Mǒhtûlû̌hǎhtûsa 13 - Kawyaw RC

Abra ta aphû̌dû̌ Lò̌tǎ cû̌pa̤khǒkè nû̌û

¹ Hǐnudě, Abra kaǎnṳ ama ta aphû̌dû̌ Lò̌tǎ dě a to̤nṳbò ata̤dû̌yò̤htò̌sa ta̤kî̌ta̤kû̌ toǒ htě a ǒ bǎ Egyptganu dě a genṳsǒ Khana̤ga cǔmû tokho.

² Abra a ta̤phû̌ta̤li̤ toǒ ǒplṳ̂ mè̤mè̤̌, htohǒtò̤ awû mî̌ a ǒplṳ̂plṳ̂, ahta mî̌ a ǒplṳ̂plṳ̂.

³ A ǒ Khana̤ga cǔmûnu tokho dě a cû̌ǒ tò̤glò hto tò̤glò, dě a gesǒ Betelǎwî̤, dě awǐkha a cû̌ma̤ hǐphû̌ bǎ Betelǎwî̤ ta Aǐwî̤ aplǎkûnu,

⁴ Dě agûla̤ htǒotò̤glò mî̌ bǎ ala̤ tèhtò̌ ta̤lṳhtò̌wa̤ ta lo̤nu tò̤glòhǒ. Dě a sabahtò̌ Cǒmara tûjûpwa̤ bǎnu.

⁵ Lò̌tǎ htě a cû̌htukhahtu kû̌ta Abra pṳ̂̌꤮ tò̤glò htǒotapwa̤nu, asophû̌ ta pè̤, pṳ̂pa̤na̤ ta hǐphû̌ toǒ mî̌ aǒplṳ̂ mè̤mè̤̌.

⁶ Asî sò̌gini̤ ǒplǒ nû̌û ayanu, asî ta̤phû̌ta̤li̤ la̤ǎshǎ agûla̤ shûpe ta asîya tò̤ hǒ. Ma̤tè̤hî̌dě asî ta̤phû̌ta̤li̤ toǒ ǒplṳ̂ǒphǎhtò̌ mè̤mè̤̌.

⁷ Htohǒtò̤ pwa̤gèǐ bǎ Abra ata̤phû̌ta̤li̤ toǒ ta pwa̤gèǐ bǎ Lò̌tǎ ata̤phû̌ta̤li̤ toǒ hî̌bǎhtè̌shǔplṳ̂ kè̌khîpo̤ nû̌ûû. Bǎnukha Khana̤phû̌ toǒ ta Perisǐphû̌ toǒ mî̌ a ǒ lǒkho bǎ gakûnunu.

⁸ Dě anǒnu Abra hî̌ Lò̌tǎ, “He ta na aplǎkûnu bǎbǎ, pwa̤gèǐ bǎ heta̤phû̌ta̤li̤ toǒ ta pwa̤gèǐ bǎ nata̤phû̌ta̤li̤ toǒ aplǎkûnu bǎbǎ, he sò̌yṳ nohtûhtò̌ ta̤ma̤nî̤ tò̤, ma̤tè̤hî̌dě he ta na mî̌ papṳwè̤khlilèpe pwǎ nû̌û.

⁹ Ma̤hǐnudě pa cû̌pa̤khǒ nû̌û hò̌꤮. Hǎkhû̌ htě na kè̌shǐbò yǎhtǒo, na wû̌lǎphî̌ yǎ mî̌ a nî̤ pwǎ. Na dè wû̌lǎphî̌ agûla̤ dě cǔcî̌ tokho hî̌nu he cû̌phî̌ bǎ na dě cǔmû tokho pě, na dè wû̌lǎphî̌ agûla̤ dě cǔmû tokho hî̌nu he phî̌ bǎtû̌ na dě cǔcî̌ tokho pě.”

¹⁰ Lò̌tǎ ò̌tò̤mò̤kè̌htò̌ cû̌to mṳhtò̌ dě Jòdalo̤htu galo̤to̤kû, aphlǔ cû̌to̤ Sorawî̤nu toklobò. Dě akè̌shǐsî̌ya ta shi wǒ bǎ mè̤mè̤̌ nû̌û bǎnu. Dě gûla̤ bǎnutò̤glò mî̌ awî̤ sǒsǒta Cǒmara tûjûpwa̤ awe̤kû, awî̤ sǒsǒta Egyptganu. Awî̤awǒ pwǐhè̌onu mî̌ bǎ Cǒmara tûjûpwa̤ cèrò Sò̌dowî̤ ta Gòmò̤̌rawî̤ hǒtò̤ akhanu pwǎ.

¹¹ Hǐnuakhû̌akhî, Lò̌tǎ wû̌lǎkè Jòdalo̤htu galo̤to̤kûnu toklobò, htodě a hǎhtò̌cû̌kè mṳhtò̌ tokho. Pṳwè̤khlilè nû̌û sò̌gini̤htǒo, tapwa̤ tûkûkû a cû̌pa̤khǒkèbò nû̌û.

¹² Abra dě a ǒkè Khana̤gakû, pò̤̌ta Lò̌tǎ lè̌dě a cû̌ǒ khǒkè wî̤ ǒ dě galo̤to̤kûnu toǒ, dě a cû̌ma̤phǔ ahǐphû̌ toǒ bǎ Sò̌dowî̤ kòshî̌nu tokho.

¹³ Bǎnukha Sò̌dowî̤phû̌ toǒ asò̌phlǒ phû̌mò̤shî̌hto mè̤mè̤̌ dě a ma̤sǔma̤plědû̌ mè̤mè̤̌ Cǒmara tûjûpwa̤.

¹⁴ Bǎ Lò̌tǎ cû̌pa̤khǒkèhto ta Abra akhanu, Cǒmara tûjûpwa̤ hî̌ Abra, “Ǒ bǎ na la̤ǒnu tò̤glò dě kè̌tohto, kè̌tò̤lò̤, kè̌htolo̤mo̤, kè̌getîkhî te̤we̤ ta nana̤nu.

¹⁵ Dě hǎkhû̌ htě na kè̌shǐbò khònò̤ htǒotoǒnu, he ǐ yǎta na ta naphû̌nali̤ toǒ aya tûjûpwa̤ pě.

¹⁶ He noǒhtò̌dû̌ naphû̌nali̤ toǒ sǒsǒta lo̤hǎnu pě. Kòyò tapwa̤pwa̤ a dǒbòpè̤bò̌ lo̤hǎnu, a dǒbòpè̤bò̌ naphû̌nali̤ toǒ pě.

¹⁷ Cû̌mò̌, cû̌shido te̤we̤bò mò̌ gakû htǒo, he ǐ yǎta na pě.”

¹⁸ Hǐnuakhû̌akhî, Abra htěpò̌cû̌ ahǐphû̌ toǒ dě a cû̌ ma̤phǔ nû̌û Mè̌mare asǒmṳcahtǐ gûla̤ bǎ Hebrowî̤nu tò̤glò, dě a tèhtò̌nṳ bǎ Cǒmara tûjûpwa̤ aya ta̤lṳhtò̌wa̤ ta lo̤ bǎnu ta̤wa̤.