Mǒhtûlû̌hǎhtûsa 14 - Kawyaw RC

Abra ma̤lû̌htò̌ Lò̌tǎ

¹ Bǎnukha, Shǐnaga Khwǐdû̌ Araphè̌, Ělasaga Khwǐdû̌ Ario, Ělaga Khwǐdû̌ Khedò̌laoma ta Kò̌iga Khwǐdû̌ Tǐda sî toǒ,

² Htò̌shě lǒkho Sò̌dowî̤ akhwǐ Berǎ, Gòmò̤̌rawî̤ akhwǐ Bǐrasha, Adamawî̤ akhwǐ Shǐnabǎ, Seboiwî̤ akhwǐ Shemeba ta Belawî̤ Khwǐdû̌ toǒ. Belawî̤ numî̌ kò kaǎkhǒpe nû̌ûmi̤ ta Sorawî̤.

³ Khwǐhtǒo sò̌yè̤ sò̌phlǒ ǒ nû̌û dě ma̤htò̌htu nû̌û aprṳ̂aho tṳgumṳ. Dě asî bè̌plǒ asî kliphû̌ toǒ bǎ Sǐdi galo̤to̤kû nutò̤glò. Gûla̤ nutò̤glòmî̌ khònò̤htǒo a mî̌ shishuha shikoǒdû̌ htǒonu hǒ.

⁴ Asî ǒ lǒkho Khwǐkhedò̌laoma ata̤pǒ ala̤ shǐginǐ̤ně hǒ, dě bǎ a behtò̌ shǐsuně akhanu, asî tèhtò̌ shěshǔsǒ lǒkho Khwǐnu tapwa̤.

⁵ Bǎ a behtò̌ shǐlǐ̤ně akhanu, Khwǐdû̌ Khedò̌laoma ta pwa̤pǒta̤ htě a bǒsû̌ ta anu toǒ htò̌shěpè̤kè Rephai khlilèphû̌ htě a ǒ bǎ Ashǎtarowî̤ Kharanei akûnu toǒ, ta Susema khlilèphû̌ htě a ǒ bǎ Hamǎwî̤ kûnu toǒ, ta Emi khlilèphû̌ htě a ǒ lǒkho bǎ Kiriate wî̤ǒplǒhtu ya̤dakhû̌nu toǒ,

⁶ ta Hǒrǐ khlilèphû̌ htě a ǒ bǎ Serǎkholoklanu toǒ, htohǒtò̤ a shě cû̌to̤ dě Ělaparawî̤ lo̤mî̌shǒkla agakûhtunu.

⁷ Htodě asî htû̌tiwǐgesǒ dě a cû̌lè̌ Ěmishaphǎ shipo̤htǎnu tokho, dě a cû̌ shěpè̤nṳbò Amalè̌ga, htohǒtò̤ a cû̌ shěpè̤nṳpo̤ Amò̌rǐ khlilèphû̌ htě a ǒ bǎ Hasarotamawî̤ kûnu toǒ. Ěmishaphǎ shipo̤htǎ htǒo khònò̤dě kò kaǎ nû̌ûta Kadeshǎ shipo̤htǎ.

⁸ Bǎ Khwǐnu sò̌li̤ shěpè̤hto htǒotoǒ akhanu, Sò̌dowî̤ akhwǐ, Gòmò̤̌rawî̤ akhwǐ, Adamawî̤ akhwǐ, Seboiwî̤ akhwǐ ta Belawî̤ akhwǐ htǒo sò̌yè̤ hǎhtò̌cû̌ cǐplǒhtǔplǒnṳbò asî kliphû̌ toǒ dě Sǐdiga lo̤to̤kûnu,

⁹ Dě asî cû̌shě ta Ělaga Khwǐdû̌ Khedò̌laoma, ta Kò̌iga Khwǐdû̌ Tǐda, ta Shǐnaga Khwǐdû̌ Araphè̌ ta Ělasaga Khwǐdû̌ Ario, dě Khwǐ htǒosò̌li̤ shěshǔ ta Khwǐhtǒo sò̌yè̤.

¹⁰ Bǎnukha dě Sǐdi galo̤to̤kûnu hǎpèè̌ maî̌ toǒ ǒbetî̌pî̌bò bǎnu dě bǎ Sò̌dowî̤ akhwǐ, Gòmò̤̌rawî̤ akhwǐ ta akliphû̌ toǒ hǎhtò̌ge akhanu, toǒǒ dě a lòte̤nṳkè hǎpèè̌ maî̌kû, toǒǒ dě a khlè̌htò̌kè kholokhû̌.

¹¹ Dě Khwǐnu sò̌li̤ htò̌to̤nṳbò Sò̌dowî̤ ta Gòmò̤̌rawî̤ ta̤kî̌ta̤kû̌ toǒ ta shǎǎshǎo toǒ dě asî hǎhtò̌cû̌kèsǒ.

¹² Htodě asî pṳ̂cû̌nṳ Abra aphû̌dû̌ Lò̌tǎ htě a hǎhtò̌ǒ Sò̌dowî̤nu tapwa̤, htohǒtò̤ ata̤kî̌ta̤kû̌ sîtoǒ mî̌ asî phî̌cû̌nṳbò, htodě asî hǎhtò̌cû̌kè.

