Matěo 8 - Kawyaw RC

Ye̤shǔ ma̤bǎ kòyò ta̤shakroǎ dě phělo̤ tapwa̤

¹ Bǎ a ǒ khopa̤lo̤ dě a hǎte̤ akhanu, kòyò toǒ gûplṳ̂gûphǎ kû̌bò nû̌ûkò.

² Kòyò ta̤shakroǎ dě phělo̤ tapwa̤ hè gene̤lò̤ nû̌ûlo̤mo̤ dě a hî̌ nû̌û, “Běcǎ, na dè ta̤sò̌yṳǒnu ma̤bǎ bǎ he ta̤shahtǒo hî̌numî̌, na ma̤bǎjò pwǎ.”

³ Běcǎ Ye̤shǔ yṳ̂hè acǔde a tè̌bǎhto nû̌û dě a hî̌ nû̌û, “He ta̤sò̌yṳǒ pwǎ,” A hî̌ htodě “Ta̤sha꤮ hǎmǎkè mò̌,” A hî̌po̤ hǐnu, dě taplǎpa ta̤sha hǎmǎkè.

⁴ Dě Běcǎ Ye̤shǔ hî̌ nû̌û, “Pwe̤ǐlṳ ma̤ kò dǐpwǎ̤꤮ ma̤ nî̌꤮, pò̤̌ta cû̌ dǔlṳkè̌ nana̤ htǒonu dě pwa̤lṳhtò̌ta̤nu tapwa̤ a ǒnu nî̌꤮. Htodě ma̤pûhǐ a htûhtò̌ ta ta̤khòlṳ dě kò pṳ̂̌꤮ tapwa̤ a lo̤mo̤ ta na ta̤sha hǎmǎ ta a mṳ̂plî ayanu, lṳhtò̌ ta̤lṳta̤tò̌ pwǐ Mǒ̤jè mǎnǎnu nî̌꤮.”

Běcǎ Ye̤shǔ ma̤bǎ Rò̌mǎphû̌ a klihǐkǒdû̌ pwa̤ma̤ta̤ tapwa̤ ta̤sha

⁵ Bǎ Běcǎ Ye̤shǔ hènṳ dě Kaperanòwî̤kû akhanu, Rò̌mǎ klita̤ya̤ ahǐkǒdû̌ tapwa̤ hèkwi nû̌û ta̤ma̤jè.

⁶ Dě a hî̌ nû̌û, “Běcǎ he pwa̤ma̤ta̤ tapwa̤ asha sitokho dě a hǎmoǒlò̤ pwǎ la̤mi̤khû̌ hǐnu. Ajî mè̤mè̤̌ nû̌û hǒ.”

⁷ Běcǎ Ye̤shǔ hî̌shǔ yǎ, “He cû̌ ma̤bǎtû̌ pě.”

⁸ Kliphû̌ ta̤ya̤ ahǐkǒdû̌nu tapwa̤ hî̌shǔ, “Běcǎ, na hènṳpwǎ dě hehǐkû pwǎnu he gwata na tò̤. Hî̌lò̤pwǎ nayo̤ tûmûpwǎ numî̌ he pwa̤ma̤ta̤ ǒmo̤ge tû̌hǒ.

⁹ Mî̌ma̤tè̤dě he hî̌ pwǐhè̌o mî̌ he bǎ gana̤de sana̤ tû̌ kòyò htě adû̌khlo ta he toǒ ayo̤. Hǐnudě kliphû̌ htě a ǒ hela̤ toǒnu a bǎ gana̤detû̌ heyo̤ hǐnunu. He dè hî̌ kliphû̌ tapwa̤pwa̤ ta, ‘Cû̌mò̌,’ hî̌numî̌ a bǎcû̌ pwǎ, he dè hî̌lè̌ ahǔwa̤tapwa̤, ‘Hèmò̌,’ hî̌numî̌ a bǎ hè pwǎ. Htohǒtò̤ he dè hî̌ hejûphû̌ ta, ‘Ma̤mò̌htǒo,’ hî̌numî̌ a bǎ ma̤ pwǎ.”

¹⁰ Bǎ Běcǎ Ye̤shǔ gana̤de ta̤hî̌bǎ htǒo akha, a sû̌pi̤sò̌pi̤ mè̤mè̤̌ dě a hî̌ kòyò htě a gû nû̌ûkò toǒ, “He hî̌ mè̤mè̌ sî, ta̤yṳta̤nǎsho pwǐhè̌o dě Israelphû̌ aklanu he kè̌shǐnǒ hǒtò̤.

