Matěo 17 - Kawyaw RC

Běcǎ Ye̤shǔ hî̌bǎ Mǒ̤jè ta pwa̤po̤ Èlî̌a

¹ Mṳni̤ susǒ behtonu Běcǎ Ye̤shǔ kaǎnṳ Petru, Jǎgomo̤ ta apṳ Jowǎ̤ni̤ dě a cû̌htò̌ kholohtò̌yî̤ tama alo̤. Dě a sò̌yṳ cû̌ǒkû̌ pwǎ̤ta asî.

² Bǎ asî ǒ bǎnuakha Běcǎ Ye̤shǔ ana̤ htû̌lè̌tèplè̌ khǒbò asî lo̤mo̤. Ami̤sǎ tabǎnu a shěrakha lò̤kèta lṳmṳnu, ahǐdonu a phǔtishi plò̌kîtrî̌kè.

³ Teděsǎphû̌ akûnu, asî kè̌shǐ Mǒ̤jè ta pwa̤po̤ Èlî̌a ǒlṳhtò̌ dě asî hî̌bǎ lǒkho ta Běcǎ Ye̤shǔ.

⁴ Petru hî̌ Ye̤shǔ, “Běcǎ, gûla̤ bǎo tò̤glò mî̌ awî̤ amo̤wǒlè. Na dè ta̤sò̌yṳǒ hî̌dě he ma̤htò̌bǎ sî hǐphû̌ suma. Tamamî̌ naya, tamamî̌ Mǒ̤jè aya, tamamî̌ pwa̤po̤ Èlî̌a aya.”

⁵ Bǎ a hî̌bǎpe akhanu, poǒlṳ shěrakha tebě lò̤jobǐkè asî dě yo̤pwe̤htò̌ tûmû dě poǒlṳ akû, “Htǒomî̌ hephû̌khû htě he mo̤ǐ yǎ dě he sò̌phlǒǒ yǎ tapwa̤, gana̤de lǒkho ayo̤ nî̌꤮.”

⁶ Bǎ akhophijaû̌ gana̤de pwǐhè̌o akha, asî ǐsha jòjî̌꤮ tò̤, dě a wîlòkhǔ toklolò̤bò ana̤ hǎkhû̌.

⁷ Pwǎ̤ta, Běcǎ Ye̤shǔ hè tè̌bǎ asî dě a hî̌ asî, “Ihtǒ lǒkho, ǐsha pûma̤.”

⁸ Bǎ asî kè̌htò̌ akha, a kè̌shǐ tû̌ Běcǎ Ye̤shǔ tapwǎ̤꤮ pa.

⁹ Bǎ asî ǒ dě kholokhû̌ hǎte̤ akhanu, Běcǎ Ye̤shǔ mǎnǎ asî yo̤sǎ, “Kòyòphû̌khû htǒo dè sihtûpwa̤gesǒ ta ta̤si hǒtò̤nu, cû̌ pwe̤ǐlṳ pûma̤ kò ta sî kè̌shǐ ta̤htǒotoǒ awi̤akè̌ dǐpwǎ̤꤮ ma̤ nî̌꤮.”

¹⁰ Akhophijaû̌ toǒ gwè nû̌û, “Pwa̤sû̌ǐ ta̤sû̌ta̤tòwò asara toǒ hî̌ ta pwa̤po̤ Èlî̌a bǎhè wǐkhlo ta Mè̤shǐa htě a ma̤lû̌htò̌ge kò htǒonu tapwa̤ pě, a cû̌hî̌tǒ̤ hǐnu ma̤tè?”

¹¹ Dě Běcǎ Ye̤shǔ hî̌shǔ asî, “Pwa̤po̤ Èlî̌a bǎ hè mè̤nòpě dě a bǎ hè tîwî̌tòwò ma̤wǒgesǒ ta̤lǒ̤꤮ bò numî̌ a mè̤mè̤̌ lè.

¹² Pwǎ̤tadě he hî̌ sî, pwa̤po̤ Èlî̌a hèhtohǒ mî̌ta asî sî̌ya nû̌û tò̤ dě kòyò toǒ ma̤ nû̌û jǔ꤮ asî sò̌phlǒ sò̌yṳ ma̤ nû̌ûnu pwǎ. Sǒsǒtahǐnuhǒ, kòyòphû̌khû htǒo khòbǎ ta̤jîta̤jû asî cǔdekû pě.”

¹³ Bǎnuakha akhophijaû̌ toǒ sî̌yaphlohè ta a hî̌ pwa̤ploshi Jowǎ̤ni̤ awi̤akè̌ htǒonu hǒ.

Běcǎ ma̤bǎ phijaû̌ makhûphû̌ tapwa̤ ta̤sha

¹⁴ Bǎ asî hǎte̤ kè̌shǐ kòyò saprṳ̂ kholola̤ akhanu, kòmakhû tapwa̤ hè gene̤lò̤ alo̤mo̤ dě a hî̌ nû̌û,

¹⁵ “Běcǎ, gwèbǎǐ pû he phû̌makhû, ahtò̌shû̌ dě a lòkhǔpo̤nṳ sala̤ mî̌kla, mè̤tò̤mî̌ a lò̤te̤nṳ sala̤ shikla.