¹³ Bǎnukha kòyò htě a hǎhtò̌khlè̌ lû̌htò̌nu tapwa̤ ge pweǐlṳ ta̤wi̤ta̤kè̌nu toǒ ta Ebrephû̌ khlilèphû̌ Abra. Abra la̤ǒgûla̤ mî̌ a ǒphǔ ta Amò̌rǐ khlilèphû̌ Mè̌mare asǒmṳdû̌cahtǐnu tò̤glò. Dě Mè̌mare mî̌ Ishako ta Ana apṳwè̤ asî lǒ̤꤮ bò htǒotoǒnu a sò̌phlǒ ǒ nû̌û dě ǎměhtobò nû̌ûyo̤ ta Abra.

¹⁴ Bǎ Abra gana̤de ta kò pṳ̂cû̌kè aphû̌dû̌ Lò̌tǎ akhanu, a kaǎnṳplǒ kòyò htě ashěpe̤jò ta̤ apwa̤ suya̤ ta shǐlǐ̤sǒ dě a ǒphijalò̤ ahǐdǒkûnu toǒ dě a lṳ̂ge Khwǐnu sò̌li̤ to̤ dě Dawî̤.

¹⁵ Bǎ asî lṳ̂to̤ lǒkho dě Dawî̤ akhanu, a mè akòyò toǒ tṳ̂prṳ̂ ta tṳ̂prṳ̂ dě bǎ lṳmṳkhǐ akhanu, a nṳshě lǒkho pwa̤sò̌khě asî toǒ. Dě a shěpè̤bò pwa̤sò̌khě asî toǒ, dě a lṳ̂to̤ asî dě Damatè̌wî̤ cǔcî̌ Hobawî̤nu.

¹⁶ Dě a cû̌phî̌genṳbòsǒ ta̤kî̌ta̤kû̌ htě kò phî̌cû̌kèbònu toǒ, htohǒtò̤ a kaǎgenṳsǒ aphû̌dû̌ Lò̌tǎ ta mamǔ toǒ ta kòyò ahǔwa̤ htě kò pṳ̂cû̌nṳ toǒ htodě ato̤genṳ ata̤kî̌ta̤kû̌nu toǒ.

Pwa̤lṳhtò̌ta̤ Khwǐmalakhǐsèdè̌ howi̤ Abra

¹⁷ Bǎ Abra cû̌ shěpè̤hto Khwǐkhedò̌laoma ta Khwǐ htě abǒsû̌ ta anu toǒ dě a ge akhanu, Sò̌dowî̤ akhwǐ hǎhtò̌cû̌ kè̌shǐshǔ nû̌û dě Shawě galo̤to̤kûnu. Shawě galo̤to̤kû numî̌ kò kaǎpe nû̌û ta Khwǐgalo̤to̤kû.

¹⁸ Htodě Khwǐ Malakhǐsèdè̌ mî̌ Salewî̤ akhwǐ mî̌ amè̤mè̤, Cǒmara htě adû̌gutṳ̌ apwa̤tòlûhtò̌ta̤ mî̌ amè̤mè̤. Dě a phî̌hènṳ shǎǎ ta sobîshisî̌yo̤ Abra ǒ.

¹⁹ Dě ahowi̤ Abra, “Cǒmara htě adû̌gutṳ̌, dě a bǒlò̤ mǒkhû̌ ta hǎkhû̌ htǒotapwa̤ howi̤ tû̌ta na nî̌꤮.

²⁰ Cǒmara htě adû̌gutṳ̌, dě a noshěpè̤kè na ta nakhuwè̤ toǒ htǒotapwa̤nu, kò htû̌sò̌ǐ tû̌ta a nî̌꤮.” Htodě Abra phî̌ ta̤kî̌ta̤kû̌ htě a nî̤bǎbònu toǒ apû̌shǐtûpû̌ dě a ǐ nû̌ûta Khwǐmalakhǐsèdè̌.

²¹ A ma̤hto hǐnudě Sò̌dowî̤ akhwǐ hî̌ Abra, “Ǐgesǒ hekòyònu toǒ, dě ta̤kî̌ta̤kû̌nu toǒ dě phî̌bòtû̌ yǎta nayanu nî̌꤮.”

²² Pwǎ̤ta Abra hî̌shǔ nû̌û, “He mèhto heyo̤ ta Cǒmara tûjûpwa̤, mî̌pwǎ Cǒmara htě adû̌gutṳ̌, a bǒlò̤ mǒkhû̌ ta hǎkhû̌ htǒotapwa̤ ta,

²³ He bǎ phî̌nṳ nata̤kî̌ta̤kû̌ dǐcǎ꤮ tò̤. Pwǎ lǔ tobo pwǎ bǎbǎ, khò̌phěpli̤ tobo pwǎ bǎbǎ, he bǎ phî̌nṳ tò̤. Pěmî̌ na hî̌ ta, ‘He mî̌ kòyò htě a ma̤dû̌yò̤ Abra,’ na hî̌ hǐnu hè̌.

²⁴ Dě he yanu he phî̌ dǐcǎ tò̤, pò̤̌ta he phî̌ pwǎpǒ̤ hekòyò phû̌sǎphû̌ toǒ ǎhtonu toǒ pwǎ. Pwǎ̤ta Ana, Ishako ta Mè̌mare htě a cû̌ kû̌ta he htǒotoǒ aya lè̌dě mèpa̤ bǎ asî ta̤kî̌ta̤kû̌ toǒ nî̌꤮.”