Mǒhtûlû̌hǎhtûsa 11 - Kawyaw RC

Babulo hǐhtò̌yî̤

¹ Dě khû̌lû̌꤮ khanu, kòyò lǒ̤꤮ bò ǒ hǎkhû̌ htǒotebě bònumî̌, yo̤sǎ ǒpwǎ tacǎpa dě asî hî̌bǎ sǒsǒ pwǎ nû̌û.

² Bǎ asî ǒ ga mṳhtò̌ tokho dě a hè akhanu, asî cû̌kè̌shǐ ya̤dakhû̌ dě Shǐnagakû tò̤glò, dě asî cû̌ǒ lǒkho bǎnu.

³ Dě asî hî̌ nû̌û tapwa̤ ta tapwa̤, “Cû̌꤮ pa cû̌bǒ plǒnû̌û lo̤hǎlî̤khlǒ dě gushò̌wǒ a hò,” dě a bǒhtò̌ hǐhtò̌yî̤ htǒo ta lo̤hǎlî̤khlǒ dě ma̤pûhǐ lo̤hǎlî̤khlǒ tǒhtumě nû̌û ayanu, a noǎ lǒkho ta̤itacǎ htě alò̤ta sǒcònu.

⁴ Htodě asî hî̌ lǒkho, “Cû̌꤮ pa ma̤htò̌ wî̤dû̌ tî̤wî̤ dě pa shǒhtò̌ hǐhtò̌yî̤ htě a htò̌yî̤ to̤ dě mǒkhû̌ tama hò꤮, pa ma̤hǐnu mî̌ pami̤lṳshilṳga pě, htohǒtò̤ pa ǒpîshî pò̤wò̤cû̌pe nû̌û hǎkhû̌ htǒotebě tò̤ hǒ.”

⁵ Dě Cǒmara tûjûpwa̤ hèlò̤ kè̌pwǎ wî̤ ta hǐhtò̌yî̤ htě kòyòhǎkhû̌phû̌ ma̤htò̌nu.

⁶ Dě a hî̌, “Kè̌mò̌, kòyò htǒotoǒ a dè ǒpwǎ tikhlilè pa, a dè hî̌bǎpwǎ tacǎpa dě a dè tèhtò̌ ma̤ ta̤ pwǐhè̌o hî̌numî̌ htû̌nǒkòpě asî sò̌yṳ ma̤ ta̤ titètè̌꤮ bǎbǎ a ma̤htûhtò̌bò̌ lǒkho pě.

⁷ Cû̌, pa hèlò̤ ma̤shîlo̤kèbò asî yo̤sǎ dě nosî̌yape pû asî tapwa̤ ta tapwa̤ ayo̤ tò̤ hò꤮.”

⁸ Hǐnuakhû̌akhî, Cǒmara tûjûpwa̤ hèlò̤ ma̤pîshîpò̤wò̤cû̌kè asî hǎkhû̌ teběbò, dě a ma̤htûhtò̌pe asî wî̤dû̌ nutî̤wî̤ tò̤.

⁹ Bǎnukha Cǒmara tûjûpwa̤ ma̤shîlo̤bò kòyò lǒ̤꤮ bò hǎkhû̌ htǒotebě ayo̤sǎ akhû̌akhî, kò kaǎ wî̤nu tî̤wî̤ ami̤ ta Babulowî̤ (Babulo mî̌ apwe̤lò̤ta ma̤shû̌shǎ ma̤htò̌pò̌htò̌shî). Hǐnudě tèhtò̌ bǎ Babulowî̤ nudě Cǒmara tûjûpwa̤ ma̤pîshîpò̤wò̤cû̌kè asî hǎkhû̌teběbò.

Shemǎ akhlialè hǎte̤gilò̤ to̤ta Abraham

¹⁰ Htǒomî̌ ta̤khwè̌mǎǐ tû̌ Shemǎ akhlialè hǎte̤gilò̤ toǒ awi̤akè̌. Bǎ Shisǔ behto ginǐ̤ně, dě Shemǎ ǒ aně ta̤ya̤ akhanu, a phû̌ǒlò̤nṳ Araphasǎ.

¹¹ Bǎ Shemǎ phû̌ǒlò̤nṳhto Araphasǎ akhanu, a ǒ hèpo̤ aně yè̤̌ya̤ dě a phû̌ǒlò̤nṳpo̤ aphû̌makhû toǒ ta aphû̌mamǔ toǒ.

¹² Bǎ Araphasǎ něǒ sushi ta yè̤̌ně akhanu, a phû̌ǒnṳ Shelǎ.

¹³ Bǎ Araphasǎ phû̌ǒnṳhto Shelǎ akhanu, a ǒ hèpo̤ aně lǐ̤ya̤ ta suně dě a phû̌ǒǐpo̤ aphû̌makhû toǒ ta aphû̌mamǔ toǒ.

