Matěo 3 - Kawyaw RC

Pwa̤ploshi Jowǎ̤ni̤ a ta̤dǒhtû̌ǐ

¹ Něyî̤layî̤ hè akhanu, kòyò ǒtapwa̤, a cû̌shido dǒhtû̌ǐ ta̤dě Yṳ̌daga lo̤semě lò̤rṳ̂khû̌, dě kò kaǎ nû̌ûta pwa̤ploshi Jowǎ̤ni̤.

² Dě a hî̌, “Yò̤lò̤ge lǒkho sîsò̌, ma̤tè̤hî̌dě mǒkhû̌ ashiaga hèto̤phǔhǒ.”

³ A mî̌ kòyò htě pwa̤po̤ Isaǐa pwe̤ǐnǎ nû̌û awi̤akè̌nu tapwa̤ ta, “Kòyò tapwa̤ kaǎguhtò̌ lo̤měshǒkla dě a hî̌, ‘Ma̤wǒnǎ lǒkho klè̌ ta Běcǎ aya. Ma̤cǒma̤nò̤ lǒkho Běcǎ la̤hèklè̌ aya tabo nî̌꤮.’”

⁴ Jowǎ̤ni̤ kûsǒhtò̌nṳ hǐdopo̤to̤ htě kò bǒyǎ ta tîsî̌budû̌ ashû̌, dě a wò̤htò̌nṳ sò̌to̤phě. Dě a ǎpwǎ dèpo̤ ta wè̌khû̌shi.

⁵ Kòyò htě a ǒdě Ye̤rǔshèlèwî̤kûnu ta Yṳ̌daga sagala̤kû ta kòyò lǒ̤꤮ bò htě a ǒ te̤we̤plṳ̂ Jòda shilo̤nu toǒ hè lǒkho Jowǎ̤ni̤ a ǒ.

⁶ Asî hè olò̤mèlò̤ lǒkho a ta̤sǔ dě Jowǎ̤ni̤ plo bǎ asî shi Jòda shilo̤kû.

⁷ Pwǎ̤ta bǎ Jowǎ̤ni̤ kè̌shǐ Pharisè̌phû̌ ta Sadugè̌phû̌ toǒ hèplṳ̂hèphǎ dě a glè hèplo dǒ ana̤ ta shi akhanu, a hî̌ asî, “Wṳ̂sa sî꤮! Mî̌ûpè tapwa̤ ǐsè̌rè̌ sî ta sî lû̌htò̌bò̌ ta Cǒmara a ta̤cèrò htě a hèpě htǒonu pè?

⁸ Sî dè yò̤lò̤ge mè̤mè̤̌ sî sò̌phlǒ dèhî̌dě dǔlṳ lǒkho sî ta̤ǒhtûpwa̤ toǒ ta sî ǐlò̤ sî sò̌phlǒsǔshi toǒ.

⁹ Hî̌htohî̌lò̤ pûma̤ sîna̤ ta, ‘Pa mî̌ Abraham akhlialè’ numa̤. He hî̌ sî, Cǒmara ma̤htûhtò̌ lo̤ htǒotoǒ ta Abraham aphû̌ mî̌ a ma̤jò pwǎ.

¹⁰ Kû ǒ dě sǒkhòshî̌ tabǎ dě kò gûga sǒmṳ toǒ pě, dě kò cǒtṳto̤ akhò̌wi̤ pě. Sǒmṳ tṳmṳmṳ htě asǎapho wîǎ tò̤nu, kò gûgakè yǎpě dě kò wînṳkè yǎ dě mî̌kla pě.

¹¹ “Dě sî yò̤lò̤ge sîsò̌ akhû̌akhî, he plo sî ta shi. Pò̤̌ta kòyò ǒtapwa̤ a sîrîpo̤phǎ shû̌shokhlo ta henu a hè dě henǒkò pě. A plo sî ta Běcǎ sǎcahtǐ ta mî̌ pě. He bòphlǔ pwǎbǎ a khò̌phěpli̤nu, he gwata a tò̤.

¹² A pṳ̂mě dògo a cǔdekû, dě a tîwî̌tòwònǎ ta a khǎbò bǔsû̌ pě. A khǎbòhto pě dě a bè̌plǒ bǔshò̌ phòkû pě. Dě asû̌aphî toǒnu a shû̌kè nû̌ûta mî̌ htě a pi̤pè̤ dǐkhò̌꤮ tò̤nu taphǎ akû pě.”

Ye̤shǔ ploana̤ ta shi

¹³ Htodě ma̤pûhǐ Ye̤shǔ plo dǒ ana̤ ta shi dě Jowǎ̤ni̤ a cǔdekû ayanu, a ǒdě Galilî̌aga hè Jòda shilo̤ a ǒ.

¹⁴ Pwǎ̤ta Jowǎ̤ni̤ sò̌yṳ plo bǎ nû̌û tò̤. Dě a hî̌ nû̌û, “He to plo ta̤pǎ̤꤮ hena̤ dě na ǒ kò̌kò̌ dě na cû̌hè plo nana̤ dě heǒ hî̌tè?”

¹⁵ Ye̤shǔ hî̌shǔ nû̌û, “Khònò̤ dě tûrû̌ plo bǎ mò̌ he, ma̤tè̤hî̌dě pa tobǎ ma̤lǒbe lǒ̤꤮ bò Cǒmara a ta̤sò̌yṳ noma̤ panu toǒ,” A hî̌ dě Jowǎ̤ni̤ sò̌phlǒǒ ta plo bǎ nû̌û.

¹⁶ Bǎ Ye̤shǔ plohto ana̤ ta shi dě a û̌ihtǒ shikhû̌khû̌ ta Cǒmara bòmo bǎ nû̌û mǒkhû̌ takha. Dě a kè̌shǐ Cǒmara a sǎcahtǐ hèlò̤ ǒ nû̌ûlo̤ sǒsǒta htû̌li̤cò̌nu.

¹⁷ Htodě yo̤pwe̤htò̌ mǒkhû̌nu tûmû dě a hî̌, “Htǒotapwa̤ mî̌ hephû̌khû htě he mo̤ǐyǎ dě a ma̤mo̤ he sò̌phlǒ tapwa̤.”