¹¹ He hî̌ sî, kòyò ǒ dě mṳhtò̌, mṳlò̤ toǒ hè ǒplṳ̂ pě. Asî hè hǎnòò̌ ǎhtukû̌ ta paphi Abraham, Isǎko, Yǎ̤kò dě mǒkhû̌ a shila̤gakû pě.

¹² Yṳ̌daphû̌ toǒnu, a tohtû Cǒmara akòyò dě Cǒmara ashiaganu, pò̤̌ta Cǒmara wînṳkè asî dě ta̤khǐta̤lo̤ agûla̤ pě. Gûla̤ bǎ asî cû̌ ǒ htǒotò̤glò pěnu, asî cû̌ hǎsihǎǒ dě asî ěgwîbò akhû̌khi pě.”

¹³ Htodě a hî̌ klihǐkǒdû̌, “Gemò̌, a htûhtò̌tû̌ pwǐ na yṳǎnu pě.” Dě apwa̤ma̤ta̤nu tapwa̤ ǒmo̤ge totǐ bǎ Běcǎ hî̌ nû̌û akhîkhanu.

Běcǎ Ye̤shǔ ma̤bǎ plṳ̂ kòyò ta̤sha

¹⁴ Bǎ Běcǎ Ye̤shǔ cû̌nṳ Petru ahǐkû akhanu, a kè̌shǐ Petru a mipwa̤mamǔ shǐshana̤gû dě a hǎmoǒlò̤ pwǎ la̤mi̤khû̌.

¹⁵ A pṳ̂ nû̌ûcǔde dě a ta̤sha hǎmǎkè. Htodě a ihtǒ ma̤ǎma̤o bǎ Ye̤shǔ.

¹⁶ Bǎ lṳmṳhǎlò̤ akhanu, kò hèsûplṳ̂ kòyò htě khînǎkhîno ma̤sha nû̌û toǒ dě Ye̤shǔ a ǒ. A hî̌lò̤ pwǎ ayo̤ tûmûpa dě khînǎkhîno hǎhtò̌cû̌bòkè. Htodě a ma̤bǎ bò꤮ kòshǐkòshanu toǒ.

¹⁷ Ta̤ htǒotoǒnu a ma̤lǒma̤behtò̌ pwa̤po̤ Isaǐa a ta̤hî̌nǎ ta, “A phî̌cû̌kè pa ta̤shǐta̤sha toǒ.”

Kòyò htě a gû Běcǎ Ye̤shǔ akò toǒ akhû̌akǎ

¹⁸ Bǎ Běcǎ Ye̤shǔ kè̌shǐ ta kòyò saprṳ̂ hè ǒte̤we̤bò yǎ akhanu, a hî̌lò̤ ayo̤ dě akhophijaû̌ toǒ a ǒ ta pa cû̌ dě shikoǒdû̌ bò̌kho tokho hò̌꤮, a hî̌ hǐnu.

¹⁹ Bǎnuakha, pwa̤sû̌ǐ ta̤sû̌ta̤tòwò asara tapwa̤ hè nû̌û ǒ dě a hî̌ nû̌û, “Sara, na cû̌ bǎtè꤮ tò̤glò bǎbǎ, he cû̌kû̌ ta na.”

²⁰ Ye̤shǔ hî̌shǔ yǎ, “Chyǐmi̤ toǒ ǒ ta akû, htû̌phû̌ wi̤ dě mǒla̤ toǒ ǒ ta api̤, pwǎ̤ta kòyòphû̌khû mî̌ hehtǒo, bǎ hehǐkǒ la̤dò̌lò̤ gûla̤ pwǎnu a ǒ dǐglò̌꤮ tò̤.”

²¹ Akhophijaû̌ ahǔwa̤tapwa̤ hî̌ nû̌û, “Běcǎ, ǐpûmò̌ he ashuakhwè dě he ge lǔwǐ kû̌nǎ hepha nî̌꤮.”

²² Pwǎ̤ta Běcǎ Ye̤shǔ hî̌shǔ yǎ, “Gûkû̌ hekò khònò̤htǒo, kòyò htě a gana̤de Cǒmara ayo̤ tò̤ toǒ numî̌ asǒsǒta kòyòsi htǒonuhǒ. Nocû̌lǔtû̌ yǎta kòyòsi htǒo ta asînu.”