¹⁴ Bǎ Shelǎ něǒ sushi akhanu, aphû̌ǒlò̤nṳ Ěbè.

¹⁵ Bǎ a phû̌ǒlò̤nṳhto Ěbè akhanu, a ǒ hèpo̤ aně lǐ̤ya̤ ta suně dě a phû̌ǒǐpo̤ aphû̌makhû toǒ ta aphû̌mamǔ toǒ.

¹⁶ Bǎ Ěbè něǒ sushi ta lǐ̤ně akhanu, aphû̌ǒnṳ Pelè̌.

¹⁷ Bǎ a phû̌ǒlò̤nṳhto Pelè̌ akhanu, a ǒ hèpo̤ aně lǐ̤ya̤ ta sushi dě a phû̌ǒnṳpo̤ aphû̌makhû toǒ ta aphû̌mamǔ toǒ.

¹⁸ Bǎ Pelè̌ něǒ sushi akhanu, a phû̌ǒlò̤nṳ Ragò̌.

¹⁹ Bǎ a phû̌ǒlò̤nṳhto Ragò̌ akhanu, a ǒ hèpo̤ aně ginǐ̤ya̤ ta lǐ̤sǒtaně dě a phû̌ǒnṳpo̤ aphû̌makhû toǒ ta aphû̌mamǔ toǒ.

²⁰ Bǎ Ragò̌ něǒ sushi ta ginǐ̤ně akhanu, a phû̌ǒlò̤nṳ Serò̌.

²¹ Bǎ aphû̌ǒlò̤nṳhto Serò̌ akhanu, a ǒ hèpo̤ aně ginǐ̤ya̤ ta susǒtaně dě aphû̌ǒlò̤nṳpo̤ aphû̌makhû toǒ ta aphû̌mamǔ toǒ.

²² Bǎ Serò̌ něǒ sushi akhanu, a phû̌ǒlò̤nṳ Nakhò.

²³ Bǎ a phû̌ǒnṳhto Nakhò akhanu, a ǒ hèpo̤ aně ginǐ̤ya̤ dě a phû̌ǒlò̤nṳpo̤ aphû̌makhû toǒ ta aphû̌mamǔ toǒ.

²⁴ Bǎ Nakhò něǒ gini̤shi ta lǐ̤sǒtaně akhanu, a phû̌ǒlò̤nṳ Terǎ.

²⁵ Bǎ a phû̌ǒnṳhto Terǎ akhanu, a ǒ hèpo̤ aně ta̤ya̤ ta shǐlǐ̤sǒtaně dě aphû̌ǒlò̤nṳpo̤ aphû̌makhû toǒ ta aphû̌mamǔ toǒ.

²⁶ Bǎ Terǎ něǒ susǒtishi akhanu, a phû̌ǒlò̤nṳ Abra, Nakhò ta Hara.

Terǎ akhlialètoǒ awi̤akè̌

²⁷ Htǒomî̌ ta̤khwè̌mǎǐ tû̌ Terǎ akhlialè hǎte̤gilò̤ toǒ awi̤akè̌. Terǎ phû̌ǒlò̤nṳ Abra, Nakhò ta Hara. Dě Hara phû̌ǒlò̤nṳ tṳtṳpo̤ Lò̌tǎ.

²⁸ Bǎ Hara sikè Ǔrǎwî̤, Babulogakû, bǎ wî̤ htě a ǒlò̤ǐ nutî̤wî̤ akhanu, apha Terǎ ǒhtûpwa̤pe pwǎ.

²⁹ Htodě Abra ta Nakhò lè̌dě a lòte̤hǐlòte̤phò lǒkho. Abra amamî̌ ami̤ ta Sharè̌, Nakhò ama lè̌dě ami̤ ta Mǐlakha, dě Mǐlakha mî̌ Hara aphû̌mamǔ. Hara htǒonumî̌ Mǐlakha ta Ǐsakha apha hǒhǒ.

³⁰ Sharè̌nu a shodophû̌tû̌ aya akhû̌akhî, a phû̌ǒ kû̌kò dǐpwǎ̤tò̤.

³¹ Terǎ ǒ bǎ Ǔrǎwî̤, Babulogakû nudě a kaǎnṳ aphû̌ Abra ta adè̌ Sharè̌ ta ali̤ Hara aphû̌ Lò̌tǎ dě a hǎhtò̌tṳ̂ge lǒkho Khana̤ga. Pwǎ̤ta bǎ asî cû̌to̤ pepwǎ Harawî̤ akhanu, a ǒ lǒkho bǎnu.

³² Terǎ něǒ ginǐ̤ya̤ ta yè̤̌ně dě a sikè bǎ Harawî̤ akûnu.