mî̌ a mo̤ǐ heběcǎ ta ata̤mo̤ǐ htě ahǎbòpè̤jò tò̤ htǒo dě a cǒtè̤ ta ayo̤. A sûhè he dě a nokè̌shǐ totǐ he ta heběcǎ akhlialè.”

²⁸ Htodě mamǔphû̌sǎ htǒo a khlè̌ge pwe̤ǐ ta amo̤ akhlialè toǒ ta bò꤮ ta̤htûhtò̌nu toǒ.

²⁹ Ribè̌ka awè̤makhû mi̤mî̌ Labanu tapwa̤ khlè̌hèkè̌shǔ makhûnu tapwa̤ bǎ shikoǒkû.

³⁰ Dě bǎ a kè̌shǐ nò̌sèhta la̤sè nò̌khilo̤ ta cǔkǒbohta dě apṳ mamǔ cǔgolo̤, dě a gana̤depo̤ apṳ mamǔ hî̌ nû̌û ta makhûnu tapwa̤ hî̌ kwè̌꤮ nû̌û hî̌tè akhanu, taplǎpa a khlè̌hè kè̌shǔ makhûnu tapwa̤, dě a kè̌shǐ nû̌û ihtǒǒ atîsî̌budû̌ kòshî̌ bǎ shikoǒhtunu.

³¹ Laba hî̌ nû̌û, “Kǒ꤮ pṳwè̤, ge, ge dě hǐ, na mî̌ pwa̤htě a nî̤bǎ Cǒmara tûjûpwa̤ ata̤howi̤hî̌wǒ tapwa̤. Na cû̌ihtǒǒtǒ̤ bǎnu ma̤tè? He ma̤wǒnǎbò bǎ nagûla̤gûbò̌ ta natîsî̌budû̌ toǒ ala̤ǒ hǒ.”

³² Makhûnu tapwa̤ gûgekû̌ dě hǐ, bǎ a geto̤ hǐ akha, Laba apwa̤ma̤ta̤ toǒ a bè̌lòte̤bò ta̤kî̌ta̤kû̌ tîsî̌budû̌ alo̤. Htodě asî phî̌hè îlo̤ ta mi̤ toǒ dě a bǔǎ bǎ asîtîsîbudû̌ toǒ, htohǒtò̤ a phî̌hè bǎ Abraham apwa̤ma̤ta̤ htǒotapwa̤ ta akho toǒ shi dě a shǔbò bǎ asîkhò̌lopo̤.

³³ Dě bǎ kò bè̌lò̤ bǎ nû̌û la̤ǎla̤o akhanu, a hî̌ asî, “He dè hî̌ heta̤hî̌bǎ hǒtò̤ hî̌mî̌, he ǎjò ta̤ǎta̤o htǒo hǒtò̤,” dě “Hî̌ mò̌,” Laba hî̌ nû̌û hǐnu.

³⁴ “He mî̌ Abraham apwa̤ma̤ta̤ tapwa̤,” dě a hî̌po̤,

³⁵ “Cǒmara tûjûpwa̤ howi̤homò̤plṳ̂ mè̤mè̤̌ heběcǎ akhû̌akhî, a dû̌yò̤ mè̤mè̤̌. A ǐlò̤bò nû̌ûsophû̌ ta pè̤, pṳ̂pa̤na̤ toǒ, wûhta ta pwa̤ma̤ta̤ mamǔmakhû ta tîsî̌budû̌ ta mòû̌lǎ sîtoǒ.

³⁶ Bǎ heběcǎ ama Sharǎ mo̤pwa̤ akhanu, a phû̌ǒlò̤nṳ bǎ Abraham phû̌makhû tapwa̤, dě ata̤kî̌ta̤kû̌ lǒ̤bònu toǒ dě a ǐbò nû̌ûta a hǒ.

³⁷ Heběcǎ nobè heyo̤ dě a hî̌ he, ‘Na bǎ wû̌lǎphî̌nṳ bǎ hephû̌makhû ama ta Khana̤mo̤ bǎ he ǒ ǐ Khana̤gakû htǒonu tò̤.

³⁸ Na bǎ ge hepha aga dě gekè̌lǎ kaǎge bǎ hephû̌makhû ama dě hekhlihelè aklanu.’

³⁹ “Htodě he gwè heběcǎ, ‘Hî̌kû̌nǎ, mamǔ dè gûgekû̌ he tò̤ hî̌mî̌ he to ma̤ hî̌tè?’

⁴⁰ Heběcǎ hî̌shǔ he, ‘Cǒmara tûjûpwa̤ htě he gana̤de ayo̤ htǒotapwa̤nu, a sûcû̌ kû̌tû̌ atanaphû̌ ta na dě a ma̤htoma̤phlǔ bǎtû̌ na pě. Dě na kè̌lǎ kaǎge tû̌bǎ hephû̌makhû ama dě hekhlihelè ta hepha ahǐphû̌phòphû̌ akla htǒonu pě.