A noǒkǔ gili̤sǎ

²³ Bǎnuakha Běcǎ Ye̤shǔ nṳ sǒkhlikû dě akhophijaû̌ toǒ gûnṳkû̌ nû̌û dě asî hǎhtò̌cû̌kè.

²⁴ Bǎ asî cû̌to̤ shikǎmakû akhanu, Gili̤sǎpla̤hè sumṳsòtò̤. Shipěpǒ dě a pla̤nṳbò sǒkhlikû. Bǎnuakha Běcǎ Ye̤shǔ hǎmoǒ shope̤.

²⁵ Dě akhophijaû̌ toǒ cû̌ htû̌wè̤ihtǒ nû̌û dě a hî̌ nû̌û, “Běcǎ, ma̤jèmò̌ pa, pa glè̌ lòcǔsibò hǒ.”

²⁶ Dě Běcǎ Ye̤shǔ hî̌ asî, “Kòyò ta̤yṳpî̌tî̌ sî꤮, sî ǐsha gètè̤̌nu ma̤tè?” A hî̌hto dě a ihtǒ sǎhtǎ gili̤htǒo ta shipěpǒ htǒotoǒ. Dě gili̤sǎ ǒkǔ hèsumṳkè.

²⁷ Akhophijaû̌ toǒ sû̌pi̤sò̌pi̤ lǒ̤bò dě a hî̌ lǒkho nû̌û, “Kòyò htǒotapwa̤ mî̌ kòyò hî̌tètè? A sîrîcû̌dû̌ pwî̌nunu. Gili̤ ta shipěpǒ gana̤de jòjò̌ nû̌ûyo̤yo̤.”

Běcǎ wṳ̂hǎhtò̌kè khînǎkhîno dě kòmakhû sò̌gini̤ akû

²⁸ Bǎ Ye̤shǔ cû̌to̤ shikoǒdû̌ bò̌kho, Kadarǎga akhanu, kòmakhû htě khînǎkhîno ma̤sha nû̌û htǒosò̌gini̤ a ǒ lṳkhû̌ hǎhtò̌ dě a hǎhtò̌cû̌ kè̌shǐshǔ nû̌û. Kòmakhû htǒosò̌gini̤nu, khînǎ ma̤sha nû̌û akhû̌akhî, ashû̌asho, a sò̌gònò̤ ǐshashû̌ mè̤mè̤̌ dě klè̌cû̌ bǎ lṳhtunu tabonu, kò cû̌phǔbǔ dǐpwǎ̤꤮ tò̤.

²⁹ Asî kaǎgu ta, “Cǒmara aphû̌khû, na sò̌yṳ ma̤ pa hî̌tè? Cǒmara amṳni̤ cèrò kò akhîakha to̤ hǒtò̤ akhanu, na glè hèma̤ kwè̌꤮ pa titè?”

³⁰ Bǎ aǒyî̤ ta asî tò̤nu, htǒ ǒ tṳ̂prṳ̂ dě a ǎ lǒkho ashǎ bǎnu.

³¹ Khînǎ ma̤sha kòmakhû htǒosò̌gini̤nu, a kwigwèbǎǐ Běcǎ Ye̤shǔ, “Na dè wṳ̂hǎhtò̌cû̌kè pa hî̌dě, nocû̌nṳǒ pû pa dě htǒnu toǒ akûnu nî̌꤮.”

³² Běcǎ hî̌shǔ asî, “Cû̌nṳǒmò̌ lǒkho!” Dě asî hǎhtò̌cû̌ nṳǒbò lǒkho htǒnu tṳ̂prṳ̂ akû, dě htǒ toǒ tukhlè̌ sagumṳbò gòpò̤lo̤ dě a lòcǔsikèbò shikoǒdû̌kû.

³³ Pwa̤gèǐhtǒ toǒ khlè̌ge wî̤kû dě a khlè̌ge pwe̤ǐlṳ kò ta bò꤮ ta̤htûhtò̌ ana̤ htǒotoǒ ta ta̤ma̤ana̤ ta kòmakhû sò̌gini̤htǒo lǒ̤꤮ bò.

³⁴ Kòyò tî̤wî̤bò hǎhtò̌kè̌bò Ye̤shǔ. Htodě bǎ asî kè̌shǐ Běcǎ Ye̤shǔ akha, a kwigwèbǎǐ nû̌û ta a glè hǎhtò̌cû̌ tephekè ta asî gakû bǎnu.