¹⁶ He kaǎhè yǎdě nakhophijaû̌ toǒ a ǒ pwǎ̤ta a ma̤bǎjò bǎ he tò̤.”

¹⁷ Běcǎ Ye̤shǔ hî̌ asî, “Kòyò shodota̤yṳ sî꤮, ta kòyò cû̌sǔklè̌ sî꤮, he bǎ ǒyî̤kû̌pe ta sî pwî̌tè? He tobǎ khòsò̌do ǒyî̤kû̌pe sî pwî̌tè?” A hî̌hto hǐnudě a hî̌lè̌ kòmakhûnu tapwa̤, “Kaǎhè naphû̌khû bǎo.”

¹⁸ Běcǎ Ye̤shǔ sǎhtǎ khînǎkhîno dě khînǎkhîno hǎhtò̌cû̌kè phijaû̌phû̌nu tapwa̤ akû dě ata̤sha hǎmǎkè taplǎpa.

¹⁹ Htodě akhophijaû̌ toǒ hèhǔhèsè̌ nû̌ûǒ dě a hè gwèhǔ nû̌û, “Pa wṳ̂hǎhtò̌bò̌ khînǎ tò̤ ma̤tè?”

²⁰ Dě a hî̌shǔ asî, “Mî̌ma̤tè̤ sî wṳ̂htò̌pè̤ kû̌kò khînǎ tò̤ hî̌dě, sî ta̤yṳpî̌tî̌ tû̌ sîyanǔ. He hî̌ mè̤mè̤̌ sî꤮, sî ta̤yṳ dè ǒmò̌ tî̌ saplǎphlǒ tophlǒnu hǐnudě sî dè hî̌ kholotama ta, ‘Sǒsǔcû̌ tephekè ta gûla̤ bǎo,’ dèhî̌mî̌ a sǒsǔcû̌ pwǎ. Sî ta̤yṳ dè ǒ hî̌nu, ta̤htě sî ma̤jòtò̤nu a ǒ dǐcǎ꤮ tò̤.

²¹ (Pwǎ̤ta, sî dè dǔǎshǎ tò̤ kwisaba tò̤ hî̌nu, khînǎ hǎhtò̌cû̌jòkè tò̤.)”

Běcǎ pwe̤ǐlṳgesǒ ta a sipě awi̤akè̌

²² Bǎ akhophijaû̌ toǒ cû̌ kè̌shǐ glashǔplǒbò nû̌û Galilî̌aga akhanu, Běcǎ Ye̤shǔ pwe̤ǐlṳ asî, “Kòyòphû̌khû mî̌ hehtǒo, kò shaǎlò̤kè yǎ dě kòyòhǎkhû̌phû̌ a cǔdekû pě.

²³ Asî ma̤si nû̌û pě dě suni̤ behtò̌pě ti̤ni̤nu a htûpwa̤gesǒ pě.” Dě akhophijaû̌ toǒ sǎpla̤sǎyṳ lǒ̤bò.

Běcǎ Ye̤shǔ sû̌ǐ bǎ kò ta ta̤lṳhtò̌ho ta̤kûta̤cî̌ awi̤akè̌

²⁴ Bǎ Běcǎ Ye̤shǔ ta akhophijaû̌ toǒ cû̌to̤ Kaperanòwî̤ akhanu, pwa̤kû ta̤lṳhtò̌ho ta̤kûta̤cî̌ toǒ hè Petru a ǒ dě a gwè nû̌û, “Sîsara ǐdǒ ta̤lṳhtò̌ho ta̤kûta̤cî̌ tò̤ ya?”

²⁵ Petru hî̌shǔ asî, “Tò̤̌, a ǐ lè.” Bǎ Petru nṳdě hǐdǒkû akha, Běcǎ Ye̤shǔ hî̌wǐ nû̌û, “Shîmǒ̤nè̤, na gènè̤ hî̌tè? Hǎkhû̌ akhwǐ toǒ a hèkwi ta̤kûta̤cî̌ dě mî̌ûpè ǒpè? A kwi tû̌ dě a shiphû̌gaphû̌ toǒ a ǒ ya? Mè̤tò̤mî̌ a kwi lǒkho dě shigaahǔwa̤ gakhlophû̌ toǒ a ǒ ya?”

²⁶ Petru hî̌shǔ nû̌û, “A kwi dě shigaahǔwa̤ gakhlophû̌ toǒ a ǒ pwǎ.” Dě Běcǎ Ye̤shǔ hî̌shǔ yǎ, “Dè ma̤hǐnudě a shiphû̌gaphû̌ toǒnu, a glè nî̤bǎ ta̤pelesesǎ hǒ.

²⁷ Pò̤̌ta ma̤pûhǐ asî sò̌phlǒsha pû pa tò̤nu, cû̌sèmè̤ǎmò̌ tò̤phû̌ dě Galilî̌a a shikoǒnu. Tò̤phû̌ htě a nî̤wǐgutṳ̌ tabonu bòmo kè̌wǐ agokûnu. Na kè̌shǐ wûyî̌pě tabǎ. Wûyî̌htǒo tabǎnu ashû ta ta̤lṳhtò̌ho ata̤kûta̤cî̌ hǒ. Phî̌ wûyî̌htǒo dě cû̌ǐ yǎta heya ta nayanu.”