⁴¹ Na la̤lû̌htò̌ ta nata̤bèyo̤ htǒonu klè̌ ǒpwǎ tabopa pwǎ. Bǎ na ge dě hekhlihelè ǒ akhanu, asî dè plûgekû̌ mamǔnu tapwa̤ tò̤ hî̌mî̌, na lû̌htò̌tû̌ ta nata̤bèyo̤ htǒonu pě.’

⁴² “Khò̌ti̤ni̤ bǎ he hè shikoǒkû akhanu, he kwisabahtò̌, ‘Kǒ꤮ Cǒmara tûjûpwa̤, heběcǎ Abraham acǒmaradû̌, khòsò̌do ma̤htoma̤phlǔ pû bǎ heta̤ma̤ htǒo nî̌꤮.’

⁴³ Bǎ he ihtǒǒ shikoǒ kòshî̌ dě bǎ mamǔphû̌sǎ hèdò̌o shi akhanu, he dè hî̌ ta, ‘Khòsò̌do ǐopa̤mò̌ he shi ta nashiokû htǒonu.’

⁴⁴ Dě a dè hî̌shǔ he ta, ‘O mò̌, he dò̌okǒpo̤wǒ bǎ natîsî̌budû̌ toǒ shi pěpě,’ a dè hî̌ hǐnu hî̌mî̌, he hî̌ sělěpo̤ Cǒmara tûjûpwa̤, ‘Khòsò̌do, a htǒonu nohtûtû̌ yǎta na wû̌lǎ bǎ heběcǎ aphû̌makhû ama htǒonu nî̌.’

⁴⁵ “Bǎ he kwisabahto dě hesò̌phlǒkû hǒtò̤ akhanu, he kè̌shǐ Ribè̌ka ò̌hèǐ shio. A hè shikoǒkû dě a lò̤dò̌ shi dě he hî̌ yǎ, ‘Ǐopa̤mò̌ he shi hò̌.’

⁴⁶ “Dě a tṳplṳtî̤wî̤ bè̌lò̤ ashio dě a hî̌shǔ he, ‘O mò̌, he dò̌okǒwǒpo̤ bǎ natîsî̌budû̌ toǒ ashi pěpě.’ He okû̌ ashi dě a ǐonṳpo̤ bǎ hetîsî̌budû̌ toǒ ashi.

⁴⁷ “He gwè yǎ, ‘Na mî̌ ûpè aphû̌mamǔ pè?’ “A hî̌shǔ he, ‘He mî̌ Betuělè aphû̌mamǔ, hephihephu mî̌ Phunakhò ta Phimǐlakha.’ “Dě he sèhtò̌ bǎ a nò̌khi nò̌sèhta dě he kǒnṳ bǎ a cǔkǒbo toǒ a cǔdekû.

⁴⁸ Cǒmara tûjûpwa̤ sûhè totǐ he dě heběcǎ akhlialè ǒ akhû̌akhî, he hèkè̌shǐ bǎ aphû̌makhû ama, dě he gene̤lò̤ sabahtò̌ǐ Cǒmara tûjûpwa̤. He htû̌sò̌ǐ Cǒmara tûjûpwa̤ mî̌ heběcǎ Abraham acǒmaradû̌ htǒo.

⁴⁹ Ma̤hǐnudě na dè dǔlṳ nata̤mo̤ta̤kwǐ, nata̤cǒta̤tè̤ ta heběcǎ hî̌dě, hî̌mò̌ he khònò̤. He tobǎ ma̤ hî̌tè he bǎ sî̌ya ayanudě, khòsò̌dodě tò̤ dě tò̤, o dě o, bǎmò̌ he.”

⁵⁰ Laba ta Betuělè hî̌, “Pwǐ na bè̌lṳ bǎ panu, htǒomî̌ Cǒmara tûjûpwa̤ ma̤wǒ pwǎ akhû̌akhî, pa la̤hî̌ gûla̤ ǒpe dǐcǎ꤮ tò̤ hǒ.

⁵¹ Hǐnulè, Ribè̌ka ǒ nakòshî̌nu, kaǎnṳ yǎ dě ge mò̌, pwǐ Cǒmara tûjûpwa̤ yṳ̂klè̌nè̌klòhtonu, nohtûhtò̌tû̌ mò̌ yǎta na̤běcǎ aphû̌makhû amanu nî̌.”

⁵² Bǎ Abraham apwa̤ma̤ta̤ gana̤de asî hî̌ pwǐhè̌o akhanu, a gene̤û̌lò̤ hǎkhû̌ dě a sabahtò̌ Cǒmara tûjûpwa̤.

⁵³ Htodě a phî̌htò̌ hǐdohǐyò̤ ta ta̤htû̌dòǐ toǒ dě a ǐ nû̌ûta Ribè̌ka, Htodě a ǐpo̤ awè̤makhû ta amo̤ sû htě ale̤dû̌pwî̤htû toǒ.

⁵⁴ Htodě Abraham apwa̤ma̤ta̤ ta makhû ǒ bǎnu toǒ ǎhtuohtu plǒnû̌û, htodě a hǎmoǒkè bǎnu tasa. Htodě bǎ lṳmṳlî asî hǎmoǒ ihtǒ akhanu, Abraham apwa̤ma̤ta̤nu tapwa̤ hî̌, “Khòsò̌do plûge pû he dě heběcǎ ǒ.”

⁵⁵ Pwǎ̤ta awè̤makhû ta amo̤ hî̌ nû̌û, “Noǒkè po̤kû̌nǎ yǎta pa bǎo pî̌tî̌gutṳ̌ ani̤shǐnu, htopě nogenǒ a pě.”

⁵⁶ Pwǎ̤ta a hî̌shǔ asî, “Ma̤pò̤ma̤ya̤pe pûma̤ he ma̤, Cǒmara tûjûpwa̤ ma̤htophlǔ bǎ heta̤ma̤ htǒo hǒ dě he bǎ ge heběcǎ ǒ hǒ.”

⁵⁷ Dě asî hî̌, “Pa kaǎhè Ribè̌ka dě pa gwè kè̌kè̌ yǎ hò̌꤮.”

⁵⁸ Hǐnudě asî kaǎhè Ribè̌ka dě asî gwè nû̌û, “Na sò̌le̤ gekû̌ ta makhû htǒotapwa̤ hǒ ya?” Dě a hî̌shǔ asî, “O, he sò̌le̤ gekû̌ hǒ.”

⁵⁹ Ma̤hǐnudě asî plûgekû̌ Ribè̌ka ta apwa̤kè̌ǐkhwè̌ǐ nû̌û tapwa̤, dě a nogekû̌dǒ asî ta Abraham apwa̤ma̤ta̤ ta akòyò sîtoǒ.

⁶⁰ Dě ahǐphû̌phòphû̌ toǒ howi̤homò̤ lǒkho Ribè̌ka, “Pa pṳmamǔ htûhtò̌tû̌ mo̤ dě phû̌ǒwo̤li̤ǒphǎ asò̌asěkû pě nî̌꤮. Nakhlinalè toǒ ma̤pè̤bò tû̌ asîkhuwè̤ awî̤ toǒ pě nî̌꤮.”

⁶¹ Dě Ribè̌ka ta pwa̤kè̌ǐkhwè̌ǐ nû̌û toǒ htò̌dò̌nṳ tîsî̌budû̌ toǒ dě a gûgekû̌ makhûnu tapwa̤, Abraham apwa̤ma̤ta̤ kaǎnṳ Ribè̌ka dě a hǎhtò̌ge plǒbò lǒkho nû̌û.

⁶² Bǎnukha Isǎko ǒ bǎ Beralahè̌ro gûla̤ dě a hǎhtò̌cû̌ ǒ Khana̤ga cǔmû tokho.

⁶³ Lṳmṳhǎ gûjûlò̤ akhanu, Isǎko cû̌gènè̤ ya̤dakhû̌ a ò̌tò̤mò̤kè̌ dě a kè̌shǐ tîsî̌budû̌ toǒ ge.

⁶⁴ Ribè̌ka kè̌htò̌ dě a kè̌shǐdǒ Isǎko ǒ tîsî̌budû̌lo̤ hǎte̤.

⁶⁵ Dě a gwè Abraham apwa̤ma̤ta̤ htǒotapwa̤, “Makhû ǒ ya̤dakhû̌ dě a hè pa ǒnu tapwa̤ mî̌ ûpè?” Pwa̤ma̤ta̤nu tapwa̤ hî̌shǔ nû̌û, “A mî̌ heběcǎ Isǎko hǒ.” Htǒotaplǎ dě Ribè̌ka phî̌ hǔgòpwî̌ dě a hǔbǐ nû̌ûta ami̤sǎ.

⁶⁶ Htodě pwa̤ma̤ta̤nu tapwa̤ pwe̤ǐlṳ Isǎko ta a ma̤htobò ta̤ dě a cû̌ klè̌ htǒotaplǎnu toǒ.

⁶⁷ Htodě Isǎko kaǎgenṳ Ribè̌ka dě amo̤ Sharǎ ahǐphû̌kû dě a htûhtò̌ nû̌ûma. A mo̤ǐ mè̤mè̤̌ nû̌û. Bǎ amo̤ sihto nû̌ûla̤ akhanu, a sǎpla̤ mè̤mè̤̌ hǐnudě khònò̤htǒo Ribè̌ka htû nû̌ûma dě asò̌phlǒmo̤ gesǒ.